7, 8. Ani wɔbaabu bɔ ni wɔkɛ wɔlilɛi tsuɔ nii wɔhaa lɛ he akɔntaa wɔha Yehowa?

⁷ Yiŋtoo ni ji etɛ hewɔ ni esa akɛ wɔkudɔ wɔlilɛi ji akɛ wɔbaabu bɔ ni wɔkɛ wɔlilɛi tsuɔ nii wɔhaa lɛ he akɔntaa wɔha Yehowa. Bɔ ni wɔkɛ wɔlilɛi tsuɔ nii wɔhaa lɛ saa wekukpãa ni kã wɔkɛ nanemɛi adesai ateŋ lɛ he, ni esaa wɔshidaamɔ yɛ Yehowa hiɛ lɛ hu he. Yakobo 1:26 lɛ kɛɔ akɛ: “Shi kɛ́ efeɔ nyɛteŋ mɔ ko akɛ Nyɔŋmɔ jálɔ ji lɛ ni ewooo elilɛi manyoflɛ shi moŋ eshishiuɔ etsui lɛ, nɛkɛ gbɔmɔ nɛɛ jamɔ lɛ yaka ni.”b Taakɛ wɔna yɛ yitso ni tsɔ yitso nɛɛ hiɛ lɛ mli lɛ, wɔwiemɔ saa wekukpãa ni kã wɔkɛ Nyɔŋmɔ teŋ lɛ he. Kɛ́ wɔwooo wɔlilɛi manyoflɛ, ni tsɔɔ akɛ wɔkɛ wiemɔi ni yeɔ awui ni tamɔ ebɔɔ tsu nii lɛ, mɔdɛŋ ni wɔbɔɔ akɛ Kristofoi lɛ fɛɛ baafee yaka yɛ Nyɔŋmɔ hiɛ. Aso esaaa akɛ wɔkɛ hiɛdɔɔ susuɔ sane nɛɛ he?—Yakobo 3:8-10.