Sanebimɔi ni Jɛ Kanelɔi Adɛŋ

Mɛni kaselɔ Yakobo tsɔɔ beni ekɛɛ: “Nyɛkafea nyɛhe tsɔɔlɔi babaoo, minyɛmimɛi, ejaakɛ nyɛle akɛ wɔbaaná kojomɔ kpele” lɛ?—Yakobo 3:1.

Eka shi faŋŋ akɛ jeee akɛ Yakobo miije Kristofoi anijiaŋ wui kɛmiijɛ anɔkwale lɛ ni amɛaatsɔɔ mɛi krokomɛi lɛ he. Yesu fa ekaselɔi lɛ yɛ Mateo 28:19, 20 akɛ, “nyɛyafea jeŋmaji fɛɛ mikaselɔi, . . . ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ.” No hewɔ lɛ, esa akɛ Kristofoi fɛɛ afee tsɔɔlɔi. Bɔfo Paulo wo Hebri Kristofoi lɛ ŋaa akɛni amɛfeko tsɔɔlɔi lolo hewɔ. Eŋma akɛ: “Ejaakɛ nyɛ ni kulɛ esa akɛ nyɛtsɔmɔ tsɔɔlɔi moŋ yɛ be lɛ naa lɛ, ehia akɛ atsɔɔ nyɛ Nyɔŋmɔ wiemɔ lɛ mli shishijee nibii lɛ ekoŋŋ.”—Hebribii 5:12.

Belɛ mɛni he Yakobo wieɔ lɛ mɔ? Eewie mɛi ni yɔɔ tsɔɔmɔ hegbɛi krɛdɛɛ yɛ asafo lɛ mli lɛ ahe. Wɔkaneɔ yɛ Efesobii 4:11 akɛ: “Ni [Yesu Kristo, asafo lɛ Yitso] lɛ nɔŋŋ eha mɛi komɛi tsɔmɔ bɔfoi, ni mɛi komɛi gbalɔi, mɛi komɛi hu sanekpakpa jajelɔi, ni mɛi komɛi hu nɔkwɛlɔi kɛ tsɔɔlɔi.” Nitsɔɔmɔ gbɛhei krɛdɛɛ yɛ klɛŋklɛŋ afii oha lɛ mli asafoi lɛ amli taakɛ eyɔɔ ŋmɛnɛ lɛ. Akɛ nɔkwɛmɔ nɔ lɛ, Nɔyeli Kuu lɛ damɔ “tsulɔ anɔkwafo kɛ nilelɔ” lɛ najiaŋ, ni amɛyɛ gbɛnaa nii krɛdɛɛ ko akɛ amɛkwɛ nitsɔɔmɔ ni yaa nɔ yɛ jeŋ muu fɛɛ asafo lɛ mli lɛ nɔ. (Mateo 24:45) Nɔkwɛlɔi gbɛfalɔi kɛ asafoŋ onukpai hu yɛ nitsɔɔmɔ he gbɛnaa nii krɛdɛɛ.

Ani Yakobo miikɛɛ Kristofoi hii ni he esa lɛ akɛ amɛkakpɛlɛ nitsɔɔmɔ nitsumɔ lɛ nɔ yɛ Nyɔŋmɔ kojomɔ ni tsii he gbeyeishemɔ hewɔ? Dabi kwraa. Onukpa nitsumɔ lɛ ji hegbɛ ni tsii, taakɛ 1 Timoteo 3:1 kɛɔ lɛ: “Kɛ mɔ ko miitao nɔkwɛmɔ nitsumɔ lɛ, eetao nitsumɔ kpakpa.” Taomɔ nii kɛha halamɔ akɛ onukpa lɛ ekome ji “nuu ni le nitsɔɔmɔ.” (1 Timoteo 3:2) Yakobo eteee shi ewooo Paulo wiemɔi ni jɛ mumɔŋ lɛ.

Shi, etamɔ nɔ ni yɛ Ŋ.B. klɛŋklɛŋ afii oha lɛ mli lɛ, mɛi komɛi kɛ amɛhe miitsɔɔ akɛ tsɔɔlɔi, eyɛ mli akɛ amɛhe esako ni ahalako amɛ. Eeenyɛ efee akɛ amɛsusu akɛ gbɛ́i namɔ ko yɛ nakai nitsumɔ lɛ mli, ni amɛsumɔɔ hiɛnyamwoo. (Okɛto Marko 12:38-40; 1 Timoteo 5:17 he.) Bɔfo Yohane tsi Diotrefe, ni ‘sumɔɔ ni ena klɛŋklɛŋ gbɛhe, ni enaaa nɔ ko ni tamɔ bulɛ kɛjɛɛɛ Yohane ŋɔɔ’ lɛ tã. (3 Yohane 9) Klɛŋklɛŋ Timoteo 1:7 wieɔ mɛi komɛi ni ‘taoɔ amɛtsɔmɔ mla tsɔɔlɔi shi amɛnuuu nii ni amɛkɛɔ loo nii ni amɛwieɔ he waa lɛ shishi’ lɛ ahe. Wiemɔi ni yɔɔ Yakobo 3:1 lɛ sa titri lɛ kɛha hii ni taoɔ ni amɛtsɔmɔ tsɔɔlɔi shi amɛhiɛ jwɛŋmɔ ni ejaaa lɛ. Gbɔmɛi ni tamɔ nɛkɛ baanyɛ aye asafoku lɛ awui waa, ni amɛnine baashɛ kojomɔ ni tsii nɔ.—Romabii 2:17-21; 14:12.

Yakobo 3:1 hu ji kaimɔ nii kpakpa kɛha mɛi ni he esa ni sɔmɔɔ akɛ tsɔɔlɔi lɛ. Akɛni akɛ babaoo ewo amɛdɛŋ hewɔ lɛ, abaabi babaoo shi kɛaajɛ amɛdɛŋ. (Luka 12:48) Yesu kɛɛ: “Yaka wiemɔ fɛɛ yaka wiemɔ ni gbɔmɛi wieɔ lɛ, amɛbaabu he akɔntaa yɛ Kojomɔ Gbi lɛ nɔ.” (Mateo 12:36) Sane nɛɛ ji anɔkwale titri yɛ mɛi ni abuɔ amɛ wiemɔ, onukpai ni ahala amɛ lɛ ahe.

Onukpai baabu gbɛ ni amɛtsɔɔ amɛkɛ Yehowa tooi lɛ yeɔ haa lɛ he akɔntaa. (Hebribii 13:17) Nɔ ni amɛkɛɔ lɛ saa wala he. No hewɔ lɛ, esa akɛ onukpa lɛ akwɛ jogbaŋŋ ni ekatsɔɔ lɛ diɛŋtsɛ esusumɔi loo ekɛ tooi lɛ ye yɛ gbɛ ni ejaaa nɔ taakɛ Farisifoi lɛ fee lɛ. Esa akɛ ebɔ mɔdɛŋ ni ejie suɔmɔ ni mli kwɔ ni Yesu jie lɛ kpo lɛ nɔŋŋ kpo. Kɛ eetsɔɔ nii, titri lɛ kɛ eetsu kojomɔ saji ahe nii lɛ, esa akɛ onukpa lɛ aŋmɛ ewiemɔi jogbaŋŋ, ni ekawie kɛkɛ ni esusuuu he loo etsɔɔ lɛ diɛŋtsɛ esusumɔi. Kɛ ekɛ ehe fɔ Yehowa, e-Wiemɔ lɛ, kɛ egbɛtsɔɔmɔ kɛtsɔ egbɛjianɔtoo lɛ nɔ lɛ nɔ waa lɛ, nɔkwɛlɔ lɛ nine baashɛ Nyɔŋmɔ dɛŋ jɔɔmɔi babaoo nɔ, shi jeee “kojomɔ kpele.”