Ani Okaiɔ?
Ani osusu nyɛsɛɛ nɛɛ Buu-Mɔɔ he jogbaŋŋ? Kɛ nakai lɛ, belɛ obaana he miishɛɛ akɛ oookai nɔ ni nyiɛ sɛɛ nɛɛ:
◻ Mɛni hewɔ wɔsɛɛ be ni aŋma afɔ̃ shi momo tsɔɔmɔ lɛ ejaaa lɛ?
Eji Nyɔŋmɔ le, ni etsɔ hiɛ ejaje Adam shigbeemɔ kɛmiibote esha mli momo kulɛ, ebaafee mɔ ni kɛ esha ba beni efee gbɔmɔ lɛ, ni kulɛ Yehowa baafee mɔ ni adesai fɛɛ anɔ fɔŋ feemɔ lɛ he gbɛnaanii baakã enɔ diɛŋtsɛ. Enɛ nyɛŋ ekɛ anɔkwale ni eji akɛ Yehowa ji Nyɔŋmɔ ni yɔɔ suɔmɔ ni enyɛ̃ɔ efɔŋfeemɔ lɛ akpã gbee. (Lala 33:5; Abɛi 15:9; 1 Yohane 4:8)—4/15, baafai 7, 8.
◻ Yɛ Yesaia 2:2-4 lɛ mlibaa lɛ, mɛni gbɔmɛi ni jɛ majimaji srɔtoi amli lɛ feɔ?
Yɛ be mli ni amɛkeɔ yuu kɛbaa Yehowa shia kɛha jamɔ lɛ, amɛtsiɔ amɛhe hu kɛjɛɔ ‘tawuu kasemɔ’ he, ejaakɛ amɛkɛ amɛhe efɔ̃ Nyɔŋmɔ ŋwɛi tai ni esaa amɛhe kɛha toiŋjɔlɛ he henyɛlɔi lɛ ahiɛkpatamɔ lɛ anɔ kɛha hebuu.—4/15, baafa 30.
◻ Namɛi ji Nyɔŋmɔ kakalɔi ni awie amɛhe yɛ Yoel 3:10, 11 lɛ?
Atsɛɔ anɔkwa Nyɔŋmɔ lɛ akɛ “Yehowa Zebaot” aaashɛ shii 280 sɔŋŋ yɛ Biblia lɛ mli. (2 Maŋtsɛmɛi 3:14) Nɛkɛ tai nɛɛ ji ŋwɛibɔfoi babaoo ni efee klalo akɛ amɛbaatsu nɔ fɛɛ nɔ ni Yehowa baafã amɛ akɛ amɛyatsu he nii lɛ.—5/1 baafa 23.
◻ Mɛni wɔkaseɔ kɛjɛɔ bi ni Yehowa bi koni Hiob asɔle eha mɛi ni tɔ̃ enɔ lɛ mli? (Hiob 42:8)
Dani aaaku sɛɛ akɛ Hiob aba gbɔmɔtsoŋ hewalɛ kpakpa mli ekoŋŋ lɛ, Yehowa bi koni esɔle eha mɛi ni tɔ̃ enɔ lɛ. Enɛ tsɔɔ akɛ, Yehowa biɔ koni wɔkɛ mɛi ni etɔ̃ wɔnɔ lɛ ahe eshai ake amɛ dani abaanyɛ akɛ wɔhe eshai ake wɔ. (Mateo 6:12; Efesobii 4:32)—5/1, baafa 31.
◻ Yakobo wiemɔ akɛ: “Nyɛhaa tsuishiŋmɛɛ lɛ agbea enitsumɔ naa kɛwulaa shi” lɛ tsɔɔ mɛni? (Yakobo 1:4)
Tsuishiŋmɛɛ yɛ nɔ ko ni ebaatsu, “nitsumɔ” ko. Enitsumɔ ji ni eha wɔye emuu yɛ nibii fɛɛ gbɛfaŋ. No hewɔ lɛ, kɛ wɔŋmɛ kaai lɛ gbɛ, ni wɔbɔɔɔ mɔdɛŋ akɛ wɔɔtsɔ gbɛi ni kɛ ŋmalɛi lɛ kpãaa gbee nɔ wɔkɛ amɛ aba naagbee oya lɛ, ekaa wɔhemɔkɛyeli ni etsuuɔ he.—5/15, baafa 16.
◻ Mɛni hewɔ Nyɔŋmɔ emɛ aahu be kakadaŋŋ dani ebaatsu adesai anaagbai lɛ ahe nii lɛ?
Esoro bɔ ni Yehowa susuɔ be he ehaa yɛ wɔnɔ he. Kɛha Nyɔŋmɔ ni yɔɔ kɛmiiya naanɔ lɛ, be sɛɛkɛlɛ kɛjɛ be ni abɔ Adam aahu kɛbashi amrɔ nɛɛ shɛko otsi po. (2 Petro 3:8) Shi bɔ fɛɛ bɔ ni wɔsusuɔ be he wɔhaa po lɛ, gbi fɛɛ gbi ni hoɔ lɛ kɛ wɔ bɛŋkɛɔ Yehowa bembuu gbi lɛ he.—6/1, baafai 5, 6.
◻ Mɛni kanyaa Yehowa Odasefoi?
Yehowa tsɔɔmɔ lɛ eha aná gbɔmɛi ni yɔɔ srɔto kwraa, átsɔse amɛ koni amɛsumɔ amɛhe kɛ amɛnanemɛi tamɔ amɛ diɛŋtsɛ amɛhe. (Yesaia 54:13) Suɔmɔ ji nɔ ni kanyaa Yehowa Odasefoi koni amɛya nɔ amɛshiɛ yɛ shikpilikpiifeemɔ loo shitee-kɛ-woo fɛɛ sɛɛ. (Mateo 22:36-40; 1 Korintobii 13:1-8)—6/15, baafa 20.
◻ Yesu wiemɔi akɛ: “Nyɛpelea agbo fiŋtɔŋŋ lɛ mlibotemɔ he” lɛ tsɔɔ mɛni? (Luka 13:24)
Nɔ ni Yesu tsɔɔ lɛ ji wɔpele, ni wɔlɛɛ wɔmli. Ewiemɔi lɛ hu tsɔɔ akɛ mɛi komɛi baasumɔ ni ‘amɛbote agbo lɛ mli’ yɛ be ni sa kɛha amɛ diɛŋtsɛ mli, yɛ gbɛ ni amɛsumɔɔ ni yɔɔ mlɛo nɔ. No hewɔ lɛ wɔteŋ mɔ fɛɛ mɔ baanyɛ abi ehe akɛ ‘Ani miimia mihiɛ waa diɛŋtsɛ kɛ nitsumɔ dɛŋdɛŋ?’—6/15, baafa 31.
◻ Mɛɛ gbɛ nɔ abaatsɔ “akojo gbohii” ni atee amɛ shi “lɛ yɛ nibii ni aŋma yɛ woji lɛ amli lɛ anaa, bɔ ni sa amɛnitsumɔi lɛ.”? (Kpojiemɔ 20:12)
Nɛkɛ wolokpoi nɛɛ jeee amɛ tsutsu nifeemɔi lɛ ahe saji ni aŋmala ashwie shi; kɛ́ amɛgboi lɛ, ahaa amɛyeɔ amɛhe kɛjɛɔ eshai ni amɛfee yɛ amɛshihilɛ be mli lɛ ahe. (Romabii 6:7, 23) Shi kɛlɛ, adesai ni atee amɛ shi lɛ baahi Adam esha lɛ shishi lolo. Belɛ, ebaafee akɛ nɛkɛ wolokpoi nɛɛ baajie ŋwɛi gbɛtsɔɔmɔi ni esa akɛ mɛi fɛɛ anyiɛ sɛɛ koni amɛná Yesu Kristo afɔleshaa lɛ he sɛɛ kɛmɔ shi lɛ kpo.—7/1, baafa 22.
◻ Mɛni wɔkaseɔ kɛjɛɔ Yesu abɛbua ni kɔɔ Samarianyo naanyo kpakpa lɛ mli? (Luka 10:30-37)
Yesu abɛbua lɛ tsɔɔ akɛ gbɔmɔ ni ja kɛmɔ shi ji mɔ ni jeee Nyɔŋmɔ mlai lɛ anɔ kɛkɛ eyeɔ, shi moŋ ekaseɔ esui lɛ hu. (Efesobii 5:1) Etsɔɔ hu akɛ, esa akɛ naanyobɔɔ ateke maŋ nɔ ni mɔ ko jɛ, shihilɛ mli ni mɔ ko yɔɔ, kɛ jamɔŋ gbɛtsii nii fɛɛ. (Galatabii 6:10)—7/1, baafa 31.
◻ Mɛɛ gbɛi etɛ yɔɔ ni oootsɔ nɔ ole obii lɛ, ni okɛ fɔlɔi agbɛtsɔɔmɔ aha amɛ?
(1) Ye obua obii lɛ ni amɛhala heloonaa nitsumɔ kpakpa; (2) saamɔ amɛ koni amɛkpee henumɔŋ nɔnyɛɛ ni anáa yɛ skul kɛ nitsumɔhe lɛ naa; (3) tsɔɔmɔ amɛ bɔ ni amɛaafee amɛtsu amɛmumɔŋ hiamɔ nii ahe nii.—7/15, baafa 4.
◻ Mɛɛ yiŋtoo naa Nyɔŋmɔ jɔɔ ehe yɛ “gbi ni ji gbi kpawo lɛ” nɔ lɛ? (1 Mose 2:1-3)
Nyɔŋmɔ ejɔɔɔ ehe yɛ tɔ ni etɔ lɛ hewɔ. Shi moŋ, ekpa shikpɔŋ nɔ nibɔɔ nitsumɔ bɔni afee ni eha eninenaa nitsumɔ lɛ diɛŋtsɛ ashwere, ni eba anunyam ni yeɔ emuu mli, kɛha eyijiemɔ kɛ woo.—7/15, baafa 18.
◻ Mɛɛ gbɛi etɛ nɔ wɔbaanyɛ wɔtsɔ wɔye jalɛ sane?
Klɛŋklɛŋ lɛ esa akɛ wɔkɛ Nyɔŋmɔ jeŋba he tɛi ni efolɔ eshwie shi lɛ akpã gbee. (Yesaia 1:17) Nɔ ni ji enyɔ lɛ, wɔyeɔ jalɛ sane kɛji akɛ wɔkɛ mɛi krokomɛi ye yɛ gbɛ ni wɔtaoɔ ni Yehowa kɛ wɔ aye lɛ nɔ lɛ. (Lala 130:3, 4) Nɔ ni ji etɛ lɛ, wɔjieɔ Nyɔŋmɔ jalɛsaneyeli kpo wɔtsɔɔ kɛ́ wɔkɛ wɔhe wo shiɛmɔ nitsumɔ lɛ mli kɛ ekãa lɛ. (Abɛi 3:27)—8/1, baafai 15, 16.