NIKASEMƆ 42
Ye Obua O-Biblia Mli Nikaselɔ Lɛ Koni Eya Ehiɛ Ni Abaptisi Lɛ—Fã Ni Ji Enyɔ
“Ohiɛ ahi ohe nɔ kɛ onitsɔɔmɔ lɛ nɔ be fɛɛ be.”—1 TIM. 4:16.
LALA 77 La Lɛ Miikpɛ Yɛ Jeŋ Ni Mli Ewo Duŋ Mli
NƆ NI ABAASUSU HEa
1. Te wɔfeɔ tɛŋŋ wɔleɔ akɛ kɛ́ wɔshiɛ wɔhã mɛi ni amɛbatsɔmɔ kaselɔi lɛ abaahere amɛyiwala?
KƐ́ WƆSHIƐ wɔhã mɛi ni amɛbatsɔmɔ Yesu kaselɔi lɛ, abaahere amɛyiwala. Te wɔfeɔ tɛŋŋ wɔleɔ enɛ? Yɛ Mateo 28:19, 20 lɛ, Yesu fã wɔ akɛ: “Nyɛyaa nyɛyafea mɛi . . . kaselɔi, nyɛbaptisia amɛ.” Mɛni wɔle yɛ baptisimɔ he? Wɔle akɛ, baptisimɔ he miihia waa, ejaakɛ kɛ́ mɔ ko miitao ahere eyiwala lɛ, esa akɛ ehã abaptisi lɛ. Shi dani abaabaptisi mɔ lɛ, esa akɛ ehe aye akɛ, eji Yesu Kristo ebagbooo ni ekɛ ewala baashã afɔle ehã wɔ ni atee lɛ shi kulɛ, wɔnáŋ naanɔ wala. No hewɔ ni bɔfo Petro kɛɛ enyɛmimɛi Kristofoi lɛ akɛ: “Baptisimɔ . . . miihere nyɛyiwala . . . kɛtsɔ Yesu Kristo shitee lɛ nɔ” lɛ. (1 Pet. 3:21) No hewɔ lɛ, kɛ́ mɔ ko batsɔ kaselɔ ni abaptisi lɛ lɛ, eyɛ hiɛnɔkamɔ akɛ abaahere eyiwala.
2. Mɛɛ gbɛ nɔ 2 Timoteo 4:1, 2 lɛ hãa wɔnaa akɛ ehe miihia waa ni wɔle nitsɔɔmɔ?
2 Dani wɔbaanyɛ wɔye wɔbua mɛi ni amɛbatsɔmɔ kaselɔi lɛ, esa akɛ wɔle nitsɔɔmɔ. (Kanemɔ 2 Timoteo 4:1, 2.) Mɛni hewɔ? Ejaakɛ Yesu fã wɔ akɛ ‘wɔya ni wɔyafee mɛi kaselɔi, ni wɔtsɔɔ amɛ nii.’ Bɔfo Paulo kɛɛ kɛ́ wɔtee nɔ wɔfee nakai lɛ, ‘wɔbaahere wɔ diɛŋtsɛ kɛ mɛi ni boɔ wɔ toi lɛ fɛɛ yiwala.’ No hewɔ ni ewo wɔ ŋaa akɛ wɔhã ‘wɔhiɛ ahi wɔnitsɔɔmɔ nɔ be fɛɛ be’ lɛ. (1 Tim. 4:16) Esa akɛ wɔle nitsɔɔmɔ. Kɛ́ wɔleee nitsɔɔmɔ lɛ, wɔnyɛŋ wɔye wɔbua mɛi ni amɛbatsɔmɔ kaselɔi.
3. Mɛni he wɔbaasusu yɛ nikasemɔ nɛɛ mli?
3 Daa gbi lɛ, wɔtsɔɔ mɛi akpekpei abɔ nii kɛjɛɔ Biblia lɛ mli. Shi tamɔ bɔ ni awie yɛ nikasemɔ ni tsɔ hiɛ lɛ mli lɛ, wɔmiisumɔ ni wɔle bɔ ni wɔbaafee wɔye wɔbua amɛteŋ mɛi pii ni amɛbatsɔmɔ Yesu Kristo kaselɔi koni abaptisi amɛ. Yɛ nikasemɔ nɛɛ mli lɛ, wɔbaasusu nibii enumɔ krokomɛi ni mɛi fɛɛ ni tsɔɔ mɛi Biblia lɛ baanyɛ afee kɛye amɛbua mɛi ni amɛkɛkaseɔ nii lɛ koni amɛya amɛhiɛ ni abaptisi amɛ.
HÃ BIBLIA LƐ AWIE
Hã nyɛmi ko ni he esa lɛ aye abua bo ni ohã Biblia lɛ awie pii moŋ fe ni bo obaawie pii (Kwɛmɔ kuku 4-6)f
4. Kɛ́ wɔkɛ mɛi miifee Biblia mli nikasemɔ lɛ, mɛni hewɔ esa akɛ wɔye wɔhe nɔ? (Kwɛmɔ shishigbɛ niŋmaa lɛ hu.)
4 Wɔsumɔɔ nibii ni wɔkase yɛ Nyɔŋmɔ Wiemɔ lɛ mli lɛ. No hewɔ lɛ, kɛ́ wɔkwɛɛɛ ni ahi lɛ, kɛ́ wɔkɛ mɛi miigba he sane lɛ, wɔbaawie pii. Shi esa akɛ wɔye wɔhe nɔ. No hewɔ lɛ, kɛ́ Buu-Mɔɔ Nikasemɔ lɛ nɔ wɔkwɛɔ jio, Asafoŋ Biblia Nikasemɔ nɔ wɔkwɛɔ jio, wɔkɛ mɛi miifee Biblia mli nikasemɔ jio, esa akɛ wɔhã Biblia lɛ awie, moŋ fe ni wɔbaawie pii. No hewɔ lɛ, kɛ́ okane ŋmalɛ ko loo sane ko lɛ, hã ehi ojwɛŋmɔ mli akɛ, jeee nɔ fɛɛ nɔ ni ole yɛ nakai ŋmalɛ lɛ loo sane lɛ he lɛ esa akɛ ogbala mli otsɔɔ nikaselɔ lɛ.b (Yoh. 16:12) Be ni abaptisi bo lɛ, ekolɛ Biblia lɛ mli shishijee tsɔɔmɔi lɛ pɛ ole. (Heb. 6:1) Ehe bo afii pii dani obale nibii ni ole ŋmɛnɛ lɛ. No hewɔ lɛ, hã ehi ojwɛŋmɔ mli akɛ, onyɛŋ otsɔɔ o-Biblia mli nikaselɔ lɛ nɔ fɛɛ nɔ shi kome.
5. (a) Yɛ nɔ ni awie yɛ 1 Tesalonikabii 2:13 lɛ naa lɛ, mɛni wɔmiisumɔ ni mɛi ni wɔkɛkaseɔ nii lɛ anu shishi? (b) Mɛɛ gbɛ nɔ wɔbaanyɛ wɔwo mɔ ni wɔkɛkaseɔ nii lɛ hewalɛ ni ewie nibii ni ekase lɛ ahe?
5 Esa akɛ wɔye wɔbua mɔ ni wɔkɛkaseɔ nii lɛ ni enu shishi akɛ, nibii ni ekaseɔ lɛ jɛ Nyɔŋmɔ Wiemɔ lɛ mli, shi jeee wɔ diɛŋtsɛ wɔjwɛŋmɔ mli. (Kanemɔ 1 Tesalonikabii 2:13.) Te wɔbaafee tɛŋŋ wɔfee nakai? Wo nikaselɔ lɛ hewalɛ ni ewie nibii ni ekase lɛ ahe. Akɛ nɔkwɛmɔnɔ lɛ, nɔ najiaŋ ni obaagbala ŋmalɛi lɛ amli ohã lɛ be fɛɛ be lɛ, hã lɛ hu egbala ekomɛi amli ehã bo. Ye obua lɛ ni ena bɔ ni ebaafee ekɛ nibii ni ekaseɔ yɛ Nyɔŋmɔ Wiemɔ lɛ mli lɛ atsu nii yɛ eshihilɛ mli. Kɛ́ nyɛkane ŋmalɛ ko lɛ, bi lɛ saji ni baahã etsɔɔ esusumɔ yɛ ŋmalɛ lɛ he kɛ bɔ ni enuɔ shishi ehãa. (Luka 10:25-28) Akɛ nɔkwɛmɔnɔ lɛ, obaanyɛ obi lɛ akɛ: “Mɛɛ su oona akɛ Yehowa ejie lɛ kpo yɛ ŋmalɛ nɛɛ mli?” “Mɛɛ gbɛ nɔ nɔ ni okase yɛ ŋmalɛ nɛɛ mli lɛ baanyɛ aye abua bo?” “Te onuɔ he ohãa tɛŋŋ yɛ nɔ ni okase lɛ he?” (Abɛi 20:5) Jeee nibii abɔ ni nikaselɔ lɛ ekase lɛ ji nɔ ni he hiaa titri. Nɔ ni he hiaa ji, ni ebaanya nɔ ni ekase lɛ he ni ekɛtsu nii.
6. Mɛni hewɔ ehi akɛ obaahã mɔ ko ni he esa kɛ nitsɔɔmɔ lɛ afata ohe kɛ́ okɛ mɔ ko yaakase nii?
6 Kɛ́ oyaafee Biblia mli nikasemɔ lɛ, ani bei komɛi lɛ, okɛ mɛi ni he esa kɛ nitsɔɔmɔ yaa? Kɛ́ okɛ mɔ ko ni tamɔ nakai tee lɛ, obaanyɛ obi lɛ esusumɔ yɛ bɔ ni okwɛ nikasemɔ lɛ nɔ ohã, kɛ bɔ ni okɛ Biblia lɛ tsu nii ohã lɛ he. Kɛ́ obaaa ohe shi lɛ, onyɛŋ obatsɔ tsɔɔlɔ ni he esa. (Okɛto Bɔfoi 18:24-26 lɛ he.) Agbɛnɛ hu, obaanyɛ obi lɛ ni etsɔɔ bo bɔ ni enaa nikaselɔ lɛ ehãa. Kɛ́ yiŋtoo ko hewɔ lɛ, otsi loo otsii enyɔ baaho ni onyɛɛɛ okɛ mɔ lɛ ayakase nii lɛ, obaanyɛ ohã ekɛ mɔ lɛ ayakase nii lɛ ehã bo. Kɛkɛ lɛ, ebaŋ lɛ akɛ ni oyaaa lɛ hewɔ lɛ, nikasemɔ lɛ baaa nɔ. Agbɛnɛ hu, ebaahã nikaselɔ lɛ ana akɛ nikasemɔ lɛ he miihia waa. Kaaná jwɛŋmɔ lɛ akɛ, ni bo o-Biblia mli nikaselɔ ni hewɔ lɛ, mɔ ko mɔ ko nyɛŋ ekɛ lɛ akase nii, akɛ ja bo pɛ. Esa akɛ osusu nikaselɔ lɛ he, ni ofee nɔ ni baaye abua lɛ ni eya ehiɛ yɛ anɔkwale lɛ mli.
HÃ O-BIBLIA MLI NIKASELƆ LƐ ANA AKƐ ONYAA NƆ NI OTSƆƆ LƐ LƐ HE NI OHEƆ OYEƆ
Gbaa nikaselɔ lɛ mɛi komɛi ni efee tsakemɔi yɛ amɛshihilɛ mli lɛ aniiashikpamɔ koni ena bɔ ni ebaafee ekɛ Biblia mli shishitoo mlai atsu nii (Kwɛmɔ kuku 7-9)g
7. Mɛni obaanyɛ ofee kɛye obua o-Biblia mli nikaselɔ lɛ ni enya nibii ni ekaseɔ lɛ ahe?
7 Esa akɛ mɔ ni okɛkaseɔ nii lɛ ana akɛ, onyaa nibii ni okase yɛ Biblia lɛ mli lɛ ahe ni oheɔ oyeɔ. (1 Tes. 1:5) Kɛ́ ena nakai lɛ, ekolɛ lɛ hu ebaanya nibii ni ekaseɔ lɛ ahe. Kɛ́ ebaahi lɛ, gbaa lɛ bɔ ni Biblia mli shishitoo mlai eye ebua bo. No baahã ena akɛ, kɛ́ lɛ hu ekɛ nibii ni awie yɛ Biblia lɛ mli lɛ tsu nii lɛ, ebaaná he sɛɛ.
8. Mɛni ekoŋŋ obaanyɛ ofee kɛye obua o-Biblia mli nikaselɔ lɛ? Ni mɛni hewɔ esa akɛ ofee nakai?
8 Be ni okɛ lɛ kaseɔ nii lɛ, gbaa lɛ mɛi komɛi ni kɛ naagbai ni ekɛkpeɔ lɛ ekomɛi kpe shi amɛnyɛ amɛye nɔ lɛ aniiashikpamɔ. Kɛ́ ole mɔ ko yɛ nyɛsafo lɛ mli ni eniiashikpamɔ lɛ baanyɛ aye abua nikaselɔ lɛ, obaanyɛ ohã efata ohe ni nyɛyafee nikasemɔ lɛ. Niiashikpamɔi ni taa mɔ tsuiŋ yɛ sane ni yitso ji, “Biblia Lɛ Tsakeɔ Mɛi” lɛ shishi yɛ jw.org lɛ nɔ.c Obaanyɛ okɛ saji kɛ vidioi ni yɔɔ jɛmɛ lɛ hu aye abua o-Biblia mli nikaselɔ lɛ koni ena akɛ kɛ́ ekɛ Biblia mli shishitoo mlai tsu nii lɛ, ebaaná he sɛɛ.
9. Mɛni obaanyɛ ofee kɛwo o-Biblia mli nikaselɔ lɛ hewalɛ ni egba ewekumɛi kɛ enanemɛi nibii ni ekaseɔ lɛ?
9 Kɛ́ o-Biblia mli nikaselɔ lɛ ebote gbalashihilɛ mli loo ekɛ mɔ ko yɛ lɛ, ani akɛ mɔ lɛ hu miikase nii? Kɛ́ akɛ lɛ ekaseee nii lɛ, obaanyɛ ohã ebafata nyɛhe. Wo nikaselɔ lɛ hewalɛ ni egba ewekumɛi kɛ enanemɛi nibii ni ekaseɔ lɛ. (Yoh. 1:40-45) Te obaafee tɛŋŋ ofee nakai? Ekolɛ obaanyɛ obi lɛ akɛ: “Kɛ́ ootao ogbala sane nɛɛ mli otsɔɔ owekunyo ko lɛ, te obaafee lɛ tɛŋŋ?” loo “Mɛɛ ŋmalɛ obaanyɛ okɛye obua onaanyo ko ni ehe sane nɛɛ eye?” Kɛ́ obi lɛ saji ni tamɔ nɛkɛ lɛ, ooye oobua lɛ ni ebatsɔ tsɔɔlɔ. Obaanyɛ ofee nakai fiofio kɛyashi ebaashɛ taomɔ nii lɛ ahe, ni ebatsɔ shiɛlɔ ni abaptisiko lɛ. Agbɛnɛ hu, obaanyɛ obi nikaselɔ lɛ kɛ́ ele mɔ ko ni lɛ hu ebaasumɔ ni akɛ lɛ akase Biblia lɛ. Kɛ́ ele mɔ ko nakai lɛ, bi mɔ lɛ kɛji ebaasumɔ ni akɛ lɛ akase Biblia lɛ, ni ojie vidio ni ji, Mɛni Yaa Nɔ yɛ Biblia Nikasemɔ Feemɔ Mli? lɛ ohã lɛ.d
YE OBUA NIKASELƆ LƐ NI ENÁ NANEMƐI YƐ ASAFO LƐ MLI
Ye obua nikaselɔ lɛ ni ená nanemɛi yɛ asafo lɛ mli (Kwɛmɔ kuku 10-11)h
10. Mɛɛ nɔkwɛmɔnɔ kpakpa Paulo fee ni abɔ he amaniɛ yɛ 1 Tesalonikabii 2:7, 8? Ni mɛɛ gbɛ nɔ wɔbaanyɛ wɔkase lɛ?
10 Esa akɛ ohã o-Biblia mli nikaselɔ lɛ ana akɛ esane kã otsui nɔ waa. Naa lɛ akɛ mɔ ko ni baanyɛ abatsɔ onyɛmi Kristofonyo wɔsɛɛ ko. (Kanemɔ 1 Tesalonikabii 2:7, 8.) Ebiɔ mɔdɛŋbɔɔ waa dani mɔ ko baanyɛ ashi enanemɛi ni yɔɔ je lɛ mli lɛ, ni efee tsakemɔi fɛɛ ni he hiaa lɛ ni ebasɔmɔ Yehowa. No hewɔ lɛ, esa akɛ oye obua lɛ ni ená nanemɛi kpakpai yɛ asafo lɛ mli. Okɛ lɛ agba sane, tswaa lɛ, sɛndimɔ lɛ tɛs mɛseji, loo yaasara lɛ, kɛjeee nii nyɛyaakase po. Enɛ baahã ena akɛ esane kã otsui nɔ waa, ni naanyo kpakpa ji bo.
11. Mɛni esa akɛ wɔye wɔbua wɔ-Biblia mli nikaselɔi lɛ ni amɛfee? Ni mɛni hewɔ?
11 Abuɔ abɛ ko akɛ: “Mɔ kome ni fɔɔ, shi jeee mɔ kome ni kwɛɔ.” Nakai nɔŋŋ wɔbaanyɛ wɔkɛɛ akɛ, jeee shiɛlɔ kome ni yeɔ ebuaa mɔ ko ni ebatsɔɔ kaselɔ, shi moŋ asafo muu. Nyɛmimɛi ni he esa kɛ nitsɔɔmɔ lɛ le enɛ, ni no hewɔ lɛ, amɛyeɔ amɛbuaa amɛ-Biblia mli nikaselɔi lɛ koni amɛkɛ nyɛmimɛi ni yɔɔ asafo lɛ mli lɛ abɔ naanyo. Kɛ́ nikaselɔ lɛ baná nanemɛi yɛ asafo lɛ mli lɛ, amɛbaanyɛ amɛye amɛbua lɛ ni ekɛ Yehowa teŋ wekukpaa lɛ mli awa, ni amɛwo lɛ hewalɛ kɛ́ enijiaŋ je wui. Esa akɛ wɔhã nikaselɔ lɛ hiɛ amɛ asafo lɛ, ni ena akɛ lɛ hu efata wɔmumɔŋ weku lɛ he. Kɛ́ ebana lɛ nakai lɛ, ebaana akɛ nyɛmimɛi lɛ sumɔɔ lɛ, ni eshashaoŋ shi kwraa akɛ ekɛ ehe baadɔmɔ asafo lɛ, ni ewaŋ kɛhãŋ lɛ akɛ ebaatsi ehe kɛje mɛi ni yeŋ amɛbuaŋ lɛ ni esɔmɔ Yehowa jogbaŋŋ lɛ ahe. (Abɛi 13:20) Kɛ́ mɛi ni ekɛbɔɔ naanyo tsutsu ko lɛ kɛ lɛ kpa bɔɔ lɛ, edɔŋ lɛ, ejaakɛ ele akɛ ebaaná nanemɛi kpakpai yɛ Yehowa asafo lɛ mli.—Mar. 10:29, 30; 1 Pet. 4:4.
OKƐ NIKASELƆ LƐ AFƆ HENƆJƆƆMƆ KƐ BAPTISIMƆ HE WIEMƆ
Fiofio lɛ, o-Biblia mli nikaselɔ lɛ baanyɛ aya ehiɛ ni abaptisi lɛ! (Kwɛmɔ kuku 12-13)
12. Mɛni hewɔ ehe miihia ni wɔkɛ wɔ-Biblia mli nikaselɔi lɛ afɔ henɔjɔɔmɔ kɛ baptisimɔ he wiemɔ?
12 Hã o-Biblia mli nikaselɔ lɛ ale akɛ henɔjɔɔmɔ kɛ baptisimɔ he miihia waa, ni okɛ lɛ afɔ he sanegbaa, ejaakɛ oti hewɔ ni wɔkɛ mɛi kaseɔ nii ji, koni amɛbatsɔmɔ kaselɔi ni abaptisi amɛ. No hewɔ lɛ, kɛ́ wɔkɛ mɔ lɛ kase nii nyɔji fioo lɛ, ehe miihia ni wɔye wɔbua lɛ ni enu shishi akɛ, wɔmiitao ebatsɔ Yehowa Odasefonyo. Enɛ he miihia, titri lɛ, kɛ́ ebɔi asafoŋ kpeei baa.
13. Kɛ́ mɔ ko miitao abaptisi lɛ lɛ, mɛni esa akɛ efee?
13 Kɛ́ Biblia mli nikaselɔ ko miitao eya ehiɛ ni abaptisi lɛ lɛ, nibii komɛi yɛ ni esa akɛ efee. Klɛŋklɛŋ lɛ, esa akɛ ekase Yehowa he nii ni esumɔ lɛ ni ehe enɔ eye. (Yoh. 3:16; 17:3) No sɛɛ lɛ, esa akɛ ekɛ Yehowa kɛ esafo lɛ abɔ naanyo. (Heb. 10:24, 25; Yak. 4:8) Agbɛnɛ hu, esa akɛ ekpa nibii gbohii ni efeɔ lɛ, eshwa ehe yɛ ehe eshai lɛ ahewɔ, ni etsake etsui. (Bɔf. 3:19) Kɛfata he lɛ, esa akɛ hemɔkɛyeli ni eyɔɔ lɛ atsirɛ lɛ ni egba mɛi nibii ni ekase lɛ. (2 Kor. 4:13) Naagbee kwraa lɛ, esa akɛ ejɔɔ ehe nɔ ehã Yehowa, ni ehã abaptisi lɛ kɛfee ehenɔjɔɔmɔ lɛ he okadi. (1 Pet. 3:21; 4:2) Kwɛ bɔ ni wɔnáa miishɛɛ kɛ́ mɔ ko tee ehiɛ ni abaptisi lɛ! Kɛ́ okɛ mɔ ko miikase nii ni ona akɛ eeya ehiɛ lɛ, jɛɛ otsuiŋ ojie eyi ni owo lɛ hewalɛ ni eya ehiɛ nakai nɔŋŋ.
YƐ BE KƐ BEIAŊ LƐ, KWƐMƆ AKƐ NIKASELƆ LƐ MIIYA EHIƐ LO
14. Te obaafee tɛŋŋ ole kɛji nikaselɔ ko miiya ehiɛ?
14 Kɛ́ wɔmiiye wɔmiibua wɔ-Biblia mli nikaselɔ lɛ koni eya ehiɛ ni abaptisi lɛ lɛ, esa akɛ wɔná ehe tsui. Shi kɛ́ wɔkɛ lɛ kase nii kɛshɛ he ko lɛ, esa akɛ agbɛnɛ lɛ, wɔkwɛ kɛji lɛɛlɛŋ eesumɔ ni esɔmɔ Yehowa Nyɔŋmɔ lo. Ani wɔmiina nibii ni tsɔɔ akɛ eebɔ mɔdɛŋ ni eye Yesu famɔi lɛ anɔ? Aloo Biblia lɛ kasemɔ kɛkɛ ni ŋɔɔ enaa?
15. Mɛɛ nibii baatsɔɔ akɛ nikaselɔ ko miiya ehiɛ?
15 Yɛ be kɛ beiaŋ lɛ, kwɛmɔ akɛ nikaselɔ lɛ miiya ehiɛ lo. Ani onaa yɛ ewiemɔ mli akɛ esumɔɔ Yehowa? Ani esɔleɔ? (Lala 116:1, 2) Ani esumɔɔ Biblia lɛ kanemɔ? (Lala 119:97) Ani ebaa asafoŋ kpeei daa? (Lala 22:22) Ani efee tsakemɔi ni esa akɛ efee lɛ? (Lala 119:112) Ani egbaa ewekumɛi kɛ enanemɛi nibii ni ekaseɔ lɛ? (Lala 9:1) Nɔ ni fe fɛɛ lɛ, ani eesumɔ ni ebatsɔ Yehowa Odasefonyo? (Lala 40:8) Kɛ́ nikaselɔ lɛ nyɛko etsu nibii nɛɛ ateŋ eko kwraa he nii lɛ, kwɛmɔ akɛ obaana nɔ hewɔ ni enyɛɛɛ efee nakai lɛ lo. No sɛɛ lɛ, jɛɛ bulɛ mli okɛ lɛ agba he sane, shi hã ena hiɛdɔɔ ni yɔɔ he.e
16. Mɛɛ sanebimɔi baanyɛ aye abua bo ni ona kɛji esa akɛ oya nɔ okɛ mɔ ko akase nii aloo esa akɛ okɛ lɛ akpa?
16 Yɛ be kɛ beiaŋ lɛ, esa akɛ osusu o-Biblia mli nikaselɔi lɛ ateŋ mɔ fɛɛ mɔ he, ni okwɛ kɛji esa akɛ oya nɔ okɛ lɛ akase nii lo. Bi ohe saji ni nyiɛ sɛɛ nɛɛ koni no aye abua bo. ‘Ani nikaselɔ lɛ saa ehe kɛhãa nikasemɔ lɛ? Ani oona faŋŋ akɛ esumɔɔɔ ni ebaa asafoŋ kpeei? Ani ekã he eefee nibii gbohii? Ani eyɛ amale jamɔ mli lolo?’ Kɛ́ ohã sanebimɔi nɛɛ hetoo akɛ hɛɛ lɛ, belɛ etsɔɔ akɛ nikaselɔ lɛ nyaaa nibii ni ekaseɔ lɛ ahe, ni efeko klalo akɛ ebaafee tsakemɔi yɛ eshihilɛ mli. No hewɔ lɛ, mɛni hewɔ oyaa nɔ okɛ lɛ kaseɔ nii? Kɛ́ ootao otsɔɔ mɔ ko bɔ ni asereɔ, shi mɔ lɛ sumɔɔɔ ni nu saa ehe po lɛ, ani esa akɛ oya nɔ ogba ohe naa yɛ ehe?
17. Yɛ nɔ ni awie yɛ 1 Timoteo 4:16 lɛ naa lɛ, mɛni esa akɛ mɛi fɛɛ ni kɛ mɛi kaseɔ Biblia lɛ afee?
17 Nitsumɔ ni akɛwo wɔdɛŋ akɛ wɔfee mɛi kaselɔi lɛ jeee shwɛmɔ nɔ ko kwraa. Wɔnaa lɛ nakai, ni no hewɔ wɔmiisumɔ ni wɔye wɔbua mɛi ni wɔkɛkaseɔ Biblia lɛ koni amɛya amɛhiɛ ni abaptisi amɛ lɛ. Enɛ hewɔ lɛ, wɔbaahã Biblia lɛ awie, ni wɔbaahã wɔnikaselɔi lɛ ana akɛ, wɔyɛ nibii ni wɔtsɔɔ amɛ lɛ ahe miishɛɛ ni wɔheɔ wɔyeɔ. Agbɛnɛ hu, wɔbaaye wɔbua amɛ ni amɛná nanemɛi yɛ asafo lɛ mli, ni wɔbaafɔ henɔjɔɔmɔ kɛ baptisimɔ he wiemɔ. Kɛfata he lɛ, yɛ be kɛ beiaŋ lɛ, wɔbaakwɛ kɛji nikaselɔ lɛ miiya ehiɛ lo. (Kwɛmɔ akrabatsa ni yɔɔ baafa 13, ni yitso ji, “Nɔ Ni Esa Akɛ Ofee Kɛye Obua Nikaselɔ Lɛ Koni Eya Ehiɛ Ni Abaptisi Lɛ.”) Eŋɔɔ wɔnaa waa akɛ, wɔfata he ni aatsu nitsumɔ nɛɛ ni baanyɛ ahere mɛi ayiwala lɛ! No hewɔ lɛ, nyɛhãa wɔfea bɔ fɛɛ bɔ ni wɔbaanyɛ ni wɔye wɔbua mɛi ni wɔkɛkaseɔ Biblia lɛ koni amɛya amɛhiɛ ni abaptisi amɛ.
LALA 79 Nyɛtsɔa Amɛ Nii, Nyɛhãa Amɛdamɔa Shi Shiŋŋ
a Yehowa ehã wɔ hegbɛ ko ni nɔ bɛ. No ji, ni wɔkɛ mɛi akase Biblia lɛ ni wɔye wɔbua amɛ koni amɛsusumɔi kɛ amɛnifeemɔi asa ehiɛ. Yɛ nikasemɔ nɛɛ mli lɛ, wɔbaakwɛ nibii krokomɛi ni wɔbaanyɛ wɔfee koni wɔnyɛ wɔtsɔɔ mɛi nii jogbaŋŋ.
b Kwɛmɔ sane ni yitso ji, “Nibii ni Esaaa akɛ Ofeɔ kɛ́ Oofee Biblia mli Nikasemɔ,” ni je kpo yɛ September 2016 Wɔshiɛmɔ Kɛ Wɔshihilɛ Kpee Nifeemɔ Wolo lɛ mli.
c Yaa WƆHE SAJI > NIIASHIKPAMƆI.
d Yɛ JW Library® lɛ, yaa MEDIA > OUR MEETINGS AND MINISTRY > TOOLS FOR THE MINISTRY.
e Kwɛmɔ sane ni yitso ji, “Suɔmɔ Yehowa Koni No Atsirɛ Bo Ni Ohã Abaptisi Bo,” kɛ “Ani Oshɛ Kɛhã Baptisimɔ?” ni je kpo yɛ March 2020 Buu-Mɔɔ lɛ mli lɛ.
f NƆ NI WƆNAA YƐ MFONIRI LƐ MLI: Nyɛmi yoo ko miifee Biblia mli nikasemɔ ni eewie pii. Ekɛ nyɛmi yoo ko ni le nitsɔɔmɔ waa nyiɛ. No hewɔ lɛ, be ni egbe naa lɛ, nyɛmi yoo lɛ ye ebua lɛ koni be kroko lɛ ekawie pii.
g NƆ NI WƆNAA YƐ MFONIRI LƐ MLI: Nyɛmi yoo lɛ miitsɔɔ nikaselɔ lɛ bɔ ni ebaafee etsɔ ŋa kpakpa. Sɛɛ mli lɛ, nikaselɔ lɛ miigba ewu nibii ni ekase lɛ.
h NƆ NI WƆNAA YƐ MFONIRI LƐ MLI: Nyɛmimɛi ni nikaselɔ lɛ kɛbɔ naanyo yɛ Maŋtsɛyeli Asa lɛ nɔ lɛ ateŋ mɔ kome efɔ̃ lɛ kɛ ewu lɛ nine kɛba eshĩa lɛ, ni amɛmiigba sane kɛ miishɛɛ.