‘Ani Esa Akɛ Miha Abaptisi Mi?’

YƐ YIŊKPƐI fɛɛ ni ehe hiaa ni wɔfee yɛ wɔwala mli lɛ fɛɛ mli lɛ, ekolɛ ekome po bɛ mli ni he hiaa fe enɛ: ‘Ani esa akɛ miha abaptisi mi?’ Mɛni hewɔ no he hiaa nakai lɛ? Ejaakɛ yiŋkpɛɛ ni wɔɔfee yɛ nɛkɛ sane nɛɛ he lɛ naa hewalɛ tɛɛ ko, jeee yɛ wɔ amrɔ nɛɛ shihilɛ gbɛ pɛ nɔ, shi moŋ yɛ wɔ naanɔ shihilɛ hu nɔ.

Ani yiŋkpɛɛ nɛɛ ka ohiɛ ni esa akɛ ofee? Ekolɛ okɛ Yehowa Odasefoi ekase Biblia lɛ be saŋŋ nɛ. Aloo ekolɛ ofɔlɔi bɔi bo Ŋmalɛi lɛ tsɔɔmɔ kɛjɛ egbekɛbiiashi tɔŋŋ. Agbɛnɛ obashɛ he ni esa akɛ bo diɛŋtsɛ okpɛ oyiŋ oha ohe yɛ nɔ ni sa akɛ ofee he. Bɔni afee ni okpɛ oyiŋ ekpakpa lɛ, ehe baahia ni onu nɔ ni yɔɔ baptisimɔ mli diɛŋtsɛ kɛ mɔ ni esa akɛ abaptisi lɛ lɛ shishi.

Nɔ ni Yɔɔ Baptisimɔ Mli Diɛŋtsɛ

Tamɔ yookpeemɔ ji lɛ, baptisimɔ ji nifeemɔ ko ni haa hiɛdɔɔ baa wekukpaa ko he. Yɛ yookpeemɔ gbɛfaŋ lɛ, nuu kɛ yoo ni ekɔɔ amɛhe lɛ ena wekukpaa ko yɛ amɛteŋ momo ni haa amɛbɛŋkɛɔ amɛhe kpaakpa. Yookpeemɔ lɛ haa maŋ fɛɛ leɔ nɔ ni amɛkpaa gbee yɛ he momo yɛ teemɔŋ lɛ kɛkɛ, ni ji akɛ, amɛyi enyɔ lɛ miibote gbalashihilɛ ekomefeemɔ lɛ mli diɛŋtsɛ agbɛnɛ. Egbeleɔ hegbɛi anaa hu ehaa mɛi enyɔ lɛ koni amɛnyɛ amɛna mli ŋɔɔmɔ, ni ekɛ gbɛnaa nii ni esa akɛ amɛ fɛɛ amɛhi shi yɛ naa kutuu hu baa.

Shihilɛ lɛ tamɔ nakai nɔŋŋ yɛ baptisimɔ gbɛfaŋ. Beni wɔkaseɔ Biblia lɛ, wɔbaleɔ nibii ni Yehowa ejɛ suɔmɔ mli efee eha wɔ. Jeee wɔwala kɛ nɔ fɛɛ nɔ ni he hiaa kɛha wɔwala yibaamɔ lɛ kɛkɛ eha wɔ, shi moŋ lɛ diɛŋtsɛ e-Bi koome lɛ hu koni egbele gbɛ eha adesai eshafeelɔi ni amɛnyɛ amɛna amɛkɛ Lɛ teŋ wekukpaa koni amɛnyɛ amɛna naanɔ wala yɛ paradeiso shikpɔŋ nɔ. Kɛ wɔsusu enɛɛmɛi fɛɛ he lɛ, ani etsirɛɛɛ wɔ ni wɔfee nɔ ko?

Mɛni wɔbaanyɛ wɔfee? Nyɔŋmɔ Bi, Yesu Kristo kɛɔ wɔ akɛ: “Kɛji mɔ ko miisumɔ akɛ enyiɛɔ misɛɛ lɛ, ha ni ekwa ehe ni ewo esɛŋmɔtso lɛ ni enyiɛ misɛɛ.” (Mateo 16:24) Hɛɛ, wɔbaanyɛ wɔtsɔmɔ Yesu Kristo kaselɔi, ni wɔnyiɛ enɔkwɛmɔ nɔ lɛ sɛɛ ni wɔsɔmɔ yɛ e-Tsɛ, Yehowa suɔmɔnaa nii ahewɔ. Shi, dani wɔbaafee nakai lɛ, ebiɔ ni ‘wɔkwa’ wɔ diɛŋtsɛ wɔhe, ni tsɔɔ akɛ, wɔbaajɛ wɔsuɔmɔ mli wɔkpɛ wɔyiŋ akɛ wɔkɛ Nyɔŋmɔ suɔmɔnaa nii baaye wɔ diɛŋtsɛ wɔnɔ hiɛ; nɔ ni etsɔɔ diɛŋtsɛ ji wɔwala ni wɔkɛaaha loo wɔɔjɔɔ nɔ wɔha esuɔmɔnaa nifeemɔ. Ni atsɔɔ nifeemɔ yɛ faŋŋ mli nɔ ahaa aleɔ nɛkɛ yiŋkpɛɛ ni ajɛɔ suɔmɔ mli afeɔ yɛ teemɔŋ nɛɛ. Nu mli baptisimɔ ji nakai nifeemɔ ni wɔkɛyeɔ wɔhenɔjɔɔmɔ kɛha Nyɔŋmɔ lɛ he odase lɛ.

Namɔ Esa akɛ Abaptisi Lɛ?

Yesu Kristo fa esɛɛnyiɛlɔi lɛ ni ‘amɛyafee jeŋmaji fɛɛ ekaselɔi, ni amɛbaptisi amɛ amɛwo Tsɛ lɛ kɛ Bi lɛ mumɔ krɔŋkrɔŋ lɛ gbɛi amli, ni amɛtsɔɔ amɛ ni amɛye nii fɛɛ ni etsɔɔ amɛ lɛ nɔ.’ (Mateo 28:​19, 20) Eka shi faŋŋ akɛ jwɛŋmɔ kɛ tsui mli salɛ he miihia yɛ mɛi ni abaabaptisi amɛ nɛɛ agbɛfaŋ. Kɛtsɔ Nyɔŋmɔ Wiemɔ ni amɛ diɛŋtsɛ amɛkaseɔ yɛ teemɔŋ lɛ nɔ lɛ, amɛbana bɔ ni ehe hiaa ni ‘amɛtsake amɛtsui ni amɛkpale’ kɛjɛ amɛ tsutsu shihilɛ gbɛ lɛ nɔ. (Bɔfoi lɛ Asaji 3:19) No sɛɛ lɛ, amɛna bɔ ni ehe hiaa ni amɛkɛ amɛhe awo sanekpakpa shiɛmɔ ni Yesu Kristo tsu lɛ mli, ni amɛtsɔmɔ ekaselɔi. Enɛɛmɛi fɛɛ etsɔ hiɛ eba momo dani baptisimɔ nifeemɔ lɛ baa.

Ani obashɛ nɛkɛ gbɛhe nɛɛ yɛ omumɔŋ dalɛ lɛ mli? Ani ooshwe akɛ obaasɔmɔ Nyɔŋmɔ? Kɛji nakai lɛ, no lɛ okɛ sɔlemɔ asusu Biblia mli sane ni kɔɔ Etiopia piafonyo lɛ he ni aŋma yɛ Bɔfoi lɛ Asaji yitso 8 lɛ he jogbaŋŋ. Beni agbala gbalɛi ni kɔɔ Yesu ni ji Mesia lɛ he lɛ mli atsɔɔ nuu nɛɛ, epɛi ejwɛŋmɔ kɛ etsui mli fɛɛ, kɛkɛ ni ebi akɛ: “Mɛni tsiɔ mibaptisimɔ gbɛ?” Eka shi faŋŋ akɛ nɔ ko bɛ ni tsiɔ lɛ gbɛ; no hewɔ lɛ abaptisi lɛ.​—Bɔfoi lɛ Asaji 8:​26-38.

Ŋmɛnɛ, mɛi pii miibi nakai sane lɛ nɔŋŋ: “Mɛni tsiɔ mibaptisimɔ gbɛ?” Nɔ ni jɛ mli ba ji akɛ abaptisi mɛi 300,945 yɛ 1991 mli. Enɛ kɛ miishɛɛ kpele baha Yehowa webii fɛɛ, ni onukpai ni yɔɔ asafoi lɛ amli lɛ yɛ he miishɛɛ akɛ amɛaaye amɛbua mɛi krokomɛi ni yɔɔ jalɛ tsuii lɛ ni amɛya amɛhiɛ ni amɛshɛ nibii ni haa mɔ he saa kɛhaa baptisimɔ lɛ ahe.

Shi ekolɛ, eeenyɛ efee akɛ onukpai ni yɔɔ osafo lɛ mli lɛ miiwo ŋaa akɛ omɛ da. Aloo, kɛji obalaŋta ji bo lɛ, ekolɛ ofɔlɔi etsɔɔ akɛ omɛ. Kɛkɛ lɛ mɛni? Esaaa ni onijiaŋ jeɔ wui. Ha ahi ojwɛŋmɔ mli akɛ wekukpaa ni bɛŋkɛ kpaakpa ni okɛ Ŋwɛi Flooflonyo lɛ aaana lɛ ji hiɛdɔɔ sane diɛŋtsɛ. Esa akɛ oshɛ tɛi ni nɔ kwɔlɔ he ni ohiɛ mli daa hu. No hewɔ lɛ bo ŋaawoo ni akɛhaa lɛ toi ni okɛtsu nii kɛ otsui muu fɛɛ. Kɛji onuuu nɔ hewɔ ni akɛɛ nakai lɛ shishi jogbaŋŋ lɛ, ohiɛ akagbo, shi moŋ bi he saji kɛyashi obaanu hesaamɔ diɛŋtsɛ ni he hiaa ni ofee lɛ shishi.

Yɛ gbɛ kroko nɔ lɛ, ekolɛ mɛi komɛi baashashao shi yɛ nifeemɔ wulu, taakɛ amɛtsɛɔ lɛ nɛɛ mli. Ani oji amɛteŋ mɔ ko? Eji anɔkwale, ekolɛ yiŋtoi titrii komɛi yɛ ni nomɛi ahewɔ otsiɔ henɔjɔɔmɔ kɛ baptisimɔ lɛ otoɔ sɛɛ lɛ. Shi kɛji ohe esa, ni kɛlɛ oogbala ohe shi lolo lɛ, no lɛ ehi akɛ ooobi ohe akɛ: “Mɛni tsiɔ mibaptisimɔ gbɛ?” Okɛ sɔlemɔ asusu oshihilɛ lɛ he ni okwɛ akɛ ani yiŋtoo kpakpa ko yɛ ni ooodamɔ nɔ otsi Yehowa ninefɔɔ akɛ okɛ lɛ abana wekukpaa ni bɛŋkɛ kpaakpa lɛ nɔheremɔ oto sɛɛ lo.

‘Midako’

Kɛji obalaŋta ji bo lɛ, ekolɛ oosusu akɛ, ‘Midako.’ Eji anɔkwale akɛ bei abɔ ni obalaŋtai yaa nɔ amɛbuɔ amɛfɔlɔi Kristofoi lɛ, ni amɛboɔ amɛ toi ni amɛkɛ Ŋmalɛi lɛ tsuɔ nii jogbaŋŋ bɔ ni amɛaanyɛ lɛ, belɛ amɛbaanyɛ amɛna hekɛnɔfɔɔ akɛ Yehowa buɔ amɛ akɛ “amɛhe tse.” Yɛ anɔkwale mli lɛ, Biblia lɛ kɛɔ wɔ akɛ Nyɔŋmɔ nɔkpɛlɛmɔ ni fɔlɔi jalɔi naa lɛ mli kpaa kɛshɛɔ amɛbii ni yɔɔ amɛshishi lɛ anɔ. (1 Korintobii 7:14) Shi, atsɔɔɔ afii pɔtɛɛ ko yɛ Biblia lɛ mli ni ji be mli ni fɔlɔi akwɛmɔ nɛɛ sɛɛ foɔ. No hewɔ lɛ, ehe miihia waa ni Kristofoi obalaŋtai kɛ hiɛdɔɔ asusu nɛkɛ sanebimɔ nɛɛ he, akɛ: ‘Ani esa akɛ miha abaptisi mi?’

Biblia lɛ woɔ obalaŋtai hewalɛ ni ‘amɛkai amɛ-Bɔlɔ Kpele lɛ yɛ amɛbalahiiaŋ gbii lɛ amli.’ (Jajelɔ 12:⁠1) Yɛ enɛ mli lɛ, wɔyɛ obalanyo Samuel nɔkwɛmɔ nɔ lɛ nɛkɛ, mɔ ni “sɔmɔɔ yɛ Yehowa hiɛ, [beni] gbekɛ ji lɛ” lɛ. Timoteo nɔkwɛmɔ nɔ lɛ hu yɛ, mɔ ni ŋɔ anɔkwale lɛ ni enyɛ kɛ enaa tsɔɔ lɛ kɛjɛ egbekɛbiiashi tɔŋŋ lɛ eto tsui mli lɛ.​—1 Samuel 2:​18; 2 Timoteo 1:5; 3:​14, 15.

Nakai nɔŋŋ hu ŋmɛnɛ, obalaŋtai pii ejɔɔ amɛwala nɔ akɛ amɛbaasɔmɔ Yehowa. Akifusa, ni eye afii 15 lɛ wie akɛ Sɔɔmɔ Kpee lɛ mli nifeemɔ ko ji nɔ ni ye ebua lɛ ni ekɛkpɛ eyiŋ akɛ ebaaha abaptisi lɛ. Abaptisi Ayumi beni eye afii nyɔŋma. Eetao ni esɔmɔ Yehowa, ejaakɛ ebana suɔmɔ kɛha lɛ momo. Amrɔ nɛɛ eye afii 13, ni nyɛsɛɛ nɛɛ nɔŋŋ ena niiashikpamɔ ko ni ji e-Biblia kaselɔ, ni lɛ hu ebana suɔmɔ kɛha Yehowa, ni abaptisi lɛ beni eye afii 12 lɛ. Abaptisi Ayumi nyɛminuu fioo lɛ hu beni eye afii nyɔŋma. Ekaiɔ akɛ: “Mɛi komɛi wie akɛ midako, shi Yehowa le bɔ ni minuɔ he mihaa. Mikpɛ miyiŋ akɛ maha abaptisi mi ejaakɛ mina mikpɛ miyiŋ akɛ majɔɔ miwala nɔ ni mikɛ minibii fɛɛ ni miyɔɔ lɛ asɔmɔ lɛ.”

Fɔlɔi anɔkwɛmɔ nɔ hu ji oti kroko, taakɛ wɔnaa yɛ nyɛmiyoo obalayoo ko niiashikpamɔ mli lɛ. Etsɛ tsĩ enyɛ naa akɛ ekɛ lɛ kɛ enyɛminuu kɛ enyɛmiyoo ni fata he lɛ fɛɛ akakase Biblia lɛ. Eyiɔ amɛ ni ekɛ la shaa amɛwoji lɛ. Shi yɛ enyɛ tsuishiŋmɛɛ kɛ ehemɔkɛyeli lɛ hewɔ lɛ, gbekɛbii lɛ nyɛ amɛna bɔ ni ehe hiaa waa akɛ aaasɔmɔ Yehowa Nyɔŋmɔ. Abaptisi nɛkɛ gbekɛyoo fioo nɛɛ beni eye afii 13, ni enyɛminuu kɛ enyɛmiyoo fioo lɛ hu enyiɛ enɔkwɛmɔ nɔ lɛ sɛɛ.

‘Mida Tsɔ’

Lalatsɛ lɛ wie akɛ: “Onukpai kɛ gbekɛbii bluublu . . . ha amɛjie Yehowa gbɛi lɛ yi.” (Lala 148:​12, 13) Hɛɛ, esa akɛ onukpai hu ayoo bɔ ni ehe hiaa akɛ amɛaakɔ amɛshidaamɔ yɛ Yehowa masɛi. Shi, bei komɛi lɛ, onukpai lɛ ekomɛi sumɔɔɔ ni amɛfeɔ tsakemɔi. Amɛnuɔ he akɛ “onyɛŋ otsɔɔ gbee momo ŋaa gbɛi heei.” Ní kɛlɛ, kaimɔ akɛ anɔkwafo Abraham eye afii 75 beni Yehowa kɛɛ lɛ akɛ: “Jee oshikpɔŋ lɛ nɔ kɛ oweku lɛŋ kɛya shikpɔŋ ni matsɔɔo lɛ nɔ” lɛ. (Bɔfoi lɛ Asaji 7:3; 1 Mose 12:​1, 4) Mose eye afii 80 beni Yehowa kɛ nitsumɔ wo edɛŋ akɛ: “Oyajie mimaŋ, Israelbii lɛ kɛjɛ Mizraim” lɛ. (2 Mose 3:10) Nɛkɛ hii nɛɛ kɛ mɛi krokomɛi lɛ hu fɛɛ ehe shi jogbaŋŋ yɛ amɛshihilɛ mli beni Yehowa bi ni amɛjie suɔmɔ ni amɛyɔɔ kɛ amɛhe nɔ ni amɛjɔɔ amɛha lɛ lɛ kpo yɛ faŋŋ mli lɛ. Amɛshashaooo shi yɛ Yehowa tsɛmɔ lɛ nɔheremɔ mli.

Ní ŋmɛnɛ hu? Shizumu ehi shi akɛ Buddha jalɔ afii 78 sɔŋŋ dani eje Biblia lɛ kasemɔ shishi. Eweku lɛ te shi amɛwo lɛ, ni amɛŋmɛɛɛ lɛ gbɛ ni ekase nii yɛ lɛ diɛŋtsɛ eshia mli po. Yɛ afi pɛ sɛɛ lɛ, ena akɛ ehe miihia ni ejɔɔ ehe nɔ eha Yehowa, ni eha abaptisi lɛ. Mɛni hewɔ efee tsakemɔ nɛɛ? Ewie akɛ: “Apasa jamɔ elaka mi aahu afi babaoo, ni miitao ni minine ashɛ anɔkwale lɛ nɔ kɛjɛ Yehowa dɛŋ daa nɛɛ kɛya naanɔ.”

‘No Nɔŋŋ Agbɛnɛ Ehereɔ Oyiwala’

Be lɛ miita. Wala, ni bo hu onɔ fata he lɛ he eba oshara. Ehe miihia ni okɛ hiɛdɔɔ asusu sane ni ji ohe nɔ nii ooojɔɔ oha Yehowa ni ofee he okadi kɛtsɔ nu mli baptisimɔ nɔ lɛ he jogbaŋŋ. Bɔfo Petro wie wiemɔ nɛɛ ni ekɛma nɔ mi akɛ: “No . . . hu agbɛnɛ ehereɔ nyɛ yiwala, ni ji baptisimɔ lɛ.” Etee nɔ etsɔɔ mli akɛ baptisimɔ “jeee hewolo nɔ muji jiemɔ” (mɔ lɛ efee nakai momo dani ehe basa kɛha baptisimɔ lɛ) “shi moŋ eji henilee kpakpa kpaŋmɔ ni ekɛ Nyɔŋmɔ feɔ.”​—1 Petro 3:⁠21.

Akɛni eshɛ Yehowa taomɔ nii lɛ ahe hewɔ lɛ, kaselɔ ni abaptisi lɛ lɛ banaa henilee kpakpa agbɛnɛ. Ni kɛji etee nɔ efee bɔ fɛɛ bɔ ni eeenyɛ yɛ Yehowa sɔɔmɔ mli lɛ, enaa jwɛŋmɔŋ toiŋjɔlɛ kɛ tsui ni nyɔɔ mɔ mli. (Yakobo 1:25) Ni nɔ ni fe fɛɛ lɛ, ebaanyɛ ekɛ hiɛnɔkamɔ akwɛ Yehowa dɛŋ jɔɔmɔi ni sɛɛ efoŋ yɛ nibii agbɛjianɔtoo hee ni baa lɛ mli lɛ gbɛ. Eba akɛ no aaafee bo hu egbɛfaŋnɔ beni ohaa sanebimɔ akɛ: ‘Ani esa akɛ miha abaptisi mi?’ lɛ hetoo yɛ gbɛ kpakpa nɔ lɛ.

[Mfoniri ni yɔɔ baafa 21]

Samuel sɔmɔ yɛ Yehowa hiɛ beni eji gbekɛnuu fioo

[Mfoniri ni yɔɔ baafa 22]

Mose eye afii 80 beni Yehowa kɛ nitsumɔ wo edɛŋ lɛ

[Mfonirii ni yɔɔ baafa 23]

Gbekɛbii kɛ onukpai fɛɛ ni haa abaptisiɔ amɛ ŋmɛnɛ lɛ baanyɛ akpa jɔɔmɔi ni sɛɛ efoŋ gbɛ yɛ Nyɔŋmɔ gbɛjianɔtoo hee lɛ mli