• “Lɛ Tsutsu Esumɔ Wɔ”
    Tsi Obɛŋkɛ Yehowa

    • “Nyɔŋmɔ lɛ, Suɔmɔ Ji Lɛ”

      15. Mɛɛ wiemɔ ko Biblia lɛ wieɔ yɛ Yehowa su ni ji suɔmɔ lɛ he, ni wiemɔ nɛɛ yɛ srɔto kwraa yɛ mɛɛ gbɛ nɔ? (Kwɛmɔ shishigbɛ niŋmaa lɛ hu.)

      15 Biblia lɛ wieɔ nɔ ko yɛ suɔmɔ he ní ewieee nakai nɔ ko yɛ Yehowa sui titrii krokomɛi lɛ ahe. Ŋmalɛi lɛ ekɛɛɛ akɛ Nyɔŋmɔ lɛ, hewalɛ ji lɛ, loo ákɛ Nyɔŋmɔ lɛ, jalɛsaneyeli ji lɛ, aloo po akɛ Nyɔŋmɔ lɛ, nilee ji lɛ. Eyɛ nakai sui lɛ, ni eji amɛ jɛɛhe ní nɔ kwɔ fe fɛɛ, ni anyɛɛɛ akɛ mɔ ko ato ehe yɛ nakai sui etɛ lɛ fɛɛ mli. Shi, awieɔ wiemɔ ko ni mli kwɔ waa yɛ su ni ji ejwɛ lɛ he, akɛ: “Nyɔŋmɔ lɛ, suɔmɔ ji lɛ.”b (1 Yohane 4:8) Mɛni no tsɔɔ?

      16-18. (a) Mɛni hewɔ Biblia lɛ kɛɔ akɛ “Nyɔŋmɔ lɛ, suɔmɔ ji lɛ” lɛ? (b) Yɛ shikpɔŋ nɔ bɔɔ nii lɛ fɛɛ ateŋ lɛ, mɛni hewɔ gbɔmɔ ji Yehowa su ni ji suɔmɔ lɛ he okadi ní sa jogbaŋŋ lɛ?

      16 Kɛɛmɔ ni akɛɔ akɛ “Nyɔŋmɔ lɛ, suɔmɔ ji lɛ” lɛ jeee egbɔyeli wiemɔ ko ni yɔɔ mlɛo, tamɔ nɔ ni aawie akɛ, “Nyɔŋmɔ kɛ suɔmɔ yeɔ egbɔ.” Wɔnyɛŋ wɔtsake wiemɔ lɛ sɛɛsɛɛ hu ni efee nɔ ni ja, ní wɔkɛɛ akɛ “suɔmɔ lɛ, Nyɔŋmɔ ni.” Yehowa fe su folo ko kɛkɛ ní jwɛŋmɔ nyɛɛɛ akɔ sɛɛ. Eji mɔ diɛŋtsɛ ni yɔɔ henumɔi kɛ sui krokomɛi babaoo kɛfata suɔmɔ he. Ni kɛlɛ, suɔmɔ jeɔ kpo yɛ Yehowa nɔ fɛɛ nɔ feemɔ mli. Wolo ko wie ŋmalɛ kuku nɛɛ he akɛ: “Bɔ ni Nyɔŋmɔ ji diɛŋtsɛ, loo esu ji suɔmɔ.” Bei pii lɛ, wɔbaanyɛ wɔsusu he yɛ nɛkɛ gbɛ nɔ: Yehowa hewalɛ lɛ haa enyɛɔ efeɔ nii. Ejalɛsaneyeli kɛ enilee kudɔɔ gbɛ ni etsɔɔ nɔ efeɔ nii. Shi Yehowa suɔmɔ lɛ kanyaa lɛ ni efeɔ nii lɛ. Ni esuɔmɔ lɛ jeɔ kpo yɛ gbɛ ni etsɔɔ nɔ ekɛ esui krokomɛi lɛ tsuɔ nii lɛ mli be fɛɛ be.

      17 Afɔɔ wiemɔ akɛ Yehowa ji suɔmɔ ni ejie ehe kpo yɛ gbɔmɔ su diɛŋtsɛ mli. No hewɔ lɛ, kɛ́ wɔmiitao ni wɔkase suɔmɔ ni damɔ mla nɔ lɛ he nii lɛ, no lɛ esa akɛ wɔkase Yehowa he nii. Yɛ anɔkwale mli lɛ, ekolɛ wɔbaanyɛ wɔna nɛkɛ su fɛfɛo nɛɛ yɛ adesai hu mli. Shi mɛni hewɔ eyɔɔ jɛmɛ lɛ? Beni Yehowa bɔɔ nibii lɛ, eka shi faŋŋ akɛ ekɛ e-Bi lɛ wie nɛkɛ wiemɔi nɛɛ, akɛ: “Ha wɔbɔ gbɔmɔ yɛ wɔsubaŋ lɛ nɔ, tamɔ wɔ henɔ.” (1 Mose 1:26, NW) Yɛ bɔɔ nii ni yɔɔ shikpɔŋ nɔ lɛ fɛɛ ateŋ lɛ, hii kɛ yei pɛ baanyɛ ahala akɛ amɛaajie suɔmɔ kpo ní amɛkɛ nakai feemɔ akase amɛ ŋwɛi Tsɛ lɛ. Kaimɔ akɛ Yehowa kɛ bɔɔ nii srɔtoi tsu nii ni ekɛfee esui titrii lɛ ahe okadi. Ni kɛlɛ, Yehowa hala eshikpɔŋ nɔ bɔɔ nii lɛ ateŋ nɔ ni nɔ kwɔ fe fɛɛ, ni ji gbɔmɔ, ni ekɛfee E-su ni nɔ kwɔ fe fɛɛ, ni ji suɔmɔ lɛ he okadi.—Ezekiel 1:10.

  • “Lɛ Tsutsu Esumɔ Wɔ”
    Tsi Obɛŋkɛ Yehowa

    • b Ŋmalɛ mli wiemɔi krokomɛi hu yɛ ni su tamɔ nakai pɛpɛɛpɛ. Akɛ nɔkwɛmɔnɔ lɛ, “Nyɔŋmɔ lɛ, la ji lɛ” kɛ “Nyɔŋmɔ lɛ, la ní fiteɔ mɔ . . . ji lɛ.” (1 Yohane 1:5; Hebribii 12:29) Shi esa akɛ anu wiemɔi nɛɛ ashishi akɛ amɛji mfonirifeemɔŋ wiemɔi, ejaakɛ amɛkɛ Yehowa miito nibii ni anaa diɛŋtsɛ lɛ ahe. Yehowa tamɔ la, ejaakɛ eyɛ krɔŋkrɔŋ ni eja hu. “Duŋ,” loo muji nɔ ko kwraa bɛ emli. Ni abaanyɛ akɛ lɛ ato la he, yɛ bɔ ni ekɛ ehewalɛ ni ekɛkpataa nii ahiɛ lɛ tsuɔ nii ehaa lɛ hewɔ.