Yitso Enyɔ
Nyɛkãfoa Yehowa ákɛ Anɔkwa Nyɔŋmɔ Kome Lɛ
1. Namɔ ji anɔkwa Nyɔŋmɔ kome pɛ lɛ?
BIBLIA lɛ kɛɔ akɛ, eyɛ mli akɛ mɛi pii yɛ ni abuɔ amɛ akɛ nyɔŋmɔi moŋ, shi kɛlɛ “wɔ lɛ Nyɔŋmɔ kome wɔyɔɔ, Tsɛ lɛ.” (1 Korintobii 8:5, 6, NW) Nakai “Nyɔŋmɔ kome” lɛ ji Yehowa, nibii fɛɛ a-Bɔlɔ lɛ. (5 Mose 6:4; Kpojiemɔ 4:11) Yesu wie ehe akɛ “mi-Nyɔŋmɔ kɛ nyɛ hu nyɛ-Nyɔŋmɔ.” (Yohane 20:17) Ekɛ Mose ni etsɔ hiɛ ewie nɛkɛ lɛ kpãa gbee, akɛ: “Yehowa lɛ, lɛ ekome ji Nyɔŋmɔ, ni mɔ ko mɔ ko bɛ esɛɛ dɔŋŋ.” (5 Mose 4:35) Yehowa nɔ kwɔ kwraa fe nɔ fɛɛ nɔ ni ajáa, tamɔ amagai, adesai ni ajáa amɛ tamɔ nyɔŋmɔi, aloo ehenyɛlɔ Satan Abonsam, “nibii agbɛjianɔtoo nɛɛ nyɔŋmɔ lɛ.” (2 Korintobii 4:3, 4, NW) Nɔ ni tamɔɔɔ enɛɛmɛi fɛɛ lɛ, Yesu tsɛ́ Yehowa akɛ lɛ ji “anɔkwa Nyɔŋmɔ kome pɛ lɛ.”—Yohane 17:3, NW.
2. Beni wɔkaseɔ Nyɔŋmɔ he nii lɛ, te esa akɛ esa wɔshihilɛi ahe eha tɛŋŋ?
2 Gbɔmɛi ni hiɛ sɔɔ nii, ni kaseɔ Nyɔŋmɔ sui ni haa mɔ náa miishɛɛ, kɛ agbɛnɛ nɔ ni efee kɛha adesai kɛ nɔ ni ebaafee kɛha wɔ lolo lɛ ahe nii lɛ yaa eŋɔɔ. Yɛ be mli ni suɔmɔ ni amɛyɔɔ kɛha Yehowa lɛ daa lɛ, amɛnuɔ he akɛ eetsirɛ amɛ ni amɛkãfo lɛ. Yɛ mɛɛ gbɛ nɔ? Gbɛ kome ji kɛtsɔ mɛi krokomɛi ni aaagba ehe sane atsɔɔ amɛ lɛ nɔ. Romabii 10:10 kɛɔ akɛ: “Naabu akɛjajeɔ kɛshɛɔ yiwalaheremɔ he.” Gbɛ kroko ji kɛtsɔ ekasemɔ yɛ wiemɔ kɛ nifeemɔ mli. Efesobii 5:1 kɛɔ akɛ: “Nyɛfea Nyɔŋmɔ kaselɔi, tamɔ bii ni asumɔɔ.” Kɛ́ wɔɔfee nakai kɛmɔ shi jogbaŋŋ lɛ, no lɛ ehe miihia ni wɔle sui diɛŋtsɛ ni Yehowa yɔɔ lɛ.
3. Mɛni ji Nyɔŋmɔ sui titrii lɛ?
3 Wiemɔi babaoo ni haa ayɔseɔ Nyɔŋmɔ sui ni ekaaa lɛ yɛ Biblia lɛ mli fɛɛ. Esui titrii ejwɛ lɛ ji nilee, jalɛsaneyeli, hewalɛ kɛ suɔmɔ. ‘Lɛ edɛŋ nilee yɔɔ.’ (Hiob 12:13) “Egbɛ̀i fɛɛ lɛ jalɛ ni.” (5 Mose 32:4, NW) Eyɛ “hewalɛ kpele.” (Yesaia 40:26, NW) “Nyɔŋmɔ lɛ, suɔmɔ ji lɛ.” (1 Yohane 4:8, NW) Shi kɛlɛ, yɛ Nyɔŋmɔ sui titrii ejwɛ nɛɛ ateŋ lɛ, te emli nɔ ni jeɔ kpo waa lɛ, ekome ni haa aleɔ nɔ̃ Nyɔŋmɔ ni eji fe ekrokomɛi fɛɛ lɛ?
“Nyɔŋmɔ lɛ, Suɔmɔ Ji Lɛ”
4. Te Nyɔŋmɔ sui lɛ ateŋ nɔ ni ha ebɔ jeŋ muu fɛɛ kɛ nibii fɛɛ ni yɔɔ wala mli lɛ?
4 Susumɔ nɔ ni kanya Yehowa koni ebɔ jeŋ muu fɛɛ lɛ kɛ bɔɔ nii ni ji mumɔ kɛ adesa ni yɔɔ nilee lɛ he okwɛ. Ani enilee kɛ hewalɛ lɛ hewɔ? Dabi, ejaakɛ yɛ be mli ni Nyɔŋmɔ kɛ nomɛi tsu nii lɛ, nomɛi jeee hewalɛi ni tsirɛ lɛ lɛ. Ni ejalɛsaneyeli biii ni ekɛ mɔ ko aja wala nikeenii lɛ. Shi moŋ, suɔmɔ kpele ni Nyɔŋmɔ yɔɔ lɛ kanya lɛ koni ehã mɛi krokomɛi shihilɛ mli ni eyɔɔ ákɛ mɔ ni yɔɔ nilee lɛ eko. Suɔmɔ tsirɛ lɛ koni eto eyiŋ akɛ esa akɛ adesai ni feɔ toiboo ahi shi kɛya naanɔ yɛ Paradeiso. (1 Mose 1:28; 2:15) Suɔmɔ ha eto gbɛjianɔ koni ejie fɔbuu ni Adam tɔmɔ lɛ kɛba adesai anɔ lɛ.
5. Taakɛ Biblia lɛ tsɔɔ lɛ, mɛɛ su anaa yɛ Yehowa su kɛ baŋ mli, ni mɛni hewɔ?
5 No hewɔ lɛ, suɔmɔ ji nɔ ni jeɔ kpo fe fɛɛ yɛ Nyɔŋmɔ sui lɛ fɛɛ ateŋ. No ji esu loo ebaŋ. Yɛ bɔ ni eji anɔkwale akɛ enilee, jalɛsaneyeli, kɛ hewalɛ he hiaa lɛ, Biblia lɛ ekɛɛɛ kɔkɔɔkɔ akɛ Yehowa ji enɛɛmɛi ateŋ eko. Shi ekɛɔ akɛ suɔmɔ ji lɛ. Hɛɛ, Yehowa ji suɔmɔ ni ejie ehe kpo yɛ gbɔmɔtso su mli. Enɛ ji suɔmɔ ni shishitoo mla kudɔɔ, jeee henumɔ. Shishitoo anɔkwale kɛ jalɛ nifeemɔ ji nɔ ni kudɔɔ Nyɔŋmɔ suɔmɔ lɛ. Eji suɔmɔ ni nɔ kwɔ fe fɛɛ, ní Yehowa Nyɔŋmɔ diɛŋtsɛ feɔ he nɔkwɛmɔnɔ lɛ kpojiemɔ. Suɔmɔ ni tamɔ nɛkɛ lɛ ji pɛsɛmkunya ni bɛ kwraa lɛ kpojiemɔ, ni nɔ ni fataa he be fɛɛ be ji nifeemɔ ni anaa faŋŋ he odaseyeli.
6. Mɛni haa wɔnyɛɔ wɔkaseɔ Nyɔŋmɔ, eyɛ mli moŋ akɛ enɔ kwɔ kwraa fe wɔ lɛ?
6 Nɛkɛ suɔmɔ su ni yɔɔ naakpɛɛ nɛɛ ji nɔ ni haa wɔnyɛɔ wɔkaseɔ Nyɔŋmɔ ni tamɔ nɛkɛ lɛ. Ákɛ adesai ni baa shi ni yeee emuu, ni tɔ̃ɔ lɛ, ekolɛ wɔbaasusu akɛ wɔnyɛŋ wɔkase lɛ yɛ omanyeyeli mli kɔkɔɔkɔ. Shi naa Yehowa suɔmɔ kpele lɛ he nɔkwɛmɔnɔ kroko hu: Ele wɔ fatɔɔi lɛ, ni etaooo emuuyeli yɛ wɔdɛŋ. Ele akɛ amrɔ nɛɛ wɔkɛ emuuyeli teŋ jɛkɛ naakpa. (Lala 51:7) No hewɔ ni Lala 130:3, 4 kɛɔ akɛ: “Kɛji bo, Yehowa, okɛɛ ooodi nishaianii asɛɛ lɛ, kulɛ, [Yehowa, NW] namɔ po aaanyɛ shi adamɔ? Shi bo odɛŋ eshaifaa yɔɔ.” Hɛɛ, Yehowa ji “Nyɔŋmɔ musuŋtsɔlɔ kɛ durolɔ ní toɔ tsui, ní mɔbɔnalɛ kɛ anɔkwale fa pii.” (2 Mose 34:6) “Bo, [Yehowa, NW], ohi ni oŋɔfaa mra, ni omɔbɔnalɛ fa ha mɛi fɛɛ ni bolɔɔ tsɛɔo lɛ.” (Lala 86:5) Kwɛ bɔ ni eshɛjeɔ mɔ mii ehaa! Kwɛ bɔ ni eji hejɔɔmɔ akɛ aaasɔmɔ Nyɔŋmɔ ni he yɔɔ naakpɛɛ nɛɛ, koni nine ashɛ esuɔmɔ kɛ mɔbɔnalɛ kwɛmɔ nɔ!
7. Te aaafee tɛŋŋ ana Yehowa suɔmɔ yɛ enibɔɔ nitsumɔi lɛ amli?
7 Abaanyɛ ana Yehowa suɔmɔ lɛ hu yɛ enibɔɔ nitsumɔi lɛ amli. Susumɔ nibii kpakpai babaoo ni Yehowa kɛha koni wɔná he miishɛɛ, tamɔ gɔji, kooi, kpaakpoi, kɛ ŋshɔi fɛfɛji lɛ ahe okwɛ. Eha wɔ niyenii srɔtoi ni yɔɔ naakpɛɛ koni eŋɔɔ wɔnaa ni eha wɔhi wala mli. Agbɛnɛ hu, Yehowa kɛ fɔfɔii fɛfɛji babaoo ni jeɔ ŋma eha wɔ kɛ bɔɔ nii ni ji kooloi ni haa wɔnaa kpɛɔ wɔhe. Efee nibii ni baaha gbɔmɔ aná miishɛɛ, eyɛ mli moŋ akɛ ehe ehiaaa ni efee enɛɛmɛi. Eji anɔkwale akɛ, bɔ ni shihilɛ yɛ yiwalɛ jeŋ fɔŋ nɛɛ mli hilɛ yɔɔ bianɛ lɛ, wɔnyɛŋ wɔná ebɔɔ nii lɛ amli ŋɔɔmɔ kɛmɔ shi. (Romabii 8:22) Shi bo lɛ susumɔ nɔ ni Yehowa baafee aha wɔ yɛ Paradeiso lɛ he okwɛ! Lalatsɛ lɛ maa nɔ mi kɛhaa wɔ akɛ: “Ogbɛɔ odɛŋ ni ohaa nɔ fɛɛ nɔ ni hiɛ kã tɔɔ kɛ nii ni etaoɔ [yɛ gbɛ ni ja nɔ lɛ].”—Lala 145:16.
8. Mɛni ji suɔmɔ ni Yehowa yɔɔ kɛha wɔ lɛ he nɔkwɛmɔnɔ ni fe fɛɛ?
8 Mɛni ji Yehowa suɔmɔ ni fe fɛɛ kɛha adesai lɛ he nɔkwɛmɔnɔ? Biblia lɛ tsɔɔ mli akɛ: “Nɛkɛ Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.” (Yohane 3:16) Ani bɔ ni gbɔmɔ feɔ ejurɔ lɛ hewɔ ni Yehowa fee enɛ? Romabii 5:8 haa hetoo akɛ: “Nyɔŋmɔ jieɔ lɛ diɛŋtsɛ esuɔmɔ ni ekɛsumɔ wɔ lɛ shi etsɔɔ, akɛ be mli ni wɔji eshafeelɔi lɛ beebe ni Kristo bagbo yɛ wɔnajiaŋ.” Hɛɛ, Nyɔŋmɔ tsu e-Bi ni yeɔ emuu lɛ kɛba shikpɔŋ nɔ koni ekɛ ewala abaha akɛ kpɔmɔ afɔleshaa nɔ̃ koni ekɛjie wɔ kɛjɛ esha kɛ gbele fɔbuu lɛ shishi. (Mateo 20:28) Enɛ gbele gbɛ kɛha mɛi ni sumɔɔ Nyɔŋmɔ lɛ koni amɛná naanɔ wala. Wɔdaa shi akɛ, Nyɔŋmɔ suɔmɔ lɛ mli lɛɛɔ kɛyaa mɛi fɛɛ ni sumɔɔ akɛ amɛaafee esuɔmɔnaa nii lɛ anɔ, ejaakɛ Biblia lɛ kɛɔ wɔ akɛ: “Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.”—Bɔfoi lɛ Asaji 10:34, 35.
9. Te esa akɛ anɔkwale ni eji akɛ Yehowa kɛ e-Bi lɛ eha wɔ ákɛ kpɔmɔnɔ lɛ aná wɔnɔ hewalɛ aha tɛŋŋ?
9 Te esa akɛ anɔkwale ni eji akɛ Yehowa kɛ e-Bi lɛ eha wɔ akɛ kpɔmɔnɔ, ni gbeleɔ gbɛ kɛyaa naanɔ wala mli lɛ, aná bɔ ni wɔkɛ wɔwala tsuɔ nii bianɛ lɛ nɔ hewalɛ aha tɛŋŋ? Esa akɛ eha suɔmɔ ni wɔyɔɔ kɛha Yehowa, anɔkwa Nyɔŋmɔ lɛ mli awa. Yɛ nakai beaŋ nɔŋŋ lɛ, esa akɛ efee wɔ mɛi ni sumɔɔ akɛ wɔɔbo Yesu, ni damɔ Nyɔŋmɔ najiaŋ lɛ toi. “[Yesu] egbo mɛi fɛɛ yigbele, koni mɛi ni hiɛ kãmɔ lɛ ahiɛ akakãmɔ miiha amɛ diɛŋtsɛ amɛhe dɔŋŋ, shi moŋ amɛhiɛ akãmɔ aha mɔ ni gbo ni atee lɛ shi ekoŋŋ aha amɛ lɛ.” (2 Korintobii 5:15) Mɛɛ miishɛɛ po eji nɛkɛ akɛ aaanyiɛ Yesu nanemaahei asɛɛ, ejaakɛ efee nɔkwɛmɔnɔ yɛ Yehowa suɔmɔ kɛ mɔbɔnalɛ lɛ kasemɔ mli! Anaa enɛ yɛ nɔ ni Yesu kɛɛ mɛi ni baa amɛhe shi lɛ mli, akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ. Nyɛwoa mipã lɛ nyɛfɔa nyɛnɔ, ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaaná hejɔɔmɔ nyɛaaha nyɛsusumai lɛ. Ejaakɛ mipã lɛ teremɔ waaa, ni mijatsu lɛ etsiii.”—Mateo 11:28-30.
Suɔmɔ ni Wɔɔjie lɛ Kpo Wɔtsɔɔ Mɛi Krokomɛi
10. Mɛɛ gbɛ̀i komɛi anɔ wɔɔnyɛ wɔtsɔ nɔ wɔjie suɔmɔ kpo wɔtsɔɔ nanemɛi Kristofoi?
10 Te wɔɔfee tɛŋŋ wɔtsɔɔ akɛ wɔyɛ suɔmɔ ni Yehowa kɛ Yesu yɔɔ kɛha wɔ lɛ eko kɛha wɔnanemɛi Kristofoi? Kadimɔ gbɛ̀i srɔtoi babaoo ni wɔɔnyɛ wɔtsɔ nɔ wɔfee enɛ lɛ: “Suɔmɔ toɔ etsui shi, emli hi; suɔmɔ he tsɛ̃ɛɛ mɔ; suɔmɔ eshwãaa, efeee pupuupu, efeee nii ni esaaa, epeleee lɛ diɛŋtsɛ enɔ̃, emli wooo la, eniŋŋ efɔŋ he, enyaaa nɔsha he, shi enyaa anɔkwale he; emiɔ ŋɔɔ yɛ nii fɛɛ mli, eheɔ nii fɛɛ eyeɔ, ehiɛ kãa nii fɛɛ nɔ, etoɔ etsui shi yɛ nii fɛɛ mli. Suɔmɔ sɛɛ efooo gbi ko gbi ko.”—1 Korintobii 13:4-8; 1 Yohane 3:14-18; 4:7-12.
11. Namɛi hu esa akɛ wɔjie suɔmɔ kpo wɔtsɔɔ, ni yɛ mɛɛ gbɛ nɔ?
11 Namɛi hu esa akɛ wɔjie suɔmɔ kpo wɔtsɔɔ amɛ, ni yɛ mɛɛ gbɛ nɔ? Yesu kɛɛ akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ Mumɔ krɔŋkrɔŋ lɛ gbɛi amli, ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ.” (Mateo 28:19, 20) Enɛ biɔ ni wɔgba Nyɔŋmɔ paradeiso jeŋ hee ni baa lɛ he sanekpakpa lɛ he sane wɔtsɔɔ mɛi ni amɛjeee wɔnanemɛi Kristofoi lolo lɛ. Yesu tsɔɔ yɛ faŋŋ mli akɛ esaaa akɛ wɔsumɔɔ mɛi ni kɛ wɔ yɔɔ hemɔkɛyeli kome mli lɛ pɛ, ejaakɛ ekɛɛ akɛ: “Kɛji nyɛsumɔɔ mɛi ni sumɔɔ nyɛ lɛ [pɛ lɛ], mɛɛ nyɔmɔwoo nyɛyɔɔ? Ani toohelɔi lɛ tete efeee nakai nɔŋŋ? Ni kɛji nyɛŋaa nyɛnyɛmimɛi kɛkɛ lɛ, enyiɛ nɔŋŋ nyɛfeɔ? Ani wɔŋjalɔi lɛ tete efeee nakai nɔŋŋ?”—Mateo 5:46, 47; 24:14; Galatabii 6:10.
‘Nyiɛmɔ Yehowa Gbɛi Amli’
12. Mɛni hewɔ Nyɔŋmɔ gbɛi lɛ baanyɛ afee nɔ ni kɔɔ lɛ ekome pɛ ehe lɛ?
12 Anɔkwa Nyɔŋmɔ lɛ ni akãfoɔ lɛ lɛ fã kroko ni he hiaa ji ni ale egbɛi ni ekaaa ni ji Yehowa lɛ, ni akɛtsu nii, ni akɛtsɔɔ mɛi krokomɛi. Lalatsɛ lɛ wie nɔ ni eshweɔ yɛ etsuiŋ nɛɛ he akɛ: “Koni amɛná amɛle akɛ bo, ni okome too ogbɛi ji Yehowa lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ!” (Lala 83:19) Gbɛi Yehowa lɛ shishi ji “Ehaa Ebaa Mli.” Lɛ ji Yiŋtolɔ Kpeteŋkpele lɛ, mɔ ni haa eyiŋtoi baa mli diɛŋtsɛ yɛ omanyeyeli mli lɛ. Ni anɔkwa Nyɔŋmɔ lɛ pɛ baanyɛ ahiɛ gbɛi ni tamɔ nɛkɛ yɛ gbɛ ni ja nɔ, ejaakɛ adesai nyɛŋ aná nɔmimaa kɔkɔɔkɔ akɛ amɛ mɔdɛŋbɔi baaye omanye. (Yakobo 4:13, 14) Yehowa pɛ ji mɔ ni baanyɛ akɛɛ akɛ ewiemɔ ‘baaye omanye’ yɛ nɔ ni etsu lɛ yɛ hewɔ lɛ mli. (Yesaia 55:11) Mɛi babaoo náa miishɛɛ waa kɛji akɛ amɛna Nyɔŋmɔ gbɛi lɛ klɛŋklɛŋ kwraa yɛ amɛ Bibliai lɛ amli ni amɛkase nɔ ni eshishi tsɔɔ lɛ. (2 Mose 6:3) Shi kɛji akɛ ‘amɛnyiɛ yɛ Yehowa gbɛi amli kɛtee naanɔ’ lɛ, no pɛ dani nilee nɛɛ he baaba sɛɛnamɔ kɛha amɛ.—Mika 4:5.
13. Le ni aaale Yehowa lɛ, kɛ egbɛi amli ni aaanyiɛ yɛ lɛ kɔɔ mɛni he?
13 Lala 9:11 jajeɔ yɛ Nyɔŋmɔ gbɛi lɛ he akɛ: “Mɛi ni le ogbɛi lɛ aaaŋɔ amɛhiɛ amɛaafɔ̃ onɔ.” Enɛ biɔ babaoo fe ni aaale gbɛi Yehowa lɛ kɛkɛ, ni no hu etsɔɔɔ trukaa kɛkɛ akɛ akɛ he fɔ̃ɔ enɔ. Le ni aaale Nyɔŋmɔ gbɛi lɛ tsɔɔ akɛ ní wɔhiɛ aaasɔ nɔ̃ Nyɔŋmɔ ni Yehowa ji, ní wɔkɛ bulɛ aaaha enɔyeli hewalɛ, ekitai atoi ni wɔboɔ, kɛ wɔhiɛ ni wɔkɛfɔ̃ɔ enɔ yɛ nɔ fɛɛ nɔ mli. (Abɛi 3:5, 6) Nakai nɔŋŋ hu, ni aaanyiɛ yɛ Yehowa gbɛi amli lɛ tsɔɔ he nɔ ni ájɔɔ kɛha lɛ, kɛ enajiaŋ ni adamɔɔ akɛ ejálɔi lɛ ateŋ mɔ kome, ni wɔkɛ wɔshihilɛ miitsu nii diɛŋtsɛ yɛ Nyɔŋmɔ suɔmɔnaa nifeemɔ kɛ gbeekpamɔ naa. (Luka 10:27) Ani oofee nakai?
14. Kɛji akɛ wɔɔsɔmɔ Yehowa kɛya naanɔ lɛ, belɛ mɛni he hiaa kɛfata nitsumɔ he gbɛnaa nii ni aaakanya wɔ lɛ he?
14 Kɛji akɛ wɔɔsɔmɔ Yehowa kɛya naanɔ lɛ, belɛ esa akɛ nɔ ni fe nitsumɔ he gbɛnaa kɛkɛ akanya wɔ. Bɔfo Paulo wo Timoteo ni miisɔmɔ Yehowa momo afii pii lɛ hewalɛ akɛ: “Okɛ Nyɔŋmɔ jamɔ hetuu-kɛhamɔ atsɔse ohe ákɛ oti ni ma ohiɛ.” (1 Timoteo 4:7, NW) Hetuu-kɛhamɔ baa kɛjɛɔ tsui ni eyi obɔ kɛ hiɛsɔɔ kɛha mɔ ni ajieɔ hetuu-kɛhamɔ lɛ ahaa lɛ lɛ mli. “Nyɔŋmɔ jamɔ hetuu-kɛhamɔ” tsɔɔ bulɛ kɛ woo ni mli kwɔ kɛha Yehowa diɛŋtsɛ. Ehaa ajɛɔ suɔmɔ mli akɛ he kpɛtɛɔ ehe yɛ hiɛsɔɔ kpele ni ayɔɔ kɛha lɛ kɛ egbɛ̀i lɛ ahewɔ. Ehaa wɔfeɔ mɛi ni sumɔɔ akɛ wɔɔha mɔ fɛɛ mɔ kɛ bulɛ ni mli kwɔ aha egbɛi lɛ. Esa akɛ wɔtao Nyɔŋmɔ jamɔ hetuu-kɛhamɔ yɛ wɔshihilɛi amli kɛ́ wɔɔnyiɛ yɛ Yehowa, anɔkwa Nyɔŋmɔ kome pɛ lɛ gbɛi amli kɛaaya naanɔ lɛ.—Lala 37:4; 2 Petro 3:11.
15. Te wɔɔfee tɛŋŋ ni wɔkɛ wɔ hetuu-kɛhamɔ aha Nyɔŋmɔ kome too?
15 Kɛji akɛ wɔɔsɔmɔ Nyɔŋmɔ yɛ nɔkpɛlɛmɔ mli lɛ, belɛ esa akɛ wɔkɛ jamɔ aha ekome too, ejaakɛ eji “Nyɔŋmɔ ni biɔ he ni atuɔ ahaa ekome too.” (2 Mose 20:5, NW) Wɔnyɛŋ wɔsumɔ Nyɔŋmɔ ní yɛ nakai beaŋ nɔŋŋ lɛ, wɔsumɔ yiwalɛ jeŋ ni Satan ji enyɔŋmɔ lɛ. (Yakobo 4:4; 1 Yohane 2:15-17) Yehowa le nɔ̃ gbɔmɔ ni wɔteŋ mɔ fɛɛ mɔ bɔɔ mɔdɛŋ akɛ wɔɔji. (Yeremia 17:10) Kɛji akɛ wɔsumɔɔ jalɛ nifeemɔ lɛɛlɛŋ lɛ, enaa enɛ ni ebaaye ebua wɔ ni wɔŋmɛ wɔtsui shi yɛ wɔ daa gbi kaai amli. Akɛni ekɛ emumɔ krɔŋkrɔŋ lɛ ni yɔɔ hewalɛ waa lɛ fiɔ wɔ sɛɛ hewɔ lɛ, ebaaha wɔnyɛ wɔye efɔŋfeemɔ ni efa babaoo yɛ je nɛɛ mli lɛ nɔ kunim. (2 Korintobii 4:7) Ebaaye ebua wɔ hu koni wɔmɔ wɔ naanɔ wala yɛ shikpɔŋ nɔ paradeiso lɛ mli lɛ he hiɛnɔkamɔ ni mli wa waa lɛ mli. Mɛɛ anunyam gbɛkpamɔ po eji nɛkɛ! Esa akɛ wɔhiɛ asɔ enɛ waa diɛŋtsɛ, ni wɔjɛ wɔsuɔmɔ mli wɔsɔmɔ anɔkwa Nyɔŋmɔ lɛ, ni ji Yehowa, ni haa ebaa mli lɛ.
16. Mɛni esa akɛ osumɔ akɛ ooofee kɛfata mɛi krokomɛi akpekpei abɔ lɛ ahe?
16 Gbɔmɛi akpekpei abɔ ni yɔɔ shikpɔŋ lɛ nɔ fɛɛ lɛ kɛ miishɛɛ ekpɛlɛ lalatsɛ ni ŋma wiemɔi ni nyiɛ sɛɛ nɛɛ lɛ ninefɔɔ lɛ nɔ, akɛ: “Nyɛkɛ mi akafoa Yehowa dalɛ lɛ, ni nyɛhaa wɔ fɛɛ wɔwóa egbɛi lɛ nɔ!” (Lala 34:4) Yehowa miifɔ̃ bo nine koni obafata gbɔmɛi asafo babaoo ni amɛyifalɛ yaa hiɛ ni yɔɔ jeŋmaji fɛɛ mli ni feɔ nakai lɛ ahe.
Sanegbaa ni Akɛtiɔ Mli
• Mɛɛ gbɔmɔ nɛkɛ Yehowa ji? Esui srɔtoi lɛ fɛɛ eko he shishinumɔ ni mli ka shi faŋŋ ni wɔɔná lɛ he baa sɛɛnamɔ kɛhaa wɔ yɛ mɛɛ gbɛ nɔ?
• Te wɔɔfee tɛŋŋ wɔye wɔbua mɛi krokomɛi ni amɛkase anɔkwale ni kɔɔ Nyɔŋmɔ he lɛ?
• Le ni aaale Yehowa lɛ kɛ egbɛi amli ni aaanyiɛ yɛ lɛ kɔɔ mɛni he?
[Mfonirii ni yɔɔ baafa 14]
Yehowa baajɛ esuɔmɔ kpele lɛ mli ‘egbɛ edɛŋ koni eha nɔ fɛɛ nɔ ni hiɛ kã atɔ kɛ nii ni etaoɔ’