Mɛni Nyɔŋmɔ ni Aaasumɔ Lɛ lɛ Tsɔɔ?

AAAFEE afii akpei ekpaa ni eho nɛ, ni afɔ klɛŋklɛŋ fufɔoo ni ji adesa. Beni afɔ lɛ sɛɛ lɛ, enyɛ Hawa, kɛɛ: “Mina nuu yɛ Yehowa hefatamɔ naa.” (1 Mose 4:1) Ewiemɔ lɛ jieɔ lɛ kpo akɛ, eyɛ mli akɛ abu Hawa kɛ ewu Adam gbele fɔ, yɛ amɛ atuatsemɔ lɛ hewɔ moŋ, shi amɛhiɛ yɛ Nyɔŋmɔ ni Yehowa ji lɛ nɔ lolo. Sɛɛ mli lɛ amɛfɔ binuu kroko. Awo gbekɛbii hii lɛ agbɛi akɛ Kain kɛ Habel.

Beni gbekɛbii hii lɛ daraa lɛ, ŋwanejee ko bɛ he akɛ amɛkase Yehowa suɔmɔ he nii babaoo kɛtsɔ enibɔɔ lɛ amlipɛimɔ nɔ titri. Amɛná adebɔɔ mli sui sɔrɔtoi fɛfɛji kɛ kooloi kɛ kwɛ̃ɛnii sɔrɔtoi lɛ ahe miishɛɛ. Jeee akɛ Nyɔŋmɔ ha amɛ wala kɛkɛ, shi eha amɛ nyɛmɔ ni amɛkɛaana miishɛɛ yɛ shihilɛ mli hu.

Amɛkase akɛ, abɔ amɛ fɔlɔi lɛ akɛ mɛi ni yeɔ emuu, ni akɛ Yehowa shishijee yiŋtoo ji ni adesai ahi shi kɛya naanɔ. Adam kɛ Hawa tsɔɔ bɔ ni Eden trom lɛ yɔɔ fɛo ha lɛ mli amɛtsɔɔ amɛ, ni ebaabi ni amɛtsɔɔ amɛ nɔ hewɔ ni ashwie amɛ kɛjɛ paradeiso shia ni tamɔ nɛkɛ mli lɛ. Ekolɛ Kain kɛ Habel hu le ŋwɛi gbalɛ ni yɔɔ 1 Mose 3:15 lɛ he nɔ ko. Gbalɛ nɛɛ nɔ Yehowa tsɔ ejie eyiŋtoo kpo akɛ ebaajaje saji yɛ be ni sa mli kɛha mɛi ni sumɔɔ lɛ, ni amɛyeɔ lɛ anɔkwa lɛ.

Yehowa kɛ esui kpakpai lɛ ahe nikasemɔ baanyɛ akanya suɔmɔ kɛha Nyɔŋmɔ hiɛ ni amɛaasa yɛ Kain kɛ Habel mli. No hewɔ lɛ, amɛtee Yehowa ŋɔɔ kɛtsɔ afɔlei ni amɛkɛaaha lɛ lɛ nɔ. Biblia mli sane lɛ kɛɔ akɛ: “Ni eba mli akɛ yɛ mli aahu lɛ, Kain ŋɔ shikpɔŋ nibaa nii lɛ eko eyashã afɔle eha Yehowa; ni Habel hu kɛ etooi akromɔbii lɛ kɛ amɛfɔi lɛ eko baha.”—1 Mose 4:3, 4.

Bɔ ni amɛshweɔ ni amɛna Nyɔŋmɔ hiɛ duromɔ lɛ kɛ shishitoo nɔ̃ kɛha amɛkɛ lɛ teŋ wekukpaa fɔ shi. Nɔ ni jɛ mli ba yɛ naagbee ji Nyɔŋmɔ hiɛ atua ni Kain tse, yɛ be mli ni, nɔ ni tee nɔ ekanya Habel ji suɔmɔ diɛŋtsɛ ni eyɔɔ kɛha Nyɔŋmɔ. Kulɛ Habel nyɛŋ ana ekɛ Nyɔŋmɔ teŋ wekukpaa ni tamɔ nɛkɛ, kɛ etsɔko hiɛ enako Yehowa su kɛ ebaŋ kɛ eyiŋtoi ahe nilee.

Bo hu obaanyɛ ole Yehowa. Akɛ nɔkwɛmɔ nɔ lɛ, obaanyɛ okase kɛjɛ Biblia lɛ mli akɛ, Nyɔŋmɔ ji mɔ ni yɔɔ diɛŋtsɛ, jeee hewalɛ ko ni wala bɛ mli, ni yaa nɔ ebɔɔ nii kɛkɛ ni yiŋtoo ko bɛ sɛɛ. (Okɛto Yohane 7:28; Hebribii 9:24; Kpojiemɔ 4:11 he.) Biblia lɛ tsɔɔ hu akɛ, Yehowa ji “Nyɔŋmɔ musuŋtsɔlɔ kɛ durolɔ ni toɔ tsui, ni mɔbɔnalɛ kɛ anɔkwale fa pii.”—2 Mose 34:6.

“Toiboo Hi Fe Afɔle”

Taakɛ akɛ Kain kɛ Habel sane lɛ fee he mfoniri lɛ, Nyɔŋmɔ he nilee ni ayɔɔ kɛ bɔ ni ashweɔ ni abɛŋkɛ lɛ kpaakpa lɛ kɛkɛ faaa. Lɛlɛŋ, nyɛmimɛi hii enyɔ lɛ kɛ afɔlei baha Nyɔŋmɔ. Kɛlɛ, “Yehowa hiɛ sɔ Habel kɛ efɔle lɛ; shi Kain kɛ efɔle lɛ, ehiɛ esɔɔɔ no. Ni Kain mli wo la naakpa, ni etu ehiɛ.”—1 Mose 4:3-5.

Mɛni hewɔ Yehowa kpoo Kain afɔle lɛ? Ani nɔ ko yɛ efɔleshaa lɛ he ni shɛɛɛ? Ani Yehowa mli fu Kain akɛni ekɛ “shikpɔŋ nɔ nibaa nii” lɛ eko sha afɔle fe kooloo afɔleshaa hewɔ? Jeee nakai tsɔ̃. Yɛ sɛɛ mli lɛ, Nyɔŋmɔ kɛ miishɛɛ kpɛlɛ ŋmãa kɛ aduawai krokomɛi ni ejálɔi kɛsha afɔlei amɛha lɛ lɛ nɔ. (3 Mose 2:1-16) Belɛ, eyɛ faŋŋ akɛ, nɔ ko ejaaa yɛ Kain tsui he. Yehowa baanyɛ ale nɔ ni yɔɔ Kain tsui mli, ni ebɔ lɛ kɔkɔ akɛ: “Mɛɛba omli ewo la? Ni mɛɛba otu ohiɛ? Aso kɛji ofee ekpakpa lɛ, ohiɛ baŋ nyam lo? Shi kɛji ofeee ekpakpa lɛ, esha bu shinaa lɛ shi, ni bo osɛɛ gbɛ etaoɔ.”—1 Mose 4:6, 7.

Suɔmɔ diɛŋtsɛ ni ayɔɔ kɛha Nyɔŋmɔ lɛ fe afɔlei ni ashãa kɛkɛ. No hewɔ ni Yehowa wo Kain hewalɛ koni ‘efee ekpakpa’ lɛ. Nyɔŋmɔ miitao toiboo. Kulɛ toiboo ni afeɔ ahaa Nyɔŋmɔ nɛkɛ lɛ baaye abua Kain koni ena shishitoo kpakpa kɛha ekɛ Bɔlɔ lɛ teŋ wekukpaa kpakpa ni suɔmɔ yɔɔ mli. Biblia lɛ maa jara ni toiboo yɔɔ lɛ nɔ mi kɛtsɔɔ nɛkɛ wiemɔi nɛɛ anɔ: “Ani Yehowa naa shãa afɔlei kɛ gbee afɔlei ahe tsui tamɔ Yehowa gbee toiboo lo? Naa, toiboo hi fe afɔle, ni ninumɔ hu hi fe too agboi afɔ.”—1 Samuel 15:22.

Ama bɔ ni toiboo he hiaa ha lɛ nɔ mi yɛ sɛɛ mli, kɛ wiemɔi ni yɔɔ 1 Yohane 5:3 lɛ: “Enɛ ji Nyɔŋmɔ suɔmɔ lɛ, akɛ wɔye ekitai lɛ anɔ; ni ekitai lɛ waaa.” Gbɛ ko bɛ ni hi fe fɛɛ ni wɔɔtsɔ nɔ wɔjie wɔ suɔmɔ kpo wɔtsɔɔ Yehowa fe wɔhe shi ni wɔɔba wɔha enɔyeli. Enɛ tsɔɔ toiboo kɛha Biblia mli jeŋba he mlai lɛ. (1 Korintobii 6:9, 10) Etsɔɔ akɛ, ni wɔɔsumɔ nɔ ni hi, ni wɔnyɛ̃ nɔ ni ehiii.—Lala 97:10; 101:3; Abɛi 8:13.

Wɔ suɔmɔ kɛha Nyɔŋmɔ lɛ kpojiemɔ kome ni he hiaa ji suɔmɔ kɛha wɔ naanyo. Biblia lɛ kɛɔ wɔ akɛ: “Kɛji mɔ ko kɛɛ akɛ: ‘Misumɔɔ Nyɔŋmɔ,’ ni enyɛ̃ɛɔ lɛ diɛŋtsɛ enyɛmi lɛ, amalelɔ ji lɛ. Ejaakɛ mɔ ni sumɔɔɔ lɛ diɛŋtsɛ enyɛmi ni enaa lɛ lɛ, Nyɔŋmɔ ni enaaa lɛ lɛ, te aaafee tɛŋŋ ni eeenyɛ lɛ esumɔ hu?”—1 Yohane 4:20.

Abaanyɛ Akɛ Nyɔŋmɔ Ana Teemɔŋ Naanyobɔɔ

Mɛi komɛi baakɛɛ akɛ, ‘Mijaa Yehowa. Miboɔ emlai atoi. Mikɛ minaanyo gbɔmɔ yeɔ yɛ gbɛ ni hi nɔ. Mifeɔ enɛɛmɛi fɛɛ. Ni kɛlɛ, minuuu he akɛ mibɛŋkɛ Nyɔŋmɔ he. Minuuu he akɛ miyɛ suɔmɔ ni mli wa kɛha lɛ, ni enɛ haa minuɔ fɔyeli he.’ Mɛi komɛi baanyɛ anu he akɛ, amɛjeee mɛi ni sa akɛ amɛnine shɛɔ amɛkɛ Yehowa teŋ teemɔŋ wekukpaa ni tamɔ nɛkɛ nɔ.

Beni Kristofonyo ko kɛ nɔ ni miihe ashɛ afii 37 esɔmɔ Yehowa yɛ henɔjɔɔmɔ mli lɛ, eŋma akɛ: “Minu he shii abɔ yɛ mishihilɛ mli akɛ sɔɔmɔ ni mikɛhaa Yehowa lɛ yɛ jabejabe, ni ekolɛ mitsui bɛ nɔ ni mifeɔ lɛ mli. Shi mile akɛ, Yehowa sɔɔmɔ ji nii ni ja akɛ afeɔ, ni miŋmɛŋ ekpamɔ gbɛ. Shi kɛlɛ, be fɛɛ be ni makane nɔ ko ni mɔ ko miikɛɛ akɛ ‘etsui yi obɔ kɛ suɔmɔ kɛha Yehowa’ lɛ, misusuɔ akɛ, ‘Mɛni ejaaa yɛ mihe, akɛni minuko he nakai da lɛ?’ ” Te wɔɔfee tɛŋŋ wɔkɛ Nyɔŋmɔ ana teemɔŋ naanyobɔɔ?

Kɛ osumɔɔ mɔ ko lɛlɛŋ lɛ, ojwɛŋɔ nakai mɔ lɛ he shii abɔ. Oshweɔ waa ni obɛŋkɛ lɛ ejaakɛ ojwɛŋɔ ehe. Babaoo ni onaa lɛ, okɛ lɛ wieɔ, ni ojwɛŋɔ ehe lɛ, babaoo suɔmɔ ni oyɔɔ kɛha lɛ lɛ daa ji no. Shishitoo mla nɛɛ kɔɔ suɔmɔ ni ooona oha Nyɔŋmɔ lɛ hu he.

Mumɔ naa niŋmalɔ lɛ kɛɔ yɛ Lala 77:13 akɛ: “Majwɛŋ onitsumɔi lɛ fɛɛ he, ni masusu onifeemɔi lɛ ahe.” Sane nɔjwɛŋmɔ he hiaa yɛ suɔmɔ ni aaana aha Nyɔŋmɔ lɛ mli. Enɛ ji anɔkwale titri, yɛ anɔkwale ni eji akɛ anaaa lɛ lɛ hewɔ. Shi babaoo ni ojwɛŋɔ ehe lɛ, babaoo hu efeɔ mɔ ni yɔɔ pɔtɛɛ kɛhaa bo. Nɛkɛ gbɛ nɔ pɛ obaanyɛ otsɔ ona okɛ lɛ teŋ tsuiŋ kɛ hedɔɔ wekukpaa—ejaakɛ eji mɔ ni yɔɔ pɔtɛɛ kɛha bo.

Bɔ ni osumɔɔ ni ojwɛŋ Yehowa gbɛ̀i kɛ enifeemɔi ahe kpitiokpitio lɛ baadamɔ shii abɔ ni oboɔ lɛ toi lɛ nɔ. Oboɔ toi kɛtsɔɔ e-Wiemɔ, ni ji Biblia lɛ kanemɔ kɛ ekasemɔ daa nɔ. Lalatsɛ lɛ wieɔ gbɔmɔ ni yɔɔ miishɛɛ lɛ he akɛ mɔ ni “Yehowa mla lɛ he emii shɛɔ yɛ, ni emla lɛ he nɔŋŋ ejwɛŋɔ shwane kɛ nyɔɔŋ.”—Lala 1:1, 2.

Nɔ kroko ni he hiaa hu ji sɔlemɔ. No hewɔ ni Biblia lɛ woɔ wɔ ŋaa shii abɔ akɛ wɔsɔle lɛ—‘nyɛsɔlea daa,’ ‘nyɛsɔlea,’ “nyɛhiɛa sɔlemɔ mli daa,” “nyɛsɔlea ni nyɛkafɔa.” (Efesobii 6:18; 1 Korintobii 7:5; Romabii 12:12; 1 Tesalonikabii 5:17) Sɔlemɔ ni wɔfeɔ daa kɛhaa Yehowa lɛ baaha esumɔ wɔ sane, ni nɔmimaa ni wɔyɔɔ akɛ eboɔ toi lɛ baagbala wɔ kɛbɛŋkɛ lɛ. Lalatsɛ lɛ ma enɛ nɔ mi, beni ejaje akɛ: “Miisumɔ Yehowa, ejaakɛ ebo migbee kɛ mifaikpamɔ lɛ toi. Akɛni egbo etoi shi eha mi hewɔ lɛ, gbii abɔ ni mihiɛ kã nɛɛ, lɛ mabolɔ matsɛ́.”—Lala 116:1, 2.

Suɔmɔ Nyɔŋmɔ lɛ Kasemɔ

Yehowa hi kɛha wɔ. Akɛni eji jeŋ muu fɛɛ Bɔlɔ hewɔ lɛ, eyɛ faŋŋ akɛ, eyɛ nibii pii ni baahi ejwɛŋmɔ mli ni ebaatsu he nii hu. Ni kɛlɛ, Biblia lɛ kɛɔ wɔ akɛ, yɛ egbojee nɛɛ fɛɛ sɛɛ lɛ, ejwɛŋɔ ebɔɔ nii ni ji adesai lɛ ahe lolo. Esumɔɔ wɔ. (1 Petro 5:6, 7) Lalatsɛ lɛ kɛ ewiemɔi ma enɛ nɔ mi: “Yehowa, wɔ-Nuntsɔ, kwɛ bɔ ni ogbɛi lɛ je agbo yɛ shikpɔŋ lɛ fɛɛ nɔ, bo ni oŋɔɔ onunyam lɛ ohaa ŋwɛi. Kɛ mikwɛ oŋwɛi lɛ, ni ji owaobii anaa nitsumɔi lɛ, nyɔŋtsere kɛ ŋulamii ni osaa oto lɛ, mɛni ji adesa ni ojwɛŋɔ enɔ? Aloo gbɔmɔ bi ni osaraa lɛ po?”—Lala 8:2, 4, 5.

Mɛɛ gbɛ nɔ Yehowa eha gbɔmɔ ni gboɔ nɛɛ ehi ejwɛŋmɔ mli yɛ? Biblia lɛ haa hetoo: “Enɛ mli Nyɔŋmɔ suɔmɔ ni ekɛsumɔɔ wɔ lɛ je kpo yɛ, akɛ Nyɔŋmɔ tsu lɛ diɛŋtsɛ ebi koome lɛ kɛba je lɛŋ, koni wɔtsɔ enɔ wɔna wala. Enɛ mli suɔmɔ lɛ yɔɔ: jeee akɛ wɔ ni wɔsumɔ Nyɔŋmɔ, shi moŋ akɛ lɛ ni esumɔ wɔ, ni etsu ebi lɛ akɛ ebafee wɔhe eshai lɛ ahe kpatamɔ nɔ̃.”—1 Yohane 4:9, 10.

Kpatamɔ nɔ̃ ni sa nɛɛ ji Nyɔŋmɔ suɔmɔ lɛ he odaseyeli ni da fe fɛɛ yɛ mɛɛ gbɛ nɔ? Nyɛhaa wɔsusua nɔ ni ba yɛ Eden trom lɛ mli lɛ he. Yiŋkpɛɛ ni baka Adam kɛ Hawa hiɛ ji, kɛ amɛbaaba amɛhe shi amɛha Yehowa mla, kɛ gbɛkpamɔ akɛ amɛbaana wala ni yeɔ emuu kɛya naanɔ, aloo amɛbaatse atua amɛshi Yehowa koni gbele ajɛ mli aba. Amɛhala akɛ amɛbaatse atua. (1 Mose 3:1-6) Nakai ni amɛfee lɛ bu adesai fɛɛ gbele fɔ. (Romabii 5:12) Amɛkɛ henɔwomɔ shɔ̃ hegbɛ ni wɔyɔɔ akɛ wɔɔkpɛ wɔyiŋ wɔha wɔhe lɛ yɛ wɔdɛŋ. Wɔteŋ mɔ ko naaa nɔ ko kɛɛmɔ yɛ sane lɛ mli.

Shi kɛlɛ, Yehowa ejɛ suɔmɔ mli eha adesa ni gboɔ lɛ ehi ejwɛŋmɔ mli, eyoo haomɔ mli ni eyɔɔ lɛ. Kɛtsɔ E-Bi, Yesu Kristo afɔleshaa gbele lɛ nɔ lɛ, Yehowa kɛ nɔ ni wɔteŋ mɔ fɛɛ mɔ baadamɔ nɔ yɛ mla naa ni ehala wala loo gbele, toiboo loo atuatsemɔ eha lɛ diɛŋtsɛ ehe lɛ eha. (Yohane 3:16) Etamɔ nɔ ni Yehowa kɛ hegbɛ ni akɛaakojo wɔ ni damɔ nɔ ni wɔhalaa nɔ ha wɔ—hegbɛ ni wɔkɛaaku wɔsɛɛ kɛya Eden yɛ okadi gbɛ nɔ, koni wɔkpɛ wɔ diɛŋtsɛ wɔyiŋ. Enɛ ji suɔmɔ kpojiemɔ ni da fe fɛɛ eko ni afee.

Susumɔ piŋmɔ ni Yehowa ŋmɛ etsui shi yɛ mli, beni ena bɔ ni ajɛɔ, apiiɔ, ni asɛŋɔ ekromɔbi lɛ tamɔ awuiyelɔ ko lɛ he okwɛ. Ni Nyɔŋmɔ ŋmɛ etsui shi yɛ enɛ mli yɛ wɔ hewɔ. Esa akɛ bɔ ni wɔyɔseɔ suɔmɔ ni Yehowa jie lɛ kpo klɛŋklɛŋ yɛ wɔhe lɛ akanya wɔ, koni wɔ hu wɔsumɔ lɛ, ni ekanya wɔ ni wɔtao esɛɛ gbɛ. (Yakobo 1:17; 1 Yohane 4:19) Biblia lɛ fɔɔ wɔ nine akɛ, “nyɛdia Yehowa kɛ ehewalɛ lɛ sɛɛ, nyɛtaoa ehiɛ gbɛ daa. Nyɛkaia enaakpɛɛ nitsumɔi ni etsu lɛ, enaakpɛɛ nii kɛ kojomɔi ni jɛ edaaŋ lɛ.”—Lala 105:4, 5.

Ni aaana mɔ kɛ Nyɔŋmɔ teŋ tsakpaa kɛ suɔmɔ wekukpaa, ni afee eshieŋtsɛ lɛ jeee nɔ ni nyɛŋ aba mli. Nine baanyɛ ashɛ nɔ. Eji anɔkwale akɛ wɔnyɛŋ wɔkɛ suɔmɔ ni wɔyɔɔ kɛha Nyɔŋmɔ lɛ ato wɔkɛ adesai ateŋ wekukpaa he koni eŋmɛ pɛpɛɛpɛ. Suɔmɔ ni wɔnuɔ he kɛhaa wɔ hefatalɔ, fɔlɔi, nyɛmimɛi, bii, loo nanemɛi lɛ yɛ sɔrɔto yɛ suɔmɔ ni wɔyɔɔ kɛha Nyɔŋmɔ lɛ he. (Mateo 10:37; 19:29) Yehowa ni wɔɔsumɔ lɛ lɛ biɔ wɔ hetuu-kɛhamɔ, jamɔ, kɛ wɔhe nɔ ni wɔɔjɔɔ wɔha lɛ kwraa ni nɔ ko bɛ sɛɛ. (5 Mose 4:24) Wekukpaa kroko ko bɛ ni nibii ni wɔtsi tã nɛɛ yɔɔ mli. Ni kɛlɛ, wɔbaanyɛ wɔna henumɔ ni mli wa ni mli kwɔ wɔha Nyɔŋmɔ, yɛ woo kɛ gbɛ ni gbeyeishemɔ yɔɔ mli nɔ.—Lala 89:8.

Eyɛ mli akɛ oyeee emuu tamɔ Kain kɛ Habel moŋ, shi oyɛ nyɛmɔ ni okɛaasumɔ o-Bɔlɔ lɛ. Kain hala nɔ ni esumɔɔ, eyafata Satan he, ni ebatsɔ klɛŋklɛŋ adesa gbɔmɔgbelɔ. (1 Yohane 3:12) Nɔ ni tamɔɔɔ nakai lɛ, Yehowa baakai Habel akɛ nuu ni yɔɔ hemɔkɛyeli ni ja, ni akɛ wala yɛ Paradeiso ni baa lɛ mli baawo lɛ nyɔmɔ.—Hebribii 11:4.

Bo hu oyɛ nɔ ni obaahala. Yɛ Nyɔŋmɔ mumɔ lɛ kɛ e-Wiemɔ lɛ yelikɛbuamɔ hewɔ lɛ, obaanyɛ obasumɔ Nyɔŋmɔ diɛŋtsɛ “kɛ otsui fɛɛ kɛ osusumɔ fɛɛ kɛ ohewalɛ fɛɛ!” (5 Mose 6:5) Kɛkɛ lɛ, Yehowa hu baaya nɔ asumɔ bo, ejaakɛ “eji mɛi ni taoɔ esɛɛ gbɛ lɛ anyɔmɔwolɔ hu.”—Hebribii 11:6.

[Mfoniri ni yɔɔ baafa 7]

Nyɔŋmɔ kpɛlɛ Habel afɔleshãa lɛ nɔ