SANEBIMƆ 7
Kɛ́ Aanyɛ Minɔ ni Maná Bɔlɛ lɛ, Mɛni Mafee?
MƐNI OBAAFEE?
Feemɔ shihilɛ nɛɛ he mfoniri okwɛ: Nyɔji enyɔ pɛ nɛ ni Heather kɛ Mike bɔi nyiɛmɔ, shi enuɔ he tamɔ nɔ ni ele Mike afii abɔ nɛ. Amɛsɛndiɔ amɛhe tɛs mɛseji daa, amɛwieɔ yɛ foŋ nɔ ŋmɛlɛtswai abɔ, ni kɛ́ mɔ kome je wiemɔ ko shishi lɛ, mɔ kroko lɛ le nɔ ni ebaawie kɛtsa nɔ! Shi sanegbaa lɛ kɛkɛ shɛɛɛ Mike naa, eetao amɛná bɔlɛ hu.
Yɛ nyɔji enyɔ ni Heather kɛ Mike enyiɛ lɛ mli lɛ, nɔ pɛ ni amɛfeɔ ji, amɛmɔmɔɔ amɛniji amli, ni amɛshɔɔ amɛnaa kuku ko kɛkɛ. Heather sumɔɔɔ ni amɛfeɔ nɔ ko dɔŋŋ fe enɛɛmɛi pɛ. Shi yɛ nakai beiaŋ nɔŋŋ lɛ, esumɔɔɔ ni Mike kɛ lɛ akpa. Yɛ Heather gbɛfaŋ lɛ, Mike pɛ ji mɔ ni hãa enuɔ he akɛ ehe yɛ fɛo waa, ni akɛ eta yei fɛɛ nɔ. Kɛfata he lɛ, Heather kɛɔ ehe akɛ, ‘Mi kɛ Mike sumɔɔ wɔhe waa diɛŋtsɛ . . .’
Kɛ́ oda kɛshɛ he ni obaanyɛ okɛ mɔ ko anyiɛ kɛhã gbalashihilɛ, ni oyaje shihilɛ nɛɛ mli lɛ, mɛni obaafee?
SUSUMƆ HE JOGBAŊŊ DÃ!
Bɔlɛnamɔ ji nikeenii ni Nyɔŋmɔ kɛhã mɛi ni ebote gbalashihilɛ mli lɛ pɛ. Bɔlɛnamɔ ni tsɔɔ gbalashihilɛ hiɛ lɛ tsɔɔ akɛ abɛ bulɛ kɛhã nikeenii nɛɛ. Etamɔ nɔ ni mɔ ko eke bo mama fɛfɛo ko shi okɛfee tako
Kɛ́ otu kɛjɛ tso ko nɔ ni oka akɛ obaafiliki tamɔ loofɔlɔ lɛ, obaapila. Nakai nɔŋŋ kɛ́ oku jeŋba he mla ko mli, tamɔ nɔ ni kɛɔ akɛ: ‘Nyɛtsia nyɛhe kɛjea bɔlɛnamɔ jeŋba sha he’ lɛ, okɛ naagbai baakpe.—1 Tesalonikabii 4:3.
Kɛ́ oku nakai mla lɛ mli lɛ, mɛɛ naagbai komɛi okɛbaakpe? Biblia lɛ kɛɔ akɛ: ‘Mɔ fɛɛ mɔ ni kɛ ehe woɔ bɔlɛnamɔ jeŋba sha mli lɛ, eefee esha eeshi lɛ diɛŋtsɛ egbɔmɔtso lɛ.’ (1 Korintobii 6:18) Mɛɛ gbɛ nɔ enɛ ji anɔkwale?
Niiamlitaolɔi ena akɛ, bei pii lɛ, mɛi ni náa bɔlɛ be ni amɛboteko gbalashihilɛ mli lɛ kɛ naagbai ni nyiɛ sɛɛ nɛɛ ekomɛi kpeɔ.
AWERƐHOYELI. Oblahii kɛ oblayei ni ná bɔlɛ be ni amɛboteko gbalashihilɛ mli lɛ ateŋ pii ewie akɛ, sɛɛ mli lɛ edɔ amɛ waa akɛ amɛfee nakai.
AMƐHEEE AMƐHE AMƐYEEE. Kɛ́ mɛi kɛ amɛhe ná bɔlɛ amɛgbe naa lɛ, amɛteŋ mɔ fɛɛ mɔ biɔ ehe akɛ, ‘Namɔ ekoŋŋ mɔ nɛɛ kɛná bɔlɛ?’
GBƐKPAMƆ NI BAAA MLI. Yɛ oblayei babaoo agbɛfaŋ lɛ, kulɛ amɛbaasumɔ hii ni baabu amɛhe, jeee hii ni kɛ amɛ baagbe amɛbɔlɛnamɔ akɔnɔ. Oblahii pii hu yɔseɔ sɛɛ mli akɛ amɛsumɔɔ yoo kroko moŋ fe yoo ni kpɛlɛ ni amɛkɛ lɛ ná bɔlɛ lɛ.
Sane lɛ nɔŋŋ ji akɛ: Kɛ́ okpɛlɛ ni mɔ ko kɛ bo ná bɔlɛ be ni nyɛboteko gbalashihilɛ mli lɛ, nɔ ko ni jara wa waa ŋmɛɔ bo, ni enɛ tseɔ bulɛ ni ayɔɔ kɛhã bo lɛ nɔ kwraa. (Romabii 1:24) Ogbɔmɔtso lɛ jara wa kwraa fe nɔ ni esa akɛ oŋmɛɛ he ohã mɛi ni amɛkɛgbe amɛkɔnɔ!
“Tsi ohe kɛje bɔlɛnamɔ jeŋba sha he” kɛtsɔɔ akɛ obaa ojeŋ jogbaŋŋ. (1 Tesalonikabii 4:3) Kɛkɛ lɛ, wɔsɛɛ ko kɛ́ obote gbalashihilɛ mli lɛ, obaanyɛ okɛ ohefatalɔ lɛ aná bɔlɛ. Obaaná mli miishɛɛ kɛmɔ shi jogbaŋŋ, ni obaaye ohe kɛjɛ naagbai ni jɛɔ bɔlɛnamɔ ni tsɔɔ gbalashihilɛ hiɛ mli kɛbaa, tamɔ haomɔi, heshwamɔ, kɛ gbeyeishemɔi lɛ ahe.—Abɛi 7:22, 23; 1 Korintobii 7:3.
TE OSUSUƆ TƐŊŊ?
Ani mɔ ko ni sumɔɔ bo lɛɛlɛŋ lɛ baasumɔ ni ekɛ ogbɔmɔtso kɛ ohenumɔ ashwɛ bɔ ni esaaa?
Ani mɔ ko ni sumɔɔ bo lɛɛlɛŋ lɛ baasumɔ ni etsirɛ bo ni ofee nɔ ko ni baafite okɛ Nyɔŋmɔ teŋ wekukpaa lɛ?—Hebribii 13:4.