Teokrase Naanyobɔɔ Mli Ŋɔɔmɔ ni Wɔɔna
1 Yehowa Odasefoi tsɛɔ amɛhe akɛ “nyɛmi nuu” kɛ “nyɛmi yoo.” Enɛ tsɔɔ wekukpaa ni bɛŋkɛ kpaakpa ni esa akɛ eka Yehowa Nyɔŋmɔ tsuji fɛɛ ateŋ lɛ.
2 Wiemɔ “nyɛmi nuu” lɛ tsɔɔ “fɔlɔi enyɔ lɛ nɔŋŋ binuu.” Ani okɛ Yehowa tsuji ni amɛjɔɔ amɛhe nɔ lɛ fɛɛ nuɔ mumɔŋ wekukpaa ko ni miishɛɛ yɔɔ mli ni bɛŋkɛ kpaakpa he? Te wɔɔfee tɛŋŋ wɔha suɔmɔ ni yeɔ wɔhe odase akɛ wɔji nyɛmi nuu loo nyɛmi yoo kɛba mɛi ni fata wɔhe akɛ Kristofoi lɛ aya hiɛ?
Yɛ Kpeei Ashishi
3 Yesu kaselɔi lɛ yɔse bɔ ni ehe hiaa akɛ aaakpe kutuu yɛ hekome. (Bɔfoi 2:42, 46; 20:7, 8) Agbɛnɛ wɔbuɔ hegbɛ ni miishɛɛ yɔɔ mli ni wɔnaa ni wɔkɛ wɔnanemɛi Kristofoi bɔɔ lɛ akɛ nɔ ko ni he hiaa waa. (Rom. 16:3, 5) Shi, ani wiemɔi ni wɔwieɔ yɛ kpeei ashishi lɛ jieɔ lɛ kpo akɛ wɔsusuɔ wɔnyɛmimɛi hii kɛ yei lɛ amumɔŋ hilɛ-kɛ-hamɔ he waa diɛŋtsɛ? Wɔbaanyɛ wɔtsɔ wiemɔi ni wɔwieɔ yɛ kpeei ashishi lɛ nɔ wɔha suɔmɔ kɛ sui ni pɛsɛmkunya bɛ mli kɛ mɛi krokomɛi ahilɛ-kɛ-hamɔ ashwere. Wɔmiisumɔ ni wɔwo wɔnyɛmimɛi lɛ ahewalɛ ni amɛkɛ ekaa ajaje sanekpakpa lɛ ni amɛkɛ amɛ daa gbi shihilɛ mli nibii fɛɛ ato okadi kpakpa.—Heb. 10: 24, 25.
4 Hegbɛi babaoo yɛ kɛha teokrase naanyobɔɔ dani kpeei lɛ aje shishi kɛ kpeei lɛ asɛɛ. Esa akɛ wɔkɛ nɛkɛ be nɛɛ atsu nii ni wɔkɛlɛɛ wɔnaanyobɔɔ lɛ mli ni wɔkɛhere mɛi heei ahiɛmɛɛ ni wɔle mɛi krokomɛi babaoo bɔ ni wɔɔnyɛ. Shiɛmɔ mli niiashikpamɔi ni wɔɔgba mɛi krokomɛi lɛ kɛ sanegbaa ni tswaa mɔ maa shi baaye abua ni ewo mɛi krokomɛi hewalɛ.—1 Tes. 5:11, 15.
Naanyobɔɔ Ni Hi
5 Mɔ ko nyɛŋ ni ekɛ Nyɔŋmɔ anyiɛ yɛ be mli ni ekɛ gbɔmɛi ni yɔɔ yiwalɛ jeŋ ni he yeɔ nɛɛ mli ni kpɛlɛɔ nɔ fɛɛ nɔ ni Nyɔŋmɔ hiɔ lɛ nɔ lɛ miibɔ. Biblia lɛ bɔɔ kɔkɔ akɛ: “Naanyobɔɔ fɔŋ fiteɔ jeŋba kpakpa.” (1 Kor. 15:33) Mɛi komɛi ni yɔɔ asafo lɛ mli lɛ baasumɔ ni amɛfɔ nine amɛtsɛ gbɔmɛi ni amɛle amɛ yɛ je lɛ mli kɛ wekumɛi ni heee yeee ni bɛ anɔkwale lɛ he miishɛɛ kɛba amɛhiɛtserɛjiemɔi ashishi, ni amɛmiisusu akɛ enɛ baawo amɛ hewalɛ ni amɛkpɛlɛ anɔkwale lɛ nɔ. Shi, ani jwɛŋmɔ yɛ enɛ mli ni ani ekɛ Ŋmalɛi lɛ kpaa gbee?
6 Abɔ wɔ kɔkɔ akɛ wɔkwɛ jogbaŋŋ yɛ bɔ ni wɔkɛ gbɔmɛi ni yɔɔ je lɛ mli lɛ, mɛi ni heee yeee kɛ gbɔmɛi krokomɛi yeɔ haa lɛ he. (Kwɛmɔ June 15, 1989 Buu-Mɔɔ lɛ yɛ baafai 15-16.) Mɛni hewɔ esa akɛ wɔkɛ je lɛŋ bii ni yaa nɔ amɛdiɔ je lɛŋ gbɛi asɛɛ ni amɛtsɔmɔko Yehowa jalɔi lɛ aya nɔ abɔ kwraa? (2 Kor. 6:14, 15) Mɛi ni kuɔ amɛhiɛ amɛshwieɔ amɛmumɔŋ nibii anɔ lɛ baatao mɛi krokomɛi ni kɛ amɛhe kpɛtɛɔ je lɛ susumɔi kɛ gbɛi ahe moŋ fe ni amɛaatao ni amɛkɛ Kristofoi ni amɛdara yɛ mumɔŋ ni baanyɛ aye abua amɛ ni amɛhe awa yɛ hemɔkɛyeli lɛ mli lɛ aaabɔ. Amɛyɔseee akɛ hiɛtserɛjiemɔi ashishi ni amɛkɛ je lɛŋ bii ni bɛ gbɛjianɔtoo lɛ aaabɔ yɛ jɛmɛ lɛ baanyɛ agbɔjɔ amɛhemɔkɛyeli ni efite amɛ.—Okɛto 2 Tesalonikabii 3:14, 15 he.
7 Esa akɛ mɔ fɛɛ mɔ ni sumɔɔ akɛ edi anɔkwale lɛ sɛɛ lɛ atao nanemɛi ni amɛtuu amɛhe amɛha Yehowa ni baasumɔ ni amɛye amɛbua lɛ ni enyiɛ yɛ anɔkwale lɛ mli ni baaha eya ehiɛ yɛ Nyɔŋmɔ sɔɔmɔ mli. Wɔnanemɛi kɛ mɛi ni wɔkɛ amɛ bɔɔ lɛ baanyɛ ana wɔnɔ hewalɛ waa. No hewɔ lɛ kwɛ bɔ ni nilee yɔɔ mli akɛ wɔɔtao gbɔmɛi ni sheɔ Nyɔŋmɔ gbeyei ni kɛ amɛhe bɔɔ Yehowa he kpaakpa lɛ akɛ nanemɛi!