Sanekpakpa Lɛ Kɛhamɔ—Kɛ Sanesɛɛkɔmɔ
1 Bɔfo Paulo ma bɔ ni sanesɛɛkɔmɔ he hiaa yɛ sanekpakpa lɛ ni akɛhaa gbɔmɛi ni hiɛ hemɔkɛyelii sɔrɔtoi kɛ mɛi ni jɛ shihilɛi sɔrɔtoi amli lɛ nɔ mi. Mɛi komɛi kɛɔ yɛ wɔgbii nɛɛ amli akɛ amɛjaa Nyɔŋmɔ, yɛ be mli ni mɛi krokomɛi ediii mumɔŋ nibii asɛɛ ni amɛhiɛ esɔɔɔ mumɔŋ nibii ni sɛɛnamɔ yɔɔ he lɛ hu. Akɛ sanekpakpa lɛ shiɛlɔi lɛ, esa akɛ wɔha Maŋtsɛyeli lɛ he sane lɛ aŋɔɔ “gbɔmɛi sɔrɔtoi fɛɛ” naa kɛtsɔ sanesɛɛkɔmɔ ni wɔkɛaatsu nii yɛ sɔɔmɔ lɛ mli lɛ nɔ.—1 Kor. 9:19-23
Shiatsɛ Lɛ Ni Aaanu Lɛ Shishi
2 Sanesɛɛkɔmɔ kɛ nitsumɔ yɛ sɔɔmɔ lɛ mli lɛ kɔɔ nyɛmɔ ni wɔkɛaakudɔ wɔshiɛmɔ wiemɔ lɛ koni ekɔ nibii ni shiatsɛ lɛ nyaa he lɛ ahe. Enɛ biɔ hesaamɔ kpakpa. Kɛ shiɛlɔ lɛ le saji sɔrɔtoi babaoo ni awie he yɛ woji Wuji lɛ kɛ woji tɛtrɛbii lɛ amli lɛ jogbaŋŋ lɛ, ebaanyɛ ekɛ saji otii pii atsu nii yɛ sanekpakpa lɛ kɛhamɔ mli. Yɛ be mli ni wɔwieɔ wɔtsɔɔ onukpai, obalaŋtai loo gbekɛbii, weku yitsei, ŋamɛi, yei ni miitsu nii kɛ mɛi krokomɛi lɛ, ehe hiaa ni wɔsusu shihilɛ mli ni amɛyɔɔ lɛ he, koni wɔkɛ sanesɛɛkɔmɔ atsu nii ni wɔkɛhala sane ni wɔbaawie he wɔtsɔɔ amɛ lɛ.
3 Yɛ be mli ni obɛŋkɛɔ shiatsɛ lɛ, ha ohiɛ ahi nibii ni ebɔle ehe lɛ anɔ. Obaanyɛ okɔ sɛɛ akɛ shiatsɛ lɛ ji fɔlɔ, eyɛ jamɔ pɔtɛɛ ko mli, esumɔɔ eshia kwɛmɔ kɛ nibii krokomɛi. Kɛ oyoo enɛ pɛ lɛ, obaanyɛ okudɔ ohiɛkpamɔ wiemɔ lɛ ni esa shihilɛ mli ni shiatsɛ lɛ yɔɔ kɛ nibii ni enyaa-she lɛ ahe. Kɛ okɛ sanebimɔi tsu nii yɛ ŋaa mli, ni obo shiatsɛ lɛ hetooi atoi jogbaŋŋ lɛ, obaanyɛ oyoo ehemɔkɛyelii kɛ henumɔi kɛkɛ lɛ obaanyɛ ole gbɛ ni hi jogbaŋŋ nɔ ni oootsɔ otsa osanegbaa lɛ nɔ.
Owiemɔ Lɛ Ni Oooha Ekɔ Mɔ Loo Nɔ Pɔtɛɛ Ko He
4 Kɛ yɛ be mli ni oboteɔ shia lɛ mli lɛ ona gbekɛbii loo amɛ shwɛmɔ nibii lɛ, obaanyɛ okudɔ osanegbaa lɛ kɛtsɔ nɛkɛ gbɛ nɔ: “Wɔkɛ fɔlɔi ni yɔɔ akutso nɛɛ mli lɛ miigba gbɛtsɔɔmɔ ni amɛkɛhaa amɛbii lɛ ahe sane. Fɔlɔi pii susuɔ jeŋba kpakpa ni atsɔɔɔ yɛ skul sɔrɔtoi lɛ amli lɛ he. Ani ona naagba ko ni tamɔ nakai yɛ enɛ mli?” Bo shiatsɛ lɛ hetoo toi. Kɛ hetoo lɛ tsɔɔ akɛ shiatsɛ lɛ sumɔɔ Nyɔŋmɔjamɔ lɛ, obaanyɛ otsa nɔ akɛ: “Eji miishɛɛ sane akɛ Biblia lɛ tsɔɔ akɛ ehe miihia ni wɔ kɛ wɔbii fɛɛ ana gbɛtsɔɔmɔ ni nilee yɔɔ mli yɛ sane ni tamɔ nɛkɛ mli. Kwɛmɔ nɔ ni awie yɛ biɛ yɛ Abɛi 14:12 lɛ. . . ”
5 Kɛji akɛ shiatsɛ lɛ hetoo tsɔɔ akɛ ebuuu Biblia lɛ mli ŋaawoo lɛ, obaanyɛ okɛ sanesɛɛkɔmɔ atsu nii ni otsake oshiɛmɔ lɛ mli kɛtsɔ nɛkɛ gbɛ nɔ ni okɛɛ: “Ani egbaŋ onaa kɛ mibiɔ ni otsɔɔ mi nɔ hewɔ ni omu sane naa nakai lɛ?” Yɛ be mli ni obo ehetoo lɛ toi lɛ, obaanyɛ otsa nɔ akɛ: “Minuɔ nɔ hewɔ ni onuɔ he nakai lɛ shishi. Yɛ anɔkwale mli lɛ, mikane sane ko nyɛsɛɛ nɛɛ yɛ wolo nɛɛ mli ni miheɔ miyeɔ akɛ obaanya he.” Kɛ hetoo lɛ sa lɛ, gbalamɔ ejwɛŋmɔ kɛya dɛhiɛmɔ wolo ko, wolo tɛtrɛɛ ko aloo wolo lɛ eko mli yitso ni wieɔ nɔ hewɔ ni wɔbaanyɛ wɔkɛ wɔhe afɔ Biblia lɛ nɔ lɛ nɔ.
6 Kɛ wɔsaa wɔhe jogbaŋŋ ni wɔkɛ sanesɛɛkɔmɔ tsu nii yɛ Yehowa sɔɔmɔ mli lɛ, wɔbaanyɛ wɔkɛɛ taakɛ bɔfo Paulo kɛɛ lɛ, “Mitsɔ mihe nɔ fɛɛ nɔ miha mɛi fɛɛ, koni be fɛɛ be ni aaafee lɛ, mikɛhere mɛi komɛi ayiwala.”—1 Kor. 9:22; Abɛi 19:8.