Ogbɛfaŋnɔ Yɛ Tsumaa Kɛha Wɔsɛɛ Lɛ Mli
1 Ŋmɛnɛ, Kristofoi miiya nɔ amɛmiitsu mumɔŋ tsumaa nitsumɔ ko ni Yesu je shishi aaafee afii 1,960 ni eho nɛ beni ebɔi ekaselɔi lɛ anaabuamɔ lɛ he nii. (Mat. 4:17; 7:24, 25, 28; Yoh. 7:46) Yehowa ejɔɔ nɛkɛ nitsumɔ nɛɛ nɔ babaoo. (Abɛi 10:22) Yɛ be mli ni wɔyaa nɔ wɔtswaa Nyɔŋmɔ Maŋtsɛyeli lɛ he adafi lɛ, belɛ wɔmiimamɔ tsui hu bɔni afee ni etsu wɔsɛɛ be shweremɔ lɛ he nii.—Jaj. 11:6.
2 Eyɛ mli akɛ eebi ni asaa Maŋtsɛyeli Asai memeji lɛ babaoo moŋ, shi asai krokomɛi ahe miihia bɔni afee ni asafoi heei ni atoɔ amɛ shishi lɛ aya mli. Nyɛsɛɛ afi lɛ asafoi ni yɔɔ Ghana lɛ ayifalɛ tee hiɛ kɛ 16 yɛ naatsii lɛ fɛɛ sɛɛ. Akɛni akpɛlɛɛɛ ni wɔya Maŋtsɛyeli Asai ni yɔɔ lɛ po amli hewɔ lɛ, esa akɛ ato gbɛjianɔ krokomɛi aha asafoi heei nɛɛ kɛ ememeji lɛ hu fɛɛ. Su ni sa yijiemɔ ni nyɛmimɛi lɛ jie lɛ kpo yɛ hiamɔ nɛɛ he nitsumɔ mli lɛ he miiba sɛɛnamɔ babaoo diɛŋtsɛ.—Lala 41:1; Abɛi 19:17; Jaj. 11:1; Luka 14:13, 14.
Mɛi Pii Jɛɔ Amɛsuɔmɔ Mli Amɛkɛ Yelikɛbuamɔ Haa
3 Wɔjieɔ suɔmɔ ni wɔyɔɔ kɛha ‘nyɛmimɛi asafo kuu lɛ fɛɛ’ lɛ kpo kɛtsɔ shika ni wɔkɛyeɔ too kɛhaa Asafo Maŋtsɛyeli Asa Tsumaa Shika lɛ nɔ. (1 Pet. 2:17) Ni atswa adafi akɛ atsi wɔnitsumɔ lɛ naa etsɛɛɛ pɛ kɛkɛ ni asafoi pii ha amɛhiɛ kpa Asafo Maŋtsɛyeli Asa Tsumaa Shika, ni aje shishi yɛ Ghana yɛ September 1988 mli lɛ nɔ. Shi kɛlɛ, asafoi fioo komɛi eha ehi amɛjwɛŋmɔ mli ni amɛtee nɔ amɛkɛ tooyeli emaje yɛ anɔkwayeli mli daa kɛha Shika lɛ, ni enɛ hewɔ lɛ beni shɛɔ October 1, 1990 lɛ, no mli lɛ shika ni yɔɔ mli ji ₵2,088,276.00. Enɛ sa yijiemɔ waa diɛŋtsɛ. Shi, Maŋtsɛyeli Asai enyiɛ nɛkɛ shika nɛɛ baanyɛ amamɔ kɛji ajie naatsii lɛ? Ni hehiamɔ lɛ miiya nɔ yɛ be mli ni naabuamɔ nitsumɔ lɛ yaa nɔ oyayaayai lɛ. No hewɔ lɛ esa akɛ onukpai lɛ akwɛ koni akadi tooyeli adeka kɛha Asafo Maŋtsɛyeli Asa Tsumaa Shika lɛ jogbaŋŋ ni mɛi fɛɛ ale he ni ema hu. Akɛ tooyeli ni nine baashɛ nɔ kɛ shika ni akɛfa ni abaawo lɛ fɛɛ baatsu nii ni akɛmamɔ Maŋtsɛyeli Asai heei kɛji aŋmɛɛ wɔhe ni wɔbaanyɛ wɔmamɔ tsui ekoŋŋ lɛ.
4 Asafo lɛ, kɛ agbɛnɛ wɔ fɛɛ wɔmiisumɔ ni wɔtsɔɔ hiɛsɔɔ ni mli kwɔ yɛ aŋkroaŋkroi kɛ wekui babaoo ni yeɔ too daa kɛhaa Asafo Maŋtsɛyeli Asa Tsumaa Shika lɛ hewɔ. Asafoi pii ekpɛ amɛyiŋ akɛ amɛkɛ shika baamaje kɛha nɛkɛ nitsumɔ nɛɛ. Kpokpai komɛi hu ejɛ amɛsuɔmɔ mli amɛfee yiŋkpɛi ni tamɔ nakai nɔŋŋ.
5 Ani ohe esa yɛ tsumaa nitsumɔ mli? Kɛji nakai ni obaanyɛ okɛ ohe aha ni oye obua kɛha Maŋtsɛyeli Asa maa lɛ, no lɛ obaanyɛ oha nyɛ asafo lɛ mli onukpai lɛ kɛ kpokpaa nɔkwɛlɔ lɛ ale. Ninenaa nitsulɔi ni he esa ahe baahia yɛ maŋ nɛɛŋ he fɛɛ he kɛji ajie naatsii lɛ ni wɔje Maŋtsɛyeli Asa maa he gbɛjianɔtoo lɛ shishi lɛ. Kɛfata he lɛ, abaatsɔse nyɛmimɛi hii ni he esa yɛ mumɔŋ lɛ hu yɛ Kpokpaa Tsumaa Ajinafoi Akui ni Asafo lɛ ehala lɛ agbɛtsɔɔmɔ shishi koni amɛtsu nitsumɔ ni he hiaa lɛ bɔni afee ni akɛye abua asafoi pii yɛ amɛtsumaa nitsumɔi lɛ amli.
Gbɛfaŋnɔ Ni Kpokpaa Tsumaa Ajinafoi Akuu Lɛ Tsuɔ
6 Ekolɛ esa akɛ wɔtsɔɔ gbɛfaŋnɔ ni Kpokpaa Tsumaa Ajinafoi Akui lɛ tsuɔ he nii lɛ mli. Asafo lɛ halaa Kpokpaa Tsumaa Ajinafoi Akui yɛ maji fɛɛ ni Asafo Maŋtsɛyeli Asa Tsumaa Shika tooyeli lɛ etee hiɛ bɔ ni sa ni abaanyɛ ajɛ mli akɛ shika afa asafoi lɛ ni amɛkɛmamɔ Maŋtsɛyeli Asai lɛ amli. Kpokpaa Tsumaa Ajinafoi Akui lɛ kɛ yelikɛbuamɔ haa yɛ Maŋtsɛyeli Asai ahe gbɛjianɔtoo kɛ amɛmaamɔ fɛɛ mli. Nɛkɛ ajinafoi akui nɛɛ yɛ tsumaa he woji ni Asafo lɛ kɛha ni nyɛɔ ehaa anaa gbɛi ni yɔɔ oya kɛha tsumaa. Nyɛmimɛi ni sɔmɔɔ yɛ ajinafoi akui lɛ amli lɛ ji onukpai ni yɔɔ niiashikpamɔ, ni amɛbaanyɛ amɛkɛ ŋaawoi ni he yɔɔ sɛɛnamɔ aha yɛ Maŋtsɛyeli Asai ni jara waaa tsɔ ni yɔɔ fɛo hu kɛ agbɛnɛ nɔ ni afiteŋ shika kɛ be babaoo yɛ he lɛ maa he. Niiashikpamɔ ni amɛyɔɔ lɛ hewɔ lɛ, amɛbaanyɛ amɛye amɛbua asafo lɛ mli onukpai lɛ ni amɛkpɛ amɛyiŋ kɛji ebaahi moŋ akɛ asaa Maŋtsɛyeli Asa momo ko aloo ama ehee, ni amɛbaanyɛ amɛye amɛbua amɛ ni amɛkpɛ amɛyiŋ kɛji he ni ahala akɛ abaama tsu lɛ yɛ lɛ hu hi dani ahe ni awo he nyɔmɔ. Amɛbaanyɛ amɛye amɛbua onukpai lɛ ni amɛna shika bɔ ni he baahia kɛha tsu lɛ maa kɛ agbɛnɛ jara ni abaanyɛ akɛhɔɔ Maŋtsɛyeli Asa ko ni yɔɔ momo hu.
7 Dani abaahe shikpɔŋ ko kwraa lɛ, nilee yɛ mli akɛ akɛ Kpokpaa Tsumaa Ajinafoi Akuu lɛ baasusu he da. Ahala nɛkɛ ajinafoi akui nɛɛ bɔni afee ni amɛye amɛbua kɛ Maŋtsɛyeli Asai amaamɔ yɛ hei pɔtɛɛ komɛi ni kpokpai babaoo yɔɔ, ni amɛbaanyɛ amɛye amɛbua yɛ shikpɔŋ hemɔ hu mli. Amɛyɛ gbɛtsɔɔmɔi ni baanyɛ aye abua nyɛmimɛi lɛ ni amɛkɛ naagbai ni nyɛɔ ebaa yɛ shikpɔŋ taomɔ mli lɛ eko akakpe. Aha kpokpaa nɔkwɛlɔi lɛ fɛɛ ele ajinafoi akuu lɛ sɛinɔtalɔ lɛ gbɛi, edrɛs, kɛ telifon yibɔ, ni ebaanyɛ ekɛ adafitswaa nɛɛ aha asafo lɛ mli onukpai lɛ kɛ ehe miihia.
8 Kɛji aahala he ko ni abaama Maŋtsɛyeli Asa yɛ yɛ maŋtiase ko ni asafoi pii yɔɔ mli lɛ, no lɛ esa akɛ asafo lɛ mli onukpai lɛ kɛ Kpokpaa Tsumaa Ajinafoi Akuu lɛ, kpokpaa nɔkwɛlɔ loo nɔkwɛlɔi lɛ, maŋtiase nɔkwɛlɔ lɛ, kɛ agbɛnɛ, kɛ ebaahi lɛ, asafoi ni bɛŋkɛ lɛ amli onukpai lɛ asusu sane lɛ he. Enɛ baanyɛ aye abua asafo lɛ mli onukpai lɛ ni amɛhala he ko ni he baaba sɛɛnamɔ aha asafoi ni efee ekome kɛmaa tsu lɛ ni ekolɛ ebaaha Maŋtsɛyeli Asai ni bɛŋkɛ ni asafoi babaoo kpeɔ yɛ mli lɛ hu he naagbai lɛ aba shi, ni ebaaha asafoi lɛ hu aya amɛhiɛ yɛ nakai shikpɔŋkuku lɛ mli. Yɛ maji wuji amli lɛ, efɔɔ kaa akɛ asafoi etɛ loo nɔ ni fa fe nakai kpeɔ yɛ Maŋtsɛyeli Asa kome mli. Ni yɛ hei ni mɛi faaa tsɔ po lɛ, abaanyɛ ahala he ko ni baahi aha asafoi enyɔ loo nɔ ni fa fe nakai.
9 Akɛni amɛkɛ gbɛtsɔɔmɔi ni Asafo lɛ kɛha lɛ tsuɔ nii hewɔ lɛ. Kpokpaa Tsumaa Ajinafoi Akui lɛ kɛ sɔɔmɔ ni he yɔɔ sɛɛnamɔ haa yɛ be mli ni amɛyeɔ amɛbuaa asafoi lɛ ni amɛsaa loo amɛmamɔɔ tsui heei lɛ. Yɛ be mli ni amamɔɔ tsui lɛ, atoɔ mɛi ni kɛ amɛhe eha kɛha nitsumɔ lɛ ahe gbɛjianɔ kɛha be mli ni amɛhe hiaa yɛ he ni amaa tsu lɛ yɛ lɛ pɛ koni amɛ asafoŋ kpeei ni esa akɛ amɛya kɛ shiɛmɔ nitsumɔ lɛ hu ni esa akɛ amɛkɛ amɛhe awo mli lɛ akaŋmɛɛ amɛ. Kpokpaa Tsumaa Ajinafoi Akuu lɛ ekome kɛɛ: “Akɛni wɔtee nɔ wɔkɛ Asafo lɛ gbɛtsɔɔmɔi lɛ tsu nii hewɔ lɛ, eye ebua wɔ ni wɔha tsumaa nitsumɔi lɛ efee mlɛo ni etee nɔ oya hu.”
10 Gbɛjianɔtoo kɛ ninenaa nitsumɔi ni akaseɔ yɛ nɛkɛ nitsumɔi nɛɛ amli lɛ eye ebua yɛ kpeei Asa maamɔ mli ni eye ebua nyɛmimɛi lɛ hu yɛ tsumaa mli yɛ be mli ni adebɔɔ mli oshara ko eba sɛɛ. Nɛkɛ ninenaa nitsumɔi ni akase nɛɛ eha mɛi komɛi po ahe esa akɛ amɛsɔmɔ yɛ Betel tsumaa alo emlilɛɛmɔ nitsumɔi amli.
11 Wɔ fɛɛ wɔbaanyɛ wɔjie mlihilɛ kpo kɛtsɔ ekome ni wɔkɛ mɛi ni kwɛɔ tsumaa nitsumɔ lɛ nɔ lɛ baafee lɛ nɔ. Nɛkɛ gbɛ nɔ atsɔɔ atsuɔ nitsumɔ ni he hiaa lɛ ‘kɛgbeɔ naa kwraa’ ni atsuɔ “kɛ miishɛɛ, . . . shi jeee kɛ ŋtsɔidɔɔmɔ.” (Bɔfoi 14:26; Heb. 13:17) Kpokpaa Tsumaa Ajinafoi Akuu ko ni yɔɔ Michigan, U.S.A. lɛ nyɛ ebɔ amaniɛ akɛ: “Ekomefeemɔ ni yɔɔ asafoi etɛ lɛ ateŋ lɛ yɛ sɔrɔto kwraa . . . Nyɛmimɛi lɛ fɛɛ jie mumɔŋ salɛ kpo. Wɔna miishɛɛ waa akɛ wɔkɛ amɛ aaatsu nii. Eji nitsumɔ ni wɔbaakai be fɛɛ be.”
Bɔ Ni Afeɔ Anaa Shika Kɛha Maŋtsɛyeli Asai Amaamɔ
12 Esa akɛ ato shika ni he baahia lɛ he gbɛjianɔ kɛjɛ shishijee kwraa. (Luka 14:28-30) Esa akɛ onukpai lɛ akwɛ kɛji asafo lɛ baanyɛ awo nyɔmɔ kɛha emaa lɛ kɛtsɔ nii amli ni amɛaatao ni amɛkɛkpɛ amɛyiŋ yɛ (1) shika bɔ ni abaanyɛ ana kutuu ni akɛye abua ni akɛhe shikpɔŋ kɛ agbɛnɛ tsu lɛ maa he nyɔmɔ lɛ hu fɛɛ, (2) shika bɔ ni nyɛmimɛi lɛ baanyɛ amɛkɛfa kɛ be sɛɛjɛkɛmɔ ni shika lɛ baanyɛ ahi asafo lɛ dɛŋ, kɛ (3) shika bɔ ni shiɛlɔi lɛ ekpɛ amɛyiŋ akɛ amɛbaaha daa nyɔŋ nɔ ni akɛwo shika ni ayafa lɛ kɛ tsu lɛ he nyɔji fɛɛ hu yɛ be mli ni amaa lɛ he.
13 Yɛ no sɛɛ lɛ, asafoi ni taoɔ yelikɛbuamɔ yɛ shika gbɛfaŋ kɛjɛ Asafo Maŋtsɛyeli Asa Tsumaa Shika lɛ mli lɛ amli onukpai lɛ kɛ kpokpaa nɔkwɛlɔ lɛ asusu tsu ni amɛbaama lɛ kɛ shika ni he hiaa kɛha emaa lɛ he, ni ebaaye ebua amɛ kɛtsɔ nibii ni he hiaa amɛ kɛ tsu lɛ he nibii ni he hiaa ni eeeha Asafo lɛ ale lɛ nɔ. Beni kpokpaa nɔkwɛlɔ lɛ kɛ adafitswaa nɛɛ emaje Asafo lɛ sɛɛ lɛ, akɛ ehetoo baamaje asafoi ni ekɔɔ amɛhe lɛ tɛɛ. Akɛ shika yelikɛbuamɔ lɛ baaha fiofio yɛ be mli ni anaa shika lɛ kɛ agbɛnɛ yɛ bɔ ni hiamɔ lɛ ji lɛ naa.
Hiɛmɔ Mumɔ Ni Yɔɔ Ekaa Mli
14 Esa akɛ wɔjie nyɛmimɛi lɛ fɛɛ ayi yɛ amɛsuɔmɔ mli ni amɛjɛɔ amɛfiɔ Asafo Maŋtsɛyeli Asa Tsumaa Shika lɛ sɛɛ lɛ hewɔ. Atsiko Shika lɛ naa. Shi moŋ, eeya hiɛ. Shi esa akɛ wɔha eya hiɛ oyayaayai, yɛ mɛi heei abɔ ni baaba asafo lɛ mli kɛji ajie naatsii lɛ hewɔ. Be ni esa akɛ wɔsaa wɔhe kɛha Maŋtsɛyeli Asai babaoo amaamɔ oyayaayai yɛ maŋ nɛɛ mli fɛɛ ji amrɔ nɛɛ. No hewɔ lɛ yaa nɔ ojɛ osuɔmɔ mli oye too kɛha Shika lɛ namɔ. Wɔmiiwo nyɛ fɛɛ hewalɛ ni nyɛku sɛɛ nyɛkane nɔ ni aŋma ahɔ wolo nɛɛ mli nɔ ni je kpo yɛ September, 1988 lɛ ekoŋŋ. No sɛɛ lɛ kadimɔ gbɛfaŋnɔ ni oyɔɔ tsumɔ kɛha nɛkɛ tsumaa kɛha wɔsɛɛ nɛɛ jogbaŋŋ, ni okɛ sɔlemɔ awo lɛ obɔ.
15 Yɛ be mli ni amaa Maŋtsɛyeli Asa hee lɛ, mɔdɛŋbɔɔ, ekaa, kɛ mumɔ kpakpa ni anaa yɛ he lɛ yeɔ ebuaa ni nitsumɔ lɛ yeɔ omanye. Esa akɛ nakai mumɔ lɛ nɔŋŋ aya nɔ yɛ be mli ni wɔbɔɔ mɔdɛŋ akɛ wɔɔha mɛi pii abana anɔkwale lɛ he nilee ni wɔwoɔ amɛ hewalɛ ni amɛkɛ wɔ akpe yɛ Maŋtsɛyeli Asa lɛ nɔ lɛ. Ekaa ni tamɔ nɛkɛ lɛ ji hiɛsɔɔ ni jɛɔ nɔyaa ni wɔnaa yɛ mɛi abɔ ni baa kpeei kɛ agbɛnɛ bɔ ni asafo muu lɛ fɛɛ shwereɔ haa lɛ mli baa lɛ he lɛ kpojiemɔ yɛ faŋŋ mli.
16 Yɛ be mli ni wɔyaa nɔ wɔlɛɛɔ wɔsɔɔmɔ nitsumɔ lɛ mli, ni wɔmiaa wɔhiɛ waa yɛ nitsumɔ ni ka wɔhiɛ lɛ mli lɛ, ŋwanejee ko bɛ he akɛ Yehowa jɔɔmɔ baaya nɔ ahi wɔnɔ. (Luka 13:24) Wɔleee nɔ shweremɔ kɛ nɔyaa ni wɔbaana yɛ wɔsɛɛ be mli. Shi ehe miihia ni wɔfee klalo ni wɔhere mɛi abɔ ni baafata wɔhe akɛ jalɔi lɛ atuu. Enɛ biɔ hesaamɔ yɛ wɔgbɛfaŋ bianɛ. No hewɔ lɛ, wɔsɔleɔ kɛhaa Yehowa jɔɔmɔ kɛ egbɛtsɔɔmɔ. Yɛ be mli ni wɔmamɔɔ tsui kɛha wɔsɛɛ lɛ, eba akɛ wɔ fɛɛ wɔkɛ Yehowa aaafee nitsulɔi—yɛ heloo mli, yɛ shika gbɛfaŋ kɛ mumɔŋ hu. Eka shi faŋŋ akɛ ebaajɔɔ wɔ yɛ be mli ni wɔtsuɔ mɛi ni kɛ oyaiyeli shaa foi kɛbaa e-Maŋtsɛyeli gbɛjianɔtoo lɛ mli lɛ ahe nii jogbaŋŋ yɛ nɛkɛ naagbee gbii nɛɛ amli lɛ.—Yes. 60:8, 10, 11, 22.