‘Sanekpakpa Lɛ He Ni Wɔɔfa Yɛ Mla Naa’

¹ Nyɔŋ nɛɛ ji nyɔji 18 pɛpɛɛpɛ ni atsɔ redio lɛ nɔ atswa adafi yɛ gbɛ ni ejaaa nɔ atsi Yehowa webii anitsumɔ naa yɛ maŋ nɛɛ mli. Taakɛ bɔ ni eka shi faŋŋ nyɛbaakai lɛ, eshishijee gbii lɛ mli bawa ni ekɛ nɔnyɛɛ babaoo hu ba. Wɔteŋ mɛi komɛi po fo beni wɔna wɔnyɛmimɛi maŋsɛɛ sanekpakpa shiɛlɔi ni ashwie amɛ kɛ agbɛnɛ Betel kɛ Maŋtsɛyeli Asai lɛ babaoo ni mɛi eyatara naa amɛmiibu he lɛ. Ebafee kaa be diɛŋtsɛ!

² Te ebalɛ tɛŋŋ? Eŋɔɔ wɔnaa waa akɛ wɔɔha nyɛle akɛ wɔteŋ mɛi ni fa fe 31,000 ehiɛ wɔ emuuyeli mli yɛ nɛkɛ shihilɛ ni kaa mɔ nɛɛ mli ni mɛi heei ohai abɔ krokomɛi hu ebafata wɔhe. Beni 1990 sɔɔmɔ afi lɛ baa naagbee yɛ August 31 lɛ, no mli lɛ wɔ akɔntaabuu akɛ, kɛ aja mli lɛ, shiɛlɔi 31,089 buɔ amɛshiɛmɔ nitsumɔ lɛ he akɔntaa yɛ daa nyɔŋ nɔ. Ato asafoi heei nyɔŋma-kɛ-ekpaa shishi yɛ afi lɛ mli. Ni nɔ ni fe fɛɛ ji, mɛi heei 556 ku amɛhiɛ amɛshwie naatsii lɛ nɔ, ni amɛkɛ ekaa hala akɛ amɛkɛ nu mli baptisimɔ baafee amɛhenɔjɔɔmɔ kɛha Yehowa lɛ he okadi. Amɛteŋ mɛi pii yɛ ni klɛŋklɛŋ kwraa ni amɛfataa wɔhe yɛ shiɛmɔ nitsumɔ lɛ mli nɛ, no hewɔ lɛ wɔna nɔyaa ni ji oha mlijaa 1 yɛ afi lɛ mli. Eka shi faŋŋ akɛ Yehowa ewaje wɔ.

Wɔɔna Amanehulu Yɛ Jalɛ Hewɔ

³ Yɛ nakai beaŋ nɔŋŋ lɛ, eji anɔkwale akɛ wɔnyɛmimɛi lɛ ateŋ mɛi pii kɛ kaai sɔrɔtoi ekpe. Akɛ mɛi pii eyawo polisifoi atsui ni mli jeɔ fu mli, ni mɛi krokomɛi hu, mɛi ni kɛɛ amɛkwɛɔ ni ayeɔ mla nɔ lɛ eyi amɛ ni shishinumɔ ko bɛ he, yɛ mli ni mɛi komɛi hu ena amanehului krokomɛi yɛ gbɛ ni ejaaa nɔ​—enɛ fɛɛ yɛ hemɔkɛyeli ni amɛyɔɔ yɛ Yehowa mli lɛ hewɔ. Yɛ anɔkwale mli lɛ, beni wɔŋmaa sane nɛɛ, no mli lɛ sane ko ni kɔɔ wɔnyɛmimɛi hii kɛ yei kpawo komɛi ahe lɛ yɛ saneyeli he ni abaaye. Ni kɛlɛ, taakɛ bɔfoi lɛ ji lɛ, nɛkɛ nyɛmimɛi hii kɛ yei nɛɛ emia amɛhiɛ, ‘ni amɛmii shɛɔ amɛhe, ejaakɛ abu amɛ mɛi ni sa akɛ abɔɔ amɛ ahora, yɛ Yesu Kristo gbɛi lɛ hewɔ.’​—Bɔfoi 5:⁠41.

⁴ Amrɔ nɛɛ nɔnyɛɛ lɛ naa eba shi kwraa yɛ he fɛɛ he. Shi kɛlɛ, wɔleee bei abɔ ni Yehowa baaŋmɛ gbɛ ni shihilɛ nɛɛ atsa nɔ nɛkɛ aloo he ni eeeŋmɛ henyɛlɔi lɛ agbɛ ni amɛya nɔ kɛyashi. No hewɔ lɛ esa akɛ wɔya nɔ wɔjie tsuishiŋmɛɛ su kpo yɛ be mli ni wɔboɔ ŋaawoo wiemɔi nɛɛ toi lɛ: “Kwɛmɔ Yehowa gbɛ ni onyiɛ egbɛ lɛ nɔ, ni eeewo onɔ, koni shikpɔŋ lɛ atsɔ onɔ.”​—Lala 37:⁠34.

⁵ Yɛ be mli ni wɔjieɔ nɛkɛ tsuishiŋmɛɛ nɛɛ kpo lɛ, ehe miihia hu ni wɔkwɛ wɔhe nɔ jogbaŋŋ yɛ nɔ fɛɛ nɔ mli, ejaakɛ wɔle akɛ wɔhenyɛlɔ Abonsam lɛ miiya nɔ lolo “eetao mɔ ni eeemi.” (1 Pet. 5:⁠8) Bei komɛi lɛ, mɛi ni kwɛɔ mla nɔ yeli he nitsumɔ nɔ lɛ ateŋ mɛi komɛi tsɔɔ wɔnyɛmimɛi lɛ tsɔne. No hewɔ esa akɛ wɔkwɛ wɔhe nɔ jogbaŋŋ ni wɔkagbee nɛkɛ tsɔnei nɛɛ amli. Enɛ hewɔ lɛ, kɛ polisifonyo ko aloo militia (milishia) nitsulɔi lɛ ateŋ mɔ ko miibi bo saji ni ekɛta odaaŋ lɛ, kaakɛɛ lɛ nɔ ko ni kaaŋma nɔ ko hu oha lɛ.

Hegbɛi Ni Oyɔɔ

⁶ Yɛ gbɛ kroko nɔ lɛ, kɛ polisifonyo ko aloo militia (milishia) nitsulɔ ko kɛɛ bo akɛ emɔ bo lɛ, okɛ lɛ akapele he kwraa. Okɛ lɛ aya polioe station aloo militia (milishia) nitsumɔ he lɛ dioo kɛ bulɛ. Kɛji nyɛshɛ jɛmɛ ni akɛɛ owie lɛ, okɛ bulɛ kɛ ekaa aha amɛle yɛ faŋŋ mli akɛ onyɛŋ okɛɛ nɔ ko, ja amɛŋma naafolɔmɔ ni akɛshiɔ bo lɛ, kɛ mla ni amɛkɛɛ otse hiɛ atua lɛ ni amɛha bo wolo lɛ eko, ni agbɛnɛ hu amɛha bo hegbɛ ni okɛ omlalelɔ loo lɔya awie da. Kaatsake oshidaamɔ nɛɛ kɔkɔɔkɔ, ejaakɛ no pɛ ji gbɛ ni oootsɔ nɔ oha amɛle akɛ ole hegbɛi ni oyɔɔ lɛ jogbaŋŋ. Mla ko enyɛɛɛ onɔ akɛ ofee nɔ kroko. Kɛji sɛɛ mli lɛ, ona akɛ eja akɛ okɛɛ nɔ ko lɛ, no lɛ esa akɛ okwɛ jogbaŋŋ ni okɛ mɛi krokomɛi akawo sane mli. Wiemɔ oha okome ohe pɛ, ni okɛ polisifoi lɛ akaya nyɛmimɛi hii loo yei krokomɛi ashiai.

⁷ Esa akɛ oha nyɛmimɛi krokomɛi lɛ ale enɛ amrɔ nɔŋŋ, koni amɛnyɛ amɛto gbɛjianɔ ni mɔ ko adamɔ shi ni ajie bo kɛba shia. Akɛni yɛ bei babaoo mli lɛ ayakwɛɔ mɛi ni akɛyawoɔ polisifoi atsuŋ lɛ ashiai akɛni asusuɔ akɛ amɛhiɛ nibii ni “agu” hewɔ lɛ, amrɔ nɔŋŋ ni abaanu akɛ amɔ mɔ ko lɛ, ehe miihia ‘ni nyɛmimɛi lɛ ayajie nibii ni he hiaa waa, titri lɛ asafo lɛ he nibii ni aŋmala ashwie shi lɛ fɛɛ kɛjɛ mɔ ni amɔ lɛ lɛ shia lɛ oya.

⁸ Ehi jogbaŋŋ akɛ ooole akɛ Ghana mla eŋmɛɛɛ gbɛ ni polisifoi aloo militia (milishia) nitsulɔi lɛ po atsi “mɔ ni asusuɔ kɛkɛ akɛ efee efɔŋ” lɛ naa fe ŋmɛlɛtswai 48. Esa akɛ amɛha mɔ ko adamɔ shi ni ajie mɔ lɛ kɛba shia aloo amɛkɛlɛ aya saneyeli he ni kojolɔ ko aha hegbɛ akɛ akɛ lɛ ato polisifoi atsuŋ, kɛ́ yiŋtoi kpakpai yɛ ni akɛbaafee nakai. Kɛ polisifoi lɛ na amɛle akɛ ole enɛ lɛ, amɛtsiŋ naa akɛ amɛhaaa mɔ ko adamɔ shi ni ajie bo kɛ be shɛ ni esa akɛ afee nakai.

⁹ Kɛji polisifoi lɛ ekpɛlɛɛɛ ni ejie mɔ lɛ kɛba shia ni amɛha ale akɛ amɛkɛ mɔ ni amɔ lɛ lɛ baaya saneyeli he yɛ ŋmɛlɛtswai 48 mli lɛ, no lɛ esa akɛ asafo lɛ he afee oya ni amɛtao lɔya kpakpa ni edamɔ shi eha mɔ ni akɛ sane eshi lɛ lɛ koni enyɛ ebi ni ajie lɛ. Ekolɛ yiŋtoo hewɔ ni polisifoi lɛ feɔ enɛ lɛ ji ni amɛha kojolɔ lɛ aŋmɛ amɛ gbɛ ni amɛkɛ lɛ ato amɛtsuŋ ni shishinumɔ bɛ he. Kɛ anaaa lɔya kpakpa ni edamɔ shi eha lɛ lɛ, no lɛ amɛbaaye omanye yɛ enɛ feemɔ mli.

¹⁰ Enɛ fɛɛ biɔ shika, ni ewoɔ wɔ hewalɛ waa akɛ wɔɔna akɛ yɛ saji ni eba yɛ naatsii be nɛɛ mli lɛ fɛɛ mli lɛ, onukpai lɛ nyiɛɔ nyɛmimɛi lɛ ahiɛ, ni amɛjɛɔ amɛsuɔmɔ mli amɛkɛ shika haa koni akɛwo nyɔji ni he hiaa lɛ. Esa akɛ aye abua nyɛmimɛi, ni jeee amɛtoigbele loo mlakwamɔ hewɔ ni amɔmɔɔ amɛ, shi moŋ yɛ sanekpakpa lɛ pɛ hewɔ lɛ yɛ nɛkɛ gbɛ nɔ. Kɛ ehe miihia lɛ, Asafo lɛ kɛ shika baaha kɛfata nɔ ni nyɛmimɛi lɛ naa lɛ he koni akɛwo nyɔmɔ ni amɔɔ yɛ sane lɛ he nitsumɔ mli lɛ. Shi kɛlɛ, dani abaakpɛlɛ shika ni abaahe yɛ sane lɛ he nitsumɔ mli lɛ nɔ, ni nyɛkɛbaaha Asafo lɛ, esa akɛ nyɛŋma Asafo lɛ nitsumɔ he nine lɛ wolo ni nyɛha amɛle enɛ da. Nyɛbɛ hegbɛ ni nyɛkɛ nyɔmɔ ni mla he nitsulɔ lɛ heɔ lɛ haa Asafo lɛ ni ewoɔ ja ekpɛlɛ nɔ da.

Bɔɔ Amaniɛ Oya

¹¹ Esa akɛ asafo lɛ mli onukpai lɛ abɔ nitsumɔ he nine lɛ amaniɛ yɛ saji fɛɛ ni baa ni amɔmɔɔ nyɛmimɛi lɛ he kɛha ŋaawoo. Esa akɛ atsɔɔ sane lɛ mli nibii fɛɛ, tamɔ(1) nɔ ni nyɛminuu lɛ feɔ beni amɔ lɛ lɛ, kɛ nɔ fɛɛ nɔ ni ba; (2) nɔ ni polisifoi lɛ fee; (3) kɛji aŋmɛ gbɛ ni ajie lɛ kɛba shia loo aŋmɛɛɛ gbɛ (4) sane ni akɛshiɔ nyɛminuu lɛ: (5) mla ni akɛɛ etse hiɛ atua lɛ; kɛ (6) nɔ ni akpaa gbɛ akɛ abaanyɛ afee wɔsɛɛ. Nyɛkwɛa ni amaniɛbɔɔ nɛɛ mli nibii lɛ fɛɛ ashɛa ni ejaa pɛpɛɛpɛ hu, ejaakɛ Asafo lɛ nyɛŋ awo ŋaa ko, ja abɔ lɛ amaniɛ lɛ fɛɛ pɛpɛɛpɛ.

Hiɛmɔ Bulɛ Ni Tamɔ Kristo Nɔ Mli

¹² Bei komɛi lɛ mɛi ni tsuɔ mla he nii ni amɛmɔɔ mɛi lɛ anifeemɔ woɔ mɔ mlila. Shi, akɛ Yesu Kristo kaselɔ lɛ, kaimɔ akɛ yɛ mla naa lɛ, 2 Timoteo 2:24 kɔɔ ohe be fɛɛ be, nɔ ni tsɔɔ akɛ “shi Nuŋtsɔ lɛ tsulɔ lɛ, esaaa akɛ ebeɔ shi moŋ emli ajɔ aha mɛi fɛɛ.” Bei shɛ ni ekolɛ onuɔ he akɛ osane ja akɛ okɛ naasha aaaha mɔ ko hetoo, aloo ni owie jɛmɔ wiemɔ loo wiemɔ fɔŋ ko. Shi, bɔ fɛɛ bɔ ni abaawo omlila aha lɛ, kaimɔ akɛ “jeee nakai nyɛkase Kristo lɛ,” ni akɛ, “naajɔlɛ hetoo kuɔ mlila naa; shi wiemɔi ni wa teɔ mlifu shi.” Yɛ shihilɛi pii amli lɛ, ŋaa ni ekɛtsuuu nii kɛ wɔnii ni wɔfeee tamɔ Kristo lɛ haa naagbai komɛi ni he ehiaaa baa ni efiteɔ hefamɔ kpakpa ni wɔyɔɔ lɛ hu (Efes. 4:​20; Abɛi 15:1; 16:​32; 1 Pet. 2:23) Enɛ etsɔɔɔ akɛ wɔbaafee wɔnii tamɔ nɔ ni wɔmiikpa fai aloo ni wɔɔha gbɔmɔ he gbeyeishemɔ ni baanyɛ afite wɔ pɛpɛɛpɛ-ŋmɛɛ akɛ Kristofoi lɛ aye wɔnɔ, dabi. Shi moŋ, etsɔɔ akɛ wɔbaahiɛ bulɛ ni wɔyɔɔ ni tamɔ Kristo nɔ lɛ mli yɛ mlifu be mli, ni wɔhiɛ wɔ Yehowa gbeyeishemɔ, ni ji nilee shishijee lɛ mli.​—Abɛi 9:⁠10.

¹³ Eyɛ mli akɛ ajieko naatsii lɛ moŋ, shi kɛ wɔkɛ amrɔ nɛɛ shihilɛ lɛ to bɔ ni nibii fee hoo kɛjɛ shishijee lɛ he lɛ, wɔbaanyɛ wɔkɛɛ taakɛ Daniel kɛɛ lɛ akɛ: “Mi-Nyɔŋmɔ lɛ etsu ebɔfo, ni ebaŋamɔ jatai lɛ anaabui, ni amɛyeko mi awui ko.” (Dan. 6:22) Yɛ naagbee lɛ ejie Daniel kɛjɛ bu lɛ mli ni ayeko lɛ awui ko. Shi, kaimɔ akɛ, Yehowa ŋmɛ gbɛ ni ekɛ jatai ni aŋamɔ amɛnaa lɛ aye jenamɔ muu yɛ bu lɛ mli, ni akɛ efee enɛ yɛ yiŋtoo ko hewɔ. No hewɔ lɛ esaaa ni etɔɔ wɔ, tamɔ bɔ ni lɛ hu efee lɛ. Akɛ kuu lɛ, wɔ hu abaahole wɔnɔ kɛjɛ bu lɛ mli ni ayeko wɔ awui ko yɛ Yehowa diɛŋtsɛ be ni eto lɛ mli.

¹⁴ Nɔ fɛɛ nɔ ni aaaba lɛ, esa akɛ wɔna hemɔkɛyeli akɛ Yehowa baawo ehiɛ, nyam yɛ wɔsane nɛɛ po mli. Nyɛsɛɛ nɛɛ, polisifonyo onukpa ko ni fata he kɛba koni amɛbakwɛ ni atsu naatsii lɛ he nii kɛjɛ shishijee mli lɛ kɛɛ Betel onukpai lɛ ekome akɛ: “Kɛjɛ shishijee mli lɛ, eyɛ gbeyei fioo. Shi nyɛye kunim. Shii abɔ ni amɛnyɛɛɛ amɛhe nyɛtsu lɛ yɛ nyɛdɛŋ lɛ, nyɛye kunim. Be ji nɔ ni baatsɔɔ.” Ojogbaŋŋ, Abɛi 16:7 kɛɔ akɛ: “Kɛji gbɔmɔ gbɛi sa Yehowa hiɛ lɛ, ehaa ehenyɛlɔi tete kɛ lɛ kpataa.” Wɔyɛ hekɛnɔfɔɔ yɛ enɛ mli waa diɛŋtsɛ. No hewɔ lɛ. nyɛnaa ekaa ni nyɛyaa nyɛhiɛ.