Nɔ Ni Ataoɔ Yɛ Sɔɔlɔ Hee Kɛ Mɔ Ni Yɔɔ Niiashikpamɔ Fɛɛ He
1 Lalatsɛ David bi akɛ: “Yehowa, namɔ aaato obuu lɛŋ? Namɔ aaahi ogɔŋ krɔŋkrɔŋ lɛ nɔ?” David ha hetoo kɛ wiemɔi fioo ni ehala jogbaŋŋ, akɛ: “Mɔ ni nyiɛɔ pɛpɛɛpɛ ni etsuɔ jalɛ nii, ni ejɛɔ etsui mli ewieɔ anɔkwale.” (Lala 15:1, 2) Nakai taomɔ nii lɛ tsakeko. Esa akɛ mɛi fɛɛ ni baa Kristofoi asafo lɛ mli ŋmɛnɛ kɛha jamɔ lɛ atsi amɛhe kɛjɛ jeŋba shara nifeemɔi kɛ daatɔɔ he. Gbɛ ko kwraa bɛ Yehowa webii ateŋ kɛha mɛi ni sumɔɔ béi, mɛi ni kɛ mlifu feɔ basabasa, aloo mɛi ni maleɔ. Kɛ sɔɔlɔi heei ji wɔjio, mɛi ni etsɛ ni yɔɔ niiashikpamɔ ji wɔ jio, esa akɛ wɔye anɔkwa yɛ tɛi ni nɔ kwɔlɔ ni atsɔɔ yɛ Nyɔŋmɔ Wiemɔ lɛ mli lɛ mlihiɛmɔ mli.—Gal. 5:19-21.
2 Mɛi heei pii kɛ amɛhe ebabɔ Yehowa gbɛjianɔtoo lɛ he. Gbekɛbii kɛ onukpai fɛɛ etsake amɛsusumɔi bɔni afee ni amɛha amɛshihilɛ gbɛ kɛ Nyɔŋmɔ taomɔ ni akpa gbee. Gbekɛ nuu ko ni jɛ South America lɛ naaa fɔlɔi agbɛtsɔɔmɔ yɛ egbekɛbiiashi ni no ha ena sui gbohii komɛi yɛ ehe. Beni enaa afi 18 lɛ, no mli lɛ tsofai fɔji kɛ nitsumɔ eka ehe, ni ayawo lɛ tsuŋ aahu yɛ ju ni ejuɔ koni ekɛna shika kɛha su nɛɛ mlihiɛmɔ lɛ hewɔ. Kɛtsɔ Biblia kasemɔ nɔ lɛ, ekɛ etsutsu nanemɛi lɛ kpa bɔɔ, ni ena nanemɛi heei yɛ Yehowa Odasefoi ateŋ, ni yɛ naagbee lɛ, ejɔɔ ewala nɔ eha Nyɔŋmɔ.
3 Nakai nɔŋŋ esa akɛ wɔtswa wɔfai shi akɛ wɔɔsa Nyɔŋmɔ hiɛ yɛ wɔjeŋba fɛɛ mli, “yɛ anɔkwa jalɛ kɛ hetsemɔ mli.” (Efes. 4:24) Gbɛnaa nii ka wɔnɔ akɛ, kɛ wɔɔya nɔ wɔhi Nyɔŋmɔ gbɛjianɔtoo ni tamɔ gɔŋ lɛ mli lɛ, no lɛ esa akɛ ‘wɔjie gbɔmɔ momo lɛ kɛ enitsumɔi lɛ wɔshwie’ ni ‘wɔwo gbɔmɔ hee ni tsɔɔ ehee ekoŋŋ kɛyaa nilee mli lɛ.’—Kol 3:9, 10
4 Nyɔŋmɔ Wiemɔ lɛ, Enaa Wɔnɔ Hewalɛ Waa: Yehowa sui, taakɛ ajie kpo atsɔɔ wɔ kɛtsɔ Biblia lɛ nɔ lɛ baanyɛ ana wɔsusumɔi kɛ wɔnifeemɔi anɔ hewalɛ waa yɛ gbɛ kpakpa nɔ. (Rom. 12:2) E-Wiemɔ lɛ yɛ hewalɛ ni ekɛaatsake jwɛŋmɔi ni ekɛtao tsuii hu mli. (Heb. 4:12) Ŋmalɛi ni jɛ mumɔŋ lɛ tsɔɔ wɔ akɛ Yehowa suɔmɔnaa nii biɔ ni wɔhi jeŋba shihilɛ ni ja mli, ni wɔna maŋ shiɛmɔ nitsumɔ lɛ mli gbɛfaŋnɔ kɛmɔ shi, ni wɔkaku wɔhiɛ wɔfɔ Kristofoi akpeei anɔ.
5 Nɔnyɛɛ ni faa daa nɛɛ baanyɛ ana Kristofonyo ko nɔ hewalɛ ni eku Nyɔŋmɔ mlai amli, yɛ nɛkɛ jaramɔ bei nɛɛ amli. Kɛ aku hiɛ afɔ teemɔŋ nikasemɔ, weku nikasemɔ, asafoŋ kpeei, aloo sɔɔmɔ nitsumɔ lɛ nɔ lɛ, no lɛ Kristofonyo ni tsutsu lɛ ehe wa lɛ baanyɛ akpalaŋ kɛjɛ hemɔkɛyeli lɛ he, ni ekolɛ eeegbee jeŋba gbonyo ko mli. No hewɔ ni Paulo ŋma Timoteo akɛ: “Ohiɛ ahi ohe nɔ kɛ otsɔɔmɔ lɛ nɔ daa” kɛ “Jwɛŋmɔ nɔ ni mikɛɔ nɛɛ he daa” lɛ.—1 Tim. 4:16; 2 Tim. 2:7, NW.
6 Kɛ mɔ hee ni eba ji bo jio, mɔ ni kɛ afi babaoo ena niiashikpamɔ jio, ha efee oti ni ma ohiɛ akɛ obaaya shiɛmɔ yɛ sɔɔmɔ afi fɛɛ afi mli nyɔji nyɔŋma kɛ enyɔ lɛ fɛɛ mli. Tswaa ofai shi akɛ obaaye obua mɛi krokomɛi ni amɛdara yɛ hemɔkɛyeli mli ni amɛtsu babaoo yɛ shiɛmɔ nitsumɔ lɛ mli. (Rom. 1:12) Ha osusumɔi ahi nibii ni ja nɔ, kɛtsɔ daa gbi teemɔŋ nikasemɔ, weku nikasemɔ, kɛ kpeeiyaa nɔ. (Fil. 4:8) Mɔdɛŋ ni obɔɔ akɛ ooosa Nyɔŋmɔ hiɛ kɛtsɔ shi ni ohiɔ yɛ etaomɔ nii anaa lɛ nɔ lɛ efeŋ nɔ ni enaaa kɔkɔɔkɔ.—Kol. 3:23, 24.