Mɛɛ Mumɔ Ojieɔ lɛ Kpo Otsɔɔ?
1 Paulo kɛ ŋaawoo nɛɛ gbe ewolo ni eŋmaa kɛyaha asafo ni yɔɔ Filipi lɛ naa akɛ: “Wɔ-Nuntsɔ Yesu Kristo duromɔ lɛ kɛ nyɛmumɔ lɛ ahi shi!” (Fil. 4:23) Ejie amɛ yi yɛ anɔkwa miishɛɛ ni amɛjie lɛ kpo yɛ sanekpakpa lɛ shiɛmɔ mli lɛ kɛ bɔ ni amɛjɛ suɔmɔ mli amɛsusu amɛteŋ mɔ fɛɛ mɔ hilɛ-kɛhamɔ he yɛ miishɛɛ mli lɛ hewɔ.—Fil. 1:3-5; 4:15, 16.
2 Esa akɛ wɔshwe akɛ wɔɔjie nakai mumɔ lɛ nɔŋŋ kpo yɛ wɔ asafo lɛ mli. Kɛ wɔ fɛɛ wɔjie ekaa, mlijɔlɛ, kɛ gbɔfeemɔ kpo lɛ, enɛ haa wɔnaa mumɔ ko ni feɔ faŋŋ kɛhaa mɛi ni naa wɔ lɛ. Mumɔ kpakpa ni suɔmɔ fata he lɛ kɛ ekomefeemɔ kɛ mumɔŋ nɔyaa baa. (1 Kor. 1:10) Mumɔ ni ejaaa lɛ kɛ nijiaŋwujee kɛ nii ni afeɔ kɛ tsui fa-kɛ-fa baa.—Kpoj. 3:15, 16.
3 Onukpai Nyiɛɔ Hiɛ: Gbɛnaa nii ka onukpai anɔ koni amɛhiɛ mumɔ ni ja, ni yɔɔ fɛo yɛ amɛteŋ kɛ amɛ asafo lɛ hu mli. Mɛni hewɔ? Ejaakɛ amɛsubaŋ kɛ jeŋba baanyɛ ana asafo lɛ nɔ hewalɛ. Wɔhiɛ sɔɔ akɛ wɔɔna onukpai ni yɔɔ ekaa yɛ shiɛmɔ nitsumɔ lɛ mli, ni kɛ miishɛɛ kɛ hiɛŋmɔlɔŋmɔlɔ kɛ wiemɔ ni mlijɔlɛ yɔɔ mli ŋáa wɔ, ni agbɛnɛ amɛwoɔ ŋaa yɛ gbɛ ni ja nɔ ni tswaa mɔ maa shi, kɛ akɛha yɛ teemɔŋ loo kɛjɛ wielɔi-akpoku lɛ nɔ.—Heb. 13:7.
4 Shi, esa akɛ wɔ fɛɛ wɔna gbɛfaŋnɔ yɛ asafo lɛ ni wɔɔha efee he ni naanyobɔɔ su, gbɔfeemɔ, ekaa, kɛ mɛi ni hiɛ yɔɔ amɛhe nɔ yɛ mumɔŋ yɔɔ jɛmɛ lɛ mli. Wɔteŋ mɔ fɛɛ mɔ baanyɛ ajie miishɛɛ kɛ suɔmɔ kpo yɛ wɔ kɛ mɛi krokomɛi anaanyobɔɔ mli. (1 Kor. 16:14) Esaaa ni akwɛɔ hiɛaŋ yɛ afii ni mɔ ko eye, hewolonɔ su, woloŋlee, loo shika ni mɔ ko yɔɔ lɛ hewɔ yɛ wɔteŋ. (Okɛto Efesobii 2:21 he.) Yɛ wɔhiɛnɔkamɔ lɛ hewɔ lɛ, wɔbaanyɛ wɔjie mumɔ ni tsɔɔ miishɛɛ, gbɔfeemɔ babaoo, kɛ ekaa kpo yɛ sɔɔmɔ nitsumɔ lɛ mli.—Rom. 12:13; Kol. 3:22, 23.
5 Esa akɛ aha mɛi fɛɛ ni kɛ wɔ bɔɔ, ni mɛi heei fata he lɛ, anu he akɛ ahereɔ amɛ hiɛmɛɛ ni amɛyoo suɔmɔ kɛ hetuu-kɛhamɔ ni yaa nɔ yɛ nyɛmimɛi ekomefeemɔ lɛ mli lɛ. Wɔbaanyɛ wɔtsɔɔ akɛ asafo lɛ ji “anɔkwale lɛ akulashiŋ kɛ enɔdaamɔnɔ” kɛtsɔ wɔ sɔɔmɔ nitsumɔ lɛ kɛ Kristofoi asui kpakpai ni wɔɔjie lɛ kpo lɛ nɔ. (1 Tim. 3:15) Wɔ hu wɔfeɔ shweshweeshwe yɛ mumɔŋ kɛtsɔɔ “Nyɔŋmɔ hejɔlɛ” ni buɔ wɔtsuii kɛ jwɛŋmɔŋ hewalɛi ahe lɛ nɔ. (Fil. 4:6, 7) Eba akɛ wɔ fɛɛ wɔkɛ ekaa aaamia wɔhiɛ ni wɔjie mumɔ ni baaha wɔna nɔmimaa yɛ Yehowa mlijɔlɛ ni esaaa wɔ lɛ he lɛ kpo kɛtsɔ Nuntsɔ Yesu Kristo nɔ.—2 Tim. 4:22.