Jajemɔ Miishɛɛ Sane ni Yɔɔ Kpojiemɔ lɛ Otsɔɔ

¹ Kpojiemɔ wolo lɛ eye ebua wɔ ni wɔnu miishɛɛ saji ni yɔɔ Kpojiemɔ wolo lɛ mli lɛ shishi. Ye obua mɛi krokomɛi ni amɛle bɔ ni nakai shɛɛ saji lɛ kɔɔ amɛhe lɛ kɛtsɔ wolo nɛɛ ni okɛaatsu nii yɛ March nyɔŋ lɛ mli lɛ nɔ. Ekolɛ ŋaawoi ni nyiɛ sɛɛ nɛɛ ahe baaba sɛɛnamɔ beni osaa oshiɛmɔ wiemɔ lɛ.

² Yɛ be mli ni oŋa shiatsɛ lɛ sɛɛ lɛ, obaanyɛ okɛɛ nɔ ko ni tamɔ nɛkɛ:

◼ “Ani onu Kpojiemɔ okpɔŋɔnɔtaralɔi ejwɛ lɛ ahe sane pɛŋ? [Ŋmɛɛ gbɛ ni eha hetoo.] Akɛ sane mlitsɔɔmɔi sɔrɔtoi ni kɔɔ nɔ ni okpɔŋɔnɔtaralɔi nɛɛ damɔ shi kɛha he lɛ eha. Shi ani ole akɛ mfoniri-feemɔ mli okpɔŋɔnɔtamɔ nɛɛ ji Biblia mli gbalɛ ni gbaa nibii ni eba mli yɛ wɔbei nɛɛ amli lɛ fã, ni ákɛ ekɔɔ wɔ fɛɛ wɔhe yɛ gbɛ kome loo gbɛ kroko nɔ? [Ŋmɛɛ hetoo gbɛ.] Ani obaasumɔ ni onu gbalɛ nɛɛ kɛ nɔ ni emlibaa tsɔɔ kɛhaa wɔ lɛ shishi?” Obaanyɛ otsɔɔ lɛ mfonirii ni yɔɔ Kpojiemɔ wolo lɛ yitso 16 lɛ ni okɛto kukuji ni aŋmala amɛ agboi lɛ ahe. Aloo obaanyɛ owie ninaa lɛ mli saji komɛi ahe kɛtsɔ dɛhiɛmɔ wolo, Ani Je Nɛɛ Baaya nɔ Ahi Shi? lɛ kɛ nitsumɔ nɔ. Okɛ wolo lɛ aha shiatsɛ lɛ kɛ miishɛɛ, aloo too gbɛjianɔ koni oku osɛɛ oba ni okɛlɛ abasusu ninaa lɛ kɛ eshishinumɔ lɛ he babaoo.

³ Aloo ekolɛ obaasumɔ ni oka nɔ ko ni tamɔ nɛkɛ okwɛ:

◼ “Ani onu wiemɔ ‘Har­ma­gedon’ lɛ pɛŋ? [Ŋmɛɛ hetoo gbɛ.] Mɛi pii susuɔ akɛ ekɔɔ nuklea tawuu ni baafite nɔ fɛɛ nɔ yɛ wɔbei nɛɛ amli lɛ he. Shi Har­ma­gedon ji nɔ ko ni yɔɔ sɔrɔto kwraa. Taakɛ Biblia lɛ tsɔɔ lɛ, ekɛ tsakemɔi wuji ni kɛ nɔyaa kpakpa baa baaba, ni nɔ ni baajɛ mli aba ji jeŋ ni naanɔ toiŋjɔlɛ yɔɔ mli.” Daamɔ bɔ ni gbɔmɔ lɛ baaha hetoo aha lɛ nɔ otsɔɔ lɛ ŋmalɛ tamɔ Kpojiemɔ 16:16 loo Lala 37:​10, 11 ni ogbala ejwɛŋmɔ kɛya Kpojiemɔ wolo lɛ yitso 39 lɛ nɔ. Beni otee emiishɛɛ shi yɛ nɛkɛ gbɛ nɔ lɛ, obaanyɛ oya nɔ ni okɛ wolo lɛ aha lɛ. Kɛ jeee nakai lɛ, obaanyɛ ni okɛ lɛ asusu saji titrii ni yɔɔ dɛhiɛmɔ wolo, Ani Je Nɛɛ Baaya nɔ Ahi Shi? lɛ mli lɛ ahe.

⁴ Obaanyɛ otee miishɛɛ shi kɛtsɔ ŋaawoo nɛɛ kɛ nitsumɔ nɔ:

◼ “Nɔ ni mɛi pii susuɔ he yɛ afi lɛ mli be nɛɛ mli yɛ je lɛŋ fɛɛ ji Yesu Kristo gbele kɛ eshitee lɛ. Ani osusu nɔ ni efeɔ kɛjɛ be mli ni atee lɛ shi nɛɛ he? Saji pii etee nɔ yɛ wɔgbii nɛɛ amli ni kɔɔ nɔ ni Yesu tsuɔ bianɛ yɛ Nyɔŋmɔ yiŋtoo mli lɛ he. Atsɔɔ ekomɛi amli yɛ Kpojiemɔ wolo lɛ mli. Ani obaasumɔ ni okase babaoo yɛ Nyɔŋmɔ yiŋtoo ni ha etsu e-Bi lɛ kɛba shikpɔŋ nɔ kɛ nɔ ni no tsɔɔ kɛhaa bo kɛ osuɔlɔi lɛ he nii?” Obaanyɛ ogbala jwɛŋmɔ kɛya Kpojiemɔ wolo lɛ yitso 41 lɛ kuku 1 kɛ 2 nɔ aloo oma saji titrii ni sa ni yɔɔ Buu-Mɔɔ loo Awake! heei ni eba lɛ amli lɛ anɔ mi. Aloo ekolɛ obaasumɔ ni okɛ Shihilɛ yɛ Toiŋjɔlɛ Jeŋ Hee ko Mli dɛhiɛmɔ wolo lɛ atsu nii ni okɛkanya emiishɛɛ lolo.

⁵ Bɔɔ mɔdɛŋ ni ofɔ̃ mɔ fɛɛ mɔ ni jieɔ miishɛɛ kpo lɛ nine kɛba Kaimɔ lɛ shishi. Yehowa jɔɔmɔ baaha onyɛ oye obua mɔ ko koni ‘enu gbalɛ nɛɛ mli wiemɔi lɛ ni eye nibii ni aŋmala yɛ mli lɛ anɔ.’​—⁠Kpoj. 1:⁠3.

Ye Obua Amɛ ni Amɛtsu Sane lɛ He Nii

¹ Wɔ shiɛmɔ nitsumɔ lɛ haa gbɔmɛi naa hegbɛ koni ‘amɛnu Kpojiemɔ gbalɛ wiemɔi lɛ.’ (Kpoj. 1:⁠3) Shi kɛji akɛ amɛbaaje “amanehulu kpeteŋkpele” lɛ mli lɛ, belɛ esa akɛ amɛtsu he nii hu. (Kpoj. 7:14) Ekɔɔ gbɔmɛi awala he! No hewɔ lɛ bɔɔ mɔdɛŋ ni ofee sɛɛsaramɔi yɛ mɛi ni jie miishɛɛ kpo yɛ woji ni okɛtsu nii yɛ nyɔŋ nɛɛ mli lɛ ekomɛi ahe lɛ anɔ.

² Kɛ okɛ “Kpojiemɔ” wolo lɛ eko ha lɛ, obaanyɛ okɛɛ akɛ:

◼ “Eŋɔɔ minaa akɛ mina bo ekoŋŋ. Nyɛsɛɛ beni wɔkpe lɛ, wɔwie Kpojiemɔ wolo lɛ mli gbalɛi lɛ ekome he, ni mishi wolo ko ni tsɔɔ mli mihao. Ekolɛ oyoo akɛ eyɛ mli akɛ Kpojiemɔ wolo lɛ mli kwɔ moŋ, shi abaanyɛ atsɔ nibii ni yaa nɔ ŋmɛnɛ lɛ anɔ anu shishi kɛtsɔ Biblia mli shishijee anɔkwalei komɛi kɛ nitsumɔ nɔ. Masumɔ ni mikɛ minitii fioo ko amamɔ saji fioo ko ni Biblia lɛ gbaa wɔ amɛhe saji yɛ wɔbei nɛɛ ahe lɛ anɔ mi.” Agbɛnɛ okɛ wolo ni sa ni obaanyɛ okɛtsu nii ni okɛje shia Biblia mli nikasemɔ shishi lɛ atsu nii.

³ Kɛ okɛ “Ani Je Nɛɛ Baaya nɔ Ahi Shi?” dɛhiɛmɔ wolo lɛ ha lɛ, obaanyɛ okɛɛ nɔ ko tamɔ nɛkɛ:

◼ “Eŋɔɔ minaa akɛ mina bo yɛ shia. Beni mibasara bo nyɛsɛɛ lɛ, wɔ­wie nibii ni feɔ okadi ni baaba dani je lɛ naagbee aba lɛ ahe. (Tii okadi ni yɔɔ Mateo 24:​3-14 lɛ amli nɔ ni sa mli.] Ani oyoo sane ko ni eba nyɛsɛɛ nɛɛ yɛ je lɛ mli loo yɛ wɔ akutso lɛ mli ni osusuɔ akɛ eji nakai okadi lɛ mlibaa lɛ fa?” Okɛ mfonirii ni yɔɔ Kpojiemɔ wolo lɛ yitso 16 lɛ atsu nii ni owie Biblia mli gbalɛi nɛɛ ekomɛi amlibaa lɛ ahe. Kɛ obaashi lɛ lɛ, tsii maŋshiɛmɔ kɛha nakai otsi lɛ saneyitso lɛ ta otsɔɔ lɛ, ni ofɔ̃ lɛ nine ni ebafata ohe yɛ Maŋtsɛyeli Asa lɛ nɔ.

⁴ Kɛ ofɔ shiatsɛ lɛ nine kɛba Kaimɔ lɛ, kɛɛmɔ akɛ:

◼ “Beni mibasara bo nyɛsɛɛ lɛ, wɔwie bɔ ni Yesu gbele lɛ he hiaa adesai waa lɛ he. Mifɔ bo nine hu koni oba egbele lɛ Kaimɔ, ni Kristofoi ni yɔɔ jeŋ fɛɛ baakai yɛ March 26 lɛ shishi. Miba ŋmɛnɛ hu ni makai bo akɛ miifɔ bo nine koni oba nakai nifeemɔ ni he hiaa waa lɛ shishi. [Tsɔɔmɔ lɛ be kɛ he ni abaafee yɛ.] Kɛ wɔsusu jɔɔmɔi ni wɔnine shɛɔ nɔ bianɛ yɛ nɔ ni Yesu fee kɛha adesai lɛ hewɔ, kɛ agbɛnɛ jɔɔmɔi ni wɔnine baashɛ nɔ lolo lɛ ahe lɛ, ebaaye ebua bo ni ohiɛ asɔ nɔ ni nakai be lɛ tsɔɔ lɛ diɛŋtsɛ.” Agbɛnɛ bɔɔ mɔdɛŋ ni okɛ lɛ asusu saji otii ni sa ni yɔɔ wɔ woji tɛtrɛbii heei lɛ ekomɛi amli loo Kpojiemɔ wolo lɛ yitso 41 lɛ mli lɛ ahe. Agbɛnɛ obaanyɛ oma mfonirii ni yɔɔ baafai 294, 299, kɛ 308 lɛ anɔ mi. Kɛ aaahi lɛ, too gbɛjianɔ ni oye obua mɔ ni yɔɔ wiemɔ lɛ he miishɛɛ lɛ koni enyɛ eba Kaimɔ lɛ shishi.

⁵ Kɛ gbɔmɔ lɛ boɔ sane lɛ toi jogbaŋŋ kɛkɛ lɛ, enɛ baaye abua:

◼ “Minya nyɛsɛɛ sane ni wɔgba yɛ Biblia lɛ he lɛ he waa. Miba ekoŋŋ, ejaakɛ masumɔ ni ona nɔ ni Nyɔŋmɔ ewo shi kɛha mɛi ni sumɔɔ ni amɛkase ehe nii babaoo lɛ mli ŋɔɔmɔ lɛ eko.” Kanemɔ Yohane 17:​3, ni ogbala jwɛŋmɔ kɛya Shihilɛ yɛ Toiŋjɔlɛ Jeŋ Hee ko Mli dɛhiɛmɔ wolo lɛ nɔ.

⁶ Eba akɛ suɔmɔ ni oyɔɔ kɛha wala kɛ hiɛsɔɔ kɛha kpɔmɔ nɔ lɛ aaatsirɛ bo koni ofee sɛɛsaramɔi yɛ mɛi ni yɔɔ wiemɔ lɛ he miishɛɛ lɛ anɔ. Ye obua amɛ ni amɛtsu miishɛɛ sane ni yɔɔ Kpojiemɔ lɛ he nii. Kaimɔ akɛ, “be lɛ eshɛ etã.”​—⁠Kpoj. 1:⁠3.