“Hewalɛ ni Fa Kɛteke Nɔ”

MƐƐ be Kristofonyo baanyɛ aŋmɛ etsui shi yɛ amanehulu mli kɛyashi? Ŋmɛnɛ, Kristofoi ni yɔɔ je lɛŋ fɛɛ lɛ kɛ ohia, weku mli naagbai, jwɛŋmɔŋ haomɔ, helai, tai, kɛ yiwaai kpeɔ. Ani nilee yɛ mli akɛ aaakpa gbɛ akɛ amɛaahiɛ amɛ emuuyeli mli yɛ shihilɛi nɛɛ fɛɛ mli? Bɔfo Paulo kɛɛ akɛ nilee yɛ mli nakai. Eŋma akɛ: “Minyɛɔ nii fɛɛ mifeɔ yɛ mɔ ni wajeɔ mi ni ji Kristo lɛ mli.”​—Filipibii 4:⁠13.

Yinɔsane etsɔɔ akɛ hewalɛ ni jɛɔ Yehowa ŋɔɔ lɛ fa lɛlɛŋ kɛha nɔ fɛɛ nɔ tsumɔ. Akɛ nɔkwɛmɔ nɔ lɛ, Yehowa Odasefoi na yiwaa ni naa wa mli amanehulu, yɛ Nazi nɔyeli be lɛ mli yɛ Germany. Ani amɛŋmɛ amɛtsui shi? Wolo ko ni atsɛɔ lɛ Les Bibelforscher et le nazisme (The Bible Students and Nazism) lɛ kɛɔ akɛ: “Yɛ yii, hegbeyeiwoo, kɛ naatsii lɛ fɛɛ sɛɛ, yɛ amɛhiɛ shi ni ashwie yɛ maŋ, tsuŋwoo kɛ amɛnaa ni ayatsi yɛ gboklɛfoi aŋsraiaŋ lɛ fɛɛ sɛɛ lɛ, Biblia Kaselɔi [Yehowa] Odasefoi lɛ eŋmɛɛɛ gbɛ ni ‘asaa atsɔse amɛ’ yɛ gbɛ kroko nɔ.”

Akɛ akrabatsa afaseo su kpɛtɛɔ Odasefoi lɛ atadei aniji ahe, yɛ gboklɛfoi aŋsra lɛ mli ni akɛkadiɔ amɛ, ni anyɛɔ ayooɔ amɛ kɛhaa yiwaa ni naa wa. Ani enɛ kumɔ amɛ? Jwɛŋmɔ he nilelɔ Bruno Bettelheim kadi akɛ “jeee akɛ amɛjie adesa bulɛ ni nɔ kwɔ waa kɛ jeŋba kpakpa kpo kɛkɛ, shi moŋ etamɔ nɔ ni abu amɛhe waa yɛ ŋsra lɛ mli shihilɛ ni etsɛɛɛ ni ekpata gbɔmɛi ni minanemɛi jwɛŋmɔ he nikaselɔi krokomɛi kɛ mi diɛŋtsɛ po susu akɛ amɛhe emɔ shi jogbaŋŋ lɛ fɛɛ ahiɛ lɛ he.”

Hɛɛ, amɛna ‘hewalɛ kɛha nibii fɛɛ.’ Mɛni hewɔ? Ejaakɛ amɛkɛ amɛhe fɔ Yehowa nɔ. Paulo kɛɛ: “Shi wɔhiɛ nɛkɛ jwetri nɛɛ yɛ sũ nii amli, koni hewalɛ ni fa kɛteke nɔ afee Nyɔŋmɔ nɔ, ni jeee wɔnɔ.” (2 Korintobii 4:⁠7) Kɛji okɛ shihilɛ ko ni kaa mɔ kpe lɛ, okɛ hekɛnɔfɔɔ akwɛ Yehowa gbɛ kɛha yelikɛbuamɔ. Ni kɛji hewalɛ ni fa kɛteke nɔ ni ekɛhaa lɛ wo bo hewalɛ lɛ, obaanyɛ oŋmɛ otsui shi yɛ mli.​—Luka 11:⁠13.

Ani Obaasumɔ ni Abasara Bo?

Obaanyɛ ona miishɛɛ yɛ jeŋ ni haomɔi yɔɔ mli nɛɛ po mli kɛjɛ Biblia mli anɔkwa nilee ni kɔɔ Nyɔŋmɔ, e-Maŋtsɛyeli lɛ, kɛ enaakpɛɛ yiŋtoo kɛha adesai ahe lɛ mli. Kɛji obaasumɔ ni ole nibii babaoo aloo ní mɔko aba oŋɔɔ ni ekɛ bo afee shia Biblia mli nikasemɔ ni aheee nɔ ko lɛ, ofainɛ ŋmaa kɛya Watch Tower, Box 760, Ghana, aloo kɛya adrɛs ni atsɔɔ yɛ baafa 2 lɛ mli nɔ ni sa.