Kwɛmɔ Nii Kɛteke Nibii ni Onaa Lɛ!

HELOO naa ninàmɔ kpakpa ji jɔɔmɔ. Yɛ anɔkwale mli lɛ, gbɔmɛi pii ji mɛi ni baakɛɛ akɛ jeee nibii ni amɛyɔɔ lɛ ateŋ babaoo jara wa waa fe no. Shi kɛha Kristofoi lɛ, ninàmɔ ko yɛ ni bɔfo Paulo wie he ni he yɔɔ sɛɛnamɔ babaoo fe heloo naa ninàmɔ kpakpa. Paulo ŋma akɛ: “Wɔjeee mɛi ni kwɛɔ nii ni anaa lɛ, shi moŋ nii ni anaaa lɛ wɔkwɛɔ.” (2 Korintobii 4:18) Nɔ ni haa wɔnaa nibii ni anaaa lɛ baanyɛ afee ninaa krɛdɛɛ diɛŋtsɛ! Wɔbaanyɛ wɔtsɛ lɛ 20/20 ninaa ni ji mumɔŋ nɔ̃.

Mɛni Hewɔ Ehe Hiaa?

Mumɔŋ ninàmɔ ni tamɔ nɛkɛ he miihia Kristofoi ni hi shi yɛ klɛŋklɛŋ afii oha lɛ mli lɛ waa diɛŋtsɛ. Amɛmiitsu amɛ Kristofoi asɔɔmɔ lɛ he nii yɛ shihilɛ ni wa babaoo shishi. Paulo tsɔɔ mli yɛ nɛkɛ gbɛ nɔ: “Afifiaa wɔ yɛ he fɛɛ he, shi kɛlɛ wɔtsui esuuu; wɔfeɔ yeyeeye, shi kɛlɛ wɔnijiaŋ ejeko wui; awaa wɔ yi, shi kɛlɛ akwako wɔ; atswiaa wɔ shi, shi kɛlɛ wɔpleneeko.”—2 Korintobii 4:8, 9.

Yɛ shihilɛi nɛɛ fɛɛ sɛɛ lɛ, kaselɔi anɔkwafoi lɛ damɔ shi shiŋŋ. Akɛni amɛyɔɔ Nyɔŋmɔ mli hemɔkɛyeli babaoo hewɔ lɛ, amɛbaanyɛ amɛkɛɛ taakɛ Paulo kɛɛ lɛ: “No hewɔ ni wɔtsui efaaa lɛ, shi moŋ kɛ wɔ kponɔgbɛ gbɔmɔ lɛ fiteɔ kwraa tete lɛ, kɛlɛ, wɔmli gbɔmɔ lɛ tsɔɔ ehee gbi fɛɛ gbi.” Shi, mɛni kɛ eheetsɔmɔ daa gbi nɛɛ ba? Paulo tee nɔ ekɛɛ akɛ: “Ejaakɛ wɔ amrɔmrɔ amanehulu ni jaraa nɛɛ miitsu naanɔ anunyam babaoo ni teke nɔ ni jara wa aahu eha wɔ. Wɔ ni wɔjeee mɛi ni kwɛɔ nii ni anaa lɛ, shi moŋ nii ni anaaa lɛ wɔkwɛɔ; ejaakɛ nii ni anaa lɛ hiɔ shi be fioo kɛkɛ, shi nii ni anaaa lɛ hiɔ shi kɛyaa naanɔ.”—2 Korintobii 4:16-18.

Paulo miiwo emumɔŋ nyɛmimɛi lɛ hewalɛ koni amɛkaŋmɛ gbɛ ni haomɔi, naagbai, yiwaai—amanehului sɔrɔtoi fɛɛ—miihà bɔ ni amɛnaa anunyam nyɔmɔwoo ni akɛma amɛhiɛ lɛ hiɛ. Esa akɛ amɛkwɛ nii kɛteke amɛ amrɔmrɔ shihilɛ nɛɛ, ni amɛha amɛhiɛ ahi miishɛɛ ni baajɛ Kristofoi agbɛ lɛ mli aba lɛ nɔ. No ji nɔ ni ye ebua amɛ ni ha amɛ faishitswaa akɛ amɛaaya amɛhiɛ yɛ tawuu lɛ mli lɛ fee ehee gbi fɛɛ gbi lɛ. Mumɔŋ ninaa ni tamɔ nɛkɛ he miihia Kristofoi ni yɔɔ ŋmɛnɛ lɛ hu.

Buu Amrɔmrɔ Amanehului lɛ akɛ Ehiɔ Shi Be Fioo!

Oosumɔ jio osumɔɔɔ jio, wɔnaa nibii ni wɔsumɔŋ ni wɔna lɛ daa gbi. Kɛ wɔkwɛ ashwishwɛ mli lɛ, eyɛ faŋŋ akɛ wɔnaa kpajeei ni wɔsumɔɔɔ lɛ kɛ fãtɔɔi ni yɔɔ wɔ heloo gbɔmɔtso he, ni tsɔɔ akɛ wɔyeee emuu yɛ gbɔmɔtsoŋ lɛ. Kɛ wɔkwɛ Nyɔŋmɔ Wiemɔ ashwishwɛ lɛ mli lɛ, wɔnaa mumɔŋ kpajeei kɛ fãtɔɔi ni yɔɔ wɔ diɛŋtsɛ kɛ mɛi krokomɛi ahe lɛ. (Yakobo 1:22-25) Ni kɛ wɔkwɛ daa gbi adafitswaa wolo mli loo tɛlivishin nɔ nibii lɛ, jalɛ sane ni ayeee, yiwalɛ, kɛ osharai jeɔ kpo amrɔ nɔŋŋ ni esaa wɔtsuii ahe kɛ awerɛho.

Satan baasumɔ ni eha wɔhao yɛ nibii ni wɔnaa lɛ hewɔ, loo egbala wɔjwɛŋmɔ ni wɔhemɔkɛyeli aje shishi ahoso. Mɛɛ gbɛ nɔ wɔɔtsɔ wɔtsi enɛ naa koni ekaba lɛ nakai? Esa akɛ wɔnyiɛ nɔkwɛmɔ nɔ ni Yesu Kristo fee efɔ shi, taakɛ bɔfo Petro jie yi beni ewie nɛkɛ lɛ sɛɛ: “Ejaakɛ enɛ nɔŋŋ hewɔ atsɛ nyɛ, ejaakɛ Kristo hu na amanehulu eha nyɛ, ni ekɛto okadi efɔ shi eha nyɛ, koni nyɛnyiɛ enanemaa hei lɛ asɛɛ.” (1 Petro 2:21) Yesu ji nɔkwɛmɔ nɔ ni yeɔ emuu yɛ Kristofoi ashihilɛ fɛɛ mli.

Yɛ be mli ni ekɛ enine tsɔɔ Yesu akɛ wɔ nɔkwɛmɔ nɔ lɛ, Petro je gbɛ etsi ta akɛ Yesu na amanehulu. Yɛ anɔkwale mli lɛ, Yesu na amanehulu babaoo yɛ be mli ni eyɔɔ shikpɔŋ nɔ lɛ. Akɛ Yehowa ‘nitsulɔ ni he esa’ ni yɔɔ beni abɔɔ adesa lɛ, ele nɔ diɛŋtsɛ ni Nyɔŋmɔ eto eyiŋ akɛ adesai afee. (Abɛi 8:30, 31) Shi agbɛnɛ ena nɔ ni esha kɛ emuu ni amɛyeee eha amɛfee klɛŋklɛŋ kwraa. Ena, ni ehe bahia ni etsu emuu ni gbɔmɛi yeee kɛ amɛ gbɔjɔmɔi ahe nii daa gbi. Enɛ baanyɛ afee nii ni kaa mɔ kɛha lɛ.—Mateo 9:36; Marko 6:34.

Yɛ mɛi krokomɛi amanehului asɛɛ lɛ, Yesu na lɛ diɛŋtsɛ enɔ̃ hu. (Hebribii 5:7, 8) Shi akɛni eyɔɔ mumɔŋ ninàmɔ ni yeɔ emuu hewɔ lɛ, ekwɛ nii kɛteke amɛ koni ena nyɔmɔwoo ni ji enɔ ni aaawo kɛya shihilɛ ni gbele bɛ mli lɛ mli yɛ emuuyeli gbɛ ni ekɔ hewɔ lɛ. Kɛkɛ lɛ, akɛ Mesia Maŋtsɛ lɛ, ebaana hegbɛ koni ehole adesai ni naa amanehulu lɛ anɔ kɛjɛ shihilɛ ni eba shi lɛ mli kɛya emuuyeli ni Yehowa kpɛ eyiŋ yɛ he kɛjɛ shishijee lɛ mli ekoŋŋ. Ehiŋmɛi ni ekɛma wɔsɛɛ be mli gbɛkpamɔi ni anaaa nɛɛ anɔ lɛ ye ebua lɛ ni ehiɛ emiishɛɛ mli yɛ Nyɔŋmɔ gbeyeishemɔ sɔɔmɔ mli yɛ amanehului ni ena daa gbi lɛ fɛɛ sɛɛ. Taakɛ Paulo ŋma yɛ sɛɛ mli lɛ: “Nyamɔ ni ka ehiɛ lɛ hewɔ lɛ, emia ehiɛ yɛ sɛŋmɔtso lɛ he amanehulu lɛ mli, ni ebuuu hiɛgbele lɛ, ni ekɛyata shi yɛ Nyɔŋmɔ maŋtsɛsɛi lɛ ninejurɔ nɔ lɛ.”—Hebribii 12:2.

Yesu eŋmɛɛɛ gbɛ kɔkɔɔkɔ koni haomɔi kɛ shihilɛi ni kaa mɔ lɛ aha enijiaŋ aje wui, ni egbala ejwɛŋmɔ, loo ni ehemɔkɛyeli ahoso. Akɛ ekaselɔi lɛ, esa akɛ wɔnyiɛ enɔkwɛmɔ nɔ ni nɔ bɛ lɛ sɛɛ kpaakpa.—Mateo 16:24.

Okɛ Ohiŋmɛi Ama Nibii ni Anaaa ni Hiɔ Shi Kɛyaa Naanɔ lɛ Anɔ!

Yɛ be mli ni ewieɔ nɔ ni ha Yesu nyɛ eŋmɛ etsui shi lɛ he lɛ, Paulo tsɔɔ gbɛ ni esa akɛ wɔtsɔ nɔ lɛ hu beni eŋma akɛ: “Wɔkɛ tsuishiŋmɛɛ ada foi ni ka wɔhiɛ lɛ, ni wɔtɛ̃je wɔhiɛ wɔkwɛ wɔ hemɔkɛyeli Najiaŋdamɔlɔ Nukpa kɛ Emuufeelɔ ni ji Yesu lɛ.” (Hebribii 12:1, 2, NW) Hɛɛ, bɔni afee ni wɔda Kristofoi agbɛ lɛ he foi lɛ yɛ omanyeyeli kɛ miishɛɛ mli lɛ, esa akɛ wɔkwɛ nii kɛteke nibii ni yɔɔ wɔhiɛ amrɔ nɛɛ. Shi te wɔɔfee tɛŋŋ “wɔtɛ̃je wɔhiɛ wɔkwɛ” Yesu, ni mɛni no baafee aha wɔ?

Nɔ kome ji akɛ, awó Yesu, Nyɔŋmɔ Maŋtsɛyeli lɛ nɔ Maŋtsɛ yɛ 1914, ni eyeɔ nɔ kɛjɛɔ ŋwɛi. Shi, wɔ heloo hiŋmɛii enaaa enɛɛmɛi fɛɛ. Ni kɛlɛ, kɛ “wɔtɛje wɔhiɛ wɔkwɛ” Yesu lɛ, wɔ mumɔŋ ninaa baaye abua wɔ ni wɔna akɛ efee klalo ni ebaatsu nii koni ekɛ ŋmɛnɛ yiwalɛ nibii agbɛjianɔtoo nɛɛ aba naagbee ni etswa Satan kɛ edaimonioi asafoi lɛ ananeshi tu kɛya amɛfiimɔ ni haaa amɛnyɛ amɛtsu nɔ ko lɛ mli. Kɛ wɔkwɛ nii kɛtee shɔŋŋ lolo lɛ, wɔ mumɔŋ ninaa lɛ baajie jeŋ hee ni yɔɔ naakpɛɛ ni emli lɛ “gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee” lɛ kpo.—Kpojiemɔ 19:11-16; 20:1-3; 21:4.

No hewɔ lɛ, ni amanehului ni hiɔ shi be fioo ni ekolɛ wɔkɛaakpe daa gbi lɛ aaatsɔ jatsũ aha wɔ lɛ, mɛni hewɔ wɔkɛ wɔhiɛ emaaa nibii ni hiɔ shi daa lɛ moŋ nɔ? Mɛni hewɔ wɔkɛ wɔ hemɔkɛyeli hiŋmɛi kwɛɛɛ nii kɛtekeee hela kɛ hiɛjoomɔ ni yɔɔ shikpɔŋ ni awo nɔ muji nɛɛ nɔ lɛ, ni wɔna paradeiso ni gbɔmɛi ni yɔɔ hewalɛ, miishɛɛ, ni jwɛŋɔ mɛi ahe eyi nɔ obɔ lɛ? Mɛni hewɔ wɔkwɛɛɛ nii kɛtekeee kpa ni wɔje yɛ gbɔmɔtsoŋ kɛ mumɔŋ lɛ, ni wɔna wɔhe akɛ wɔye wɔhe kwraa kɛmiiya naanɔ kɛtsɔ Kristo kpɔmɔ afɔleshaa lɛ jara lɛ nɔ? Mɛni hewɔ wɔkwɛɛɛ nii kɛtekeee gbɔmɔgbee kpeteŋkpele ni tawuu, awuiyeli, kɛ basabasa feemɔ shiɔ yɛ esɛɛ lɛ, ni wɔna mɛi ni atee amɛ shi ehee ni atsɔɔ amɛ nii yɛ Yehowa toiŋjɔlɛ kɛ jalɛ nifeemɔ mli lɛ?

Kɛfata he lɛ, ‘wɔhiɛ ni wɔɔtɛje wɔkwɛ’ Yesu lɛ hu baatsɔɔ wɔ mumɔŋ ninamɔ ni wɔkɛaama nɔ ni Maŋtsɛyeli, ni eyɛ mli moŋ akɛ wɔnaaa lɛ, etsu momo yɛ Nyɔŋmɔ webii ni yɔɔ shikpɔŋ nɔ lɛ ateŋ lɛ nɔ: ekomefeemɔ, toiŋjɔlɛ, suɔmɔ, nyɛmimɛi ahedɔɔ, kɛ mumɔŋ shweremɔ. Beni Kristofonyo yoo ko ni yɔɔ Germany lɛ na video, United by Divine Teaching lɛ, eŋma akɛ: “Video lɛ baaye abua mi ni maha ahi mijwɛŋmɔ mli babaoo akɛ, wɔ nyɛmimɛi hii kɛ yei Kristofoi babaoo ni yɔɔ jeŋ fɛɛ lɛ kɛ anɔkwayeli miisɔmɔ Yehowa bianɛ—ni amɛmiifee enɛ yɛ shitee-kɛ-woo fɛɛ sɛɛ. Kwɛ bɔ ni wɔ ekomefeemɔ akɛ nyɛmimɛi lɛ jara wa babaoo ha, yɛ basabasa feemɔ kɛ hetsɛ̃ jeŋ nɛɛ mli!”

Ani bo hu ‘onaa’ Yehowa, Yesu, ŋwɛibɔfoi anɔkwafoi lɛ, kɛ nanemɛi Kristofoi akpekpei abɔ ni damɔ omasɛi? Kɛji nakai ni lɛ, ogbaŋ ohe naa pii yɛ “je nɛŋ he naagbamɔ” ni baagbala osɛɛ yɛ nijiaŋwujee mli ni eha ofee mɔ ni “wooo yibii” yɛ Kristofoi asɔɔmɔ mli lɛ he. (Mateo 13:22) No hewɔ lɛ ‘tɛjemɔ ohiɛ okwɛ’ Yesu kɛtsɔ omumɔŋ hiŋmɛii ni okɛaama Nyɔŋmɔ Maŋtsɛyeli ni ato ama shi lɛ kɛ ejɔɔmɔi kɛha ŋmɛnɛŋmɛnɛ kɛ wɔsɛɛ be mli fɛɛ lɛ nɔ.

Ná Wala Koni Ona Nɔ ni Anaaa Lɛ!

Akɛni wɔmiina sɔrɔto feemɔ ni da waa ni kã Nyɔŋmɔ naanɔ jeŋ hee lɛ kɛ ŋmɛnɛŋmɛnɛ jeŋ momo ni kumɔɔ shwieɔ shi nɛɛ teŋ hewɔ lɛ, esa akɛ etsirɛ wɔ ni wɔba wɔjeŋ yɛ gbɛ ni aaaha abu wɔ akɛ wɔsa akɛ wɔnaa nibii ni wɔtsɔɔ wɔ hemɔkɛyeli hiŋmɛi pɛ nɔ wɔnaa bianɛ lɛ diɛŋtsɛ. Ebaawa kɛha akpekpei abɔ ni atee amɛ shi lɛ akɛ amɛaahe nɔ ni amɛnaa lɛ amɛye, beni amɛteɔ shi ni amɛnaa paradeiso shikpɔŋ ni jalɛ yɔɔ nɔ, ni yɔɔ sɔrɔto kwraa yɛ jeŋ ni amɛna dani amɛgboi lɛ he lɛ. Susumɔ miishɛɛ ni wɔɔna akɛ wɔyɛ wala mli, koni wɔhere amɛ atuu, ni wɔtsɔɔ nɔ ni Nyɔŋmɔ efee lɛ mli wɔtsɔɔ amɛ lɛ he okwɛ!—Okɛto Yoel 2:21-27 he.

Hɛɛ, kwɛmɔ bɔ ni mumɔŋ ninàmɔ kpakpa jara wa ha, ni wɔkwɛ bɔ ni ehe hiaa akɛ wɔɔha enɔ atse keŋkeŋ! Wɔbaanyɛ wɔfee enɛ kɛtsɔ Biblia lɛ ni wɔɔkase daa yɛ teemɔŋ, Kristofoi akpeei ni wɔɔya, mɛi krokomɛi ni wɔɔwie wɔ hiɛnɔkamɔ ni damɔ Biblia lɛ nɔ lɛ he wɔtsɔɔ, kɛ nɔ ni fe fɛɛ lɛ, sɔlemɔ ni wɔɔsɔle kɛha ŋwɛi gbɛtsɔɔmɔ nɔ. Enɛ baaha wɔ mumɔŋ ninaa lɛ nɔ atse keŋkeŋ ni efee faŋŋ, ni eha wɔnyɛ wɔkwɛ nii kɛteke nibii ni wɔnaa lɛ!