Bɔ ni Ooofee Oná Hiɛnɔkamɔ yɛ Nijiaŋwujee Mli
ŊƆƆ lɛ akɛ shihilɛ mli niiashikpamɔi ni nyiɛ sɛɛ nɛɛ baaba onɔ: Ákpata oheloonaa nibii fɛɛ hiɛ, ni eha onɔ̃ fɛɛ nɔ etã. Obii lɛ—nɔ ni haa onaa shihilɛ mli miishɛɛ lɛ—eje mli. Ohefatalɔ lɛ wooo bo hewalɛ ko kwraa. Obɛ gbɔmɔtsoŋ hewalɛ dɔŋŋ. Daa gbi shihilɛ ebafee piŋmɔ ni naa wa waa.
Kɛ nakai bafee oshihilɛ lɛ, ani obaanyɛ onu he akɛ ehe miihia ni oya nɔ ohi shi? Aloo obaaŋmɛɛ ohe oha nijiaŋwujee?
Shihilɛ ni yɔɔ mɔbɔ ni átsɔɔ mli bianɛ lɛ, bafee Hiob, ni ji nuu ni hi shi yɛ Biblia bei amli lɛ shihilɛ mli niiashikpamɔ diɛŋtsɛ. (Hiob, yitsei 1, 2) Beni Hiob nii fee mɔbɔ aahu lɛ, eye awerɛho akɛ: “Mijeŋhilɛ eje mitsine.” Kulɛ ebaahere gbele atuu akɛ nɔ ni ekɛaana heyeli. (Hiob 10:1; 14:13) Shi kɛlɛ, yɛ Hiob piŋmɔ ni naa wa waa lɛ fɛɛ sɛɛ lɛ, etee nɔ ehiɛ emuu ni eyeɔ ehaa Nyɔŋmɔ lɛ mli. No hewɔ lɛ Yehowa “jɔɔ Hiob sɛɛkpee be lɛ fe etsutsu be lɛ.” No hewɔ lɛ egbo yɛ hejɔlɛ mli, “beni egbɔ ni eye gbii pii lɛ.”—Hiob 42:12, 17.
Hiob fee tsuishiŋmɛɛ ni átee nɔ ajie yi aahu kɛbashi wɔgbii nɛɛ amli lɛ he nɔkwɛmɔ nɔ. Kaai ni ba enɔ lɛ ha ena su kpakpa, ni ekanya mɛi krokomɛi koni amɛtsu nitsumɔi kpakpai. (Yakobo 5:10, 11) Nɔ ni he hiaa fe fɛɛ lɛ, emuuyeli ni kpa ko bɛ he ni Hiob hiɛ mli lɛ ha Yehowa mli fili lɛ. (Abɛi 27:11) No hewɔ lɛ yɛ naagbee lɛ, piŋmɔ ni yɔɔ gbeyei waa lɛ batsɔ Nyɔŋmɔ jamɔ, hemɔkɛyeli kɛ emuuyeli mlihiɛmɔ he kunimyeli wulu ni kɛ jɔɔmɔi baha Hiob kɛ mɛi fɛɛ ni enɔkwɛmɔ nɔ lɛ ená amɛnɔ hewalɛ lɛ.
Hiɛnɔkamɔ yɛ Kaai Sɔrɔtoi Fɛɛ Sɛɛ
Ekolɛ obaaná kaai ni tamɔ nɔ ni ba Hiob nɔ lɛ eko mli niiashikpamɔ. Ekolɛ suɔlɔ ko gbele eha ofee basaa yɛ henumɔŋ. Ekolɛ hela ni naa wa eha oshihilɛ efee piŋmɔ sɔŋŋ. Ekolɛ oshihilɛ gbɛ fɛɛ efee tamɔ nɔ ni efite kwraa, yɛ gbalamlitsemɔ ni woɔ mɔ awerɛho waa hewɔ. Ekolɛ shika he naagbai eha onɔ̃ fɛɛ nɔ̃ etã. Ekolɛ henyɛlɔi ni teɔ shi woɔ anɔkwa jamɔ lɛ kɛ yitsoŋwalɛ waa bo yi. Ekolɛ bɔ ni omiaa ohiɛ ni onyɛ odamɔ kaai ni baa onɔ lɛ anaa lɛ eha oonu he akɛ obɛ wɔsɛɛ be he hiɛnɔkamɔ.—1 Petro 1:6.
Yɛ nɔ najiaŋ ni oooŋmɛɛ ohe oha nijiaŋwujee lɛ, bi ohe akɛ, ‘Mɛni hewɔ minaa amanehulu?’ Oona amanehulu ejaakɛ oyɛ jeŋ ko ni “kã mɔ fɔŋ” Satan Abonsam hewalɛ mli “lɛ mli.” (1 Yohane 5:19) No hewɔ lɛ, mɔ fɛɛ mɔ naa amanehulu. Yɛ gbɛ ko nɔ lɛ, nyɛ̃ɛ ni Abonsam kɛbaa Maŋtsɛyeli shɛɛ sane lɛ nɔ, mɛi krokomɛi awiemɔi ni suɔmɔ bɛ mli, loo jeŋba gbonyo mli nifeemɔi ni ehiii kwraa ni egbɛ eshwã babaoo yɛ “jaramɔ bei” nɛɛ amli lɛ saa wɔ fɛɛ wɔhe.—2 Timoteo 3:1-5.
Kɛ nɔ ko ni yɔɔ oshara eba onɔ yɛ shihilɛ mli lɛ, ekolɛ obafee mɔ ni “be kɛ nibii ni aleee ni baa trukaa” enina lɛ. (Jajelɔ 9:11, NW) Yɛ gbɛ kroko nɔ lɛ, bei komɛi lɛ nibii eyaaa nɔ jogbaŋŋ yɛ shihilɛ mli yɛ wɔ diɛŋtsɛ wɔhe esha ni wɔná akɛ gboshinii lɛ hewɔ. (Romabii 5:12) Kɛ ótɔ̃ waa po ni otsake otsui ni otao mumɔŋ yelikɛbuamɔ lɛ, kaasusu akɛ Nyɔŋmɔ ekwa bo. (Lala 103:10-14; Yakobo 5:13-15) Nɔ ni efeɔ fe mɔ fɛɛ mɔ ji, esusuɔ wɔhe. (1 Petro 5:6, 7) Obaanyɛ ona nɔmimaa akɛ “Yehowa bɛŋkɛɔ mɛi ni tsuii ekumɔ lɛ, ni ehereɔ mɛi ni mumɔ tswiaa shi kɛ dɔlɛ lɛ.” (Lala 34:19) Bɔ fɛɛ bɔ ni okaa lɛ baanyɛ afee nɔ ni yɔɔ gbeyei loo emli wa waa ha lɛ, Yehowa baanyɛ aha bo ŋaalee ni okɛtsu he nii. (Yakobo 1:5-8) Kaimɔ be fɛɛ be akɛ Yehowa baanyɛ atsá pilamɔi fɛɛ. Kɛ osa ehiɛ lɛ, nɔ ko kwraa bɛ ni baaha wala jweremɔ nɔ̃ lɛ aŋmɛɛ bo.—Romabii 8:38, 39.
Ani Nɔ̃ Kpakpa Baanyɛ Ajɛ Kaai Amli Aba?
Blema abɛbua ko kɛɔ akɛ, “Hiɛnɔkamɔ yɛ haomɔ fɛɛ haomɔ mli.” Nakai ji gbɛ ni waaa ni aaatsɔ nɔ akɛɛ akɛ, bɔ fɛɛ bɔ ni shihilɛ mli nibii aaafite aha lɛ, obaanyɛ ona nɔ ni ooodamɔ nɔ ona hiɛnɔkamɔ be fɛɛ be. Yiŋtoo ni yɔɔ nɔ fɛɛ nɔ ni aŋma yɛ Nyɔŋmɔ Wiemɔ lɛ mli lɛ sɛɛ ji akɛ, “wɔbaanyɛ wɔna hiɛnɔkamɔ.” (Romabii 15:4, NW) Bɔ fɛɛ bɔ ni oshihilɛ lɛ mli wa waa ha lɛ, shiwoi kɛ shishitoo mlai ni yɔɔ Biblia lɛ mli lɛ baanyɛ aha ona miishɛɛ kɛ hiɛnɔkamɔ hee.
Ŋmalɛi lɛ tsɔɔ akɛ “amanehulu lɛ sɛɛ etsɛɛɛ ni emli waaa” kɛ akɛto naanɔ jɔɔmɔi ni akɛma mɛi ni sumɔɔ Nyɔŋmɔ lɛ ahiɛ lɛ he lɛ. (2 Korintobii 4:16-18, NW) Biblia lɛ tsɔɔ hu akɛ, Nyɔŋmɔ jamɔ sui ni anáa yɛ kaai amli lɛ jara wa aahu fe hiɛnyam loo heloonaa ninamɔ. (1 Yohane 2:15-17) No hewɔ lɛ, piŋmɔ po baanyɛ atsu yiŋtoo kpakpa ko he nii. (Hebribii 5:8) Yɛ anɔkwale mli lɛ, nɔ ni okase yɛ kaai amli lɛ ni okɛaatsu nii lɛ baanyɛ aha ona jɔɔmɔi ni okpaaa gbɛ.
Ekolɛ kaa ni naa wa lɛ baaha ofee mɔ ni he ejɔ waa yɛ subaŋ gbɛfaŋ agbɛnɛ. Ekolɛ obaakpɛlɛ nɔ akɛ, tsutsu ko lɛ, oyɛ subaŋ ko ni woɔ mɛi krokomɛi amli la ni haaa oya hiɛ yɛ mumɔŋ po. Ekolɛ no mli lɛ, oheɔ ohe oyeɔ tsɔ̃. Beni amanehulu ko eha opiŋ sɛɛ lɛ, ekolɛ amrɔ nɔŋŋ ni oyɔseɔ bɔ ni oyɔɔ wudɔɔ ha kɛ bɔ ni mɛi krokomɛi ahe hiaa bo ha. Kɛ kaa ni ba onɔ lɛ eha okase nakai nɔ ko, ni ofee tsakemɔi ni he hiaa lɛ, ehe eba sɛɛnamɔ kɛha bo.
Ni kɛ tsutsu ko lɛ, ewa kɛha mɛi krokomɛi akɛ amɛkɛ bo aaabɔ, yɛ omlifu ni onyɛɛɛ nɔ oye hewɔ hu? Ekolɛ enɛ po egba ogbɔmɔtsoŋ hewalɛnamɔ naa waa. (Abɛi 14:29, 30) Shi, amrɔ nɛɛ ekolɛ shihilɛ lɛ baahi saŋŋ fe tsutsu ko, ejaakɛ okɛ ohe miifɔ Nyɔŋmɔ mumɔ lɛ nɔ koni eye ebua bo ni ona henɔyeli.—Galatabii 5:22, 23.
Taakɛ mɛi krokomɛi ji lɛ, ekolɛ be ko lɛ obɛ mlihilɛ ni aaaha ona mɛi ni tɔ̃ɔ lɛ mɔbɔ. Shi kɛ bo diɛŋtsɛ lɛ, oyaje shihilɛ ko mli ni onu he akɛ mɔbɔnalɛ babaoo he miihia bo lɛ, ekolɛ kpaako onuɔ he waa akɛ esa akɛ ona mɛi krokomɛi amɔbɔ. Mlihilɛ babaoo, mɔ hesusumɔ kɛ mɔbɔnalɛ ni ajie kpo atsɔɔ bo lɛ eha oyɔse akɛ esa akɛ ojie sui ni tamɔ nakai nɔŋŋ kpo otsɔɔ efɔŋfeelɔi ni tsakeɔ amɛtsui lɛ. Kɛ opiŋmɔ lɛ etsirɛ bo ni ojaje fatɔɔi nɛɛ yɛ osubaŋ mli lɛ, belɛ enɛ ji sɛɛnamɔ kome ni ona kɛjɛ oniiashikpamɔ lɛ mli. Okase akɛ “shwãa mɔbɔnalɛ shwãa eshiɔ kojomɔ.”—Yakobo 2:13; Mateo 5:7.
Ni kɛ tsɔsemɔ ni Kristofoi asafo lɛ kɛha bo lɛ eha hegbɛi kɛ bulɛ ni mɛi krokomɛi yɔɔ kɛha bo lɛ eŋmɛɛ bo hu? Kaaha onijiaŋ je wui. Tsɔsemɔ nifeemɔ yeɔ ebuaa koni asafo lɛ he atse, shi eyiŋtoi lɛ eko ji koni atswa efɔŋfeelɔ lɛ ama shi ekoŋŋ. Wɔkpɛlɛɔ nɔ akɛ, “tsɔsemɔ fɛɛ tsɔsemɔ lɛ, amrɔmrɔ nɛɛ efeee mɔ akɛ miishɛɛ nɔ̃ ni, shi dɔlɛ nɔ̃ moŋ; shi kɛ fee sɛɛ lɛ, ewoɔ hejɔlɛ yibii ni ji jalɛ lɛ ehaa mɛi ni etsɔ nɔ ekase nɔ ko lɛ.” (Hebribii 12:11; wɔma efã ko nɔ mi.) Eyɛ mli akɛ tsɔsemɔ baanyɛ afee haomɔ ni haa mɔ feɔ basaa moŋ, shi ehaaa mɔ ni kɛ heshibaa tsakeɔ etsui lɛ afee mɔ ni bɛ hiɛnɔkamɔ. Atsɔse Israel Maŋtsɛ David waa diɛŋtsɛ yɛ efɔŋ feemɔ hewɔ, shi etsake etsui, ni yɛ naagbee lɛ enine shɛ yijiemɔ krɛdɛɛ ko nɔ akɛ nuu ni yɔɔ hemɔkɛyeli ni mli wa.—2 Samuel 12:7-12; Lala 32:5; Hebribii 11:32-34.
Kaa baanyɛ ana hewalɛ waa yɛ bɔ ni osusuɔ nii ahe ohaa lɛ nɔ. Tsutsu ko lɛ, ekolɛ okɛ ohiɛ ma heloonaa otii kɛ omanye ni oye ni ha mɛi gbala jwɛŋmɔ kɛba onɔ, ni ha otee hiɛ waa yɛ je nɛŋ lɛ anɔ waa. Ekolɛ kaa ni shika he naagba fata he loo heloonaa nibii ni je odɛŋ lɛ gbala ojwɛŋmɔ kɛtee nibii ni he hiaa titri lɛ anɔ. (Okɛto Filipibii 1:10 he.) Amrɔ nɛɛ oyɔse akɛ mumɔŋ nibii ni jara wa kɛ otii ni yɔɔ sɔɔmɔ krɔŋkrɔŋ lɛ mli lɛ ji nibii pɛ ni kɛ anɔkwa miishɛɛ kɛ tsui ni nyɔɔ mɔ mli daa baa.
Okɛ Ohiɛ Afɔ̃ Yehowa Nɔ
Sɔɔmɔ krɔŋkrɔŋ ni okɛhaa Yehowa lɛ baanyɛ ekɛ yiwaa kɛ piŋmɔ ni jɛ mɛi ni teɔ shi woɔ o-Kristofoi ahemɔkɛyelii lɛ aŋɔɔ aba. Ekolɛ obaanu nɔnyɛɛ he yɛ kaa nɛɛ hewɔ, shi nɔ̃ kpakpa baanyɛ ajɛ mli aba. Kaa nɛɛ baanyɛ aha ohemɔkɛyeli mli awa. Kɛfata he lɛ, ekolɛ otsui shi ni oŋmɛɔ lɛ baanyɛ awo mɛi krokomɛi ni awaa amɛyi ni amɛnaa enɛ lɛ hewalɛ ni ekãnya amɛ. Ekolɛ ebaatsirɛ mɛi ni naa ojeŋba kpakpa lɛ ni amɛwo Nyɔŋmɔ hiɛ nyam. Ekolɛ mɛi ni teɔ shi woɔ bo lɛ po ahiɛ baagbo ni amɛkpɛlɛ onitsumɔi kpakpai lɛ anɔ!—1 Petro 2:12; 3:16.
Bɔni afee ni okaha onijiaŋ miije wui beni awaa bo yi lɛ, ehe miihia ni okɛ ohe afɔ̃ Yehowa nɔ. E-Wiemɔ lɛ tsɔɔ akɛ heyeli baajɛ kaa mli aba lɛlɛŋ, shi ekolɛ ebaŋ lɛ mra taakɛ otaoɔ. Shi amrɔ nɛɛ, ‘kaaha ejurɔfeemɔ miitɔ bo.’ (2 Tesalonikabii 3:13) Yaa nɔ otao gbɛi ni oootsɔ nɔ odamɔ kaai anaa ni oŋmɛ otsui shi. Kɛ etamɔ nɔ ni hiɛnɔkamɔ bɛ mli po lɛ, “shɛ ojatsu lɛ ofɔ̃ Yehowa nɔ, ni lɛ eeehiɛ omli; eŋmɛŋ gbɛ gbi ko gbi ko ni jalɔ adidã.” (Lala 55:23) Yɛ nɔ najiaŋ ni oooha onii afee bo mɔbɔ lɛ, susumɔ bɔ ni ajɔɔ bo aha akɛ ole Yehowa, ákɛ ona he ko ohi yɛ ewebii ateŋ, kɛ naanɔ wala he hiɛnɔkamɔ lɛ.—Yohane 3:16, 36.
Ha ojwɛŋmɔ ahi nibii ni he hiaa lɛ anɔ. Yaa Yehowa ŋɔɔ daa gbi yɛ sɔlemɔ mli, ni obi ni eha bo nyɛmɔ koni okɛŋmɛ otsui shi. (Filipibii 4:6, 7, 13, NW) Jiemɔ susumɔ fɛɛ susumɔ ni oyɔɔ akɛ okɛ efɔŋ aaato mɛi ni haa onaa amanehulu lɛ anajiaŋ lɛ kɛjɛ ojwɛŋmɔ mli. Shi saji lɛ oha Yehowa. (Romabii 12:19) Yaa nɔ otao gbɛi ni oootsɔ nɔ oha osubaŋ ahi kɛya hiɛ, ni ona Kristofoi asui. (2 Petro 1:5-8) Ohiɛ asɔ nɔ fɛɛ nɔ ni mɛi krokomɛi feɔ haa bo lɛ, ní onukpai ni tsuɔ omumɔŋ hiamɔ nii ahe nii yɛ suɔmɔ mli lɛ fata he lɛ. (Hebribii 13:7, 17) Ye Nyɔŋmɔ anɔkwa, ni okɛ ohiŋmɛi ama wala jweremɔ nɔ̃ lɛ nɔ, kɛ hiɛnɔkamɔ akɛ gbele po nyɛŋ aha eŋmɛɛ bo.—Yohane 5:28, 29; 17:3.
Kɛ kpaako onii feɔ mɔbɔ waa loo okɛ kaai ni mli wa kpeɔ lɛ, “okɛ ohiɛ afɔ̃ Yehowa nɔ kɛ otsui fɛɛ,” ni yɛ naagbee lɛ mlifilimɔ babaoo baaye owerɛho kɛ onɔnaa lɛ najiaŋ. (Abɛi 3:5, 6; Yohane 16:20) Miishɛɛ baaye amanehulu najiaŋ, beni Nyɔŋmɔ jɔɔ bo taakɛ ejɔɔ Hiob lɛ. Ŋmɛnɛŋmɛnɛ beaŋ amanehului lɛ jeee nɔ ko kwraa kɛ akɛto ojweremɔ nɔ̃ lɛ he. (Okɛto Romabii 8:18 he.) Otsuishiŋmɛɛ ni okɛ anɔkwayeli tsuɔ he nii lɛ baanyɛ awo mɛi krokomɛi ahewalɛ ni eye ebua bo ni ona Kristofoi asui fɛfɛji ni jɛɔ “gbɔmɔ hee” lɛ mli baa lɛ. (Efesobii 4:23, 24; Kolosebii 3:10, 12-14) Belɛ, ná miishɛjemɔ kɛjɛ bɔfo Petro ŋaawoo ni nilee yɔɔ mli nɛɛ mli: “Mɛi ni naa amanehulu yɛ Nyɔŋmɔ suɔmɔ lɛ naa lɛ hu atu amɛsusumai awo bɔlɔ anɔkwafo lɛ dɛŋ yɛ ekpakpafeemɔ mli.”—1 Petro 4:19.
[Mfoniri ni yɔɔ baafa 23]
Feemɔ tamɔ Hiob. Onijiaŋ akaje wui kɔkɔɔkɔ
[Mfoniri ni yɔɔ baafa 24]
Okɛ ohiɛ afɔ̃ Yehowa nɔ kɛ otsui fɛɛ