Bɔ ni Ooofee ni Okɛ Nilee Wolo lɛ Afee Kaselɔi

¹ Oti ni Kristofoi fɛɛ sumɔɔ ni amɛkɛma amɛhiɛ ji ni amɛtsɔɔ mɛi krokomɛi anɔkwale lɛ, ni amɛha mɛi ni “hiɛ naanɔ wala he jwɛŋmɔ kpakpa” lɛ atsɔ kaselɔi. (Bɔf. 13:48, NW; Mat. 28:19, 20) Yehowa gbɛjianɔtoo lɛ kɛ dɛŋdade ni yɔɔ naakpɛɛ ni wɔkɛbaatsu enɛ he nii ewo wɔdɛŋ—Nilee Ni Kɛ Mɔ Yaa Naanɔ Wala Mli wolo lɛ. Esaneyitso lɛ maa bɔ ni ehe hiaa waa akɛ afee shia Biblia mli nikasemɔi lɛ nɔ mi, ejaakɛ naanɔ wala damɔ Yehowa, anɔkwa Nyɔŋmɔ kome pɛ lɛ kɛ e-Bi, Yesu Kristo he nilee ni aaana nɔ.—Yoh. 17:3.

² Amrɔ nɛɛ, Nilee wolo lɛ ji Asafo lɛ wolo titri ni ekɛtsuɔ nii yɛ shia Biblia mli nikasemɔi afeemɔ mli. Kɛ wɔkɛtsu nii lɛ, wɔbaanyɛ wɔtsɔɔ mɛi anɔkwale lɛ, ni efee mlɛo, ni efee faŋŋ, ni wɔkɛ be kuku afee. Enɛ baaye abua ni ashɛ mɛi ni atsɔɔ amɛ nii lɛ atsui he. (Luka 24:32) Shi, ehe miihia ni nikasemɔ nɔkwɛlɔ lɛ kɛ nitsɔɔmɔ he ŋaa kpakpai sɔrɔtoi atsu nii. Yɛ nakai yiŋtoo lɛ hewɔ lɛ, ato nɔ ni aŋma ahɔ mli nɛɛ he gbɛjianɔ. Ekɛ ŋaawoi haa, ni ekɛ nitsɔɔmɔ gbɛi sɔrɔtoi ni kɛ nitsumɔ emɔ shi jogbaŋŋ yɛ afii ni eho lɛ amli lɛ haa. Kɛ okɛ sɛɛyoomɔ tsu nii, ni okɛ bɔ ni aŋkroaŋkroi ashihilɛi yɔɔ ha lɛ hu tsu nii lɛ, fiofio lɛ, obaanyɛ okɛ nɔ ni atsɔɔ yɛ biɛ lɛ ekomɛi atsu nii, loo ni okɛ fɛɛ atsu nii. Okɛ nɔ ni aŋma ahɔ mli nɛɛ ato, ni ofɔ mli kwɛmɔ. Ebaanyɛ eye ebua bo ni ohe asa jogbaŋŋ diɛŋtsɛ yɛ kaselɔi afeemɔ mli, beni okɛ Nilee wolo lɛ tsuɔ nii lɛ.

³ Feemɔ Shia Biblia Mli Nikasemɔ ni Yaa Hiɛ: Jiemɔ miishɛɛ diɛŋtsɛ kpo yɛ nikaselɔ lɛ he akɛ mɔ ko ni baatsɔ Kristofonyo kaselɔ kɛ mumɔŋ nyɛmi nuu loo yoo. Okɛ miishɛɛ, naanyobɔɔ, kɛ ekãafeemɔ atsu nii. Kɛ ofee toibolɔ kpakpa lɛ, obaana ole mɔ kroko lɛ—bɔ ni eyɔɔ ha kɛ eshihilɛ mli sane—ní baaye abua bo ni oyoo bɔ ni ooofee oye obua lɛ jogbaŋŋ yɛ mumɔŋ. Ná suɔmɔ akɛ okɛ ohe aaaha yɛ nikaselɔ lɛ hewɔ.—1 Tes. 2:8.

⁴ Kɛ ato nikasemɔ shishi nɔŋŋ lɛ, nɔ ni abaasumɔ titri ji ni akase Nilee wolo lɛ taakɛ ato yitsei lɛ anaa yɛ yibɔ naa aha lɛ. Enɛ baaha nikaselɔ lɛ anu anɔkwale lɛ shishi fiofio, akɛni wolo lɛ wieɔ Biblia mli saji ahe yɛ bɔ ni ato naa jogbaŋŋ aha lɛ hewɔ. Yaa nɔ oha nikasemɔ lɛ afee mlɛo ni eŋɔɔ, koni no aha efee miishɛɛ ni eya nɔ. (Rom. 12:11) Yɛ bɔ ni nikaselɔ lɛ shihilɛi kɛ enilee yɔɔ ha lɛ naa lɛ, ekolɛ eeenyɛ eba akɛ ooogbe yitsei babaoo naa yɛ nikasemɔ be kome ni heɔ ŋmɛlɛtswaa kome loo nɔ̃ mli, yɛ be mli ni owooo nikasemɔ lɛ foi. Nikaselɔi lɛ baaya hiɛ jogbaŋŋ kɛ nitsɔɔlɔ kɛ nikaselɔ lɛ fɛɛ ye be ni amɛto lɛ nɔ kɛha nikasemɔ lɛ otsi fɛɛ otsi lɛ. No hewɔ lɛ, yɛ mɛi babaoo agbɛfaŋ lɛ, esa akɛ anyɛ agbe wolo lɛ mli yitsei 19 lɛ naa yɛ nɔ ni shɛɔ nyɔji komɛi amli.

⁵ Okɛ wiemɔ kuku ni baatee miishɛɛ shi yɛ nikasemɔ lɛ mli lɛ aje nikasemɔ be lɛ eko fɛɛ eko shishi. Obaana akɛ wiemɔ ni aŋma yɛ yitso fɛɛ yitso yiteŋgbɛ lɛ ji esaneyitso, ní he hiaa ni ama nɔ mi. Saneyitsei bibii lɛ eko fɛɛ eko wieɔ sane oti titri ko he, ni eyeɔ ebuaa bo koni ogbala jwɛŋmɔ kɛya saneyitso lɛ nɔ. Kwɛmɔ jogbaŋŋ ni okawie babaoo tsɔ. Yɛ no najiaŋ lɛ, bɔɔ mɔdɛŋ ni oha nikaselɔ lɛ awie. Ní ooodamɔ nɔ ni nikaselɔ lɛ le momo lɛ nɔ obi lɛ saji pɔtɛɛ ni yeɔ ebuaa lɛ lɛ baaye abua ni esusu sane he ni emu saji anaa yɛ gbɛ ni ja nɔ. (Mat. 17:24-26; Luka 10:25-37; kwɛmɔ School Guidebook, baafa 51 kuku 10.) Nyiɛmɔ saji ni akala yɛ Nilee wolo lɛ mli lɛ sɛɛ jogbaŋŋ. Saji krokomɛi ni tsɔɔ sane mli fitsofitso ni ooowie he ofata he lɛ baanyɛ agbala jwɛŋmɔ kɛjɛ saji otii lɛ anɔ loo ehaŋ efee faŋŋ ni ebaaha nikasemɔ lɛ sɛɛ atsɛ. (Yoh. 16:12) Kɛ atee sanebimɔ ko ni kɔɔɔ sane ni akaseɔ lɛ he lɛ shi lɛ, bei pii lɛ, obaanyɛ oha sanebimɔ lɛ hetoo yɛ nikasemɔ lɛ naagbee gbɛ. Enɛ baaha ogbe otsi lɛ mli nikasemɔ lɛ naa ni nɔ kroko ejieee ojwɛŋmɔ yɛ nɔ. Tsɔɔmɔ mli oha nikaselɔ lɛ akɛ, yɛ sɛɛ mli lɛ, abaaha saji ni ebiɔ lɛ babaoo hetoo beni nikasemɔ lɛ yaa nɔ lɛ.—Kwɛmɔ School Guidebook, baafa 94 kuku 14.

⁶ Kɛ nikaselɔ lɛ heɔ Triniti, susuma ni gbooo, hɛl la, loo amale tsɔɔmɔ kroko ni tamɔ nakai eyeɔ waa diɛŋtsɛ, ní nɔ ni akɛha yɛ Nilee wolo lɛ mli lɛ faaa haaa lɛ lɛ, no lɛ obaanyɛ okɛ Reasoning wolo loo wolo kroko ni wieɔ sane lɛ he lɛ aha lɛ. Kɛɛmɔ lɛ akɛ, okɛ lɛ baasusu sane lɛ he kɛji esusu nɔ ni ekaneɔ lɛ he egbe naa.

⁷ Nikasemɔ lɛ ni akɛ sɔlemɔ aaaje shishi ni akɛ sɔlemɔ agbe naa kɛha Yehowa gbɛtsɔɔmɔ kɛ jɔɔmɔ lɛ haa bulɛ baa nifeemɔ lɛ he, ni ehaa mɔ jajeɔ ejwɛŋmɔ yɛ gbɛ ni bulɛ yɔɔ mli lɛ nɔ, ni egbalaa jwɛŋmɔ kɛyaa Yehowa nɔ akɛ anɔkwa Tsɔɔlɔ. (Yoh. 6:45) Kɛ nikaselɔ lɛ kã he eji tawa shɛrelɔ lolo lɛ, sɛɛ mli lɛ ehe baahia ni okɛɛ lɛ ni etsi ehe kɛjɛ he beni nikasemɔ lɛ yaa nɔ lɛ.—Bɔf. 24:16; Yak. 4:3.

⁸ Okɛ Ŋmalɛi, Nɔkwɛmɔ Nii, kɛ Sanebimɔi ni Akɛtiɔ Saji Amli Atsɔɔ Nii Jogbaŋŋ: Shii abɔ ni ekolɛ nitsɔɔlɔ lɛ ekase sane lɛ eha dã lɛ kɔɔɔ he eko, nitsɔɔlɔ ni he esa baati nikasemɔ fɛɛ nikasemɔ mli yɛ be mli ni esusuɔ nikaselɔ pɔtɛɛ ko he lɛ. Enɛ yeɔ ebuaa ni asusuɔ saji ni nikaselɔ lɛ baanyɛ abi lɛ ahe. Kɛ oootsɔɔ nii ni nitsɔɔmɔ lɛ amɔ shi lɛ, nu saji otii ni yɔɔ yitso lɛ mli lɛ ashishi jogbaŋŋ. Kwɛmɔ ŋmalɛi lɛ amli ni okwɛ bɔ ni amɛkɔɔ nikasemɔ lɛ he amɛhaa, ni otsɔɔ emli nɔ ni esa akɛ akane beni nikasemɔ lɛ yaa nɔ lɛ. Susumɔ bɔ ni ooonyɛ ofee otsɔɔ nii lɛ he, yɛ be mli ni okɛ nɔkwɛmɔ nii kɛ sanebimɔi ni akɛtiɔ saji amli lɛ ni yɔɔ yitso lɛ naagbee gbɛ lɛ tsuɔ nii lɛ.

⁹ Kɛ okɛ ŋmalɛi lɛ tsu nii jogbaŋŋ lɛ, obaaye obua nikaselɔ lɛ ni ele akɛ eekase Biblia lɛ lɛlɛŋ. (Bɔf. 17:11) Okɛ akrabatsa ni ji “Okɛ O-Biblia lɛ Atsu Nii Jogbaŋŋ” lɛ ni yɔɔ Nilee wolo lɛ baafa 14 lɛ atsu nii ni okɛtsɔɔ lɛ bɔ ni eeefee etao ŋmalɛi. Tsɔɔmɔ lɛ bɔ ni eeefee eyɔse ŋmalɛi ni aŋmala emli wiemɔi yɛ nikasemɔ lɛ mli lɛ. Kɛ be yɛ lɛ, nyɛtaoa ŋmalɛi ni aŋmalako emli wiemɔi lɛ ni nyɛkane. Ha nikaselɔ lɛ awie bɔ ni amɛfiɔ nɔ ni awie yɛ kuku lɛ mli lɛ sɛɛ amɛhaa loo bɔ ni amɛhaa efeɔ faŋŋ lɛ he. Maa ŋmalɛi lɛ amli fãi komɛi ni saji otii yɔɔ mli lɛ anɔ mi, koni eyoo yiŋtoi ni yɔɔ nikasemɔ lɛ mli saji otii lɛ asɛɛ. (Neh. 8:8) Bei pii lɛ, ehe ehiaaa ni tsɔɔlɔ lɛ kɛ ŋmalɛi ni fa fe nɔ ni wolo lɛ kɛhaa lɛ bawoɔ sanegbaa lɛ mli. Wiemɔ sɛɛnamɔ ni yɔɔ Biblia woji lɛ agbɛi kɛ bɔ ni ato naa aha lɛ he. Eeefee yelikɛbuamɔ akɛ nikaselɔ lɛ aaakane June 15, 1991 Buu-Mɔɔ lɛ baafai 27-30. Kɛ aaahi lɛ, wo hewalɛ ni akɛ New World Translation lɛ atsu nii. Fiofio lɛ, obaanyɛ otsɔɔ bɔ ni aaafee akɛ efãi sɔrɔtoi lɛ atsu nii, tamɔ hei ni akɛtsɛɔ ŋmalɛi asɛɛ lɛ kɛ Biblia mli wiemɔi ni ato naa lɛ nɛkɛ.

¹⁰ Theocratic Ministry School Guidebook lɛ Nikasemɔ 34 lɛ tsɔɔ mli akɛ, nɔkwɛmɔ nii haa mɔ jwɛŋmɔŋ nyɛmɔi tsuɔ nii, ni ehaa efeɔ mlɛo akɛ aaanu saji heei ni asusuɔ he lɛ shishi. Amɛkɛ jwɛŋmɔŋ nyɛmɔ kɛ henumɔŋ nyɛmɔ lɛ feɔ ekome, bɔni afee ni akɛ shɛɛ sane lɛ aha kɛ ekãa ni bei pii lɛ anyɛɛɛ akɛ anɔkwa saji kukuji atsu he nii nakai lɛ. (Mat. 13:34) Nɔkwɛmɔ nii sɔrɔtoi babaoo ni akɛtsɔɔ mɔ nii, ni ewaaa ni kanyaa mɔ, yɛ Nilee wolo lɛ mli. Akɛ nɔkwɛmɔ nɔ lɛ, nɔkwɛmɔ nɔ ni akɛtsu nii yɛ yitso 17 lɛ tswaa hiɛsɔɔ ni aaana yɛ bɔ ni Yehowa kɛ niyenii, hehaa nii, kɛ wɔɔhe haa kɛtsɔɔ Kristofoi asafo lɛ nɔ yɛ mumɔŋ shishinumɔ naa lɛ emaa shi. Abaanyɛ akɛ mfonirii fɛfɛji ni atɛŋ yɛ Nilee wolo lɛ mli lɛ atsu nii jogbaŋŋ kɛmɔ shi, koni akɛtee henumɔi ashi. Yɛ saneyitso bibioo, “Gbohiiashitee ni Kɛ Mlifilimɔ Baa Lɛ” shishi, ni yɔɔ baafa 185 lɛ mli lɛ, abaanyɛ awo bɔ ni kuku 18 lɛ kanyaa mɔ ehaa lɛ mli hewalɛ kɛtsɔ nikaselɔ lɛ ni aaaha esaa ekwɛ mfoniri ni yɔɔ baafa 86 lɛ ekoŋŋ lɛ nɔ. Enɛ baatsirɛ lɛ ni esusu gbohiiashitee lɛ he akɛ nɔ ko ni baaba diɛŋtsɛ yɛ Nyɔŋmɔ Maŋtsɛyeli lɛ shishi.

¹¹ Ehe miihia ni Biblia mli nikaselɔi aya amɛhiɛ yɛ mumɔŋ yɛ nikasemɔ fɛɛ nikasemɔ mli. Yɛ yiŋtoo nɛɛ hewɔ lɛ, kaaku ohiɛ oshwie sanebimɔi ni yɔɔ akrabatsa ni ji “Kaa Onilee Okwɛ” ni jeɔ kpo yɛ yitso fɛɛ yitso naagbee gbɛ lɛ nɔ. Bo nɔ ni akaseɔ lɛ he saji ahetoo ni jwɛŋmɔ yɔɔ mli lɛ toi fe hetoo ni ja kɛkɛ. Ato sanebimɔi nɛɛ ateŋ babaoo he gbɛjianɔ koni akɛha mɔ lɛ aha hetoo kɛjɛ etsui mli. Akɛ nɔkwɛmɔ nɔ lɛ, kwɛmɔ baafa 31, he ni abiɔ nikaselɔ lɛ yɛ akɛ: “Mɛɛ Yehowa Nyɔŋmɔ sui kpakpai komɛi sa ohiɛ jogbaŋŋ?” lɛ.—2 Kor. 13:5.

¹² Tsɔsemɔ Nikaselɔi ni Amɛsaa Amɛhe Kɛha Nikasemɔ Lɛ: Nikaselɔ ni kaneɔ nɔ ni abaakase lɛ kɛtsɔɔ hiɛ, ni ekadiɔ hetooi lɛ, ni esusuɔ bɔ ni eeefee ewie amɛhe yɛ lɛ diɛŋtsɛ ewiemɔi amli lɛ, baaya hiɛ yɛ mumɔŋ oyayaayai. Kɛtsɔ onɔkwɛmɔ nɔ kɛ hewalɛwoo nɔ lɛ, obaanyɛ otsɔse lɛ ni esaa ehe kɛha nikasemɔ lɛ. Okɛ owolo ni okɛ niŋmaa tso ekadi wiemɔi otii, kɛ saji kukuji lɛ, loo ofolɔ amɛ shishi lɛ atsɔɔ lɛ. Tsɔɔmɔ bɔ ni abaafee ana hetooi ni yɔɔ tɛ̃ɛ kɛha sanebimɔi ni akala lɛ. Ní nyɛaafee ekome kɛsaa nyɛhe yɛ yitso lɛ eko mli lɛ baaye abua nikaselɔ lɛ. Wo lɛ hewalɛ ni ewie yɛ lɛ diɛŋtsɛ ewiemɔi amli. No dani ebaafee faŋŋ kɛji enuɔ nikasemɔ lɛ shishi loo enuuu shishi. Kɛ ekane ehetoo lɛ kɛjɛ wolo lɛ mli lɛ, obaanyɛ okanya bɔ ni esusuɔ nii ahe ehaa lɛ kɛtsɔ sane ni ooobi lɛ, ni etsɔɔ bɔ ni eeefee etsɔɔ oti lɛ mli eha mɔ kroko yɛ lɛ diɛŋtsɛ ewiemɔi amli lɛ nɔ.

¹³ Wo nikaselɔ lɛ hewalɛ ni etao ŋmalɛi ni aŋmalako emli wiemɔi lɛ ákɛ edaa otsi hesaamɔ lɛ fã, akɛni ekolɛ anaŋ be ni akɛaakane ŋmalɛi lɛ fɛɛ yɛ nikasemɔ lɛ mli lɛ hewɔ. Jiemɔ eyi yɛ mɔdɛŋ ni ebɔɔ yɛ enikasemɔi lɛ amli lɛ he. (2 Pet. 1:5; kwɛmɔ August 15, 1993 Buu-Mɔɔ, baafa 13-14, kɛha ŋaawoi krokomɛi ni kɔɔ nɔ ni nitsɔɔlɔ lɛ kɛ nikaselɔ lɛ fɛɛ baanyɛ afee koni amɛha Biblia kasemɔ lɛ aya hiɛ lɛ he.) Kɛtsɔ nɛkɛ gbɛ nɔ lɛ, aatsɔse nikaselɔ lɛ ni esaa ehe kɛha asafoŋ kpeei ni eeeya ni eha saji ahetoo ni shishinumɔ yɔɔ mli. Ebaaya nɔ ekase bɔ ni eeefee ena teemɔŋ nikasemɔ he sui kpakpai ni baawaje lɛ, ni ekã he eya ehiɛ yɛ anɔkwale lɛ mli, beni ekɛ Nilee wolo lɛ egbe lɛ diɛŋtsɛ e-Biblia mli nikasemɔ naa lɛ.—1 Tim. 4:15; 1 Pet. 2:2.

¹⁴ Tsɔɔmɔ Nikaselɔi Agbɛ Kɛya Yehowa Gbɛjianɔtoo lɛ Mli: Eji kaselɔ feelɔ lɛ gbɛnaa nii akɛ ekudɔ nikaselɔ lɛ miishɛɛ kɛya Yehowa gbɛjianɔtoo lɛ mli. Kɛ nikaselɔ lɛ yɔse, ni ená hiɛsɔɔ kɛha gbɛjianɔtoo lɛ, ni ena bɔ ni ehe hiaa akɛ ebatsɔ emli nyo lɛ, ebaaya ehiɛ oyayaayai kɛya mumɔŋ dalɛ mli. Wɔmiisumɔ ni ena miishɛɛ yɛ Yehowa webii ni ekɛaabɔ lɛ he, ni wɔkpaa gbɛ akɛ ekɛ wɔ baahi Maŋtsɛyeli Asa lɛ nɔ, he ni enine baanyɛ ashɛ mumɔŋ kɛ henumɔŋ sɛɛfimɔ ni Kristofoi asafo lɛ kɛhaa lɛ nɔ yɛ.—1 Tim. 3:15.

¹⁵ Afee Yehowa Odasefoi—Miifee Nyɔŋmɔ Suɔmɔnaa Nii yɛ Ekomefeemɔ Mli yɛ Jeŋ Fɛɛ wolo bibioo lɛ, ni eha aŋkroaŋkroi ale gbɛjianɔtoo kome pɛ ni anaa ni Yehowa kɛtsuɔ nii ŋmɛnɛ koni ekɛtsu esuɔmɔnaa nii ahe nii lɛ. Kɛ ato nikasemɔ lɛ shishi nɔŋŋ pɛ lɛ, mɛni hewɔ okɛ eko haaa nikaselɔ lɛ? Kɛjɛ shishijee mli tɔ̃ɔ lɛ, yaa nɔ ofɔ̃ nikaselɔ lɛ nine kɛya kpeei. Tsɔɔmɔ bɔ ni afeɔ amɛ ahaa. Obaanyɛ okɛɛ lɛ maŋ shiɛmɔ ni baa ni abaaha lɛ yitso loo ni okɛ sane ni abaasusu he yɛ Buu-Mɔɔ Nikasemɔ mli lɛ atsɔɔ lɛ. Ekolɛ obaanyɛ okɛ lɛ aya koni eyana Maŋtsɛyeli Asa lɛ, beni afeee kpee ko, bɔni afee ni ekolɛ he ko hee ni eeeya jɛmɛ klɛŋklɛŋ kwraa lɛ he gbeyei ni eeeshe lɛ aba shi. Ekolɛ obaanyɛ otao tsɔne ni nyɛkɛya kpeei lɛ. Kɛ etee lɛ, ha ni ehiɛ amɛ ni ena miishɛɛ. (Mat. 7:12) Okɛ lɛ atsɔɔ Odasefoi krokomɛi ní onukpai lɛ hu fata he. Wɔyɛ hekɛnɔfɔɔ akɛ, ebaaje shishi ebu asafo lɛ akɛ emumɔŋ weku. (Mat. 12:49, 50; Mar. 10:29, 30) Obaanyɛ okɛ oti ko ama ehiɛ, tamɔ kpee kome ni eeeya otsi fɛɛ otsi, ni okɛ otii lɛ ekomɛi afata he fiofio.—Heb. 10:24, 25.

¹⁶ Be mli ni shia Biblia mli nikasemɔ ni akɛ Nilee wolo lɛ feɔ lɛ yaa nɔ lɛ, maa efãi ni tsɔɔ bɔ ni ehe hiaa ni aya asafoŋ kpeei daa lɛ nɔ mi. Titri lɛ, kadimɔ baafai 52, 115, 137-9, 159, kɛ yitso 17 lɛ hu. Wiemɔ bɔ ni bo diɛŋtsɛ onuɔ he ohaa waa yɛ bɔ ni ohiɛ sɔɔ Yehowa gbɛjianɔtoo lɛ ohaa lɛ he. (Mat. 24:45-47) Wiemɔ nyɛ asafo lɛ kɛ nɔ ni nyɛkaseɔ yɛ kpeei lɛ ashishi lɛ he ekpakpa. (Lala 84:11; 133:1-3) Ebaahi akɛ nikaselɔ lɛ aaanyɛ akwɛ Asafo lɛ video sɔrɔtoi lɛ eko fɛɛ eko, yɛ be mli ni akɛ Jehovah’s Witnesses—The Organization Behind the Name lɛ jeɔ shishi. Kɛha ŋaawoi babaoo yɛ bɔ ni aaakudɔ miishɛɛ ni ana kɛya gbɛjianɔtoo lɛ he lɛ, kwɛmɔ November 1, 1984 Blɔfo Buu-Mɔɔ lɛ baafai 14-18, kɛ nɔ ni aŋma ahɔ April 1993 Wɔ Maŋtsɛyeli Sɔɔmɔ lɛ mli lɛ.

¹⁷ Wo Nikaselɔi Ahewalɛ ni Amɛye Mɛi Krokomɛi Odase: Oti ni ma wɔhiɛ yɛ nikasemɔ ni wɔkɛ mɛi feɔ lɛ mli ji ni wɔha amɛtsɔmɔ kaselɔi ni yeɔ odase amɛhaa Yehowa. (Yes. 43:10-12) Enɛ tsɔɔ akɛ esa akɛ nitsɔɔlɔ lɛ awo nikaselɔ lɛ hewalɛ ni ekɛ mɛi krokomɛi agba nɔ ni ekaseɔ kɛjɛɔ Biblia lɛ mli lɛ he sane. Abaanyɛ afee enɛ kɛtsɔ sanebimɔ tamɔ enɛ kɛkɛ nɔ, “Te obaafee tɛŋŋ otsɔɔ anɔkwale nɛɛ mli oha oweku lɛ?” loo “Mɛɛ ŋmalɛ okɛbaatsu nii ni okɛtsɔɔ enɛ mli otsɔɔ onaanyo?” Maa Nilee wolo lɛ mli hei titrii ni awoɔ odaseyeli he hewalɛ yɛ lɛ nɔ mi, tamɔ baafai 22, 93-5, 105-6, kɛ yitso 18 lɛ hu. Abaanyɛ akɛ dɛhiɛmɔ woji komɛi aha nikaselɔ lɛ ni ekɛtsu nii ni ekɛye mɛi krokomɛi odase trukaa. Wo lɛ ŋaa ni efɔ̃ eweku lɛ mli bii lɛ anine ni amɛbana enikasemɔ lɛ mli gbɛfaŋnɔ. Ani eyɛ nanemɛi hu ni baasumɔ ni amɛkase nii? Bi lɛ ni etsɔɔ bo mɛi ni yɔɔ he miishɛɛ lɛ.

¹⁸ Kɛ etee Teokrase Sɔɔmɔ Skul lɛ kɛ Sɔɔmɔ Kpee lɛ, mɔ ni baatsɔ kaselɔ wɔsɛɛ ko lɛ baanyɛ aná tsɔsemɔ kɛ hewalɛwoo babaoo ni baaye abua lɛ, ni ebatsɔ sanekpakpa lɛ he shiɛlɔ. Kɛ etsɔɔ akɛ eesumɔ ni ekɛ ehe awo skul lɛ mli loo ni etsɔ shiɛlɔ ni abaptisiko lɛ lɛ, no lɛ akɛ shishitoo mlai ni ato naa yɛ Our Ministry wolo lɛ baafai 98 kɛ 99 lɛ baatsu nii. Kɛ eshihilɛ mli su ko haaa efee mɔ ni sa lɛ, obaanyɛ okwɛ Asafo lɛ woji amli koni ona nikasemɔ ni kɔɔ sane lɛ he lɛ ni okɛ lɛ asusu he. Akɛ nɔkwɛmɔ nɔ lɛ, ekolɛ ebaawa eha nikaselɔ ko akɛ ebaaye tawa shɛremɔ loo tsofai fɔji kɛ nitsumɔ ni eka ehe lɛ nɔ. Reasoning wolo lɛ kɛ Ŋmalɛ naa yiŋtoi ni mli wa, ni tsɔɔ nɔ hewɔ ni Kristofoi kwaa jeŋbai ni tamɔ subaŋi fɔji lɛ haa, ni etsɔɔ gbɛ ni atsɔ nɔ aye omanye yɛ mɛi krokomɛi ni ayeɔ abuaa koni amɛtsi amɛhe kɛjɛ he lɛ yɛ baafa 112. Okɛ lɛ asɔle yɛ sane lɛ he, ni otsɔɔ lɛ ni etswa hekɛnɔfɔɔ ni eyɔɔ yɛ Yehowa mli lɛ ema shi kɛha yelikɛbuamɔ.—Yak. 4:8.

¹⁹ Atsɔɔ gbɛ ni abaatsɔ nɔ akɛtsu nii, koni akɛle kɛji mɔ ko sa akɛ ekɛ ehe woɔ shiɛmɔ nitsumɔ lɛ mli lo lɛ yɛ January 15, 1996, Buu-Mɔɔ lɛ baafa 16, kuku 6. Kɛ nikaselɔ lɛ sa lɛ, ebaafee yelikɛbuamɔ akɛ okɛ lɛ aaafee enɛ he nɔkwɛmɔ nɔ, koni okɛsaa lɛ kɛha klɛŋklɛŋ gbi ni ebaaya shiɛmɔ lɛ. Okɛ lɛ agba bɔ ni mɛi feɔ amɛnii amɛhaa, kɛ naataamɔ saji ni fɔɔ baa yɛ nyɛ shikpɔŋkuku lɛ mli lɛ he sane yɛ gbɛ kpakpa nɔ. Kɛ eeehi kwraa lɛ, okɛ lɛ aje shishi klɛŋklɛŋ yɛ shia-kɛ-shia nitsumɔ lɛ mli, ni otsɔse lɛ fiofio yɛ shiɛmɔ nitsumɔ lɛ fãi krokomɛi lɛ amli. Kɛ oha oshiɛmɔ wiemɔ lɛ fee kuku ni ewaaa lɛ, ebaafee mlɛo eha lɛ akɛ eeekase. Feemɔ mɔ ni tswaa mɔ emaa shi, ni woɔ mɔ hewalɛ, ni ojie miishɛɛ kpo yɛ nitsumɔ lɛ mli, bɔni afee ni ená miishɛɛ ni oyɔɔ lɛ eko ni ejie lɛ kpo etsɔɔ. (Bɔf. 18:25) Esa akɛ oti ni baama kaselɔ hee lɛ hiɛ lɛ afee sanekpakpa lɛ shiɛlɔ ni yɔɔ ekãa ni yaa shiɛmɔ daa ni eeeji. Ekolɛ obaanyɛ oye obua lɛ ni eto gbɛjianɔ kpakpa kɛha shiɛmɔ nitsumɔ lɛ. Bɔni afee ni eya ehiɛ yɛ nyɛmɔ ni eyɔɔ akɛ eeeye mɛi krokomɛi odase lɛ mli lɛ, obaanyɛ owo lɛ ŋaa ni ekane August 15, 1984 Blɔfo Buu-Mɔɔ lɛ baafai 15-25; September 1, 1988 baafai 9-20; January 15, 1991 baafai 15-20 (Vol. 112, No. 2 GA); kɛ January 1, 1994 Buu-Mɔɔ lɛ baafai 20-5.

²⁰ Wo Nikaselɔi Ahewalɛ Kɛha Henɔjɔɔmɔ kɛ Baptisimɔ: Esa akɛ efee mlɛo kɛha nikaselɔ anɔkwafo lɛ akɛ eeekase nibii babaoo kɛtsɔ Nilee wolo lɛ kasemɔ nɔ, ni ejɔɔ ehe nɔ eha Nyɔŋmɔ ni ehe asa kɛha baptisimɔ. (Okɛto Bɔfoi lɛ Asaji 8:27-39; 16:25-34 he.) Shi, dani aaakanya mɔ ko koni ejɔɔ ehe nɔ lɛ, ehe miihia ni etu ehe eha Yehowa. (Lala 73:25-28) Taomɔ hegbɛi ni oootsɔ nɔ otswa hiɛsɔɔ ni aaana aha Yehowa sui lɛ oma shi, yɛ nikasemɔ lɛ fɛɛ mli. Tsɔɔmɔ bɔ ni bo diɛŋtsɛ oyɔɔ henumɔi ni mli kwɔ ohaa Nyɔŋmɔ. Ye obua nikaselɔ lɛ ni esusu bɔ ni eeefee ena ekɛ Yehowa teŋ wekukpaa ni yɔɔ miishɛɛ lɛ he. Kɛ ebale Nyɔŋmɔ lɛlɛŋ ni esumɔɔ lɛ lɛ, no lɛ ebaasɔmɔ Lɛ yɛ anɔkwayeli mli, ejaakɛ Nyɔŋmɔ jamɔ hetuu-kɛhamɔ kɔɔ bɔ ni wɔnuɔ he wɔhaa yɛ Yehowa he akɛ mɔ ko lɛ he.—1 Tim. 4:7, 8; kwɛmɔ School Guidebook lɛ baafa 76, kuku 11.

²¹ Bɔɔ mɔdɛŋ ni oshɛ nikaselɔ lɛ tsui he. (Lala 119:11; Bɔf. 16:14; Rom. 10:10) Ehe miihia ni ele bɔ ni anɔkwale lɛ saa lɛ diɛŋtsɛ ehe ehaa, koni ekpɛ eyiŋ yɛ nɔ ni ekɛ nɔ ni ekase lɛ baafee lɛ he. (Rom. 12:2) Ani eheɔ anɔkwale lɛ ni akɛhaa lɛ otsi fɛɛ otsi lɛ eyeɔ lɛlɛŋ? (1 Tes. 2:13) Kɛbashi biɛ lɛ, obaanyɛ okɛ nikaselɔ lɛ agba sane kɛtsɔ saji ni tsɔɔ sɛɛyoomɔ ni ooobi ni ekɛtsɔɔ ejwɛŋmɔ lɛ nɔ, tamɔ: Te onuɔ enɛ he ohaa tɛŋŋ? Te obaafee tɛŋŋ ni okɛ enɛ atsu nii yɛ oshihilɛ mli? Obaanyɛ otsɔ hetoo ni eha lɛ nɔ oyɔse he ni ehe hiaa ni aye abua lɛ babaoo yɛ, koni ashɛ etsui lɛ he. (Luka 8:15; kwɛmɔ School Guidebook lɛ baafa 52, kuku 11.) Mfonirii ahe niŋmaai ni yɔɔ Nilee wolo lɛ baafai 172 kɛ 174 lɛ biɔ akɛ: “Ani ojɔɔ ohe nɔ oha Nyɔŋmɔ yɛ sɔlemɔ mli?” kɛ “Mɛni tsiɔ obaptisimɔ gbɛ?” Enɛ baanyɛ akanya nikaselɔ lɛ jogbaŋŋ kɛmɔ shi ni etsu he nii.

²² Atsɔɔ gbɛ ni abaatsɔ nɔ beni shiɛlɔ ni abaptisiko lɛ lɛ miisumɔ ni abaptisi lɛ lɛ yɛ January 15, 1996 Buu-Mɔɔ lɛ baafa 17, kuku 9. Aŋma Nilee wolo lɛ kɛ yiŋtoo akɛ ewaje mɔ lɛ, ni enyɛ eha “Sanebimɔi Kɛha Mɛi ni Miisumɔ ni Abaptisi Amɛ” lɛ, ni anaa yɛ Our Ministry wolo lɛ saji ni fata he lɛ, ni onukpai lɛ kɛ lɛ baatĩ mli lɛ ahetoo. Kɛ oma sanebimɔi ni akala yɛ Nilee wolo lɛ mli lɛ ahetoo nɔ mi lɛ, esa akɛ ewaje nikaselɔ lɛ jogbaŋŋ kɛha sanebimɔi sɔrɔtoi ni onukpai lɛ baabi koni ekɛsaa ehe kɛha baptisimɔ lɛ.

²³ Ye Obua Mɛi ni Gbeɔ Shia Biblia Mli Nikasemɔ Naa Lɛ: Esa akɛ akpa gbɛ akɛ beni mɔ ko aaagbe Nilee wolo lɛ kasemɔ naa lɛ, enɔkwayeli kɛ bɔ ni emiishɛɛ lɛ mli kwɔ ha yɛ Nyɔŋmɔ sɔɔmɔ mli lɛ baafee faŋŋ. (Mat. 13:23) No hewɔ ni wolo lɛ naagbee saneyitso bibioo lɛ biɔ akɛ, “Mɛni Obaafee?” Naagbee kukuji lɛ biɔ nikaselɔ lɛ ni ekɛ ejwɛŋmɔ ama wekukpaa ni esa akɛ étsɔ hiɛ ekɛ Nyɔŋmɔ éna momo lɛ nɔ, bɔ ni ehe hiaa ni ekɛ nilee ni ená lɛ atsu nii, kɛ bɔ ni ehe hiaa ni efee he nɔ ko oya, koni ekɛjie suɔmɔ ni eyɔɔ kɛha Yehowa lɛ kpo etsɔɔ. Atoko gbɛjianɔ ko kɛhako woji krokomɛi ni akɛ mɛi ni akɛ amɛ gbeɔ Nilee wolo lɛ kasemɔ naa lɛ baakase. Okɛ mlihilɛ atsɔɔ mli faŋŋ oha nikaselɔ ni kɛ Nyɔŋmɔ he nilee lɛ tsuuu nii lɛ, nɔ ni esa akɛ efee ni eya hiɛ yɛ mumɔŋ. Obaanyɛ okɛ lɛ agba sane yɛ bei komɛi amli, koni oshi gbɛ lɛ ofɔ shi oha lɛ, ni efee nii ni kɛ lɛ baaya naanɔ wala mli.—Jaj. 12:13.

²⁴ Kaselɔ hee ni mɔɔ anɔkwale lɛ mli ni abaptisiɔ lɛ lɛ baaya nɔ ada babaoo yɛ enilee kɛ esane shishinumɔ mli, bɔni afee ni efĩ shi shiŋŋ yɛ hemɔkɛyeli lɛ mli. (Kol. 2:6, 7) Yɛ nɔ najiaŋ ni okɛ lɛ aaatsa eshia Biblia mli nikasemɔ lɛ nɔ beni okɛ lɛ egbe Nilee wolo lɛ kasemɔ naa lɛ, obaanyɛ okɛ ohe aha ni okɛ yelikɛbuamɔ fɛɛ ni he baahia lɛ lɛ aha lɛ, bɔni afee ni eda yɛ mumɔŋ. (Gal. 6:10; Heb. 6:1) Yɛ egbɛfaŋ lɛ, ebaanyɛ eha enii ashishinumɔ lɛ aye emuu kɛtsɔ Biblia lɛ kanemɔ daa nɔ, Buu-Mɔɔ lɛ kɛ woji krokomɛi ni tsulɔ anɔkwafo lɛ kɛha lɛ kasemɔ yɛ teemɔŋ, ehe ni eeesaa kɛha kpeei ni eya hu, kɛ nanemɛi heyelilɔi ni ekɛ amɛ aaagba anɔkwale lɛ he sane. (Mat. 24:45-47; Lala 1:2; Bɔf. 2:41, 42; Kol. 1:9, 10) Our Ministry wolo lɛ ni eeekane ni ekɛ emli saji lɛ aaatsu nii lɛ baatsu gbɛfaŋnɔ ko ni he hiaa waa, yɛ be mli ni etoɔ gbɛjianɔ yɛ teokrase gbɛ nɔ, koni egbe esɔɔmɔ lɛ naa kwraa lɛ.—2 Tim. 2:2; 4:5.

²⁵ Okɛ Nitsɔɔmɔ he Ŋaa Atsu Nii: Afã wɔ koni ‘wɔha mɛi atsɔmɔ kaselɔi, ni wɔtsɔɔ amɛ nii.’ (Mat. 28:19, 20) Akɛni nitsɔɔmɔ gbɛ kɛ kaselɔ feemɔ nyiɛ kpaakpa hewɔ lɛ, wɔmiisumɔ ni wɔmia wɔhiɛ ni wɔya hiɛ akɛ nitsɔɔlɔi. (1 Tim. 4:16; 2 Tim. 4:2) Kɛ ootao ŋaawoi babaoo ni tsɔɔ bɔ ni ooofee ona nitsɔɔmɔ he ŋaa lɛ, ekolɛ obaasumɔ ni okane: “Nitsɔɔmɔ he Ŋaa ni Akɛaatsu Nii” kɛ “Otoibolɔi lɛ ni Onine Aaashɛ Amɛtsui Nɔ” ni yɔɔ School Guidebook lɛ mli nikasemɔi 10 kɛ 15 lɛ; “Tsɔɔlɔ, Nitsɔɔmɔ” ni yɔɔ Insight, Kpo 2 lɛ mli; kɛ Buu-Mɔɔ mli saji ni ji “Nibii ni La Nyɛŋ Asha ni Akɛaatswa Tsu Lɛ” kɛ “Kɛ Ootsɔɔ Nii lɛ, Shɛ Tsui lɛ Mli,” February 1, 1985; “Ani Okɛ Mɛi Susuɔ Saji Ahe Kɛjɛɔ Ŋmalɛi lɛ Amli Kɛmɔɔ Shi?” (Blɔfo) March 1, 1986; kɛ “Bɔ ni Ooofee Ona Miishɛɛ yɛ Kaselɔ Feemɔ Mli,” February 15, 1996.

²⁶ Be mli ni obɔɔ mɔdɛŋ ni ofee kaselɔi, yɛ be mli ni okɛ Nilee wolo lɛ tsuɔ nii lɛ, sɔlemɔ daa koni Yehowa, mɔ ni ‘haa eshwereɔ’ lɛ, ajɔɔ mɔdɛŋ ni obɔɔ ni okɛ Maŋtsɛyeli lɛ sanekpakpa lɛ ashɛ adesai atsui mli lɛ nɔ. (1 Kor. 3:5-7) Eba akɛ ooona miishɛɛ ni jɛɔ mɛi krokomɛi anitsɔɔmɔ mli baa lɛ, ni otsu nilee ni kɛ mɔ yaa naanɔ wala mli lɛ he nii!