Wɔyiŋkpɛɛ—Ákɛ Wɔbaanyiɛ Yehowa Shihilɛ Gbɛ lɛ Sɛɛ
1 “Nyɔŋmɔ Shihilɛ Gbɛ” Kpokpaa Wulu nɔ Kpeei lɛ mli saji ni akɛma nɔ lɛ ji yiŋkpɛɛ ni akɛbaatsu nii ni akɛha yɛ naagbee wiemɔ lɛ mli lɛ. Eje shishi kɛ sanejajemɔ akɛ: “Wɔ . . . jɛɔ wɔtsui muu lɛ fɛɛ mli wɔkpɛlɛɔ nɔ akɛ, Nyɔŋmɔ gbɛ lɛ ji shihilɛ gbɛ ni hi fe fɛɛ.” Kaimɔ saji otii komɛi ni he hiaa waa ni yɔɔ nakai yiŋkpɛɛ lɛ mli ni wɔhere nɔ akɛ, “HƐƐ” lɛ!
2 Eji wɔyiŋkpɛɛ akɛ wɔhi shi yɛ hetsemɔ mli yɛ Yehowa hiɛ, koni je lɛ akawo wɔhe muji. Wɔbaaya nɔ ni wɔkɛ Nyɔŋmɔ suɔmɔnaa nii aye klɛŋklɛŋ gbɛhe yɛ wɔshihilɛi amli. Yɛ be mli ni wɔkɛ e-Wiemɔ, Biblia lɛ tsuɔ nii akɛ wɔgbɛtsɔɔlɔ lɛ, wɔgbaŋ afã kɛyaŋ ejurɔ loo abɛku, ni no baama nɔ mi akɛ Nyɔŋmɔ gbɛ lɛ nɔ kwɔ kwraa fe je lɛ gbɛ lɛ.
3 Je lɛ fɛɛ ebuuu Nyɔŋmɔ shihilɛ gbɛ lɛ ni amɛkpaa nɔ ni jɛɔ mli baa lɛ. (Yer. 10:23) No hewɔ lɛ, esa akɛ wɔya nɔ ni wɔha wɔ-Tsɔɔlɔ Kpeteŋkpele, Yehowa atsɔɔ wɔ nii, mɔ ni kɛɔ akɛ: “Gbɛ lɛ nɛ! nyɛnyiɛa nɔ!” (Yes. 30:21) Yehowa shihilɛ gbɛ taakɛ atsɔɔ yɛ Ŋmalɛi lɛ amli lɛ anɔ kwɔ yɛ nɔ fɛɛ nɔ mli. Bɔni afee ni wɔnyiɛ nakai gbɛ lɛ sɛɛ lɛ, ehe miihia ni wɔkɛ nɔ fɛɛ nɔ ni Yehowa tsɔɔ wɔ lɛ atsu nii jogbaŋŋ kɛmɔ shi.
4 Yehowa Nitsɔɔmɔ Gbɛjianɔtoo ni Nɔ Kwɔ: Yehowa tsɔɔ wɔ yiŋtoo diɛŋtsɛ ni yɔɔ shihilɛ sɛɛ kɛ bɔ ni wɔɔfee ni wɔkɛ wɔwala atsu nii jogbaŋŋ kɛmɔ shi. Etsɔɔ wɔ bɔ ni wɔɔfee ni wɔha wɔjwɛŋmɔŋ, jeŋba mli, kɛ mumɔŋ shihilɛi aya hiɛ. Etsɔɔ wɔ bɔ ni wɔɔfee ni wɔkɛ wɔnyɛmimɛi, wɔweku, kɛ wɔnaanyo gbɔmɔ ahi shi yɛ toiŋjɔlɛ mli. Efeɔ enɛ kɛtsɔɔ ewolo ni akɛkaseɔ nii, ni ji Biblia lɛ kɛ egbɛjianɔtoo lɛ nɔ.
5 Wɔ asafoŋ kpeei lɛ ahe hiaa waa yɛ enɛ gbɛfaŋ. Yɛ be mli ni wɔyaa kpeei enumɔ lɛ fɛɛ daa ni wɔkɛ wɔhe woɔ mli lɛ, wɔnine shɛɔ tsɔsemɔ ni mli lɛɛ nɔ akɛ sanekpakpa lɛ he sɔɔlɔi kɛ Kristofoi ashihilɛ he tsɔsemɔ ni ŋmɛɔ pɛpɛɛpɛ. (2 Tim. 3:16, 17) Wɔ Tsɔɔlɔ Kpeteŋkpele lɛ yaa nɔ ekɛ teokrase tsɔsemɔ haa wɔ kɛtsɔ kpeei bibii kɛ kpeei wuji anɔ. Esa akɛ efee oti ní ma wɔhiɛ akɛ wɔfoŋ kpee lɛ eko loo nifeemɔ lɛ fã ko mli kɔkɔɔkɔ kɛji wɔgbɔmɔtsoŋ hewalɛnamɔ kɛ wɔshihilɛi baaŋmɛ wɔ gbɛ akɛ wɔya.
6 Eba akɛ wɔkɛ mɔdɛŋbɔɔ baaya nɔ ni wɔnyiɛ Nyɔŋmɔ shihilɛ gbɛ lɛ sɛɛ yɛ gbii ni kã wɔhiɛ lɛ mli, koni wɔkɛ fɛɛ ajie Yehowa yi kɛha wɔ naanɔ sɛɛnamɔ!—Yes. 48:17.