Tsakemɔ ni Afee yɛ Ŋmɛlɛtswai ni Ataoɔ yɛ Gbɛgbalɔi Adɛŋ

¹ Wɔ fɛɛ wɔnaa miishɛɛ kɛ́ gbɛgbalɔi kɛ gbɛgbalɔi awalɔi ni tsuɔ nii waa yɛ asafo lɛ mli. Yɛ shikpɔŋkuku ni edaaa ni atsu mli nii aahu shii abɔ po mli lɛ, gbɛgbalɔi lɛ efee nɔkwɛmɔnɔ kpakpa amɛfɔ̃ shi kɛtsɔ ekãa ni amɛyɔɔ yɛ Maŋtsɛyeli nitsumɔ lɛ mli lɛ nɔ. Amɛkɛ hewalɛwoo eha shiɛlɔi fɛɛ koni amɛfee mɛi ni bɛ dekã yɛ mɛi ni hiɛ “tsui ni ja” lɛ ataomɔ mli.—Bɔf. 13:48, NW.

² Asafo lɛ eyɔse naagbai ni mli waa ni gbɛgbalɔi lɛ kɛkpeɔ lɛ, titri lɛ, ní amɛaaná heloonaa nitsumɔ ni akɛ be-fã tsuɔ, ni no baaha amɛná hegbɛ koni amɛnine ashɛ amɛ heloonaa nibii ni he hiaa amɛ lɛ nɔ bɔ ni sa, bɔni afee ni amɛhi be-fɛɛ sɔɔmɔ nitsumɔ lɛ mli lɛ. Shika he naagba shihilɛ ni yɔɔ shikpɔji pii anɔ lɛ miiha eeewa kɛmiiha mɛi krokomɛi akɛ amɛkɛ amɛhe aaawo gbɛgbamɔ nitsumɔ lɛ mli, eyɛ mli akɛ, no ji nɔ ni amɛtsui shweɔ ní amɛfee moŋ. Asusu enɛɛmɛi, kɛ nibii krokomɛi ahe jogbaŋŋ yɛ nyɛsɛɛ nyɔji nɛɛ amli.

³ Yɛ nɔ ni asusu he yɛ yiteŋgbɛ nɛɛ hewɔ lɛ, Asafo lɛ etse ŋmɛlɛtswai abɔ ni ataoɔ yɛ daa gbɛgbalɔi kɛ gbɛgbalɔi awalɔi fɛɛ adɛŋ lɛ nɔ. Kɛjɛ afi 1999 kalanda afi lɛ nɔ kɛyaa lɛ, abaatao ŋmɛlɛtswai 70 yɛ daa gbɛgbalɔi adɛŋ daa nyɔŋ nɔ, aloo kɛ abua fɛɛ naa lɛ, ŋmɛlɛtswai 840 kɛha afi lɛ. Abaatao ŋmɛlɛtswai 50 yɛ gbɛgbalɔi awalɔi adɛŋ daa nyɔŋ. Ŋmɛlɛtswai ni ataoɔ yɛ gbɛgbalɔi krɛdɛɛi kɛ maŋsɛɛ sanekpakpa shiɛlɔi adɛŋ lɛ tsakeko akɛni Asafo lɛ toɔ gbɛjianɔ ehaa amɛ kɛyeɔ ebua amɛ koni amɛkɛtsu amɛheloonaa hiamɔ nibii ahe nii lɛ hewɔ. No hewɔ lɛ amɛbaanyɛ amɛkɛ amɛjwɛŋmɔ fɛɛ asusu amɛ shiɛmɔ nitsumɔ lɛ kɛ kaselɔi afeemɔ nitsumɔ lɛ he.

⁴ Wɔyɛ hekɛnɔfɔɔ akɛ, tsakemɔ ní afee yɛ ŋmɛlɛtswai ni ataoɔ lɛ amli lɛ baaye abua gbɛgbalɔi pii koni amɛhiɛ amɛsɔɔmɔ hegbɛi ni jara wa lɛ mli. Esa akɛ egbele gbɛ hu eha shiɛlɔi pii koni amɛkɛ amɛhe awo daa gbɛgbamɔ kɛ gbɛgbalɔi awalɔ nitsumɔ lɛ mli. Kwɛ jɔɔmɔ nɛkɛ ni eeeji kɛha mɔ fɛɛ mɔ ni yɔɔ asafo lɛ mli lɛ!