Woji Bibii Kɛ Nitsumɔ Ni Wɔkɛtao Mɛi Ni Yɔɔ Wiemɔ Lɛ He Miishɛɛ

¹ Woji bibii ji dɛŋdadei ni yɔɔ hewalɛ waa. Wolo bibioo ni yɔɔ baafai 32 pɛ lɛ baanyɛ ekɛ Ŋmalɛ mli anɔkwalei amamɔ shi ni ekumɔ susumɔi kɛ tsɔɔmɔi ni kɛ Nyɔŋmɔ nilee kpaaa gbee lɛ eshwie shi.​—2 Kor. 10:⁠5.

² Beni nuu ko kane Yehowa Odasefoi​—Miifee Nyɔŋmɔ Suɔmɔnaa Nii yɛ Ekomefeemɔ Mli yɛ Jeŋ Fɛɛ wolo lɛ, etsirɛ lɛ ni eŋma akɛ: “Minako gbɛjianɔtoo ni tamɔ nɛkɛ da. . . . Eyɛ naakpɛɛ akɛ aaana gbɔmɛi ni susuɔ Nyɔŋmɔ suɔmɔnaa nifeemɔ he kɛ ekaa nakai, yɛ nɛkɛ jamɔ mli osatofeemɔ yinɔ nɛɛ mli.” Afrika okɔmfo ko kase Na Wala Mli Ŋɔɔmɔ yɛ Shikpɔŋ nɔ Kɛya Naanɔ! wolo bibioo lɛ. Mɛɛ hewalɛ ena yɛ enɔ? Eŋmɛɛ Okɔmfo nitsumɔ lɛ he ni eshwie yei ni ekɛyɔɔ lɛ fɛɛ, ja eŋa nukpa lɛ pɛ. Kɛkɛ ni ekɛ lɛ bote gbalashihilɛ mli yɛ mla naa.

³ Ani Esa akɛ Ohe Triniti lɛ Oye? wolo bibioo lɛ ji anɔkwale lɛ he dɛŋdade ni aje gbɛ aŋma jogbaŋŋ, ni nilee yɔɔ mli, ni mɔɔ shi jogbaŋŋ hu. Beni jamɔ he niŋmalɔ kɛha The Sunday Gleaner yɛ Jamaica, yɛ West Indies lɛ wieɔ he lɛ, ekɛɛ: “Wolo lɛ . . . ji Odasefoi awolo ko ni aje gbɛ aŋma, ni amrɔ nɛɛ Triniti tsɔɔlɔ​—loo mɔ ni heɔ mɛi enyɔ ni efee ekome eyeɔ​—ko bɛ shweshweeshwe. Wolo bibioo nɛɛ eto naa eŋmala wiemɔi babaoo kɛjɛ yinɔsane kɛ jamɔ he woji amli ni tsɔɔ akɛ Triniti tsɔɔmɔ lɛ jɛɛɛ Biblia mli. . . . Ewa waa kɛha nɛkɛ jamɔ he niŋmalɔ nɛɛ akɛ eeena bɔ ni sɔlemɔyalɔ folo kɛkɛ​—aloo mɔ ni fe sɔlemɔyalɔ folo kɛkɛ​—aaanyɛ afee ejie naataamɔi ni nyɛɔ mɔ nɔ ni anyɛɛɛ nɔ aye ni Odasefoi ebua naa kɛmiite shi kɛmiiwo susumɔ ni ahiɛ akɛ Yesu ji Nyɔŋmɔ lɛ naa.”

⁴ Okɛtsu Nii Jogbaŋŋ: Kɛji eeemɔ shi lɛ, no lɛ esa akɛ akɛ nɛkɛ dɛŋdadei fɛfɛji ni yɔɔ hewalɛ waa nɛɛ aha gbɔmɛi ni baakane. Akɛni wɔyɛ woji bibii nɛɛ sɔrɔtoi babaoo, ni eko fɛɛ eko wieɔ saneyitso sɔrɔto ko he hewɔ lɛ, esa akɛ wɔbɔ mɔdɛŋ ni wɔkɛ nɔ ni wɔsusuɔ akɛ ebaafee nɔ ni sa jogbaŋŋ kɛha mɔ aŋkro ni wɔyeɔ lɛ odase lɛ aha lɛ. Woji bibii nɛɛ ni wɔɔle kɛ sɔrɔtoi ni wɔɔhiɛ yɛ wɔhe lɛ baaha efee mlɛo kɛha wɔ akɛ wɔkɛaatsu nii jogbaŋŋ, kɛji wɔyɛ shiɛmɔ mli, aloo shia, aloo he kroko.

⁵ Akɛ nɔkwɛmɔ nɔ lɛ, kɛ wɔkɛ mɔ ko ni yiŋ efutu yɛ Kristendom Triniti tsɔɔmɔ lɛ he aloo ekolɛ esusuɔ akɛ Yesu ji Nyɔŋmɔ lɛ miiwie lɛ, mɛɛ wolo bibioo okɛbaatsu nii? Kɛ mɔ ko bi nɔ hewɔ ni Nyɔŋmɔ ni yɔɔ suɔmɔ lɛ eŋmɛ amanehulu gbɛ lɛ, mɛɛ wolo bibioo baasa ehiamɔ nɛɛ he? Kɛ mɔ ko tsɔɔ akɛ esusuɔ bɔ ni ehe hiaa ni ana nɔyeli ni he baaba sɛɛnamɔ aha gbɔmɛi lɛ he lɛ, mɛɛ wolo bibioo baafee nɔ ni sa kɛha lɛ?

⁶ Kɛfata le ni ooole wolo bibioo ni sa akɛ okɛtsu nii lɛ he lɛ, bɔɔ mɔdɛŋ ni otee mɔ lɛ miishɛɛ shi yɛ emli saji ahe. Kɛ shihilɛ lɛ baaŋmɛ gbɛ lɛ, gbalamɔ ejwɛŋmɔ kɛya wiemɔ loo mfoniri ko nɔ, nɔ ni baatee emiishɛɛ shi koni eha ekane wolo lɛ. Aloo obaanyɛ okɛ lɛ akane kuku kome loo enyɔ ko, ni nyɛkane ŋmalɛi ni atsɛ lɛ, ni nyɛsusu sane lɛ he. Atsɔ nɛkɛ gbɛ nɔ aje nikasemɔi babaoo shishi.

⁷ Wɔ woji bibii lɛ kɛ Ŋmalɛ mli hetooi haa, ni ehaa mɛi ni dɔmɔɔ ŋtsɔi ni amɛyeɔ ŋkɔmɔ yɛ nihiinii ni afeɔ yɛ je lɛŋ ahewɔ lɛ naa hiɛnɔkamɔ. (Okɛto Ezekiel 9:4 he.) Gbɔmɛi ni tamɔ gwantɛŋi lɛ baahere shɛɛ sane ni yɔɔ woji nɛɛ amli lɛ nɔ. Eji hegbɛ ni wɔna akɛ wɔkɛ woji bibii nɛɛ atsu nii jogbaŋŋ yɛ afii muu lɛ mli lɛ, yɛ wɔsɔɔmɔ nitsumɔ lɛ fãi sɔrɔtoi lɛ fɛɛ mli beni wɔtaoɔ mɛi ni yɔɔ wiemɔ lɛ he miishɛɛ lɛ.

Buu-Mɔɔ Kɛ Awake! Lɛ Ni Wɔkɛaatsu Nii Jogbaŋŋ

¹ Buu-Mɔɔ kɛ Awake! lɛ ji woji tɛtrɛbii ni hi ni he yɔɔ sɛɛnamɔ fe woji tɛtrɛbii krokomɛi fɛɛ ni gbɔmɛi baanyɛ akane ŋmɛnɛ. Mɛni hewɔ? Ejaakɛ mumɔŋ anɔkwalei ni yɔɔ mli lɛ baanyɛ ana hewalɛ kpakpa kɛya naanɔ yɛ gbɔmɛi lɛ ashihilɛ nɔ. Shi kɛlɛ, mɛi babaoo ahiɛ bɛ amɛmumɔŋ hiamɔ nii anɔ aloo amɛleee he ni amɛbaakwɛ ni amɛnine ashɛ nɔ. Eji hegbɛ ni wɔna akɛ wɔkase bɔfo Paulo kɛtsɔ yelikɛbuamɔ ni wɔkɛaaha gbɔmɛi lɛ ni amɛgbele amɛhiŋmɛii yɛ mumɔŋ lɛ nɔ.​—Mat. 5:3; Bɔf. 26:⁠18.

² Hiɛmɔ Jwɛŋmɔ Kpakpa ni Osaa Ohe Jogbaŋŋ: Ekolɛ gbɔmɛi ni tamɔ gwantɛŋi yɛ oshikpɔŋkuku lɛ mli ni baabo anɔkwale lɛ toi. Ekolɛ hewalɛwoo pɛ he hiaa amɛteŋ mɛi komɛi koni amɛkane woji tɛtrɛbii lɛ. No hewɔ lɛ, hiɛmɔ jwɛŋmɔ kpakpa ni owo hewalɛ hu beni okɛ Buu-Mɔɔ kɛ Awake! lɛ haa lɛ. Hiɛmɔ woji tɛtrɛbii lɛ eko be fɛɛ be ni okɛ hegbɛ fɛɛ hegbɛ ni onaa lɛ atsu nii ni okɛja, kɛji wɔkɛ woji krokomɛi miitsu nii po.

³ Mɛni baaha wɔnyɛ wɔja woji tɛtrɛbii lɛ jogbaŋŋ kɛmɔ shi? Klɛŋklɛŋ kwraa lɛ, esa akɛ wɔhiɛ asɔ sɛɛnamɔ ni yɔɔ he lɛ wɔ diɛŋtsɛ. Esa akɛ wɔle saji ni aŋmala yɛ woji tɛtrɛbii ni wɔkɛhaa lɛ amli, ni enɛ baawo hekɛnɔfɔɔ kɛ ekaa ni wɔkɛhaa lɛ mli hewalɛ. Ha nɛkɛ susumɔ nɛɛ ahi ojwɛŋmɔ mli beni okaneɔ klɛŋklɛŋ kwraa lɛ. Ohiɛ ahi ohe nɔ ni ohala otii ni obaamamɔ nɔ mi yɛ shiɛmɔ mli. Bi ohe akɛ: ‘Namɔ tuuŋtu baana nɛkɛ sane nɛɛ he miishɛɛ waa? Ani shianyɛ, obalanyo, aloo ekolɛ nitsumɔtsɛ ko baana he miishɛɛ? Ani nɛkɛ oti nɛɛ baaŋɔɔ skul nikaselɔ, mɔ ko ni yɔɔ gbalashihilɛ mii, aloo mɔ ko ni susuɔ nibii ni ebɔle wɔhe lɛ ahe lɛ naa? Kɛji ebaamɔ shi jogbaŋŋ lɛlɛŋ lɛ, no lɛ esa akɛ wɔnyɛ wɔdamɔ nilee ni wɔ diɛŋtsɛ wɔna kɛ emli saji ahe miishɛɛ ni wɔyɔɔ lɛ nɔ wɔjie yi wɔtsɔɔ amɛ.

⁴ Okɛ Ememeji lɛ Atsu Nii Jogbaŋŋ: Kaimɔ akɛ, Buu-Mɔɔ kɛ Awake! lɛ ahe sɛɛnamɔ lɛ elaajeee, kɛ akɛ fɛɛ po hako yɛ nyɔŋ nɔ ni eje kpo lɛ sɛɛ nyɔŋ kome loo nyɔji enyɔ mli. Saji ni yɔɔ mli lɛ efeee nɔ ni he ehiaaa dɔŋŋ yɛ be ni eshwie mli lɛ hewɔ no hewɔ lɛ esaaa akɛ wɔshashaoɔ shi akɛ wɔkɛ ememeji lɛ aaaha, kɛji amɛhi. Ní wɔɔha woji tɛtrɛbii memeji lɛ atĩa kɛma shi ni wɔkɛtsuuu nii kwraa lɛ tsɔɔ hiɛsɔɔ ni wɔbɛ kɛha nɛkɛ dɛŋdadei ni he yɔɔ sɛɛnamɔ nɛɛ. Woji tɛtrɛbii lɛ eko fɛɛ eko hiɛ anɔkwalei ni yɔɔ hewalɛi ni ekɛaatsiɛ mumɔŋ tsinebaa hiɛ ni etsu he nii hu. Yɛ nɔ najiaŋ ni wɔkɛ ememeji lɛ aaashwie afa ni wɔhiɛ akpa nɔ lɛ, ani ehiŋ moŋ akɛ wɔɔbɔ mɔdɛŋ yɛ gbɛ krɛdɛɛ nɔ ni wɔshi wɔha mɛi ni yɔɔ wiemɔ lɛ he miishɛɛ lɛ, aloo kɛ hoo lɛ wɔshi yɛ he ni mɛi nyɛŋ ana, kɛji gbɔmɛi lɛ bɛ shia?

⁵ Awake! wolo tɛtrɛɛ lɛ eye ebua mɛi babaoo ni tsutsu ko lɛ amɛdiii mumɔŋ nibii asɛɛ lɛ ni amɛhiɛ eba amɛmumɔŋ hiamɔ nii anɔ. Buu-Mɔɔ ji dɛŋdade krɛdɛɛ ko yɛ Yehowa webii amumɔŋ niyenii he gbɛjianɔtoo lɛ mli. Nɛkɛ woji tɛtrɛbii nɛɛ yeɔ buaa amɛhe yɛ gbɛ ni yɔɔ fɛo nɔ, ni amɛtsuɔ gbɛfaŋnɔ ni he hiaa yɛ sanekpakpa lɛ shiɛmɔ mli.

⁶ Beni wɔkɛ hegbɛ fɛɛ hegbɛ ni wɔnaa ni wɔkɛ woji tɛtrɛbii lɛ aaaha lɛ tsuɔ nii lɛ, wɔbaanyɛ wɔna hekɛnɔfɔɔ yɛ bɔ ni enyɛɔ etsuɔ nii jogbaŋŋ yɛ gbɔmɛi ni tamɔ gwantɛŋ lɛ amumɔŋ hiamɔ nii ahe nitsumɔ mli lɛ mli. Wɔmiitao wɔhiɛ jwɛŋmɔ kpakpa be fɛɛ be, wɔsaa wɔhe jogbaŋŋ, ni wɔya shiɛmɔ daa hu. Akɛ sanekpakpa lɛ shiɛlɔi lɛ, eba akɛ wɔteŋ mɔ fɛɛ mɔ kɛ Buu-Mɔɔ kɛ Awake! woji tɛtrɛbii lɛ baatsu nii jogbaŋŋ kɛmɔ shi daa.