“Mɛni Esa akɛ Mafee?”
1 Ákɛ oblanyo loo oblayoo ni miitsɔ onukpa lɛ, ekolɛ obaabi akɛ, ‘Mɛni esa akɛ mikɛ mishihilɛ afee?’ Kristofoi oblahii kɛ oblayei sumɔɔ ni amɛlɛɛ amɛsɔɔmɔ kɛha Yehowa lɛ mli yɛ shiɛmɔ nitsumɔ lɛ mli. Shi te ooofee tɛŋŋ ofee enɛ beni otsuɔ onukpai agbɛnaa nii, ni nɔ ni fata he ji, bo diɛŋtsɛ oheloonaa hiamɔ nii ni oootao lɛ he nii lɛ ahe nii lɛ? Ekolɛ, ebɛ mlɛo akɛ aaaná hetoo lɛ.
2 Oblahii kɛ oblayei komɛi feɔ yeyeeye kɛ́ amɛna je lɛ shika he saji kɛ nɔ ni baanyɛ aba wɔsɛɛ lɛ. Amɛbaasusu akɛ: ‘Ani esa akɛ miya skul lɛ eko mifata he? Ani esa akɛ mikɛ mihe awo be-fɛɛ sɔɔmɔ lɛ mli oya nɔŋŋ?’ Bɔni afee ni mɔ ko anyɛ afee yiŋkpɛɛ kpakpa lɛ, ehe miihia ni mɔ lɛ kɛ anɔkwayeli aha sanebimɔ nɛɛ hetoo, ‘Mɛni ji nɔ ni he hiaa mi fe fɛɛ yɛ shihilɛ mli?’ Esa akɛ epɛi eyiŋtoi amli jogbaŋŋ.
3 Mɛni ji nɔ titri ni okɛma ohiɛ akɛ obaafee beni oji oblanyo loo oblayoo lɛ? Ani nɔ ni he hiaa bo ji ni oná shika, loo oosumɔ ni okɛ oshihilɛ atsu nii koni okɛha Maŋtsɛyeli lɛ he nibii aya hiɛ diɛŋtsɛ? Jeee univɛsiti yijiemɔ wolo ni mɔ ko baaná lɛ baatsɔɔ akɛ ebaaye omanyɛ yɛ nitsumɔ mli. Mɛi babaoo etsɔ gbɛ̀i krokomɛi anɔ amɛna ninenaa nitsumɔ kɛtsɔ nitsumɔ ni amɛkase lɛ nɔ, ni mɛi krokomɛi yaa ninenaa nitsumɔ loo tsɔne he nitsumɔ skul, loo be kukuoo mli univɛsiti nikasemɔ ni eheee be babaoo.
4 Ná Hekɛnɔfɔɔ yɛ Yehowa Shiwoo Mli: Nɔ titri ni he hiaa fe fɛɛ ni sa akɛ wɔsusu he ji hekɛnɔfɔɔ ni jɛ Yehowa Nyɔŋmɔ ŋɔɔ akɛ ebaaha mɛi ni kɛ Maŋtsɛyeli lɛ he nibii lɛ yeɔ klɛŋklɛŋ gbɛhe yɛ amɛshihilɛ mli lɛ anine ashɛ amɛhiamɔ nii anɔ. (Mat. 6:33) Enɛ jeee shiwoo folo. Dani nyɛmimɛi babaoo ni yaa Sɔɔmɔ Tsɔsemɔ Skul lɛ baana anɔkwale lɛ, no mli lɛ, amɛná univɛsiti yijiemɔ wolo momo. No mli lɛ, mɛni heloonaa nitsumɔ amɛtsuɔ? Shi mɛni ji nɔ ni amɛfeɔ yɛ amɛheloonaa nitsumɔ he? No mli lɛ, amɛteŋ mɛi fioo ko pɛ tsuɔ nitsumɔ ni amɛyakase lɛ. Amɛteŋ mɛi pii tsuɔ nitsumɔi bibii amɛhaa mɛi, ni amɛnyɛɔ amɛnaa shika ni amɛkɛkwɛɔ amɛhe beni amɛtsuɔ gbɛgbamɔ nitsumɔ lɛ. Kɛtsɔ lɛɛmɔ ni amɛlɛɛ amɛshiɛmɔ nitsumɔ lɛ mli lɛ nɔ lɛ, amɛná jɔɔmɔi ni fe nɔ fɛɛ nɔ ni amɛaanyɛ amɛná yɛ shika gbɛfaŋ.
5 Beni okpɛɔ oyiŋ yɛ nɔ ni esa akɛ ofee kɛ́ ogbe nɔtsamɔ skul naa lɛ he lɛ, susumɔ saji ni kɔɔ he lɛ fɛɛ he, ni opɛi oyiŋtoi amli jogbaŋŋ. Kɛ ootao ole nɔ ni obaafe yɛ yiŋkpɛɛi ni ŋmɛɔ pɛpɛɛpɛ he lɛ, susumɔ saji ni je kpo yɛ March 8, 1998 Awake! baafai 19-21 lɛ he. Okɛ ofɔlɔi, onukpai lɛ, okpokpaa nɔkwɛlɔ lɛ, kɛ gbɛgbalɔi ni yɔɔ okutso lɛ mli ni eye omanye lɛ agba he sane. No baaye abua bo koni ofee yiŋkpɛɛ kpakpa yɛ nɔ ni esa akɛ okɛ oshihilɛ afee lɛ he.—Jaj. 12:1, 13.