Fɔlɔi Agbɛnaa Nii Kɛha Amɛbii Amumɔŋ Hiamɔ Nii yɛ Skul

Wolo kasemɔ kpakpa sáa gbekɛbii koni amɛkɛ omanyeyeli akpee shihilɛi ni yɔɔ ŋmɛnɛ lɛ naa. Ehaa amɛleɔ nikanemɔ kɛ niŋmaa jogbaŋŋ, kɛ agbɛnɛ hu akɔntaabuu, ni ewajeɔ amɛ yɛ jeŋba kpakpai amli. Belɛ, yiŋtoo kpakpa hewɔ fɔlɔi sumɔɔ ni amɛbii aná wolo kasemɔ kpakpa lɛ.

Ekolɛ, skul ni hi fe fɛɛ lɛ ji nɔ ni yɔɔ he ko ni jɛkɛ. Enɛ hewɔ lɛ, ekolɛ fɔlɔi baaha amɛbi ayahi wekumɛi aloo nanemɛi aŋɔɔ yɛ be mli ni amɛyaa skul lɛ. Ekolɛ mɛi krokomɛi baasusu akɛ skul ni awɔɔ jɛmɛ baafee he ni hi. Akɛni yiŋtoo ni yɔɔ wolo kasemɔ sɛɛ lɛ ji ni eye ebua Kristofonyo koni esɔmɔ Yehowa jogbaŋŋ hewɔ lɛ, ani fɔlɔ gbɛnaa nii kɛha ebi mumɔŋ hilɛ-kɛ-hamɔ lɛ baa naagbee yɛ be mli ni eshi kɛtee skul? Dabi! Dɔlɛ sane ji akɛ, amaniɛbɔɔ tsɔɔ akɛ ‘aŋmɛɛɔ gbekɛbii lɛ ahe’ kɛ́ amɛshɛ nɔnyɛɛ afii amli. (Abɛi 29:15) Yɛ naagbee lɛ, je lɛ mumɔ lɛ náa gbekɛbii ni tamɔ nakai lɛ anɔ hewalɛ. Kwɛ mɔbɔ sane ni eji! Kwɛ bɔ ni etsɔɔ nii ni akwɛɛɛ kɛyaaa shɔŋŋ akɛ akɛ nikeenii ni jara wa tamɔ nakai ni jɛ Yehowa ŋɔɔ lɛ aaatsake heloonaa nii!—Lala 127:3; okɛto Luka 2:41-52 he.

Miishɛɛ sane ji akɛ, fɔlɔi pii kwɛɔ koni anyɛ atsu amɛbii amumɔŋ hiamɔ nii ahe nii. Amɛkɛ tsɔɔlɔi ni tsɔɔ gbekɛ lɛ nii lɛ gbaa gbekɛ lɛ mumɔŋ hiamɔ nii ahe sane, ni amɛtoɔ gbɛjianɔ pɔtɛɛ ni he hiaa koni asafo lɛ aye abua lɛ. Amɛyasaraa gbekɛ lɛ kpitiokpitio koni amɛye amɛbua lɛ yɛ mumɔŋ. Bei pii lɛ kɛ́ akɛ yelikɛbuamɔ ni tamɔ nɛkɛ ha gbekɛbii lɛ, ehaa amɛhiɛɔ mumɔŋ shidaamɔ kpakpa mli.

Yehowa ejɛ enilee mli ekɛ gbɛtsɔɔmɔ eha akɛ, fɔlɔi diɛŋtsɛ akwɛ amɛbii lɛ amumɔŋ hiamɔ nii. Ekɛ sɔ̃ lɛ fɔ̃ɔ fɔlɔi anɔ koni amɛtsu amɛbii bibii lɛ ahilɛ-kɛ-hamɔ he nii. (1 Tim. 5:8; Efe. 6:4) Belɛ nyɛhaa wɔyea wɔbuaa wɔbii lɛ ni amɛdara koni amɛtsɔmɔ mumɔŋ hii kɛ yei kɛha amɛ naanɔ jɔɔmɔi.—3 Yoh. 4.