Anɔkwa Jamɔ Miishwere yɛ Europa Bokagbɛ
1 Klɛŋklɛŋ afii oha lɛ mli Kristofoi lɛ ji Maŋtsɛyeli shiɛlɔi ni yɔɔ ekãa. Amɛná miishɛɛ waa beni asafoi lɛ ‘ayi fáa daa nɛɛ.’ (Bɔf. 16:5) Ekãa ni amɛkɛshiɛ lɛ ha anɔkwa jamɔ yashɛ Asia, Afrika, kɛ Europa, ni nɔ ni jɛ mli ba ji ŋmãa ni akpá ni ji heyelilɔi babaoo.
2 Yɛ nɛkɛ naagbee be nɛɛ mli lɛ, anɔkwa jamɔ miiya nɔ eeshwere lolo yɛ Europa Bokagbɛ shikpɔji anɔ. Yɛ maji wuji ni nɔyeli lɛ kɛ naatsĩi ba wɔnɔ yɛ jɛmɛ aahu kɛyashi afi 1990 afii lɛ mra be mli lɛ, wɔmiiná yifalɛi ni yaa hiɛ waa bianɛ. Nɔ ni 1999 Yearbook lɛ jieɔ lɛ kpo ji akɛ maji wuji ni tamɔ nɛkɛ lɛ ateŋ enyɔ ni ji Russia kɛ Ukraine lɛ eko fɛɛ eko náa shiɛlɔi ni fá fe 100,000 ni kɛ amɛhe woɔ shiɛmɔ nitsumɔ lɛ mli. Kɛjɛ afi 1991 kɛbaa nɛɛ, mɛi ni fá fe 220,000 ejɔɔ amɛhe nɔ amɛha Yehowa yɛ tsutsu Soviet Union shikpɔŋkukuji 15 lɛ mli, ni ábaptisi amɛ! Nɛkɛ nɔyaa ni baa lɛ oyayaayai nɛɛ eha ehe ebahia koni amamɔ Maŋtsɛyeli Asai kɛ Kpee Asai heei babaoo koni agbɛnɛ alɛɛ nitsumɔhe niji atsũi komɛi amli.
3 Akɛ Asafo Maŋtsɛyeli Asa Tsumaa Fotro lɛ miitsu nii bianɛ koni akɛ shika afa asafoi ni yɔɔ shikpɔji anɔ ní Maŋtsɛyeli Asai babaoo ahe hiaa waa yɛ jɛmɛ lɛ, yɛ be mli ni shika fioo pɛ amɛnáa ní shika helɛtemɔ mli naagbai ni naa wa yɔɔ jɛmɛ lɛ. Kɛjɛ March 1996 kɛyashi October 1998 lɛ, Asafo lɛ kpɛlɛ nɔ koni akɛ shika ni abi kɛjɛ nitsumɔhe niji ni kwɛɔ Europa Bokagbɛ shikpɔji 11 lɛ nɔ lɛ afa kɛha Maŋtsɛyeli Asai 359 he nitsumɔ. Akɛ shika ni akɛyeɔ abuaa lɛ heɔ shikpɔŋ kɛ nibii kɛha Maŋtsɛyeli Asai heei amaamɔ ní aye abua asafoi koni amɛfee tsũi ni yɔɔ lɛ ehee. Mfonirii ni yɔɔ biɛ nɛɛ haa wɔleɔ nɔ ko ni tsɔɔ bɔ ni shika ni akɛhaa koni akɛwo Asafo Maŋtsɛyeli Asa Tsumaa Fotro mli yɛ United States kɛ maji wuji krokomɛi anɔ lɛ he eba sɛɛnamɔ eha wɔnyɛmimɛi ni yɔɔ Europa Bokagbɛ lɛ.
4 Bulgaria ná oha mlijaa 12 nɔyaa yɛ afi 1998, ni nyɛmimɛi lɛ amii shɛ amɛhe waa beni ajɔɔ amɛ klɛŋklɛŋ Maŋtsɛyeli Asa lɛ nɔ yɛ April mli nakai afi lɛ. Croatia ná oha mlijaa 4 nɔyaa, ni amrɔ nɛɛ, nyɛmimɛi ni yɔɔ jɛmɛ lɛ miimamɔ Maŋtsɛyeli Asai babaoo koni amɛkɛha anɔkwa jamɔ ashwere. Asafoi 144 miikpe yɛ Maŋtsɛyeli Asai aaafee 80 mli yɛ Hungary. Enɛ tsɔɔ akɛ asafoi 235 ni yɔɔ nakai maŋ lɛ mli lɛ mli oha mlijaa 61 yɛ amɛ diɛŋtsɛ amɛjamɔhe. Maŋtsɛyeli Asa tsumaa nitsumɔ lɛ eha agbe asai heei enyɔ maa naa yɛ Macedonia, ni aamamɔ babaoo lolo. Agbe Maŋtsɛyeli Asai enyɔ ni afee lɛ ekome lɛ maa naa yɛ Skopje maŋtiase lɛ mli yɛ afi 1999 hulutsoobe mli. Kɛ hoo lɛ, asafoi ekpaa baanyɛ akpe yɛ asa nɛɛ nɔ. Kɛ aja mli lɛ, abaptisi mɛi ni fá fe 260 otsi fɛɛ otsi yɛ Russia yɛ nyɛsɛɛ afi lɛ mli! Yɛ tsumaa he gbɛjianɔtoo ni akɛtsu nii yɛ maji wuji krokomɛi lɛ sɛɛnyiɛmɔ nɔ lɛ, agbɛnɛ Russia nitsumɔhe nine lɛ eto Kpokpaa Tsumaa Ajinafoi Akui 12 shishi yɛ amɛshikpɔŋkuku lɛ mli fɛɛ koni amɛkɛfĩ Maŋtsɛyeli Asa tsumaa nitsumɔi ni baaya nɔ wɔsɛɛ ko lɛ sɛɛ. Klɛŋklɛŋ Kpee Asa he tsumaa miiya nɔ yɛ St. Petersburg wuoyigbɛ, ni sɛii ni baamamɔ mli lɛ ayibɔ ji 1,600. Nɔ ni baafata tsũ ni amaa lɛ he hu ji Maŋtsɛyeli Asai enumɔ ni sɛii 200 yɔɔ eko fɛɛ eko mli. Bɔni afee ni atsu wɔnyɛmimɛi kɛ mɛi babaoo ni yɔɔ wiemɔ lɛ he miishɛɛ ni amɛyɔɔ Ukraine lɛ amumɔŋ hiamɔ nii ahe nii lɛ, amamɔ Maŋtsɛyeli Asai 84 ni aamamɔ 80.
5 Ani nɛkɛ nɔyaa ni yɔɔ Europa Bokagbɛ nɛɛ haaa mlifilimɔ ayi wɔtsuiaŋ obɔbɔ? Yɛ he ni wɔyɔɔ lɛ fɛɛ sɛɛ lɛ, anɔkwa jamɔ shweremɔ lɛ haa wɔkaiɔ akɛ Nyɔŋmɔ jeee mɛi ahiɛaŋkwɛlɔ, ni ákɛ etsuishitoo lɛ baaha ahere “asafo babaoo” ko yiwala. (Kpoj. 7:9; 2 Pet. 3:9) Kwɛ hegbɛ ni eji kɛha wɔ akɛ wɔɔná shika ni akɛyeɔ abuaa koni mɛi krokomɛi adara yɛ mumɔŋ lɛ mli gbɛfaŋnɔ fioo ní mɛi ni yɔɔ shikpɔji ni yɔɔ shɔŋŋ lɛ nɔ lɛ po fata he! Abɛi 28:27 maa nɔ mi ehaa wɔ akɛ “mɔ ni hãa ohiafo nɔ̃ lɛ, nɔ ko nɔ ko ehiaŋ lɛ.” Bɔ ni wɔsumɔɔ ni wɔye wɔbua koni akɛwo nɛkɛ tsumaa he nyɔji nɛɛ haa heloonaa nibii ‘yeɔ egbɔ pɛpɛɛpɛ,’ ni ehaa mɔ fɛɛ mɔ náa miishɛɛ ni jɛɔ nihamɔ mli kɛbaa lɛ kɛ mlifilimɔ ni anɔkwa jamɔ ni anaa akɛ eeshwere yɛ jeŋ fɛɛ lɛ kɛbaa lɛ.—2 Kor. 8:14, 15; Bɔf. 20:35.
[Caption on page 3]
Săcele, Romania
[Caption on page 3]
Maardu, Estonia
[Caption on page 3]
Sevnica, Slovenia
[Caption on page 3]
Tiszavasvári, Hungary
[Caption on page 4]
Jūrmala, Latvia
[Caption on page 4]
Taurage, Lithuania
[Caption on page 4]
Tallinn, Estonia
[Caption on page 5]
Prievidza, Slovakia
[Caption on page 5]
Mátészalka, Hungary
[Caption on page 5]
Belgrade, Yugoslavia
[Caption on page 6]
Ruma, Yugoslavia
[Caption on page 6]
Vranov nad Topl’ou, Slovakia
[Caption on page 6]
Tornakalns, Latvia