Be lɛ Nɛ

¹ Beni bɔfo Paulo ŋma ewolo ni ji enyɔ lɛ eyaha Korintobii lɛ, ekai amɛ akɛ amɛkpɛ amɛyiŋ momo akɛ amɛaatsu nitsumɔ kpakpa ni kɛ heyeli baaba abaha amɛnanemɛi heyelilɔi ni yɔɔ Yerusalem lɛ. Shi kɛlɛ, afi kome eho, ni amɛgbeko nitsumɔ ni amɛje shishi lɛ naa lolo. No hewɔ lɛ ewo amɛ hewalɛ akɛ: “Nyɛyaa nɔ koni nyɛgbea naa: nyɛfea ekaa nakai nɔŋŋ koni nyɛgbe nitsumɔ lɛ naa taakɛ bɔ ni esa akɛ nyɛfee lɛ pɛpɛɛpɛ.”​—⁠2 Kor. 8:​11, The New English Bible.

² Wɔ fɛɛ wɔkɛ otii emamɔ wɔhiɛ kɛha wɔhe yɛ be ko mli loo yɛ be kroko mli pɛŋ. Ekolɛ wɔkpɛ wɔyiŋ akɛ wɔɔha bɔ ni wɔkɛ wɔhe woɔ sɔɔmɔ nitsumɔ lɛ mli wɔhaa lɛ afa kɛya hiɛ, koni wɔnyɛ wɔle wɔnyɛmimɛi lɛ babaoo, koni wɔhe asa kɛha sɔɔmɔ hegbɛ ko, loo ni wɔye fatɔɔ ko nɔ. Eyɛ mli akɛ wɔkɛ yiŋtoo kpakpai je shishi moŋ, shi ekolɛ wɔnyiɛɛɛ sɛɛ kɛmɔɔɔ shi koni wɔnine ashɛ oti ni ma wɔhiɛ lɛ nɔ. Dani wɔɔyoo lɛ, ekolɛ otsii, nyɔji, loo afii komɛi po eho ni wɔnyɛko wɔfee he nɔ ko kwraa. Ani eeenyɛ efee akɛ ehe miihia ni wɔkɛ ŋaawoo ni ji ‘wɔya nɔ koni wɔgbe’ nɔ ni wɔje shishi lɛ ‘naa’ lɛ ato wɔhe?

³ Otii lɛ Ni Wɔnine Aaashɛ Nɔ: Eyɛ mlɛo akɛ oookpɛ oyiŋ kɛha nɔ ko tsumɔ shi ewa waa akɛ oootsu he nii ni onine ashɛ oti lɛ nɔ. Nɔ ko tsumɔ ni atsiɔ atoɔ lɛ baanyɛ efite nɔyaa loo hiɛyaa. Ehe miihia ni wɔkpɛ wɔyiŋ koni no sɛɛ lɛ wɔtswa wɔfai shi ni wɔtsu he nii kɛmɔ shi koni wɔkashashao shi hu. Mɔ diɛŋtsɛ gbɛjianɔ ni eeeto lɛ he miihia hu. Ehe miihia ni oto be ni he hiaa lɛ oma shi koni okwɛ ni otsu nitsumɔ lɛ he nii koni okwɛ hu ni okɛ be lɛ atsu nakai yiŋtoo lɛ he nii. Ehi akɛ oooto be ko oma shi akɛ ohaŋ eho ohe koni no sɛɛ lɛ oye ohe nɔ ni otsu he nii koni okwɛ ni nakai be lɛ akaho ohe.

⁴ Kɛ ebafee nɔ ni wa waa kɛha wɔ akɛ wɔɔshɛ otii lɛ ahe lɛ, ewaaa akɛ wɔɔsusu nɛkɛ akɛ: ‘Matsu he nii be kroko.’ Shi wɔleee nɔ ni baaba wɔsɛɛ. Abɛi 27:1 kɛɛ akɛ: “Kaashwã ofɔ wɔ́ nɔ; ejaakɛ oleee nɔ ni gbi lɛ aaafɔ.” Kaselɔ Yakobo bɔ kɔkɔ eshi nɔmimaa tsɔ ni mɔ ko aaana kɛha wɔsɛɛ ejaakɛ “nyɛleee wɔ́ sane. . . . Mɔ ni le ekpakpa-feemɔ ni efeee lɛ, esha ji no ha lɛ.”​—⁠Yak. 4:​13-17.

⁵ Akɛni nibii babaoo gbalaa wɔjwɛŋmɔ ni mɛi krokomɛi hu kpaa gbɛ akɛ wɔɔfee nii ni amɛtaoɔ hewɔ lɛ, ebaanyɛ efee nɔ ni haaa wɔnine ashɛ otii lɛ anɔ jogbaŋŋ. Mɔdɛŋ ni wɔɔbɔ koni wɔhiɛ ahi otii lɛ anɔ jogbaŋŋ yɛ wɔjwɛŋmɔ mli lɛ he miihia. Ni wɔɔsɔle yɛ sane lɛ he lɛ baaye abua. Ni wɔɔbi mɛi ni bɛŋkɛ wɔ kpaakpa lɛ koni amɛkai wɔ ni amɛwo wɔ hewalɛ lɛ baatsake shihilɛ lɛ. Ni wɔɔfee kadimɔ nii yɛ wɔ kalanda lɛ nɔ lɛ baakai wɔ koni wɔkwɛ bɔ ni wɔyaa nɔ wɔhaa. Esa akɛ mɔ lɛ akpɛ eyiŋ koni ‘efee bɔ ni ekpɛ mli momo yɛ etsui mli’ lɛ.​—⁠2 Kor. 9:⁠7.

⁶ October nyɔŋ lɛ kɛ hegbɛ fɛfɛo haa koni wɔjwɛŋmɔ ahi otii ni mamɔ wɔhiɛ lɛ anɔ. Wɔbaaha ashɛ Buu-Mɔɔ kɛ ­Awake! woji tɛtrɛbii lɛ. Ani wɔɔnyɛ wɔkɛ otii komɛi ni sa amamɔ wɔhiɛ koni wɔnine ashɛ nɔ? Ni otii ni wɔkɛaamamɔ wɔhiɛ akɛ kɛ hoo lɛ wɔɔna hegbɛ shikome po akɛ wɔha ashɛ woji yɛ be ni akɛfaa ta lɛ mli lɛ hu? Ni aaakpɛ yiŋ akɛ aaafee sɛɛsaramɔi babaoo ni aje Biblia mli nikasemɔ hee shishi lɛ baanyɛ afee otii ni sa ni mɛi babaoo kɛaamamɔ amɛhiɛ.

⁷ Akɛni “je lɛ hoɔ eyaa” hewɔ lɛ, nilee bɛ mli akɛ wɔɔtsi nɔ ni he hiaa lɛ wɔto. (1 Yoh. 2:17) Hegbɛi kɛ jɔɔmɔi krɛdɛɛi komɛi yɛ kɛha wɔ bianɛ yɛ Yehowa sɔɔmɔ mli. Eka wɔnɔ akɛ wɔɔna enɛɛmɛi ahe sɛɛ.

Nyɛtaoa Nyɔŋmɔ Maŋtsɛyeli lɛ Klɛŋklɛŋ—Kɛtsɔ Yijiemɔ Afɔle ni Nyɛkɛaaha Daa Nɔ

¹ Mɛi ni taoɔ Maŋtsɛyeli lɛ klɛŋklɛŋ lɛ ajwɛŋmɔ yɛ Yehowa ni amɛaawie ehe sane ni amɛwie Maŋtsɛyeli lɛ hu he sane daa lɛ nɔ. (Lala 145:​11-13) Hegbɛi yɛ daa gbi kɛha egbɛi lɛ yijiemɔ koni awie sanekpakpa lɛ he sane. (Lala 96:⁠2) Yehowa yijiemɔ lɛ ji miishɛɛ sane kɛha lalatsɛ lɛ ni jaje akɛ: “Wɔkɛ yijiemɔ baaha yɛ Nyɔŋmɔ mli daa gbi.” (Lala 44:⁠8, NW) Kɛ wɔnu he nakai nɔŋŋ lɛ, wɔbaana ekãa koni wɔna Maŋtsɛyeli sɔɔmɔ nitsumɔ lɛ mli gbɛfaŋnɔ daa gbi.

² Yehowa etoko taomɔ nii pɔtɛɛ komɛi emamɔko shi ni baatsɔɔ be falɛ ni esa akɛ wɔye yɛ sɔɔmɔ nitsumɔ lɛ mli, shi moŋ ewoɔ wɔ hewalɛ koni wɔjie eyi “daa.” (Heb. 13:15) Kɛ wɔ diɛŋtsɛ wɔ shihilɛi ŋmɛɔ gbɛ lɛ, esa akɛ wɔkɛfee oti ni ma wɔhiɛ akɛ wɔɔjie Yehowa yi daa otsi. Mɛi ni miifee nakai momo lɛ baanyɛ ato amɛshihilɛ mli saji ahe gbɛjianɔ koni amɛsɔmɔ akɛ gbɛgbalɔi awalɔi yɛ bei komɛi amli loo ni amɛaafee nakai daa kɛtsara nɔ po. Mɛi ni miina gbɛgbalɔi awalɔi asɔɔmɔ lɛ mli miishɛɛ lɛ baanyɛ ni amɛkɛ amɛhe aha akɛ daa gbɛgbalɔi.

³ Bɔ fɛɛ bɔ ni wɔ shihilɛi ji ha lɛ, ani eyɛ mlɛo akɛ wɔɔha wɔ yijiemɔ afɔle lɛ afa kɛya hiɛ? Hiɛsɔɔ ji nɔ ni kanyaa ekãafeemɔ. Nyɔŋmɔ Wiemɔ lɛ kasemɔ yɛ teemɔŋ haa anaa hiɛsɔɔ. Asafoŋ kpeei kanyaa wɔ koni wɔjie nakai hiɛsɔɔ lɛ kpo yɛ gbɛi sɔrɔtoi babaoo diɛŋtsɛ nɔ. Yijielɔi krokomɛi ni yɔɔ ekãa lɛ ni wɔkɛ amɛ aaabɔ gbagbalii lɛ ‘baaha wɔhiɛ adɔ yɛ nitsumɔi kpakpai ahe.’ (Heb. 10:24) Ni wɔɔna gbɛjianɔ sɔrɔtoi ni asafo lɛ eto lɛ he sɛɛ kɛmɔ shi lɛ baanyɛ aha wɔ yijiemɔ afɔle lɛ afa kɛya hiɛ.

⁴ Gbalɔyoo Hana fee nɔkwɛmɔ nɔ fɛfɛo efɔ shi yɛ Yehowa sɔɔmɔ mli. Eyɛ mli akɛ eye afii 84 moŋ, shi “ejeee sɔlemɔwe lɛ kwraa, shi ejaa Nyɔŋmɔ . . . nyɔɔŋ kɛ shwane.” (Luka 2:37) Ehe ni ekɛwo asafo lɛ nitsumɔi amli kɛ esusuma fɛɛ lɛ ha etsui nyɔ emli babaoo diɛŋtsɛ. Biblia mli sane ni kɔɔ ehe ni ekɛwo sɔɔmɔ lɛ mli kɛ anɔkwayeli lɛ ji ekãawoo kɛha wɔ ŋmɛnɛ.

⁵ Paulo jie yi akɛ “wɔ mɛi ni wɔyɔɔ hewalɛ lɛ, esa akɛ wɔkpeeɔ mɛi ni bɛ hewalɛ lɛ kɛ amɛgbɔjɔmɔi lɛ.” (Rom. 15:⁠1) Ekolɛ mɛi komɛi yɛ asafo ni oyɔɔ mli lɛ mli ni baana yelikɛbuamɔ kɛ hewalɛwoo ni okɛaaha yɛ suɔmɔ mli lɛ he sɛɛ. Ni ooofɔ lɛ nine koni efata ohe yɛ shiɛmɔ nitsumɔ mli lɛ baanyɛ afee nɔ pɛ ni he hiaa lɛ. Ekolɛ yelikɛbuamɔ ko baahia shiɛlɔ hee koni enyɛ esaa ehe kɛha shiɛmɔ nitsumɔ, loo mɔ ni ekɛ lɛ aaatsu nii he baahia lɛ. Ekolɛ nijiaŋwujee ji mɔ kroko naagba, ni bo ji mɔ ni baanyɛ ni ekɛ yelikɛbuamɔ ni tswaa mɔ emaa shi ni he hiaa koni akɛtee ekãa ni mɔ lɛ yɔɔ kɛha Maŋtsɛyeli sɔɔmɔ lɛ shi ekoŋŋ lɛ aha. (1 Tes. 5:14) Bɔ ni ooosumɔ akɛ ‘oha mɛi krɔŋkrɔŋi lɛ ahiamɔ nii lɛ ahia bo’ lɛ tsɔɔ bɔ ni osumɔɔ ni ojɛ otsui mli oha Nyɔŋmɔ gbɛi lɛ yijiemɔ afa kɛya hiɛ.​—⁠Rom. 12:⁠13.

⁶ Wɔnyɛŋ wɔtsi nibii fɛɛ ni Yehowa efee eha wɔ momo ni ebaafee eha wɔ lolo lɛ ata ni wɔto naa wɔshwie shi ekomekome. Gbɛ ko kwraa bɛ ni wɔɔnyɛ wɔtsɔ nɔ wɔto jɔɔmɔi nɛɛ anajiaŋ wɔha lɛ. Mɛɛ yiŋtoi komɛi ni kanyaa mɔ waa yɔɔ nɛkɛ akɛ “nɔ fɛɛ nɔ ni muɔ lɛ ajie Yehowa yi!”​—⁠Lala 150:​6.