Miishɛɛ ni Oooná yɛ Osɔɔmɔ Krɔŋkrɔŋ lɛ Mli
1 Amɛku amɛsɛɛ amɛba “kɛ miishɛɛ.” Biblia mli sane lɛ tsɔɔ bɔ ni kaselɔi 70 lɛ nu he amɛha beni amɛshiɛ aahu ní amɛtee amɛyabɔ Yesu amaniɛ lɛ. Amɛnu he akɛ amɛná mligbɛ miishɛɛ yɛ Nyɔŋmɔ suɔmɔnaa nifeemɔ hewɔ. (Luka 10:17) Mɛni baanyɛ aye abua bo koni oná miishɛɛ ni tamɔ nakai yɛ sɔɔmɔ krɔŋkrɔŋ lɛ mli?
2 Jwɛŋmɔ ni Ja: Oyɛ hegbɛ ni Nyɔŋmɔ kɛha bo akɛ oha gbɔmɛi ale Yehowa yiŋtoo ni yɔɔ nyam lɛ. Kɛtsɔ shiɛmɔ ni oshiɛɔ nɔ lɛ, obaanyɛ oye obua mɔ ko koni eye ehe kɛjɛ nɛkɛ je nɛŋ nifeemɔi ni baa mɔ shi lɛ mli kɛ apasa jamɔ gboklɛi lɛ amli. Obaanyɛ okɛ hegbɛ kɛha wala yɛ jeŋ ni béi ni ebɔle wɔ kɛkpe ŋmɛnɛ nɛɛ bɛ mli lɛ he hiɛnɔkamɔ aha gbɔmɛi. Susumɔ miishɛɛ ni Yehowa náa kɛ́ okɛ omanyeyeli dũ anɔkwale dumɔwui owo tsui ni kpɛlɛɔ sane lɛ nɔ lɛ he okwɛ. Ná jwɛŋmɔ ni ja yɛ be mli ni osɔleɔ ní oná Nyɔŋmɔ mumɔ lɛ eko koni ewo miishɛɛ yibii yɛ omli beni okɛ otsui fɛɛ tiuɔ sɔɔmɔ nitsumɔ lɛ sɛɛ lɛ.
3 Tsɔsemɔ Kpakpa: Akɛ nitsɔɔmɔ he kpee ni Yesu kɛ ekaselɔi 70 lɛ fee lɛ eto ŋmɛnɛŋmɛnɛ beaŋ Sɔɔmɔ Kpee lɛ he. Ekɛ tsɔsemɔ ha bɔni afee ni amɛnyɛ amɛtsu amɛsɔɔmɔ nitsumɔ lɛ he nii jogbaŋŋ kɛmɔ shi. (Luka 10:1-16) Sɔɔmɔ Kpee ni afeɔ yɛ gbii nɛɛ amli lɛ tsɔseɔ bo yɛ gbɛ̀i ni oootsɔ nɔ obɛŋkɛ mɛi lɛ mli, bɔ ni ooofee oje sanegbaai ashishi, kɛ bɔ ni ooofee oje shia Biblia mli nikasemɔi ashishi ni okwɛ nɔ. Kɛ okɛ hesaai ni oyɔɔ yɛ shiɛmɔ nitsumɔ lɛ mli lɛ tsu nii, ni otee hiɛ yɛ mli lɛ, obaana akɛ tsuifãa loo hesaa ni asusuɔ akɛ abɛ ni baanyɛ aba onɔ lɛ baaba shi ni hekɛnɔfɔɔ kɛ miishɛɛ ni oooná lɛ baaye nɔ.
4 Okɛ Ojwɛŋmɔ Ama Wɔsɛɛ Be lɛ Nɔ: Yesu ná miishɛɛ yɛ esɔɔmɔ krɔŋkrɔŋ lɛ mli yɛ amanehului ni eŋmɛ etsui shi yɛ mli lɛ fɛɛ sɛɛ. Mɛni hewɔ? Ejaakɛ ekɛ ehiɛ ma jɔɔmɔi kɛ hegbɛi ni yɔɔ ehiɛgbɛ lɛ nɔ jogbaŋŋ diɛŋtsɛ. (Heb. 12:2) Obaanyɛ ofee nakai nɔŋŋ kɛ́ okɛ ojwɛŋmɔ kɛ otsui ma Yehowa gbɛi lɛ nɔ kɛ jɔɔmɔi ni baaba yɛ Nyɔŋmɔ jeŋ hee lɛ mli lɛ. Enɛ baaha oná miishɛɛ kɛ shishinumɔ babaoo yɛ osɔɔmɔ nitsumɔ lɛ mli.
5 Sɔɔmɔ krɔŋkrɔŋ ni okɛaaha Yehowa lɛ ji hegbɛ kpele fe fɛɛ eko ni obaanyɛ oná ŋmɛnɛ. No hewɔ lɛ, ekolɛ obaakɛɛ akɛ: “Mi-Nyɔŋmɔ, eŋɔɔ minaa akɛ mafee osuɔmɔnaa nii.”—Lala 40:9.