Nikasemɔ 8

Weku Shihilɛ ni Saa Nyɔŋmɔ Hiɛ

Mɛni ji wu lɛ gbɛhe yɛ weku lɛ mli? (1)

Te esa akɛ wu kɛ eŋa aye aha tɛŋŋ? (2)

Mɛɛ gbɛnaa nii ka tsɛ lɛ nɔ? (3)

Mɛni ji ŋa lɛ nitsumɔ yɛ weku lɛ mli? (4)

Mɛni Nyɔŋmɔ taoɔ yɛ fɔlɔi kɛ bii adɛŋ? (5)

Mɛni ji Biblia lɛ jwɛŋmɔ yɛ mligbalamɔ kɛ gbalamlitsemɔ he? (6, 7)

1. Biblia lɛ kɛɔ akɛ wu lɛ ji eweku lɛ yitso. (1 Kor. 11:3) Esa akɛ wu lɛ ana ŋa kome pɛ. Esa akɛ amɛbote gbalashihilɛ mli yɛ gbɛ kpakpa nɔ yɛ mla lɛ naa.—1 Tim. 3:2; Tito 3:1.

2. Esa akɛ wu lɛ asumɔ eŋa lɛ taakɛ esumɔɔ lɛ diɛŋtsɛ ehe lɛ. Esa akɛ ekɛ lɛ aye yɛ gbɛ ni Yesu kɛ esɛɛnyiɛlɔi lɛ yeɔ haa lɛ nɔ. (Efe. 5:25, 28, 29) Esaaa akɛ egbaa eŋa lɛ ma kɔkɔɔkɔ loo ewaa lɛ yi yɛ gbɛ ko kwraa nɔ. Shi moŋ, esa akɛ ekɛ woo kɛ bulɛ aha lɛ.—Kol. 3:19; 1 Pet. 3:7.

3. Esa akɛ tsɛ lɛ atsu nii waa koni ekɛkwɛ eweku lɛ. Esa akɛ etao niyenii, hehaa nii, kɛ wɔɔhe eha eŋa kɛ ebii. Esa akɛ tsɛ lɛ atsu eweku lɛ mumɔŋ hiamɔ nii ahe nii hu. (1 Tim. 5:8) Enyiɛɔ eweku lɛ hiɛ yɛ yelikɛbuamɔ ni ekɛhaa amɛ koni amɛkase Nyɔŋmɔ kɛ E-yiŋtoi ahe nii lɛ mli.—5 Mose 6:4-9; Efe. 6:4.

4. Esa akɛ ŋa lɛ afee ewu lɛ yelikɛbualɔ kpakpa. (1 Mose 2:18) Esa akɛ eye ebua ewu lɛ yɛ amɛbii lɛ anitsɔɔmɔ kɛ tsɔsemɔ mli. (Abɛi 1:8) Yehowa biɔ ni ŋa lɛ akwɛ eweku lɛ nɔ yɛ suɔmɔ mli. (Abɛi 31:10, 15, 26, 27; Tito 2:4, 5) Esa akɛ ena bulɛ ni mli kwɔ eha ewu lɛ.—Efe. 5:22, 23, 33.

5. Nyɔŋmɔ kpaa gbekɛbii agbɛ akɛ amɛaabo amɛfɔlɔi atoi. (Efe. 6:1-3) Ekpaa fɔlɔi agbɛ akɛ amɛaatsɔse amɛbii ni amɛjaje amɛ. Ehe miihia ni fɔlɔi ana be amɛha amɛbii ni amɛkɛ amɛ akase Biblia lɛ, ni amɛtsu amɛ mumɔŋ kɛ henumɔŋ hiamɔ nii ahe nii. (5 Mose 11:18, 19; Abɛi 22:6, 15) Esaaa akɛ fɔlɔi tsɔseɔ amɛbii yɛ gbɛ ni yɔɔ keketee loo ni yeɔ awui nɔ.—Kol. 3:21.

6. Kɛ gbalashihilɛ mli hefatalɔi yɛ naagbai yɛ gbɛ ni amɛaatsɔ nɔ amɛhi shi yɛ ekomefeemɔ mli lɛ he lɛ, esa akɛ amɛbɔ mɔdɛŋ ni amɛkɛ Biblia mli ŋaawoo atsu nii. Biblia lɛ woɔ wɔ hewalɛ ni wɔjie suɔmɔ kpo wɔtsɔɔ ni wɔkɛ tɔmɔ ake. (Kol. 3:12-14) Nyɔŋmɔ Wiemɔ lɛ wooo mligbalamɔ he hewalɛ akɛ gbɛ ni atsɔɔ nɔ asaa naagbai bibii. Shi ŋa lɛ baanyɛ ahala akɛ eeeshi ewu lɛ kɛji (1) wu lɛ kɛ kuɛŋtimɔ kpoo akɛ eeekwɛ weku lɛ, (2) wu lɛ yi wa aahu akɛ yoo lɛ hewalɛnamɔ kɛ ewala ebaje oshara mli, loo (3) yiwaa ni naa wa ni ekɛbaa lɛ eha ewa kɛha yoo lɛ akɛ eeeja Yehowa.—1 Kor. 7:12, 13.

7. Esa akɛ gbalashihilɛ mli hefatalɔi aye amɛteŋ mɔ fɛɛ mɔ anɔkwale. Gbalafitemɔ ji esha ni afeɔ ashiɔ Nyɔŋmɔ kɛ mɔ lɛ hefatalɔ. (Heb. 13:4) Bɔlɛnamɔ yɛ gbalashihilɛ lɛ sɛɛ, ji nɔ̃ pɛ ni abaanyɛ adamɔ nɔ yɛ Ŋmalɛ naa atse gbala mli ni anyɛ abote gbalashihilɛ mli ekoŋŋ. (Mat. 19:6-9; Rom. 7:2, 3) Yehowa nyɛ̃ɛɔ gbalamlitsemɔ ni damɔɔɔ Ŋmalɛ nɔ ni akɛ mɔ kroko boteɔ gbalashihilɛ mli lɛ.—Mal. 2:14-16.

[Mfonirii ni yɔɔ baafa 16, 17]

Nyɔŋmɔ kpaa gbɛ akɛ fɔlɔi baatsɔse amɛbii ni amɛjaje amɛ

[Mfonirii ni yɔɔ baafa 17]

Tsɛ ni yɔɔ suɔmɔ lɛ kɛ heloonaa kɛ mumɔŋ nibii haa eweku