Ani Esa akɛ Obi Aya Skul ni Awɔɔ Jɛmɛ Lɛ?

¹ Fɔlɔi fɛɛ ni susuɔ amɛbii ahe lɛ miisumɔ ni amɛha amɛje shihilɛ shishi jogbaŋŋ, ni kɛ́ nine aaashɛ enɛ nɔ lɛ, no lɛ wolokasemɔ ni sa ni ŋmɛɔ pɛpɛɛpɛ lɛ he miihia. Bei pii lɛ, je lɛŋ wolokasemɔ gbeleɔ gbɛ kɛhaa wɔsɛɛ be nitsumɔ mli hegbɛi, ni eyeɔ ebuaa gbekɛbii koni amɛdara kɛtsɔmɔ onukpai ni nyɛɔ amɛkwɛɔ amɛhe kɛ amɛ diɛŋtsɛ amɛwekui. Eyɛ mli akɛ wolokasemɔ kpakpa ni fɔlɔi ni ji Kristofoi kɛaaha amɛbii lɛ he miihia moŋ, shi amɛkɛ sɔlemɔ susuɔ gbɛnaa nii—amɛbii lɛ amumɔŋ hilɛ-kɛ-hamɔ—ni hiɛdɔɔ yɔɔ he babaoo lɛ he.—Fil. 1:10.

² Yɛ Ghana lɛ, fɔlɔi kɛ naagba krɛdɛɛ ko kpeɔ yɛ amɛbii lɛ askul woo mli. Yɛ hei babaoo lɛ, atsɔɔɔ nii jogbaŋŋ yɛ skul srɔtoi ni yɔɔ jɛmɛ lɛ amli. Yɛ maji komɛi amli lɛ, nɔtsamɔ skul ko kwraa bɛ jɛmɛ ní gbekɛbii baanyɛ atsa amɛnikasemɔ lɛ nɔ yɛ jɛmɛ. Enɛ hewɔ lɛ, fɔlɔi babaoo kpɛɔ amɛyiŋ akɛ amɛbaawo amɛbii agbɛ kɛya skul ni awɔɔ jɛmɛ, he ni bei pii lɛ, amɛyɛ nikasemɔ he nibii ni amɛtsɔɔ nii waa lɛ. Niiamlipɛimɔ ni afee nyɛsɛɛ nɛɛ etsɔɔ akɛ, Odasefoi abii babaoo ni yɔɔ maŋ lɛŋ he fɛɛ he lɛ yaa skul ni awɔɔ jɛmɛ. Shi, yɛ shihilɛi komɛi amli lɛ, fɔlɔi kɛ amɛbii etee skul ni awɔɔ jɛmɛ, eyɛ mli moŋ akɛ ayɛ skul ni awɔɔɔ jɛmɛ ní nibii kpakpai ni akɛtsɔɔ nii yɛ jɛmɛ. Fɔlɔi krokomɛi hu eŋmɛ amɛbii lɛ agbɛ koni amɛ diɛŋtsɛ amɛhala skul ni awɔɔ jɛmɛ. Ani osharai yɛ skul ni awɔɔ jɛmɛ lɛ mli ní baanyɛ asa gbekɛbii lɛ ahe yɛ mumɔŋ? Mɛni ji saji ni he hiaa ni esa akɛ fɔlɔi asusu he lɛ?

³ Hewalɛ ni Nikaselɔi Krokomɛi Náa yɛ Mɔ Nɔ: Skul srɔtoi komɛi ni awɔɔ jɛmɛ lɛ baanyɛ afee he ni abɔɔ nikasemɔ he mɔdɛŋ waa yɛ. Shi, te nikaselɔi lɛ kɛ tsɔɔlɔi ni yɔɔ skul lɛ ajeŋba yɔɔ tɛŋŋ? Nikaselɔi lɛ ateŋ mɛi babaoo enaaa tɔmɔ ko yɛ bɔlɛnamɔ ni tsɔɔ gbalashihilɛ hiɛ lɛ he. Amɛnaa juu, amale, kɛ lakamɔ akɛ tɔmɔ ko bɛ he. Akɛni Odasefoi abii lɛ kɛ susumɔi nɛɛ kpãaa gbee hewɔ lɛ, bei pii lɛ awaa amɛyi, ayeɔ amɛhe fɛo, ni akɛ nɔnyɛɛ ni naa wa baa amɛnɔ koni amɛkpɛlɛ tɛi ni je lɛ efolɔ eshwie shi lɛ nɔ. (1 Pet. 4:4) Eji anɔkwale akɛ, nɛkɛ ji bɔ ni shihilɛ lɛ yɔɔ yɛ skul srɔtoi lɛ fɛɛ mli. Shi kɛ wɔbii lɛ yɛ skul ni awɔɔ jɛmɛ lɛ mli lɛ, amɛkɛ amɛklasbii lɛ hiɔ shi ŋmɛlɛtswai 24 daa gbi. Fiofio lɛ, nɛkɛ naanyobɔɔ gbonyo ni abɔɔ be fɛɛ be nɛɛ baanyɛ afite wɔbii lɛ ahemɔkɛyeli, ni ebaanyɛ eye amɛ awui yɛ mumɔŋ. Akɛni gbekɛbii lɛ kɛ be kakadaŋŋ etse amɛhe kɛjɛ amɛfɔlɔi ahe hewɔ lɛ, amɛbaanyɛ amɛná jeŋbai srɔtoi enyɔ, amɛbaafee amɛnii yɛ gbɛ kome nɔ yɛ skul kɛ gbɛ kroko hu nɔ beni amɛkɛ amɛfɔlɔi lɛ yɔɔ yɛ shia.—Lala 26:4.

⁴ Susumɔ awerɛho sane ko ni kɔɔ shiɛlɔ ko ni eye afii 13 kɛyaa ni abaptisi lɛ ni yaa skul ni awɔɔ jɛmɛ yɛ Ghana lɛ nɔkwɛmɔnɔ lɛ he okwɛ. Yɛ eklɛŋklɛŋ afi lɛ mli lɛ, skulnyo yoo ko ná ehe akɔnɔ. Ekpoo gbekɛ yoo lɛ nifeemɔi lɛ ni ekɛɛ efɔlɔi. Efɔlɔi lɛ kai lɛ osharai ni yɔɔ mli lɛ, ni amɛwo lɛ hewalɛ koni ekwɛ ehe nɔ jogbaŋŋ. Shi, beni be shwieɔ mli lɛ, kɛtsɔ nɔnyɛɛ ni gbekɛ yoo lɛ kɛ skulbii krokomɛi lɛ kɛba enɔ be fɛɛ be lɛ hewɔ lɛ, eŋmɛɛ ehe ni ebɔ ajwamaŋ. Awerɛho sane ji akɛ, nɛkɛ efɔŋfeemɔ nɛɛ tee nɔ yɛ teemɔŋ nɔ ni fe afi kɛ fã kɛyashi naagbee mli lɛ abale ni ashwie lɛ kɛjɛ asafo lɛ mli.

⁵ Eji anɔkwale akɛ, kɛ́ nikaselɔi ni yɔɔ skul ni awɔɔ jɛmɛ lɛ tsɔ amɛwiemɔi kɛ nifeemɔi anɔ amɛha ale akɛ amɛji Yehowa Odasefoi lɛ, ehe baa sɛɛnamɔ kɛhaa amɛ. Ekolɛ skul lɛ nɔkwɛlɔi baajie amɛ kɛjɛ apasa jamɔ mli nifeemɔi ni anyɛɔ mɔ nɔ awoɔ mli, ni teɔ shi woɔ wɔhemɔkɛyeli lɛ mli. Ekolɛ nanemɛi nikaselɔi lɛ baatsi amɛhe kɛjɛ mɔdɛŋ ni amɛaabɔ koni amɛha amɛkɛ amɛhe awo nifeemɔi kɛ sanegbaai ni esaaa mli lɛ he. Agbɛnɛ hu, ekolɛ akɛ hiɛ kaŋ mɛi ni hiɔ shi yɛ Kristofoi ashishitoo mlai anaa lɛ akɛ amɛfee efɔŋ ko ni ehiii kwraa, ni ekolɛ tsɔɔlɔi kɛ nanemɛi nikaselɔi kɛ bulɛ baaha amɛ.

⁶ Shi, nibii eyaaa nɔ nakai be fɛɛ be. Ní gbekɛ ko aaahi shi akɛ esoro lɛ lɛ haa yɛ bei babaoo mli lɛ, ebafeɔ mɔ ni nanemɛi nikaselɔi kɛ tsɔɔlɔi hu waa lɛ yi ni amɛyeɔ ehe fɛo. Esther kɛ nɔnyɛɛ ni naa wa ni jɛ skulbii kɛ tsɔɔlɔi aŋɔɔ lɛ kpe koni eŋmɛɛ Biblia mli shishitoo mlai ahe ekɛsaa. Anyɛ lɛ kɛ Odasefoi nikaselɔi krokomɛi anɔ koni amɛkɛ amɛhe awo hiɛtserɛjiemɔ mli jeŋba shara kɛ bɔlɛnamɔ mli jeŋba shara kɛ agbɛnɛ hu apasa jamɔ nifeemɔi amli. Beni amɛkpɛlɛɛɛ tsɛmɔ kɛha jeŋba shara nifeemɔi ni nikaselɔi ni nyiɛ amɛhiɛ lɛ kɛba amɛnɔ lɛ nɔ lɛ, agbala amɛtoi waa yɛ apasa naafolɔmɔi ahewɔ. Esther biɔ akɛ: “Be sɛɛkɛlɛ enyiɛ obaanyɛ oya nɔ otsĩ shihilɛi ni tamɔ nɛkɛ naa?”

⁷ Hewalɛ ni Tsɔɔlɔi Náa yɛ Mɔ Nɔ: Tsɔɔlɔi ni jeŋba ekpɔtɔ ni kɛ hegbɛ ni amɛyɔɔ lɛ tsuɔ nii yɛ gbɛ fɔŋ nɔ, ni amɛkɛ nikaselɔi lɛ náa bɔlɛ po lɛ baanyɛ ahi skul fɛɛ skul mli. Shi, afɔɔɔ tsɔɔlɔi ni tamɔ nɛkɛ lɛ anifeemɔi lɛ ahe amaniɛbɔɔ yɛ skul srɔtoi ni awɔɔ jɛmɛ lɛ mli. Tsɔɔlɔi krokomɛi kɛ anɔkwayeli bɔɔ mɔdɛŋ koni amɛtsɔse gbekɛbii ni amɛbatsɔmɔ maŋbii ni sɛɛnamɔ yɔɔ amɛhe, koni amɛnyɛ amɛhi jeŋ ni ebɔle amɛhe kɛkpe lɛ mli. Shi, biɛ ji he ni naagba kroko yɔɔ kɛha gbekɛbii Odasefoi. Jeee be fɛɛ be nibii ni je lɛ buɔ nomɛi lɛ kɛ Kristofoi ashishitoo mlai kpãa gbee. Yɛ be mli ni tsɔɔlɔi woɔ nikaselɔi ahewalɛ ni amɛtsɔmɔ mɛi ni sa kɛha je nɛɛ lɛ, Yesu kɛɛ akɛ esɛɛnyiɛlɔi lɛ baafee mɛi ni ‘jɛɛɛ je lɛ mli.’—Yoh. 17:16.

⁸ Kpojee He Naatsĩi: Nɔ ni tamɔɔɔ univɛsitii srɔtoi ni bei pii lɛ nikaselɔi lɛ yɔɔ hegbɛ akɛ amɛjeɔ kpo kɛyaa kɛbaa bɔ ni amɛsumɔɔ lɛ, nɔtsamɔ skul srɔtoi lɛ tsĩɔ gbekɛbii lɛ akpojee gbɛ. Nikaselɔi lɛ yɛ amɛtsɔɔlɔi akudɔmɔ shishi. Skul ni awɔɔ jɛmɛ lɛ mli onukpai lɛ ateŋ mɛi babaoo bɛ bulɛ kɛha wɔhemɔkɛyelii lɛ, ni amɛŋmɛɛɛ Odasefoi gbekɛbii lɛ agbɛ koni amɛya asafoŋ kpeei. Bei pii lɛ, skul komɛi ni jamɔ kui kwɛɔ nɔ lɛ nyɛɔ wɔbii lɛ anɔ amɛwoɔ sɔlemɔ lɛ mli, ni amɛnyɛɔ amɛteŋ mɛi komɛi po anɔ koni amɛkɛ amɛhe awo apasa jamɔ nifeemɔi amli. Skul pii eŋmɛɛɛ asafoŋ onukpai ni yɔɔ jɛmɛ lɛ agbɛ koni amɛkɛ Odasefoi abii abafee nikasemɔ, ni no nyɛɔ nikaselɔi lɛ anɔ koni amɛ diɛŋtsɛ amɛfee amɛkpeei. Yɛ naatsĩi nɛɛ ahewɔ lɛ, wɔbii lɛ ateŋ mɛi komɛi folɔɔ daa otsi nikasemɔi lɛ babaoo mli, amɛbatsɔmɔɔ mɛi ni efɔɔɔ shiɛmɔ yaa, ni atsĩɔ amɛ gbɛbimɔ kɛha Kaimɔ lɛ yaa naa po!

⁹ “Nyɛkahaa Alakaa Nyɛ”: Fɔlɔi komɛi miisumɔ ni amɛkɛ amɛbii lɛ amumɔŋ shidaamɔ awo oshara mli bɔni afee ni amɛha amɛnine ashɛ tsɔsemɔ ni “hi fe fɛɛ” nɔ. Amɛtsĩɔ nɔkwɛmɔnii ni kɔɔ Kristofoi oblahii kɛ oblayei ni tee skul ni awɔɔ jɛmɛ, ni amrɔ nɛɛ amɛtsɔmɔ onukpai kɛ gbɛgbalɔi lɛ atã akɛ odaseyeli ni tsɔɔ akɛ kɛ hoo kwraa lɛ, “skul ni awɔɔ jɛmɛ lɛ jeee nɔ ni ehiii kwraa.” Shi kɛlɛ, tsulɔ anɔkwafo kɛ nilelɔ lɛ kɛ kɔkɔbɔɔ nɛɛ ha fɔlɔi yɛ March 15, 1997 Buu-Mɔɔ lɛ baafa 26, kuku 3 lɛ mli akɛ: “Paulo ŋma akɛ: ‘Nyɛkahaa alakaa nyɛ. Naanyobɔɔ fɔŋ fiteɔ jeŋbai kpakpai.’ (1 Korintobii 15:33, NW) Esaaa akɛ alakaa fɔlɔi Kristofoi koni amɛsusu akɛ mumɔŋ awuiyeli ko baŋ amɛbii lɛ anɔ kɛ́ amɛkɛ mɛi ni sɔmɔɔɔ Nyɔŋmɔ lɛ bɔ be fɛɛ be. Yɛ be kpalaŋŋ sɛɛ lɛ, gbekɛbii ni sheɔ Nyɔŋmɔ gbeyei lɛ bafeɔ mɛi ni kɛ Kristofoi asubaŋi kpakpai tsuuu nii, ni amɛbaanyɛ amɛlaaje hiɛsɔɔ fɛɛ ni amɛyɔɔ kɛha mumɔŋ nibii lɛ. Yɛ bei komɛi amli lɛ, fɔlɔi lɛ leee enɛ aahu kɛyashiɔ be mli ni amɛbii lɛ eshi skul ni awɔɔ jɛmɛ lɛ sɛɛ. Kɛkɛ lɛ, ekolɛ ákɛ aaasaa shihilɛ lɛ efee nɔ ni ekpe sɛɛ tsɔ̃.”

¹⁰ Clement niiashikpamɔ lɛ feɔ enɛ he nɔkwɛmɔnɔ. Ewie akɛ: “Miyɛ suɔmɔ kɛha anɔkwale lɛ, ni mikɛ nyɛmimɛi lɛ yaa shiɛmɔ. Minyaa weku Biblia mli nikasemɔ kɛ Asafo Woloŋ Nikasemɔ he titri. Shi, beni mitee skul ni awɔɔ jɛmɛ beni miye afii 14 lɛ pɛ kɛkɛ ni mishi anɔkwale lɛ kwraa. Miyaaa kpeei gbi ko gbi ko yɛ afii enumɔ ni miye yɛ skul ni awɔɔ jɛmɛ lɛ fɛɛ mli. Yɛ naanyobɔɔ fɔŋ hewɔ lɛ, mikɛ mihe wo tsofai fɔji kɛ nitsumɔ, zigaret shɛremɔ, kɛ dãanumɔ shɛii mli.”

¹¹ Fɔlɔi Agbɛnaa Nii: Nyɔŋmɔ Wiemɔ lɛ tsɔɔ faŋŋ akɛ, esa akɛ fɔlɔi lɛ diɛŋtsɛ akwɛ amɛbii lɛ amumɔŋ hiamɔ nii anɔ. Yelikɛbuamɔ he miihia wɔbii lɛ be fɛɛ be koni amɛnyiɛ wala gbɛ lɛ nɔ. Ehe miihia ni akɛ amɛ afee Biblia mli nikasemɔ daa, amɛkɛ amɛhe awo shiɛmɔ nitsumɔ lɛ mli, ni amɛya kpeei lɛ fɛɛ. Ehe miihia ni fɔlɔi kɛ amɛbii lɛ agba sane daa gbi bɔni afee ni amɛyɔse hewalɛ fɔŋ he okadii loo nɔ fɛɛ nɔ ni baanyɛ ajɛ je lɛ mli kɛba ni baagbɔjɔ amɛmumɔŋ shidaamɔ lɛ. (1 Kor. 15:33; Abɛi 20:11) Fɔlɔi baakpɛlɛ nɔ amrɔ nɔŋŋ akɛ enɛ jeee nitsumɔ bibioo! Kɛ́ ebiɔ mɔdɛŋbɔɔ waa, daa gbi sɛɛfimɔ, kɛ sɔlemɔ ni aaasɔle be fɛɛ be beni obii yɔɔ omasɛi yɛ shia lɛ, belɛ, kɛ́ akɛ amɛ tee he ko shɔŋŋ yɛ skul ni awɔɔ jɛmɛ, ni amɛnáaa sɛɛfimɔ ni fɔlɔi kɛaaha amɛ daa lɛ dɔŋŋ lɛ, no hu?

¹² Fɔlɔi komɛi eshi amɛbii lɛ akwɛmɔ amɛfɔ wekumɛi loo Odasefoi krokomɛi anɔ bɔni afee ni amɛnyɛ amɛya skul ni awɔɔ jɛmɛ. Amɛsusuɔ akɛ nɛkɛ mɛi ni hiɛ efã nɛɛ baanyɛ akwɛ amɛbii lɛ anifeemɔi kɛ jeŋba nɔ. Shi kɛlɛ, Paulo ŋma fɔlɔi akɛ: “Nyɛ tsɛmɛi lɛ, nyɛkawoa nyɛbii amlifu, shi moŋ nyɛlɛa amɛ yɛ Nuŋtsɔ [Yehowa, NW] tsɔsemɔ kɛ ŋaawoo lɛ mli.” (Efe. 6:4) Te fɔlɔi aaafee tɛŋŋ ni amɛkɛ ŋaawoo ni jɛ ŋwɛi nɛɛ aaatsu nii, kɛ́ amɛbii lɛ yɛ mɔ kroko ŋɔɔ, loo amɛ́tee skul ni awɔɔ jɛmɛ, he ni ekolɛ abaaha amɛba jɛmɛ shikome loo shii enyɔ yɛ nyɔŋ kome mli lɛ? Kɛji akɛ Kristofoi ni ji fɔlɔi kɛ amɛbii yawo skul ni tamɔ nɛkɛ mli lɛ, mɛɛ shɛɛ sane amɛkɛhaa amɛbii lɛ? Enɛ: Ákɛ wolokasemɔ kpakpa ni aaana lɛ he hiaa waa fe nɔ ni aaabua he naa kɛha jamɔ, kɛ he ni akɛaawo kaselɔ feemɔ nitsumɔ lɛ mli—ni ehe hiaa waa po fe emuuyeli mli ni aaahiɛ aha Nyɔŋmɔ! Nakai jeŋba he taomɔ nii srɔtoi enyɔ lɛ baanyɛ aye gbekɛ ko hemɔkɛyeli awui waa.—2 Tim. 1:5.

¹³ Ani Gbɛ̀i Krokomɛi Yɛ ni Abaanyɛ Atsɔ Nɔ? Mɛni fɔlɔi baanyɛ afee kɛ etamɔ nɔ ni nibii enyɔ pɛ yɔɔ ni amɛbaahala emli ekome—skul ni awɔɔ jɛmɛ loo maŋ lɛ mli skul ni nitsɔɔmɔ nibii kpakpai bɛ jɛmɛ? Fɔlɔi ni ji Kristofoi ni edara yɛ mumɔŋ lɛ ateŋ mɛi babaoo toɔ gbɛjianɔ koni atsɔɔ amɛbii anii yɛ shia kɛfata wolokasemɔ ni yaa nɔ yɛ maŋ lɛ mli skul lɛ he. Fɔlɔi krokomɛi enyɛ amɛ diɛŋtsɛ amɛtsɔɔ amɛbii lɛ anii. Wekui komɛi eshi kɛtee hei ni skul kpakpai ni awɔɔɔ jɛmɛ lɛ yɔɔ. Nakai gbɛjianɔtoi lɛ baanyɛ afee nɔ ni wa, nɔ ni woɔ mɔ haomɔ, kɛ nɔ ni jara wa po, shi fɔlɔi ni edara yɛ mumɔŋ lɛ miisumɔ ni amɛtsɔ nibii ni woɔ mɔ haomɔi nɛɛ amli fe nɔ ni amɛkɛ amɛbii lɛ amumɔŋ shihilɛi aaawo oshara mli.—Fil. 1:10; Efe. 5:15.

¹⁴ Shi, kɛ etamɔ nɔ ni nɔ ko bɛ ni abaafee akɛ ja akɛ gbekɛ lɛ tee skul ni awɔɔ jɛmɛ lɛ, no hu? Akɛni ekɔɔ amɛbii lɛ anaanɔ wala he hewɔ lɛ, fɔlɔi ni sumɔɔ teokrase gbɛtsɔɔmɔ lɛ kɛ hiɛdɔɔ kɛ sɔlemɔ baasumɔ ni amɛsusu sanebimɔi ni nyiɛ sɛɛ nɛɛ ahe koni amɛkɛhala skul ko: Ani skul onukpai lɛ baaná bulɛ amɛha wɔ Kristofoi ahemɔkɛyelii lɛ? Ani abaaha mibi lɛ akpa asafoŋ kpeei lɛ ateŋ babaoo yaa loo abaatsi enaa koni ekɛ ehe akawo shiɛmɔ nitsumɔ lɛ mli? Ani skul lɛ mli onukpai lɛ baaŋmɛ gbɛ koni asafoŋ onukpai ni yɔɔ jɛmɛ lɛ kɛ gbekɛbii lɛ afee kpeei? Ani manyɛ maná heyeli kɛha mibi lɛ bɔni afee ni akanyɛ enɔ ni ekɛ ehe miiwo je lɛŋ nifeemɔi amli loo apasa jamɔ nifeemɔi amli? Ani manyɛ mayasara mibi lɛ daa otsi koni mikɛwo lɛ hewalɛ ni mikɛkwɛ emumɔŋ nɔyaa? Kɛ́ anyɛŋ ato nɔ ni yɔɔ yiteŋgbɛ lɛ he gbɛjianɔ lɛ, no lɛ fɔlɔi ni ji Kristofoi kɛ nilee baatao skul kroko kɛha amɛbi lɛ.

¹⁵ Fɔlɔi ni edara yɛ mumɔŋ lɛ yɔseɔ akɛ tsɔɔlɔ ko, skul ko, wekunyo ko loo mɔ kroko nyɛŋ abɔ mɔdɛŋ aŋɔ nitsumɔ ni ji amɛbii lɛ akudɔmɔ afɔ̃ amɛhe nɔ yɛ gbɛ ni ja nɔ koni amɛtsɔmɔ Nyɔŋmɔ tsuji ni amɛjɔɔ amɛhe nɔ. Enɛ ji amɛgbɛnaa nii! (Gal. 6:5; 5 Mose 6:6, 7) Ama bɔ ni hiɛdɔɔ yɔɔ enɛ he lɛ nɔ mi yɛ wiemɔ ni ajɛ mumɔŋ awie nɛɛ mli: “Shi kɛ́ mɔ ko kwɛɛɛ lɛ diɛŋtsɛ emɛi, titri lɛ lɛ diɛŋtsɛ eshiabii lɛ, ekpa yɛ hemɔkɛyeli lɛ sɛɛ, ni efaŋ mɔ ni heee yeee fe lɛ.” (1 Tim. 5:8) Shihilɛi yɛ srɔtoi yɛ hei babaoo, ni esa akɛ weku fɛɛ weku diɛŋtsɛ ahala skul ni amɛbi lɛ baaya. Shi, kwɛ bɔ ni ebaafee nɔ ni nilee bɛ mli akɛ aaaŋmɛ gbɛ koni gbekɛbii lɛ diɛŋtsɛ ahala skul ni amɛbaaya! Esa akɛ nyɛ ni nyɛji fɔlɔi lɛ afee nakai nihalamɔ lɛ.

¹⁶ Yɛ osharai ni yɔɔ mli kɛha gbekɛbii lɛ hewɔ lɛ, fɔlɔi ni ji Kristofoi ni kɛ amɛbii yawoɔ skul ni awɔɔ jɛmɛ ni amɛkwɛɛɛ kɛji ákɛ akɛ mumɔŋ gbɛjianɔtoi ni sa miitsu nii yɛ jɛmɛ lɛ efeee nɔkwɛmɔnɔ kpakpa ni ehaŋ Kristofonyo ko he asa kɛha hegbɛi yɛ asafo lɛ mli.—1 Tim. 3:4, 5, 12, 13; 5:8; Tito 1:6, 7.

¹⁷ Taakɛ fɔlɔi ni ji Kristofoi le jogbaŋŋ lɛ, ebiɔ hesaai, tsuishitoo, kɛ be babaoo dani adũ suɔmɔ kɛha Yehowa awo gbekɛ tsui mli. Akɛni ekɔɔ gbekɛ lɛ naanɔ wala he hewɔ lɛ, esa akɛ fɔlɔi kɛ hiɛdɔɔ kɛ sɔlemɔ akpɛ amɛyiŋ, kɛji akɛ amɛbi ni amɛkɛ lɛ aaawo skul ni awɔɔ jɛmɛ lɛ mli yɛ be mli ni eyɔɔ efii ni he hiaa waa lɛ mli lɛ sa oshara ni yɔɔ he lɛ lo. Kwɛ bɔ ni eeefee nii ni akwɛɛɛ kɛyaaa shɔŋŋ, ákɛ akɛ gbekɛ ko mumɔŋ nibii aaashã afɔle aha wolokasemɔ yɛ skul ni awɔɔ jɛmɛ lɛ mli sɛɛnamɔi!

¹⁸ Nyɔŋmɔ Wiemɔ lɛ kɛɔ akɛ: “Hiɛtɛ̃lɔ naa efɔŋ ni baa, ni eteeɔ ehe, shi mɛi ni nako jwɛŋmɔ lɛ batsɔɔ he kɛhoɔ, ni amɛnaa nɔ̃.” (Abɛi 22:3) Ani ehiii akɛ aaatsĩ shihilɛ ni ehiii naa, fe nɔ ni aaajaje eko yɛ sɛɛ mli? Akɛni “nibii fɛɛ anaagbee lɛ eshɛ etã” hewɔ lɛ, esa akɛ fɔlɔi kɛ hiɛdɔɔ asusu sanebimɔ ni ji, “Ani esa akɛ obi aya skul ni awɔɔ jɛmɛ lɛ?” lɛ he.—1 Pet. 4:7; Mat. 16:26.