Gbɛgbamɔ Nitsumɔ lɛ Mli Jɔɔmɔi
1, 2. Mɛɛ jɔɔmɔi nɛkɛ kɔɔ gbɛgbamɔ nitsumɔ lɛ he waa, ni mɛni hewɔ?
1 Gbɛgbalɔ ko kɛɛ akɛ: “Mile akɛ nitsumɔ ko bɛ ni baanyɛ ekɛ tsui ni nyɔɔ mɔ mli abaha mi tamɔ nɔ ni ejɛ anɔkwale lɛ ni mikɛ mɛi krokomɛi gbaa he sane lɛ mli eba lɛ.” Mɔ kroko hu kɛɛ akɛ: “Miwɔ ŋɔ́ɔ minaa yɛ gbi fɛɛ gbi naagbee, ni mitsui yiɔ obɔ kɛ miishɛɛ.” Gbɛgbalɔi nɛɛ damɔ nyɛmimɛi hii kɛ yei ni yɔɔ he fɛɛ he ni kɛ gbɛgbamɔ nitsumɔ lɛ mli jɔɔmɔi lɛ esa amɛnaa dã lɛ najiaŋ.—Abɛi 10:22.
2 Mɛi krokomɛi ni aaaye abua amɛ koni amɛná Nyɔŋmɔ Wiemɔ lɛ mli nilee ni hereɔ mɔ yiwala lɛ kɛ tsui ni nyɔɔ mɔ mli diɛŋtsɛ baa. (Bɔf. 20:35; 1 Tes. 2:19, 20) Gbɛgbalɔ ko ni etsɛ waa lɛ ŋma akɛ: “Eŋɔɔ waa ni ewajeɔ hemɔkɛyeli akɛ ooona bɔ ni Nyɔŋmɔ Wiemɔ lɛ yɔɔ hewalɛ hã, yɛ bɔ ni ekanyaa gbɔmɛi koni amɛfee tsakemɔi yɛ amɛshihilɛi amli lɛ hewɔ.” Hɛɛ, akɛni gbɛgbalɔi kɛ amɛhe haa koni amɛye amɛbua mɛi ni amɛfee Biblia mli nikasemɔi hewɔ lɛ, amɛbaaná jɔɔmɔi ni tamɔ enɛɛmɛi.
3, 4. Gbɛgbamɔ nitsumɔ lɛ tsɔɔ mɔ nii koni ekɛ ehiɛ afɔ̃ Yehowa nɔ yɛ mɛɛ gbɛ nɔ, ni mɛɛ gbɛ nɔ enɛ yeɔ ebuaa mɔ ko ni edaa yɛ mumɔŋ?
3 Okɛ Ohiɛ Afɔ̃ Yehowa Nɔ: Akɛni gbɛgbalɔi kɛ amɛhiɛ fɔ̃ɔ Nyɔŋmɔ mumɔ lɛ nɔ daa yɛ be mli ni amɛtsuɔ amɛsɔɔmɔ nitsumɔ lɛ he nii hewɔ lɛ, eyeɔ ebuaa amɛ ni amɛwoɔ “mumɔ lɛ yibii” lɛ, ni efeɔ hebuunɔ kɛhaa amɛ. (Gal. 5:16, 22, 23) Kɛfata he lɛ, akɛni gbɛgbalɔi lɛ kɛ Nyɔŋmɔ Wiemɔ lɛ tsuɔ nii be fɛɛ be hewɔ lɛ, bei pii lɛ amɛfeɔ mɛi ni he esa yɛ Ŋmalɛ lɛ ni akɛtsuɔ nii kɛfãa anɔkwale lɛ he ni akɛwajeɔ mɛi krokomɛi lɛ mli. (2 Tim. 2:15) Nyɛmi nuu ko ni kɛ afii nyɔŋmai abɔ tsu gbɛgbamɔ nitsumɔ lɛ wie akɛ: “Gbɛgbamɔ lɛ eye ebua mi ni eha miná Biblia lɛ he nilee ni mli kwɔ, nilee ni mikɛtsu nii ni mikɛye mibua gbɔmɛi pii koni amɛle Yehowa kɛ eyiŋtoi ahe nii lɛ.” Kwɛ bɔ ni ehaa mɔ mii shɛɔ ehe!
4 Esa akɛ daa gbɛgbalɔi hu kɛ amɛhiɛ afɔ̃ Yehowa nɔ yɛ gbɛ̀i krokomɛi babaoo hu nɔ. Amɛhemɔkɛyeli lɛ mli waa yɛ be mli ni amɛnaa bɔ ni ejɔɔ mɔdɛŋ ni amɛbɔɔ lɛ nɔ koni amɛnine ashɛ amɛheloonaa hiamɔ nii lɛ anɔ lɛ. Gbɛgbalɔ ko ni eye afii 72 ni kɛ afii 55 esɔmɔ akɛ daa gbɛgbalɔ lɛ kɛɛ akɛ: “Yehowa kwako mi gbi ko gbi ko pɛŋ.” Kɛfata he lɛ, akɛni gbɛgbalɔi lɛ haa amɛshihilɛi feɔ mlɛo hewɔ lɛ, amɛyeɔ amɛhe kɛjɛɔ shihilɛ mli yeyeeyefeemɔi babaoo he. Ani enɛ shɛjeɔ omii?—Mat. 6:22; Heb. 13:5, 6.
5. Gbɛgbamɔ nitsumɔ lɛ yeɔ ebuaa mɔ ni etsiɔ ebɛŋkɛɔ Yehowa yɛ mɛɛ gbɛ nɔ?
5 Nyɔŋmɔ ní Aaatsi Abɛŋkɛ Lɛ: Wɔkɛ Yehowa teŋ wekukpaa ji nii ni jara wa fe fɛɛ ni wɔyɔɔ. (Lala 63:4) Kɛ́ wɔkɛ wɔhe wo sɔɔmɔ nitsumɔ lɛ mli kɛmɔ shi yɛ suɔmɔ ni wɔyɔɔ kɛha Yehowa lɛ hewɔ lɛ, nakai wekukpaa lɛ mli waa. (Yak. 4:8) Gbɛgbalɔ ko ni kɛ nɔ ni fe afii 18 ehi be fɛɛ sɔɔmɔ lɛ mli lɛ kɛɛ akɛ: “Gbɛgbamɔ sɔɔmɔ lɛ haa ‘wɔsaa wɔnaa ni wɔnaa akɛ Yehowa hi,’ daa gbi lɛ etswaa wɔ kɛ wɔ-Bɔlɔ lɛ teŋ wekukpaa ni mli wa be fɛɛ be emaa shi.”—Lala 34:9.
6. Mɛni esa akɛ gbɛgbalɔi lɛ aná, ni yɛ gbɛgbalɔi lɛ asɛɛ lɛ, namɛi hu náa he sɛɛ?
6 Kɛfata shihilɛi ni he hiaa ni gbɛgbalɔi lɛ aaaná lɛ he lɛ, esa akɛ amɛná hemɔkɛyeli ni mli wa, anɔkwa suɔmɔ kɛha Nyɔŋmɔ kɛ naanyo, kɛ suɔmɔ mli ni ajɛɔ akɛ he shãa afɔlei. (Mat. 16:24; 17:20; 22:37-39) Shi, yɛ be mli ni wɔnaa gbɛgbalɔi ni yɔɔ he fɛɛ he lɛ ahiɛ ŋmɔlɔŋmɔlɔ lɛ, etsɔɔ akɛ gbɛgbamɔ nitsumɔ lɛ mli jɔɔmɔi lɛ fa kɛteke nɔ. (Mal. 3:10) Jeee gbɛgbalɔi lɛ pɛ náa jɔɔmɔi nɛɛ amli ŋɔɔmɔ, shi amɛwekumɛi kɛ asafo lɛ hu náa mumɔ kpakpa ni gbɛgbalɔi lɛ jieɔ lɛ kpo lɛ hu he sɛɛ babaoo.—Fil. 4:23.