Oblahii kɛ Oblayei—Nyɛtswaa Shishitoo Nɔ̃ Kpakpa Kɛha Wɔsɛɛ
1. Mɛni hewɔ ehe miihia koni Kristofoi oblahii kɛ oblayei aná hemɔkɛyeli ni mli wa lɛ?
1 Mɛni ji nɔ̃ titri ni yɔɔ ojwɛŋmɔ mli? Mɛni he osusuɔ? Ani nibii titrii ni osusuɔ he lɛ kɔɔ nibii ni yɔɔ amrɔ nɛɛ loo nibii ni baaba wɔsɛɛ lɛ ahe, ni ogbalaa ojwɛŋmɔ kɛyaa nibii ni Nyɔŋmɔ ewo shi lɛ anɔ? (Mat. 6:24, 31-33; Luka 8:14) Ehe miihia ni aná hemɔkɛyeli ni mli wa koni akɛtsu Nyɔŋmɔ shiwoi ahe nii, taakɛ abaanyɛ ana yɛ nɔkwɛmɔnii ni Abraham kɛ Mose fee lɛ amli lɛ. (Heb. 11:8-10, 24-26) Te obaafee tɛŋŋ oná hemɔkɛyeli ni tamɔ nɛkɛ koni ‘otswa shishitoo nɔ̃ kpakpa kɛha wɔsɛɛ’?—1 Tim. 6:19.
2. Mɛni wɔkaseɔ kɛjɛɔ Maŋtsɛ Yosia nɔkwɛmɔnɔ lɛ mli?
2 Taomɔ Yehowa Sɛɛ Gbɛ: Kɛ́ okɛ ohe woɔ oweku lɛ daa gbi mumɔŋ nifeemɔi amli lɛ, no lɛ esa yijiemɔ. Shi kaasusu akɛ gbɛjianɔtoo ni tamɔ nɛkɛ lɛ baaha oná hemɔkɛyeli ni mli wa kɛji otsuuu he nɔ ko. Kɛ́ oooná “Nyɔŋmɔ he nilee” lɛ, no lɛ esa akɛ bo diɛŋtsɛ otao Yehowa sɛɛ gbɛ. (Abɛi 2:3-5; 1 Kron. 28:9) Maŋtsɛ Yosia ni edako lɛ fee nakai. Eyɛ mli akɛ eda yɛ he ko ni yeee ebuaaa kɛha mumɔŋ hiɛyaa moŋ, shi “ebɔi etsɛ David Nyɔŋmɔ lɛ sɛɛgbɛtaomɔ” beni eye afii 15.—2 Kron. 34:3.
3. Te Kristofoi oblahii kɛ oblayei ni yɔɔ ŋmɛnɛ lɛ baafee tɛŋŋ amɛtao Yehowa sɛɛ gbɛ?
3 Te obaafee tɛŋŋ ni otao Yehowa sɛɛ gbɛ? Kɛtsɔ pɛimɔ ni ooopɛi nɔ ni oheɔ oyeɔ lɛ mli jogbaŋŋ koni ‘bo diɛŋtsɛ oná nɔmimaa’ akɛ eji anɔkwale lɛ diɛŋtsɛ lɛ nɔ. (Rom. 12:2) Ákɛ nɔkwɛmɔnɔ lɛ, ani obaanyɛ otsɔɔ nɔ ni Biblia lɛ kɛɔ yɛ lá he lɛ mli, loo ní otsɔɔ akɛ Nyɔŋmɔ Maŋtsɛyeli lɛ je enɔyeli shishi yɛ ŋwɛi yɛ afi 1914? Shishitoo nɔ̃ kpakpa ni oootswa kɛha wɔsɛɛ lɛ fã ko ni he hia waa ji ‘anɔkwale lɛ he anɔkwa nilee’ ní oooná.—1 Tim. 2:3, 4.
4. Te shiɛlɔi ni abaptisiko amɛ lɛ baafee tɛŋŋ ni amɛha ana amɛshweremɔ lɛ faŋŋ lɛ?
4 Nyɔŋmɔ sɛɛ gbɛ ní Yosia tao lɛ wo yibii kpakpai. Beni eyeko afii 20 lɛ, ekɛ ekãa tsu nii ni ekɛjie apasa jamɔ yɛ shikpɔŋ lɛ nɔ. (2 Kron. 34:3-7) Nakai nɔŋŋ hu abaana omumɔŋ hiɛyaa lɛ faŋŋ kɛtsɔ onifeemɔi anɔ. (1 Tim. 4:15) Kɛ́ oji shiɛlɔ ni abaptisiko lɛ lɛ, bɔɔ mɔdɛŋ ni oná hiɛyaa yɛ oshiɛmɔ nitsumɔ lɛ mli. Kaaha otsui nyɔ omli yɛ woji kɛkɛ ni okɛhaa lɛ he. Kɛfee oti ni ma ohiɛ akɛ okɛ mɛi baasusu nii ahe kɛjɛ Biblia lɛ mli, ni otsu miishɛɛ ni ajieɔ lɛ kpo lɛ he nii. (Rom. 12:7) Enɛ baaye abua bo ni oda yɛ mumɔŋ.
5. Mɛɛ hegbɛi nɛkɛ anaa egbele kɛha Kristofoi ni abaptisi amɛ lɛ koni amɛkɛlɛɛ amɛsɔɔmɔ nitsumɔ lɛ mli?
5 Okɛ Nɔ ni Hi Fe Fɛɛ Aha Yehowa: Kɛ́ okɛ nu mli baptisimɔ fee ohenɔjɔɔmɔ kɛha Yehowa lɛ he okadi lɛ, obatsɔɔ Nyɔŋmɔ sɔɔlɔ ni ahala lɛ. (2 Kor. 3:5, 6) Enɛ gbeleɔ hegbɛi anaa kɛhaa bo koni okɛ be fɛɛ asɔmɔ Yehowa. Nɔ ni fata hegbɛi nɛɛ ahe ji gbɛgbamɔ nitsumɔ lɛ, kɛ agbɛnɛ hu Betel sɔɔmɔ, maŋsɛɛ sanekpakpa shiɛmɔ nitsumɔ lɛ, kɛ majimaji ateŋ sɔɔmɔ nitsumɔ lɛ. Gbɛ̀i krokomɛi ni yɔɔ lolo ni obaanyɛ otsɔ nɔ olɛɛ osɔɔmɔ nitsumɔ lɛ mli lɛ ji kɛtsɔ wiemɔ kroko kasemɔ nɔ, loo kɛtsɔ fã ni ooofã kɛyahi he ni hiamɔ lɛ da yɛ lɛ nɔ.
6. Mɛɛ gbɛ nɔ wɔteŋ mɔ fɛɛ mɔ baanyɛ atsɔ nɔ atswa shishitoo nɔ̃ kpakpa kɛha wɔsɛɛ?
6 Yɛ anɔkwale mli lɛ, jeee mɛi fɛɛ baanyɛ amɛkɛ amɛhe awo nɛkɛ sɔɔmɔ hegbɛi nɛɛ amli, shi wɔteŋ mɔ fɛɛ mɔ baanyɛ ekɛ nɔ ni hi fe fɛɛ lɛ aha Yehowa. (Mat. 22:37) Bɔ fɛɛ bɔ ni oshihilɛ ji ha lɛ, ha Yehowa sɔɔmɔ afee nɔ̃ titri yɛ oshihilɛ mli. (Lala 16:5) Okɛ nakai feemɔ baatswa shishitoo nɔ̃ kpakpa kɛha wɔsɛɛ.