Hã Ale Anɔkwale ni Kɔɔ Yesu He lɛ He

¹ Kristofoi ni afɔ amɛ mu, ni amɛnanemɛi tooi krokomɛi lɛ yeɔ buaa amɛ lɛ ‘hiɛ Yesu he odaseyeli nitsumɔ lɛ mli.’ (Kpoj. 12:17) Nitsumɔ ko ni he hiaa nɛ, ejaakɛ lɛ pɛ enɔ yiwalaheremɔ baanyɛ atsɔ aba.—Yoh. 17:3; Bɔf. 4:12.

² ‘Gbɛ lɛ, Anɔkwale lɛ, kɛ Wala Lɛ’: Yesu kɛɛ akɛ: “Mi nɔŋŋ ji gbɛ lɛ kɛ anɔkwale lɛ kɛ wala lɛ; mɔ ko baaa tsɛ lɛ ŋɔɔ, akɛ ja etsɔ minɔ.” (Yoh. 14:6) Kɛtsɔ Yesu, ni ji “gbɛ lɛ” nɔ pɛ wɔbaanyɛ wɔtsɔ wɔya Nyɔŋmɔ ŋɔɔ yɛ sɔlemɔ mli koni wɔná wɔkɛ Lɛ teŋ wekukpaa ni nɔkpɛlɛmɔ yɔɔ mli. (Yoh. 15:16) Yesu ji “anɔkwale lɛ,” kɛ shishinumɔ akɛ gbalɛi kɛ nɔkwɛmɔnii ni yɔɔ Hebri Ŋmalɛi lɛ amli lɛ ba mli diɛŋtsɛ yɛ emli. (Yoh. 1:17; Kol. 2:16, 17) Yɛ anɔkwale mli lɛ, shishijee yiŋtoo ni kɔɔ anɔkwa gbalɛ he ji, ní eha enitsumɔ, titri lɛ, nɔ ni kɔɔ Nyɔŋmɔ yiŋtoo he nitsumɔ he lɛ mli afee faŋŋ jogbaŋŋ. (Kpoj. 19:10) Agbɛnɛ hu, Yesu ji “wala lɛ.” Bɔni afee ni nine ashɛ naanɔ wala he nikeenii lɛ nɔ lɛ, esa akɛ mɔ fɛɛ mɔ aná hemɔkɛyeli yɛ ekpɔmɔ afɔleshaa lɛ mli.—Yoh. 3:16, 36; Heb. 2:9.

³ Yitso kɛ Maŋtsɛ ni Yeɔ Nɔ: Esa akɛ gbɔmɛi ayɔse nɔyeli hegbɛ kpele ni Yehowa kɛwo e-Bi lɛ dɛŋ lɛ hu. Akɛ Yesu eta sɛi nɔ akɛ Nyɔŋmɔ Maŋtsɛyeli lɛ nɔ Maŋtsɛ—‘ni lɛ toi majimaji fɛɛ baabo.’ (1 Mose 49:10) Kɛfata he lɛ, Yehowa ehala lɛ akɛ asafo lɛ Yitso. (Efe. 1:22, 23) Ehe miihia ni wɔye wɔbua wɔ Biblia mli nikaselɔi lɛ ni amɛnu bɔ ni Yesu kwɛɔ asafo lɛ nɔ ehaa, kɛ bɔ ni ekɛ “tsulɔ anɔkwafo kɛ nilelɔ” lɛ tsuɔ nii koni eha amɛ “amɛŋmaa yɛ be ni sa nɔ” lɛ shishi.—Mat. 24:45-47.

⁴ Osɔfonukpa ni Naa Mɔbɔ: Akɛni Yesu na nɔ̃ yɛ kaai kɛ amanehului amli akɛ adesa hewɔ lɛ, “enyɛɔ eyeɔ ebuaa mɛi ni akaa amɛ lɛ.” (Heb. 2:17, 18) Kwɛ miishɛɛ sane ni eji akɛ adesai ni yeee emuu lɛ aaale akɛ Yesu nuɔ amɛgbɔjɔmɔi lɛ ahe ehaa amɛ ni ekɛ mlihilɛ kpaa fai kɛhaa amɛ! (Rom. 8:34) Kɛtsɔ Yesu afɔleshaa lɛ, kɛ esɔɔmɔi akɛ Osɔfonukpa lɛ nɔ lɛ, wɔbaanyɛ ni ‘wɔkɛ wiemɔ mli heyeli’ atsi abɛŋkɛ Yehowa koni wɔná ‘yelikɛbuamɔ yɛ be ni sa mli.’—Heb. 4:15, 16.

⁵ Eba akɛ mɔdɛŋ ni wɔbɔɔ koni wɔha mɛi krokomɛi ale anɔkwale ni kɔɔ Yesu he lɛ baatsirɛ amɛ koni amɛkɛ wɔ fɛɛ abo lɛ toi ni wɔsɔmɔ lɛ yɛ ekomefeemɔ mli.—Yoh. 14:15, 21.

Ye Obua Nyɛ Asafo Woloŋ Nikasemɔ Nɔkwɛlɔ Lɛ

¹ Wɔteŋ mɔ fɛɛ mɔ náa Asafo Woloŋ Nikasemɔ lɛ he sɛɛ jogbaŋŋ. Wɔsusu bɔ ni Asafo Woloŋ Nikasemɔ nɔkwɛlɔ lɛ tsuɔ enii lɛ he yɛ nyɔŋ ni ho lɛ mli. Shi, mɛni wɔbaanyɛ wɔfee ni wɔkɛye wɔbua lɛ koni ehe aba sɛɛnamɔ kɛha wɔ kɛ mɛi krokomɛi?

² Yaa Daa Otsi: Akɛni ahãa woloŋ nikasemɔ kui lɛ feɔ bibii hewɔ lɛ, jɛmɛ ní abaana bo yɛ lɛ he hiaa. Okɛfee oti ni ma ohiɛ akɛ obaaya daa otsi. Obaanyɛ oye obua hu kɛtsɔ jɛmɛ ni obaashɛ yɛ ebe naa pɛpɛɛpɛ lɛ nɔ, ejaakɛ enɛ haa nɔkwɛlɔ lɛ jeɔ nikasemɔ lɛ shishi yɛ gbɛjianɔtoo kpakpa naa.—1 Kor. 14:40.

³ Hetooi ni Tswaa Mɔ Emaa Shi: Gbɛ kroko ni obaanyɛ otsɔ nɔ oye obua ji kɛtsɔ ohesaamɔ jogbaŋŋ, kɛ hetooi ni tswaa mɔ emaa shi ni obaaha lɛ nɔ. Bei pii lɛ, hetooi ni kɔɔ sane oti kome pɛ he lɛ ji nɔ ni hi fe fɛɛ, ni enɛ hu woɔ mɛi krokomɛi hewalɛ koni amɛwie. Kaabɔ mɔdɛŋ akɛ obaawie nɔ fɛɛ nɔ ni yɔɔ kuku lɛ mli lɛ he. Kɛji akɛ sane oti ko ni yɔɔ nikasemɔ lɛ mli lɛ ná onɔ hewalɛ waa lɛ, obaanyɛ otsɔ ohetoo nɔ okɛ nɔ ko ni hi afata he.—1 Pet. 4:10.

⁴ Kɛji akɛ oná hegbɛ lɛ ákɛ oookane kukuji lɛ amli koni ehe aba sɛɛnamɔ kɛha kuu lɛ, no lɛ okɛ hiɛdɔɔ atsu nakai nitsumɔ lɛ he nii. Nii ni akaneɔ lɛ jogbaŋŋ lɛ haa nikasemɔ lɛ he baa sɛɛnamɔ.—1 Tim. 4:13.

⁵ Kutuu Odaseyeli: Afeɔ kpeei kɛha shiɛmɔyaa yɛ hei pii ní afeɔ woloŋ nikasemɔ yɛ jɛmɛ lɛ, ni yelikɛbuamɔ ni okɛhaa nɛkɛ gbɛjianɔtoo nɛɛ yeɔ ebuaa nɔkwɛlɔ lɛ yɛ be mli ni enyiɛɔ sanekpakpa jajemɔ nitsumɔ lɛ hiɛ lɛ. Susumɔ gbɛjianɔtoi nɛɛ ahe akɛ hegbɛi ni baaha otsi obɛŋkɛ onyɛmimɛi lɛ ahe kpaakpa ni owo amɛ hewalɛ.

⁶ Sɔɔmɔ Nitsumɔ He Akɔntaabui: Osɔɔmɔ nitsumɔ lɛ he akɔntaa ni obaabu oya nɔŋŋ yɛ nyɔɔŋ fɛɛ nyɔɔŋ naagbee lɛ ji gbɛ kroko ni otsɔɔ nɔ oyeɔ obuaa Asafo Woloŋ Nikasemɔ nɔkwɛlɔ lɛ. Obaanyɛ okɛ okɔntaabuu lɛ awo edɛŋ tɛ̃ɛ, aloo okɛwo adeka ni akɛ sɔɔmɔ nitsumɔ he akɔntaabuu woji lɛ woɔ mli yɛ Maŋtsɛyeli Asa lɛ nɔ lɛ mli. Woloŋmalɔ lɛ baanyɛ ni ekɛ enɛ atsu nii ni ekɛbua sɔɔmɔ nitsumɔ he akɔntaabui ni nikasemɔ nɔkwɛlɔi lɛ anine eshɛ nɔ lɛ anaa.

⁷ Ehiɛ baasɔ ekome ni okɛ nyɛ Asafo Woloŋ Nikasemɔ nɔkwɛlɔ lɛ baafee yɛ enɛ mli lɛ jogbaŋŋ. Nɔ ni fe fɛɛ lɛ, obaanyɛ oná nɔmimaa akɛ Yehowa ‘baakpɛlɛ mumɔ ni ojieɔ lɛ kpo lɛ nɔ.’—Fil. 4:23.