Kasemɔ Nikanemɔ kɛ Niŋmaa
1. Yehowa Odasefoi etsu ŋwɛi famɔ ni yɔɔ Mateo 24:14 kɛ 28:19, 20 lɛ he nii yɛ mɛɛ gbɛ nɔ?
1 Yesu kɛɛ esɛɛnyiɛlɔi lɛ ni ‘amɛfee jeŋmaji fɛɛ ekaselɔi, ni amɛtsɔɔ amɛ ni amɛye nii fiaa ni ekɛɛ lɛ nɔ.’ Egba efɔ̃ shi hu akɛ ‘abaashiɛ maŋtsɛyeli lɛ he sanekpakpa lɛ atsɔɔ je nɛŋ fɛɛ.’ (Mat. 24:14; 28:19, 20) Ŋmɛnɛ, Yehowa Odasefoi etsɔ wiemɔi ni akɛ naabu jajeɔ kɛ woji ni akala lɛ anɔ amɛkɛ ekãa eshiɛ ni amɛtsɔɔ nii kɛtsu nitsumɔ ni akɛwo amɛdɛŋ nɛɛ he nii. Kɛjɛ afi 1920 kɛbaa nɛɛ lɛ, Yehowa Odasefoi ekala Bibliai, woji wuji, woji tɛtrɛbii, kɛ woji bibii akpekpei toi akpei abɔ mli, ni amɛjara yɛ wiemɔi aaafee 380 mli.
2. (a) Namɛi fata mɛi ni ehere Maŋtsɛyeli shɛɛ sane lɛ nɔ lɛ ahe? (b) Te esa akɛ wɔbu wɔnyɛmimɛi hii kɛ yei ni wɔsumɔɔ amɛ ni lé nikanemɔ loo niŋmaa lɛ tɛŋŋ?
2 Gbɔmɛi akpekpei abɔ ni yɔɔ je lɛ mli fɛɛ lɛ ekpɛlɛ shɛɛ sane lɛ nɔ, ni amɛbatsɔmɔ Kristo kaselɔi. Amɛteŋ mɛi komɛi ji hii kɛ yei ni lé woloŋ. Mɛi ni leee nikanemɔ kɛ niŋmaa nɛɛ jeee Kristofoi ni baa shi—amɛteŋ mɛi pii kɛ anɔkwayeli esɔmɔ Nyɔŋmɔ afii nyɔŋmai abɔ, amɛŋmɛ amɛtsui shi yɛ jamɔŋ yiwaa mli, ni amɛkɛ Yehowa kitai ní amɛyeɔ nɔ lɛ etsɔɔ akɛ amɛsumɔɔ lɛ.—1 Yoh. 5:3.
3. Mɛɛ yiŋtoi ni mli wa mɛi ni lé woloŋ lɛ yɔɔ ni amɛaadamɔ nɔ amɛbɔ mɔdɛŋ amɛkase nikanemɔ?
3 Mɛni Hewɔ Esa akɛ Okase Nikanemɔ? Shi kɛlɛ, nɛkɛ gbɔmɛi nɛɛ ateŋ mɛi babaoo shweɔ ni amɛ diɛŋtsɛ amɛkane Nyɔŋmɔ Wiemɔ ni ji Biblia lɛ. Amɛyɔseɔ akɛ no feemɔ ji nɔ titri ni baaha amɛkɛ amɛhe awo Nyɔŋmɔ ni amɛjaa lɛ lɛ mli jogbaŋŋ kɛmɔ shi. Amɛsumɔɔ ni amɛnyiɛ sɛɛ kɛkane Biblia lɛ kɛ Kristofoi awoji, ni amɛsumɔɔ ni amɛkane lalai ni aláa lɛ amli wiemɔi lɛ koni amɛnyɛ amɛfata amɛmumɔŋ nyɛmimɛi hii kɛ yei lɛ ahe kɛlá yɛ kpeei ashishi. Amɛsumɔɔ ni amɛtsɔ Biblia kasemɔ nɔ amɛtswa amɛ diɛŋtsɛ amɛhe kɛ amɛwekui lɛ amɛma shi yɛ shĩa. Amɛsumɔɔ ni amɛ diɛŋtsɛ amɛkane anɔkwale ni yɔɔ Nyɔŋmɔ Wiemɔ lɛ mli lɛ ní amɛkɛtsɔɔ mɛi krokomɛi anii yɛ shiɛmɔ nitsumɔ lɛ mli.
4. (a) Nikanemɔ jogbaŋŋ ni wɔɔkase lɛ baanyɛ aná wɔmumɔŋ shidaamɔ nɔ hewalɛ yɛ mɛɛ gbɛ nɔ? (b) Taakɛ Habakuk 2:2 tsɔɔ lɛ, mɛni hewɔ esa akɛ Kristofoi fɛɛ ashwe akɛ amɛaakane nii jogbaŋŋ lɛ?
4 Akaiɔ wɔ be kɛ beaŋ yɛ Yehowa Odasefoi akpeei ashishi ní wɔkane Nyɔŋmɔ Wiemɔ lɛ daa gbi. Nakai feemɔ haa mɔ náa miishɛɛ. Eyeɔ kɛbuaa wɔ hu ni wɔfeɔ yiŋkpɛi ni nilee yɔɔ mli, wɔjajeɔ sui ni ehiii, wɔdamɔɔ kaai anaa, ni kɛ́ wɔkɔ gbɛ ko ni ejaaa lɛ, ehaa wɔsaa wɔŋmɛɔ pɛpɛɛpɛ yɛ mumɔŋ ekoŋŋ. (Lala 19:8, 9) Eyɛ faŋŋ akɛ wɔmumɔŋ dalɛ lɛ damɔ nii ni wɔɔnyɛ wɔkane lɛ nɔ titri. Enɛ hewɔ lɛ, esa akɛ bɔ ni akaneɔ nii kɛ naatselɛ, shi jeee ekanemɔ kɛkɛ lɛ hu afee nɔ ni Kristofoi fɛɛ ni sumɔɔ akɛ amɛye anɔkwale ni amɛná naanɔ wala lɛ asumɔ.—Hab. 2:2; Yoh. 17:3.
5. (a) Mɛɛ hegbɛi yɔɔ kɛha mɛi ni kaseɔ nikanemɔ lɛ? (b) Taakɛ Romabii 12:2 tsɔɔ lɛ, mɛni hewɔ ehi akɛ wɔ diɛŋtsɛ wɔnyɛ wɔkane Biblia lɛ?
5 Nikanemɔ ni akaseɔ lɛ haa anáa hegbɛi kɛ nitsumɔi babaoo yɛ Kristofoi asafo lɛ mli. Kɛji akɛ mɔ ko kase nikanemɔ lɛ, enáa he sɛɛ waa akɛ ekɛ ehe aaawo Teokrase Sɔɔmɔ Skul lɛ mli. Hegbɛ kpele kroko ni mɛi ni kɛ mɔdɛŋbɔɔ kaseɔ nikanemɔ kɛ niŋmaa lɛ náa ji ni amɛaasɔmɔ akɛ gbɛgbalɔi. Nɔ ni fe fɛɛ lɛ, kɛ́ wɔ diɛŋtsɛ wɔbaanyɛ wɔkane Biblia lɛ wɔha wɔhe lɛ, wɔbaanyɛ ‘wɔyoo nii ni ji Nyɔŋmɔ suɔmɔnaa nii kpakpai ní sa ehiɛ jogbaŋŋ ní hi kɛwula shi lɛ.’ (Rom. 12:2) Enɛ baawaje wɔhemɔkɛyeli lɛ ni ebaatsi wɔ kɛbɛŋkɛ Nyɔŋmɔ.—Yak. 4:8.
6. Mɛni hewɔ ewa kɛha mɛi ni edara lɛ akɛ amɛaakase nikanemɔ lɛ?
6 Mɔdɛŋ ní Aaabɔ Koni Akase: Ní mɔ aaakase nikanemɔ kɛ niŋmaa be ni eji onukpa lɛ baanyɛ afee nɔ ni wa. Bei babaoo lɛ kɛ́ mɔ ko da yɛ afii amli lɛ, esubaŋ, esui, enifeemɔi, kɛ nibii ni enáa he miishɛɛ lɛ atsakemɔ wa, ni nibii heei akasemɔ baanyɛ afee nɔ ni wa waa kɛha lɛ. Kɛfata he lɛ, akɛni mɛi ni edara lɛ babaoo tsuɔ nii kɛha amɛshihilɛ mli nibii hewɔ lɛ, ekolɛ amɛbaanu he akɛ amɛbɛ dekã ni amɛkɛbaaya nikanemɔ kɛ niŋmaa skul. Ebiɔ ni mɔ ni lé woloŋ ni eda lɛ aná ekãa dani enyɛ eyɔse ehiamɔ nii, ni ebi ni aye abua lɛ. Enɛ hewɔ lɛ, mɛi ni edara lɛ ekomɛi kɛ gbeyeishemɔ kɛ hekɛnɔfɔɔ ni abɛ kaseɔ nikanemɔ kɛ niŋmaa. Ekolɛ mɛi krokomɛi baanu he akɛ amɛdara tsɔ fe bɔ ni amɛaakase nikanemɔ kɛ niŋmaa.
7. Mɛɛ nibii baanyɛ aye abua mɛi ni edara lɛ kɛ́ amɛmiikase nikanemɔ?
7 Yɛ gbɛ kroko nɔ lɛ, mɛi ni edara lɛ ateŋ mɛi pii ená niiashikpamɔi babaoo yɛ shihilɛ mli, ni amɛnyɛɔ amɛnuɔ saji kɛ susumɔi ashishi. Eyɛ mli akɛ amɛkaseko nikanemɔ kɛ niŋmaa moŋ, shi amɛyɛ nyɛmɔi kɛ hesaai ni yɔɔ srɔto, ni enɛ eye ebua amɛ ni amɛye omanye yɛ shihilɛ mli nifeemɔi krokomɛi amli. He ní anyɛɔ atsakeɔ awoɔ shihilɛ fɛɛ shihilɛ mli, ŋaalee, kɛ tsuishiŋmɛɛ ni amɛná yɛ afii ni eho lɛ amli lɛ yeɔ kɛbua amɛ yɛ mɔdɛŋ ni amɛbɔɔ koni amɛkase nikanemɔ kɛ niŋmaa lɛ mli.
8. (a) Mɛɛ niiashikpamɔ tsɔɔ akɛ mɔ ko baanyɛ akase nikanemɔ kɛ́ egbɔ po? (b) Mɛɛ su kpakpa ye ebua Effor ni ekase nikanemɔ jogbaŋŋ?
8 Enɛ hewɔ lɛ mɛi ni edara lɛ pii ekase nikanemɔ kɛ niŋmaa momo. Nyɛminuu ko ni atsɛɔ lɛ Effor fata mɛi nɛɛ ahe. Ewie akɛ: “Minu he akɛ nikanemɔ kɛ niŋmaa ni mileee lɛ tamɔ hela ko. Miisumɔ akɛ matsɔɔ Biblia lɛ mli maha minyɛmimɛi kɛ minanemɛi lɛ, shi akɛni mileee nikanemɔ kɛ niŋmaa hewɔ lɛ, minyɛɛɛ mafee no ojogbaŋŋ. Suɔmɔ ni miná akɛ mashiɛ ni matsɔɔ mɛi krokomɛi anii koni amɛbatsɔmɔ Kristo kaselɔi lɛ ji nɔ ni kanya mi ni mikase nikanemɔ kɛ niŋmaa. Miŋmaa nii yɛ nɔ fɛɛ nɔ ni maná nɔ, yɛ amadãa baa po nɔ. Shwelɛ ni miyɔɔ akɛ makase nikanemɔ kɛ niŋmaa lɛ mli wa aahu akɛ, kɛ́ mikã shi lɛ milaa ní miikase nikanemɔ kɛ niŋmaa. Mibiɔ mɛi krokomɛi ni amɛye amɛbua mi; mihiɛ gbooo yɛ no he. . . . Mikɛ afi kase nikanemɔ kɛ niŋmaa yɛ asafo lɛ nikanemɔ kɛ niŋmaa skul lɛ mli. . . . Bei komɛi kɛ́ mikã shi gbɛkɛ lɛ, midaa Yehowa shi lolo akɛ mijeee mɔ ni lé woloŋ yɛ ŋmɛnɛŋmɛnɛ jeŋ nɛɛ mli dɔŋŋ.” Yɛ anɔkwale mli lɛ, su ni tamɔ nɛkɛ baanyɛ aye abua mɔ fɛɛ mɔ ni ekase nikanemɔ kɛ niŋmaa.
9. (a) Mɛni esa akɛ etsirɛ wɔ koni wɔbɔ mɔdɛŋ wɔkase nikanemɔ? (b) Mɛni hewɔ heshibaa kɛ tsuishiŋmɛɛ ji sui ni esa akɛ mɔ ko aná kɛ eesumɔ ni ekase nikanemɔ?
9 Mɛi babaoo hu kɛ mɔdɛŋbɔɔ nɛɛ nɔŋŋ ekase nikanemɔ kɛ niŋmaa. Suɔmɔ ni mli wa ni amɛyɔɔ akɛ amɛtsɔɔ mɛi ni yɔɔ mumɔŋ duŋ mli lɛ Biblia mli anɔkwalei lɛ ji nɔ ni kanya amɛ. Amɛmiisumɔ akɛ amɛkɛ heshibaa kɛ anɔkwayeli aya nikanemɔ kɛ niŋmaa skul lɛ ni atsɔɔ amɛ nii. Kɛ́ amɛnijiaŋ je wui po lɛ, amɛŋmɛɔ amɛtsui shi, ni amɛkpaaa. Mɔ fɛɛ mɔ baanyɛ ekase nikanemɔ kɛ niŋmaa kɛ́ ená faishitswaa ni mli wa tamɔ nɛkɛ, jwɛŋmɔ ni ja, kɛ Yehowa sɛɛfimɔ!—Mat. 17:20.
10. Mɛɛ dɛŋdade hee yɔɔ amrɔ nɛɛ kɛha nikanemɔ kɛ niŋmaa skul lɛ, ni mɛni ji nitsɔɔmɔ wolo nɛɛ mli nibii komɛi?
10 Dɛŋdade Hee Kɛha Nikanemɔ kɛ Niŋmaa: Nikanemɔ kɛ niŋmaa skul ni Yehowa Odasefoi feɔ lɛ eye ebua mɛi akpei nyɔŋmai abɔ ni amɛkase nikanemɔ kɛ niŋmaa. Yɛ bei ni eho lɛ amli lɛ, wɔkɛ wolo ni akɛkaseɔ nikanemɔ kɛ niŋmaa ní Bureau of Ghana Languages lɛ ji mɛi klɛŋklɛŋ ni fee lɛ tsuɔ nii. Shi kɛlɛ, eji miishɛɛ akɛ ooole akɛ amrɔ nɛɛ Yehowa Odasefoi efee wolo ni ji “Kasemɔ Nikanemɔ kɛ Niŋmaa” yɛ Blɔfo, Ewe, Ga, kɛ Twi wiemɔi amli. Aŋma wolo bibioo lɛ yɛ gbɛ ni yɔɔ mlɛo nɔ, ni ato he gbɛjianɔ koni akɛtsɔɔ shishijee nikanemɔ kɛ niŋmaa mli hesaai. Nibii ni hi jogbaŋŋ yɛ wolo nɛɛ he lɛ ateŋ ekomɛi ji: nifeemɔ ni akɛkaseɔ niŋmaa ni nikaselɔi lɛ baafee yɛ shĩa, Maŋtsɛyeli lalai akasemɔ, Biblia woji lɛ agbɛi akasemɔ, kɛ bɔ ni aŋmaa shiɛmɔyaa he akɔntaabuu wolo lɛ nɔ nii ahaa kasemɔ.
11. (a) Mɛɛ gbɛjianɔ kpakpa esa akɛ onukpai lɛ ato aha mɛi ni lé woloŋ yɛ asafo lɛ mli lɛ? (b) Taakɛ Galatabii 6:7 lɛ tsɔɔ lɛ, mɛni esa akɛ mɛi ni lé nikanemɔ lɛ ayɔse? (d) Kɛ́ nikaselɔi lɛ bɔ mɔdɛŋ koni amɛkase nikanemɔ kɛ niŋmaa lɛ, mɛni gbɛ amɛbaanyɛ amɛkpa?
11 Kɛ́ onukpai akuu lɛ na akɛ wiemɔ ni akɛtsuɔ nii yɛ asafo lɛ mli lɛ kanemɔ he tsɔsemɔ he miihia aŋkroaŋkroi komɛi ni yɔɔ asafo lɛ mli lɛ, amɛbaanyɛ amɛto he gbɛjianɔ koni tsɔɔlɔ ko ní he esa afee skul lɛ shii abɔ ni abaanyɛ yɛ otsi lɛ mli. (Sɔɔmɔ Skul, bf. 285) Tsɔɔlɔi ni he esa waa lɛ baanyɛ akanya nikaselɔi lɛ kɛtsɔ hewalɛwoo kɛ yijiemɔ ni amɛkɛaaha amɛ, kɛ ye ni amɛaaye amɛbua amɛ koni amɛshɛ otii ni anyɛɔ atsuɔ he nii lɛ ahe kɛ́ amɛmiikase nikanemɔ lɛ nɔ. Shi kɛlɛ, esa akɛ nikaselɔi lɛ hu aná he miishɛɛ akɛ amɛaatsu amɛ diɛŋtsɛ amɛtsɔsemɔ lɛ he gbɛnaa nii lɛ ahe nii ní amɛbɔ mɔdɛŋ waa amɛkase nii. (Gal. 6:7) Kɛ́ nikaselɔ lɛ bɔ nakai feemɔ he mɔdɛŋ lɛ, ebaanyɛ ekpa gbɛ akɛ Yehowa baajɔɔ emɔdɛŋbɔɔi anɔ ni ekɛ emumɔ lɛ aye abua lɛ.—2 Kor. 4:7.
12. (a) Te afeɔ asafoŋ nikanemɔ kɛ niŋmaa skul lɛ ahaa tɛŋŋ? (b) Mɛni hewɔ esaaa akɛ mɔ ko sheɔ gbeyei akɛ eeeya skul lɛ?
12 Mɛi ni kɛ amɛhe éwo asafo lɛ nikanemɔ kɛ niŋmaa skul lɛ mli lɛ baana akɛ afeɔ skul lɛ yɛ suɔmɔ kɛ tsuishitoo mli. Ajieɔ bulɛ kpo atsɔɔ nikaselɔi lɛ, ni awooo amɛ hiɛgbele ni asaŋ abaaa amɛshi hu kɔkɔɔkɔ. Awoɔ nikaselɔi lɛ hewalɛ ní amɛkase nii yɛ amɛnyɛmɔ naa, ni ajieɔ amɛyi yɛ amɛmɔdɛŋbɔɔi lɛ ahewɔ be fɛɛ be. No hewɔ lɛ kɛji akɛ okɛ ohe woko asafo lɛ nikanemɔ kɛ niŋmaa skul lɛ mli lɛ, mɛni hewɔ ofee nakai bianɛ? Enɛ baaye kɛbua bo ni oha omumɔŋ hiɛyaa lɛ aya hiɛ oyayaayai, ni ebaaha ‘oyi obɔ kɛ esuɔmɔnaa nii alee yɛ mumɔŋ nilee kɛ shishinamɔ fɛɛ mli.’—Kol. 1:9.
13. Mɛɛ jɔɔmɔ yɔɔ kɛha mɛi ni bɔɔ mɔdɛŋ koni amɛkase nikanemɔ kɛ niŋmaa lɛ?
13 Yehowa Nyɔŋmɔ, ni ji wɔ-Bɔlɔ lɛ, kɛ nyɛmɔ ni akɛkaneɔ nii ni akɛŋmaa lɛ eduro adesai. Shi mɔdɛŋbɔɔ akɛnáa hesaai nɛɛ. Sɛɛnamɔi ni jɛɔ nikanemɔ kɛ niŋmaa kasemɔ mli kɛbaa lɛ fa babaoo. Shi kɛlɛ, sɛɛnamɔ ni fe fɛɛ ni jɛɔ mɔdɛŋbɔɔ nɛɛ mli kɛbaa lɛ ji nyɛ ni anyɛɔ akɔɔ Nyɔŋmɔ Wiemɔ lɛ ní ‘akaneɔ lɛ blɛoo nyɔɔŋ kɛ shwane’ lɛ. Enɛ feemɔ baaha ‘wɔfee nɔbatsɛ kɛ hiɛshikalɔ’ yɛ nɔ fɛɛ nɔ ni wɔfeɔ lɛ mli. Ani yiŋtoo ko yɛ ni wɔɔdamɔ nɔ wɔkase nikanemɔ kɛ niŋmaa ni fe enɛ?—Yosh. 1: 8.