¹ Nɔ ko ni ehe gbɛi waa ni atsɔɔ nɔ akɛ mɛi yeɔ sharamɔ ji saji ni aŋmalaa kɛtsɔ kɔmpiuta nɔ lɛ. Eyɛ mli akɛ shihilɛ mli niiashikpamɔi kɛ susumɔi ni agbaa wekumɛi kɛ nanemɛi kɛtsɔɔ enɛ nɔ lɛ baanyɛ afee nɔ ni sa moŋ, shi mɛɛ “yaka nii” baanyɛ akɔ saji ni aŋmalaa kɛtsɔɔ kɔmpiuta nɔ lɛ ni akɛtsuɔ nii yɛ gbɛ ni husu bɛ he nɔ lɛ he?—Abɛi 12:11.

² Kɔkɔbɔi ni Kɔɔ Saji Aŋmalamɔ Kɛtsɔ Kɔmpiuta Nɔ lɛ He: Mɛi komɛi kɛɔ akɛ amɛnuɔ Yehowa gbɛjianɔtoo lɛ he babaoo kɛji akɛ amɛnine shɛ nɔ ni amɛsusuɔ akɛ eji sane hee nɔ kɛtsɔ saji ni akɛha kɛtsɔ kɔmpiuta lɛ nɔ lɛ. Nɔ ni baanyɛ afata enɛɛmɛi ahe ji niiashikpamɔi, saji ni eba Betel, amaniɛbɔi ni kɔɔ osharai loo yiwaa ni eba he, kɛ teemɔŋ saji ni atswaa he adafi yɛ Maŋtsɛyeli Sɔɔmɔ Skul srɔtoi lɛ amli po. Mɛi krokomɛi ahe tswaa shi babaoo akɛ amɛkɛ nɛkɛ saji nɛɛ aaamaje, kɛ hiɛnɔkamɔ akɛ amɛbaafee klɛŋklɛŋ mɛi ni jie saji nɛɛ akpo amɛha amɛnanemɛi.

³ Yɛ bei komɛi amli lɛ atsakeɔ saji kɛ niiashikpamɔi ahiɛ loo awoɔ he fe nine. Aloo ekolɛ yɛ mɔdɛŋ ni abɔɔ koni átee mɛi amiishɛɛ shi yɛ saji ahe hewɔ lɛ, mɛi komɛi hãa anáa jwɛŋmɔ ni ejaaa. Bei pii lɛ, mɛi ni yeɔ oyai akɛ amɛaajie saji nɛɛ akpo lɛ bɛ anɔkwalei ni kɔɔ he lɛ fɛɛ. (Abɛi 29:20) Yɛ shihilɛi komɛi amli lɛ, kɛji akɛ anyɛŋ ahe sane lɛ aye po lɛ, akɛhaa akɛ nɔ ko ni yɔɔ miishɛɛ. Nɔ ni amaniɛbɔi ni ejaaa ni lakaa mɔ nɛɛ kɛbaa ji “yakayaka adesãi,” ni haaa Nyɔŋmɔ jamɔ hetuu-kɛhamɔ aya hiɛ.—1 Tim. 4:6, 7.

⁴ Kɛji akɛ okɛ sane ko ni jeee anɔkwale maje lɛ, gbɛnaa nii ko bakãa onɔ yɛ awerɛho loo yiŋfutumɔ ni enɛ kɛbaaba lɛ hewɔ. Beni David nine shɛ shɛɛ sane ko ni awo he tsɔ ni tsɔɔ akɛ agbe ebihii lɛ fɛɛ nɔ lɛ, ekɛ piŋmɔ ‘gbala etadei amli.’ Shi yɛ anɔkwale mli lɛ, ebihii lɛ ateŋ mɔ kome pɛ gbo. Eji haomɔ sane babaoo, shi sane ni awo he fe nine nɛɛ kɛ haomɔ kroko bafata David naagbai lɛ ahe. (2 Sam. 13:30-33) Yɛ anɔkwale mli lɛ, wɔsumɔŋ ni wɔfee nɔ ko ni baalaka loo eje wɔnyɛmimɛi lɛ anijiaŋ wui.

⁵ Gbɛ ni Nyɔŋmɔ Ehala: Ha ehi ojwɛŋmɔ mli akɛ, wɔŋwɛi Tsɛ lɛ yɛ adafitswaa gbɛ ni ehala, ni ji, “tsulɔ anɔkwafo kɛ nilelɔ” lɛ. Gbɛnaa nii kã nakai “tsulɔ” lɛ nɔ akɛ etsɔɔ nɔ̃ sane ni esa akɛ ekɛha hemɔkɛyeli we lɛ, kɛ agbɛnɛ “be ni sa” mli ni ekɛbaaha yɛ. Akɛ mumɔŋ niyenii nɛɛ haa kɛtsɔɔ teokrase gbɛjianɔtoo lɛ pɛ nɔ. Esa akɛ wɔkwɛ adafitswaa gbɛ ni Nyɔŋmɔ ehala kɛha saji ni anyɛɔ akɛ he fɔ̃ɔ nɔ lɛ pɛ gbɛ, shi jeee kɛmiijɛ mɛi ni kɛ Internet lɛ tsuɔ nii lɛ aŋɔɔ.—Mat. 24:45.

⁶ Internet Web Sites: Asafo lɛ yɛ Internet Web site, ni no ji: www.watchtower.org. Nɛkɛ hé nɛɛ fa bɔ ni sa ni abaanyɛ atsɔ nɔ aha maŋ bii anu saji ni yaa nɔ. Ehe ehiaaa ni mɔ aŋkro ko, ajinafoi akuu ko, loo asafo ko aná Web baafa ko ni kɔɔ Yehowa Odasefoi ahe. Mɛi komɛi kɛ woji amli saji kɛ emli ŋmalɛi kɛ ehe saji krokomɛi fɛɛ ewo mli, ni amɛkɛ kpeei wuji ashishi wiemɔi ewo mli kɛha tooyeli. Kɛji akɛ shika mli sɛɛnamɔ ko fata he loo jeee nakai hu lɛ, Yehowa Odasefoi awoji amli saji ni aŋmalaa akɛjaa yɛ ilɛtrɔnik woji amli nɛkɛ lɛ kuɔ copyright loo niŋmaa hegbɛ mlai amli. Yɛ be mli ni mɛi komɛi baasusu enɛ he akɛ sɔɔmɔ ko ni amɛkɛhaa nyɛmimɛi lɛ, kɛlɛ, akpɛlɛɛɛ nɔ, ni esa akɛ akpa nakai feemɔ.

⁷ Sane he susumɔ yɛ gbɛ kpakpa nɔ kɛ jwɛŋmɔŋ hiɛshikamɔ yɛ be mli ni akɛ ilɛtrɔnik nibii ni akɛyeɔ sharamɔ nɛɛ tsuɔ nii lɛ baakwɛ koni wɔjwɛŋmɔi ayimɔ obɔbɔ kɛ “nii ni jara wa ni yɔɔ fɛo fɛɛ.”—Abɛi 24:4.

Nɔ ni Esa akɛ Owie yɛ Woji Tɛtrɛbii lɛ Ahe

The Watchtower Sept. 15

“Gbɔmɛi akpekpei abɔ heɔ yeɔ akɛ ‘hetselɔi’ yɛ hewalɛ krɛdɛɛ ko, ni ákɛ ehi akɛ aaasɔle kɛtsɔ amɛnɔ. Te osusuɔ tɛŋŋ? [Ŋmɛɛ gbɛ ni eha hetoo.] Kadimɔ nɔ ni Yesu Kristo wie nɛɛ. [Kanemɔ Yohane 14:6.] Enɛ haa mɛi komɛi susuɔ sɔlemɔ ni afeɔ kɛtsɔɔ ‘hetselɔi’ anɔ lɛ he. Nɛkɛ Buu-Mɔɔ nɛɛ wieɔ nakai sane ni he hiaa lɛ he.”

Awake! Sept. 22

“Mɛi pii susuɔ niseniianii ni afeɔ mɛi ŋmɛnɛ, ni muawai kɛ ebɔɔ ni akɛfee tawuu nii fata he lɛ ahe waa. Ani osusuɔ akɛ adesai anɔyelii baanyɛ ajie niseniianii nɛɛ kɛya? [Ŋmɛɛ gbɛ ni eha hetoo.] Biblia lɛ tsɔɔ nɔ ni yɔɔ Nyɔŋmɔ jwɛŋmɔ mli. [Kanemɔ Ezekiel 34:28.] Awake! wolo tɛtrɛɛ nɛɛ pɛiɔ saji ni kɔɔ he lɛ ekomɛi amli.”

The Watchtower Oct. 1

“Mɛi pii esusu kɛji haomɔi babaoo ni ebɔle wɔhe nɛɛ—ni ji, tawuu, awuiyeli, kɛ niseniianiifeemɔi nɛɛ baaba naagbee gbi ko lɛ he. Te osusuɔ tɛŋŋ? [Ŋmɛɛ gbɛ ni eha hetoo.] Biblia lɛ kɛ nɔmimaa ni shɛjeɔ mɔ mii nɛɛ haa. [Kanemɔ Lala 37:10, 11.] Wolo tɛtrɛɛ nɛɛ tsɔɔ nɔ hewɔ ni Nyɔŋmɔ kɛ efɔŋfeemɔ kɛ piŋmɔ ni jɛɔ mli baa lɛ bako naagbee lolo lɛ mli.”

Awake! Oct. 8

“Etamɔ nɔ ni fɔlɔ kome mɔ wekui lɛ ayi efa babaoo ŋmɛnɛ yɛ naakpɛɛ gbɛ nɔ. Biblia lɛ tsɔɔ akɛ wɔ-Bɔlɔ lɛ musuŋ tsɔɔ lɛ kɛhaa amɛ. [Kanemɔ Lala 146:9.] Awake! nɛɛ tsɔɔ bɔ ni Biblia shishitoo mlai baanyɛ aye abua fɔlɔi ni amɛ kome pɛ amɛkwɛɔ amɛbii lɛ koni amɛlɛ amɛbii lɛ yɛ omanyeyeli mli.”