Nyɛyaa nɔ Nyɛshia Kpe! Wolo Bibioo lɛ Kasemɔ
Asafoi ni yɔɔ je lɛŋ fɛɛ lɛ baakase Nyɛyaa nɔ Nyɛshia Kpe! wolo bibioo lɛ yɛ May 23, 2005 otsi lɛ mli kɛyashi June 20, 2005 otsi lɛ yɛ Asafo Woloŋ Nikasemɔ lɛ shishi. Nyɛfainɛ nyɛkɛ sanebimɔi ni nyiɛ sɛɛ nɛɛ atsua nii beni nyɛsaa nyɛhe kɛhaa nikasemɔ lɛ kɛ beni nyɛfeɔ nikasemɔ lɛ. Kɛ́ nyɛmiifee nikasemɔ lɛ, nyɛkanea wolo lɛ mli saji, koni nyɛkane ŋmalɛi ni aŋmalako amɛmli wiemɔi lɛ bɔ ni be baaŋmɛ gbɛ.
May 23 Otsi Lɛ
◼ Baafa 3-4: Te shihilɛi ni ato naa yɛ biɛ lɛ ateŋ nɔ ni esa oshihilɛ he lɛ? Mɛni haa oleɔ akɛ enɛɛmɛi jeee shihilɛi ni efɔɔɔ kaa ni yaa nɔ yɛ he ko kɔkrɔɔ pɛ lɛ?
◼ Baafa 5: Mɛni haa oheɔ oyeɔ akɛ Nyɔŋmɔ susuɔ mɔ he lɛɛlɛŋ? Mɛni baanyɛ atsɔɔ akɛ wɔsusuɔ Nyɔŋmɔ kɛ nɔ ni efeɔ lɛ he?
◼ Baafa 6-8: Mɛni Mateo 24:1-8, 14 lɛ kɛɔ yɛ nɔ ni shihilɛi ni yaa nɔ yɛ je lɛŋ amrɔ nɛɛ lɛ tsɔɔ lɛ he? Taakɛ atsɔɔ yɛ 2 Timoteo 3:1-5 lɛ, mɛɛ be mli wɔyɔɔ amrɔ nɛɛ? Mɛni he naagbee gbii? Mɛni haa oheɔ oyeɔ akɛ Biblia lɛ ji Nyɔŋmɔ Wiemɔ lɛɛlɛŋ? Mɛni ji Maŋtsɛyeli ni wɔshiɛɔ yɛ he lɛ?
◼ Baafa 9-10: Mɛni hewɔ esa akɛ wɔsusu yiŋ ni wɔkpɛɔ daa gbi kɛ nibii ni wɔkɛyeɔ klɛŋklɛŋ gbɛhe yɛ wɔshihilɛ mli lɛ ahe jogbaŋŋ lɛ? (Rom. 2:6; Gal. 6:7) Beni otĩɔ sanebimɔi ni yɔɔ baafa 10 lɛ amli lɛ, mɛɛ ŋmalɛi ní esa akɛ amɛná onifeemɔ nɔ hewalɛ okaiɔ?
May 30 Otsi Lɛ
◼ Baafa 11: Ákɛ aŋkroaŋkroi lɛ, mɛni hewɔ esa akɛ wɔsusu sanebimɔi ni abi yɛ baafa nɛɛ mli lɛ ahe lɛ? (1 Kor. 10:12; Efe. 6:10-18) Bɔ ni wɔhaa sanebimɔi nɛɛ ahetoo wɔhaa lɛ haa anaa bɔ ni wɔkɛ hiɛdɔɔ tsuɔ Yesu ŋaawoo ni yɔɔ Mateo 24:44 lɛ he nii yɛ mɛɛ gbɛ nɔ?
◼ Baafa 12-14: Mɛni ji ‘kojomɔ ŋmɛlɛtswaa lɛ’ ni atsĩ tã yɛ Kpojiemɔ 14:6, 7 lɛ? Ákɛ ‘ashe Nyɔŋmɔ gbeyei ni akɛ anunyam aha lɛ’ lɛ tsɔɔ mɛni? Mɛni ji Babilon Kpeteŋkpele lɛ, ni mɛni baaba enɔ? Mɛni esa akɛ wɔfee yɛ Babilon Kpeteŋkpele lɛ he amrɔ nɛɛ nɔŋŋ? Mɛɛ nɔ̃ kroko hu fata kojomɔ ŋmɛlɛtswaa ni agba he sane afɔ shi lɛ he? “Nɔ̃ gbi loo nɔ̃ ŋmɛlɛtswaa” ni Nyɔŋmɔ kɛbaatsu kojomɔ he nii ni wɔleee lɛ náa mɛɛ hewalɛ yɛ wɔnɔ? (Mat. 25:13)
◼ Baafa 15: Mɛni ji jeŋ muu fɛɛ maŋtsɛyeli he sane lɛ, ni sane nɛɛ saa wɔhe akɛ aŋkroaŋkroi yɛ mɛɛ gbɛ nɔ?
◼ Baafa 16-19: Mɛni ji “ŋwɛi hee” kɛ “shikpɔŋ hee” lɛ? (2 Pet. 3:13) Namɔ ji mɔ ni kɛ nibii nɛɛ ahe shiwoo lɛ ha? Mɛɛ tsakemɔi ŋwɛi hee lɛ kɛ shikpɔŋ hee lɛ baaha eba? Ákɛ aŋkroaŋkroi lɛ, ani wɔbaaná tsakemɔi nɛɛ ahe sɛɛ?
June 6 Otsi Lɛ
◼ Baafa 20-21: Mɛɛ foijee he famɔ ko Yesu kɛha esɛɛnyiɛlɔi ni hi shi yɛ klɛŋklɛŋ afii 100 lɛ mli lɛ? (Luka 21:20, 21) Mɛɛ be aná hegbɛ kɛha foijee nɛɛ? Mɛni hewɔ ehe bahia ni amɛjo foi oyá lɛ? (Mat. 24:16-18, 21) Mɛni hewɔ mɛi babaoo kuɔ amɛhiɛ amɛshwieɔ kɔkɔbɔi anɔ lɛ? Mɛi akpekpei abɔ ni yɔɔ China kɛ Philippines lɛ ná kɔkɔbɔi ni anyɛɔ akɛ he fɔ̃ɔ nɔ lɛ ahe sɛɛ yɛ mɛɛ gbɛ nɔ? Mɛni hewɔ ehe hiaa waa diɛŋtsɛ akɛ abo Biblia mli kɔkɔbɔi ni kɔɔ nibii agbɛjianɔtoo nɛɛ naagbee he lɛ atoi lɛ? Akɛni enɛ he miihia waa hewɔ lɛ, mɛɛ sɔ̃ kã wɔnɔ? (Abɛi 24:11, 12)
◼ Baafa 22-23: Mɛni hewɔ mɛi babaoo ku amɛhiɛ amɛfɔ̃ oshara he kɔkɔbɔɔ nɔ yɛ Australia, yɛ afi 1974 kɛ yɛ Colombia, afi 1985 lɛ, ni mɛni jɛ mli kɛba? Eji oyɛ jɛmɛ kulɛ, te obaafee onii yɛ kɔkɔbɔi nɛɛ ahe oha tɛŋŋ, ni mɛni hewɔ? Mɛni baanyɛ atsɔɔ kɛji akɛ kulɛ wɔbaabo kɔkɔbɔɔ ni akɛha yɛ Noa gbii lɛ amli lɛ toi loo wɔboŋ toi? Mɛni hewɔ mɛi sumɔɔ ni amɛhi blema Sodom kɛ maji ni bɛŋkɛ lɛ lɛ amli lɛ? Nɔ ni ba yɛ Sodom lɛ ni wɔkɛ hiɛdɔɔ aaasusu he lɛ he baanyɛ aba sɛɛnamɔ aha wɔ yɛ mɛɛ gbɛ nɔ?
June 13 Otsi Lɛ
◼ Baafa 24-27: Nyɛkɛ “Nikasemɔ lɛ He Sanebimɔi” ni yɔɔ baafa 27 lɛ atsua nii.
June 20 Otsi Lɛ
◼ Baafa 28-31: Nyɛkɛ “Nikasemɔ lɛ He Sanebimɔi” ni yɔɔ baafa 31 lɛ atsua nii.
Wolo bibioo lɛ ni wɔbaakase lɛ baaye abua wɔ koni ‘wɔya nɔ wɔshi kpe,’ ní wɔsaa wɔhe wɔto. Eba akɛ wɔbaajie hehiamɔ henumɔ ni ŋwɛibɔfo lɛ kɛjaje akɛ: “Nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmɛlɛtswaa lɛ eshɛ” lɛ kpo yɛ wɔshiɛmɔ nitsumɔ lɛ mli be fɛɛ be.—Mat. 24:42, 44; Kpoj. 14:7.