Woji ni Wɔkɛaaha yɛ Shikpɔŋkuku ni Awieɔ Wiemɔi Srɔtoisrɔtoi yɛ Mli lɛ Mli

1. Mɛni hewɔ woji ni yɔɔ maŋsɛɛ wiemɔ mli lɛ he hiaa asafoi babaoo lɛ?

¹ Yɛ hei babaoo lɛ, gbɔmɛi ni jɛ maji krokomɛi anɔ ebahi shikpɔŋkuku lɛ mli. Mɛnɛɛmɛi ateŋ mɛi babaoo kaseɔ anɔkwale lɛ oyayaayai ni amɛnuɔ nibii ashishi jogbaŋŋ hu kɛji akɛ atsɔɔ amɛ nii yɛ amɛ diɛŋtsɛ amɛmaŋ wiemɔ mli lɛ. Mɛɛ gbɛjianɔi ato ni baaha mɛi ni yɔɔ wiemɔ lɛ he miishɛɛ lɛ nine ashɛ Biblia kasemɔ woji ni yɔɔ wiemɔ ni amɛnuɔ shishi jogbaŋŋ lɛ mli lɛ nɔ?

2. Mɛɛ ekomefeemɔ nɛkɛ he hiaa kɛ́ asafoi enyɔ loo nɔ ni fa fe nakai ni wieɔ wiemɔi srɔtoi lɛ tsuɔ shikpɔŋkuku kome too lɛ nɔŋŋ mli nii lɛ?

² Be ni Esa akɛ Akɛ Woji Aha: Kɛ́ asafoi enyɔ loo nɔ ni fe nakai ni wieɔ wiemɔi srɔtoi tsuɔ shikpɔŋkuku kome too lɛ nɔŋŋ mli nii lɛ, onukpai akui ni enɛ kɔɔ amɛhe lɛ kɛ sɔɔmɔ nitsumɔ nɔkwɛlɔi lɛ baafee ekome ni amɛto gbɛjianɔ ni baahi eha asafo fɛɛ asafo bɔni afee ni anyɛ aye wiemɔ kuu fɛɛ wiemɔ kuu odase jogbaŋŋ kɛmɔ shi. Kɛ́ shiɛlɔi kɛ amɛhe miiwo shia kɛ shia sɔɔmɔ nitsumɔ lɛ mli lɛ, bei pii lɛ amɛkɛ woji ni yɔɔ wiemɔ ni asafo kroko loo asafoi krokomɛi wieɔ lɛ efɔɔɔ kɛhamɔ. Shi kɛlɛ, kɛ́ shiɛlɔi miiye odase trukaa loo amɛmiiye odase yɛ hei ni anaa maŋbii yɛ lɛ, ekolɛ amɛkɛ woji ni yɔɔ wiemɔi ni awieɔ yɛ jɛmɛ lɛ mli lɛ baaha.—Kwɛmɔ November 1990 [Vol. 33, No. 11] Wɔ Maŋtsɛyeli Sɔɔmɔ lɛ Sanebimɔ He lɛ mli.

3. Mɛɛ be esa akɛ asafo ko ashɛ woji ni yɔɔ maŋ kroko ko wiemɔ mli lɛ ashwie shi?

³ Be ni Esa akɛ Ashɛ Woji Ashwie Shi: Mɛni abaanyɛ afee kɛji akɛ ayɛ mɛi saŋŋ ni wieɔ maŋsɛɛ wiemɔ yɛ akutso ko mli shi abɛ asafo ko ni wieɔ nakai wiemɔ pɔtɛɛ lɛ? Yɛ shihilɛi ni tamɔ nakai mli lɛ, asafoi lɛ baanyɛ ashɛ woji fioo komɛi ni he hiaa ni yɔɔ nakai wiemɔ lɛ mli, tamɔ dɛhiɛmɔ woji, Taoɔ kɛ Nyɔŋmɔ Naanyo woji bibii lɛ, kɛ Nilee wolo lɛ nɛkɛ ashwie shi. Shiɛlɔi baanyɛ amɛkɛ woji nɛɛ aha be fɛɛ be ni amɛbaana mɔ ko ni baanyɛ akane nakai wiemɔ lɛ.

4. Mɛɛ gbɛ nɔ abaanyɛ atsɔ ni nine ashɛ woji ni yɔɔ wiemɔ kroko mli ni asafo lɛ eshɛɛɛ eko eshwieee shi lɛ nɔ?

⁴ Gbɛ Nɔ ni Atsɔɔ Ashɛɔ Woji: Kɛ́ asafo lɛ eshɛɛɛ woji yɛ wiemɔ ni mɔ ko ni yɔɔ wiemɔ lɛ he miishɛɛ baanyɛ akane lɛ mli lɛ, te abaafee tɛŋŋ ni nine ashɛ woji anɔ yɛ nakai wiemɔ lɛ mli lɛ? Esa akɛ shiɛlɔ lɛ ayana sɔɔlɔ ni kwɛɔ woji anɔ lɛ koni ená ele woji ni yɔɔ nakai wiemɔ lɛ mli, bɔni afee ni anyɛ ashɛ woji ni he hiaa lɛ afata asafo lɛ woji ni abaashɛ kɛnyiɛ sɛɛ lɛ he.

5. Mɛni abaanyɛ afee kɛji akɛ aatao wolo ko dani nine ashɛ woji ni ashɛ ni baaba lɛ anɔ lɛ?

⁵ Kɛ́ ehe miihia ni atsu he nii amrɔ nɔŋŋ lɛ, shiɛlɔ lɛ baanyɛ abi Sɔɔmɔ Ajinafoi Akuu lɛ ateŋ mɔ ko kɛji abaanyɛ akɛ woji ashɛɛ he wolo lɛ aha dani eshɛ be ni asafo lɛ kɛbaashɛ enɔ̃ lɛ. Kɛ́ akpɛlɛ nɔ lɛ, mɔ ni kwɛɔ woji ashɛɛ nɔ lɛ, loo mɔ kroko ni ehala lɛ lɛ baanyɛ ekɛ wolo ni akɛshɛɔ woji lɛ amaje amrɔ nɔŋŋ loo etswa tɛlifoŋ kɛya nitsumɔhe nine lɛ. Akɛ wolo lɛ baamaje kɛtsɔ asafo lɛ adrɛs ni akɛtsuɔ nii daa lɛ nɔ, loo kɛ́ nyɛbaasumɔ lɛ kɛtsɔ adrɛs kroko ni nyɛkɛaatsu nii be kukuoo lɛ nɔ. Kɛji akɛ nyɛbi koni nyɛnine ashɛ wolo lɛ nɔ yɛ gbi kome loo gbii enyɔ pɛ mli lɛ, no lɛ nyɛ asafo lɛ baawo emajemɔ lɛ he nyɔmɔ.

6. Mɛni ji oti hewɔ ni wɔkɛ Kristofoi awoji haa lɛ?

⁶ Eba akɛ wɔkɛ wɔ Kristofoi awoji lɛ baatsu nii jogbaŋŋ kɛmɔ shi koni wɔkɛye wɔbua “gbɔmɛi fɛɛ,” ekɔɔɔ he eko wiemɔ ni amɛwieɔ “koni amɛshɛ anɔkwale lɛ lee mli.”—1 Tim. 2:3, 4.

Nɔ ni Esa akɛ Owie yɛ Woji Tɛtrɛbii lɛ Ahe

Buu-Mɔɔ July 15

“Mɛi pii eyɔse shihilɛ ko ni miiya nɔ waa ni ji gbɔmɛi ni tseɔ amɛhe banee kɛjɛɔ mɛi krokomɛi ahe lɛ. Ani osusuɔ akɛ enɛ ji nilee gbɛ? [Ŋmɛɛ gbɛ ni eha hetoo.] Kadimɔ nɛkɛ wiemɔ ni nilee yɔɔ mli ni kɔɔ sɛɛnamɔ ni yɔɔ naanyobɔɔ mli lɛ he. [Kanemɔ Jajelɔ 4:9, 10.] Wolo tɛtrɛɛ nɛɛ wieɔ nɔ hewɔ ni mɛi krokomɛi ahe hiaa wɔ fɛɛ lɛ he kɛ bɔ ni abaanyɛ atsu naagba ni ji he ni atseɔ banee kɛjɛɔ mɛi krokomɛi ahe lɛ he nii.”

Awake! July 22

“Mɛi pii haoɔ yɛ bɔlɛnamɔ he mfonirii ni yɔɔ ni egbɛ eshwã lɛ hewɔ. Ani osusuɔ akɛ esa akɛ asusu enɛ he? [Ŋmɛɛ gbɛ ni eha hetoo.] Ŋaawoo ni anyɛɔ atsuɔ he nii ni anaa yɛ Biblia lɛ mli lɛ baanyɛ abu wɔhe. [Kanemɔ Efesobii 5:3, 4.] Wolo tɛtrɛɛ nɛɛ tsɔɔ bɔ ni wɔbaanyɛ wɔbu wɔhe kɛjɛ nɛkɛ oshara ni yɔɔ nigii nɛɛ he.”

Buu-Mɔɔ Aug. 1

“Taakɛ amaniɛbɔɔ ko tsɔɔ mli lɛ, ani ole akɛ mɛi ni fa fe gbɔmɛi ayifalɛ ni yɔɔ je lɛŋ lɛ mlijaa yeɔ nɔ ni shɛɛɛ dɔlai 2 daa gbi? Ani osusuɔ akɛ abaanyɛ afee nɔ ko kɛtsu enɛ he nii? [Ŋmɛɛ gbɛ ni eha hetoo.] Buu-Mɔɔ nɛɛ tsɔɔ tsabaa ni hiɔ shi daa kɛha ohia shihilɛ taakɛ aŋma yɛ Biblia lɛ mli lɛ.”—Kanemɔ Lala 72:12, 13, 16.

Awake! Aug. 8

“Yɛ nyɛsɛɛ afii nɛɛ amli lɛ, osharai ni kɔɔ kɔɔyɔŋ tsakemɔ he lɛ efite nii babaoo yɛ je lɛŋ fɛɛ. Mɛni ji nɔ ni osusuɔ akɛ abaanyɛ afee ni akɛjie piŋmɔ ni enɛ kɛbaa lɛ? [Ŋmɛɛ gbɛ ni eha hetoo.] Wolo tɛtrɛɛ nɛɛ pɛiɔ kɔɔyɔŋ tsakemɔ shikamɔ mli naagba lɛ kɛ ehe tsabaa ni aŋma yɛ Biblia lɛ mli lɛ mli.”—Kanemɔ Yesaia 35:1.