Weku Be He Gbɛjianɔtoo—Asafoŋ Kpeei
1 Kɛ́ fɔlɔ ni ji Kristofonyo ji bo lɛ, belɛ oosumɔ ni obii lɛ adara kɛbatsɔmɔ mɛi ni sumɔɔ Yehowa ni amɛsɔmɔɔ lɛ, koni yɛ naagbee mli lɛ amɛná naanɔ wala yɛ Nyɔŋmɔ jeŋ hee ni ewo he shi lɛ mli. Mɛɛ gbɛ nɔ oootsɔ oye obua amɛ koni amɛkɛ Yehowa jamɔ aye klɛŋklɛŋ gbɛhe yɛ amɛshihilɛ mli? Gbɛ titri ni oootsɔ nɔ ofee enɛ ji kɛtsɔ nɔkwɛmɔnɔ ni ooofee lɛ nɔ. (Abɛi 20:7) Nyɛmi yoo ko gba nɔkwɛmɔnɔ ni enyɛ ni ji heyelilɔ lɛ feɔ lɛ he sane akɛ: “Wɔyiŋ efeee wɔ enyɔnyɔɔnyɔ kɔkɔɔkɔ akɛ wɔbaaya asafoŋ kpeei loo wɔyaŋ.” Enɛ ná eshihilɛ nɔ hewalɛ be kpalaŋŋ.
2 Ani oweku lɛ nuɔ nɔ hewɔ ni ayaa asafoŋ kpeei lɛ shishi? Nitsɔɔmɔ ni wɔnine shɛɔ nɔ yɛ henaabuamɔi nɛɛ ashishi lɛ woɔ wɔ hewalɛ koni wɔya nɔ wɔfee Nyɔŋmɔ suɔmɔnaa nii, ni naanyobɔɔ ni bakãa wɔkɛ wɔnyɛmimɛi lɛ ateŋ lɛ ji hewalɛwoo jɛɛhe ko ni he yɔɔ sɛɛnamɔ. (Yes. 54:13; Rom. 1:11, 12) Shi kɛlɛ, yiŋtoo titri hewɔ ni afeɔ kpeei ni tamɔ nɛkɛ lɛ ji koni ajie Yehowa yi “yɛ gwabɔi amli!” (Lala 26:12) Kristofoi akpeei haa wɔnáa hegbɛi koni wɔjie suɔmɔ ni wɔyɔɔ kɛha Yehowa lɛ kpo ní wɔjá lɛ.
3 “Nyɛhiɛ Ahia Nyɛhe Nɔ Jogbaŋŋ”: Hiɛsɔɔ ni wɔɔná wɔha yiŋtoo ni yɔɔ krɔŋkrɔŋ hewɔ ni wɔyaa wɔkpeei lɛ baatsirɛ wɔ ni ‘wɔhiɛ ahi wɔhe nɔ jogbaŋŋ,’ koni ekabalɛ akɛ wɔɔfee mɛi ni eyaaa kpeei daa yɛ saji ni he ehiaaa tsɔ̃ lɛ ahewɔ. (Efe. 5:15, 16, NW; Heb. 10:24, 25) Kɛ nyɛmiifee nyɛweku be he gbɛjianɔtoo lɛ, nyɛbaanyɛ nyɛkɛ bei kɛha asafoŋ kpeei lɛ ni nyɛaakadi yɛ nɔ lɛ aje shishi. No sɛɛ lɛ, nyɛkwɛa jogbaŋŋ koni nyɛkaha nifeemɔi krokomɛi bafolɔ mli. Nyɛkwɛa koni kpeeiyaa afee nɔ ni nyɛkɛyeɔ klɛŋklɛŋ gbɛhe yɛ nyɛweku lɛ mli.
4 Kɛ́ wɔkane saji ni tsɔɔ bɔ ni wɔnyɛmimɛi lɛ ye gbɛtsĩi nibii anɔ koni amɛya asafoŋ kpeei kɛ kpeei wuji lɛ, ani ehaaa wɔmii ashɛ wɔhe? Eyɛ mli akɛ ekolɛ nyɛshihilɛ lɛ mli waaa tsɔ̃ tamɔ nakai moŋ, shi ekolɛ nyɛ hu nyɛkɛ naagbai kpeɔ. Satan miiya nɔ eeha eefee nɔ ni wa waa kɛha Nyɔŋmɔ webii akɛ amɛaajá Yehowa. Ni kɛlɛ, nyɛnáa nɔmimaa akɛ bɔ fɛɛ bɔ ni fee lɛ, nyɛbii lɛ baayɔse bɔ ni nyɛtswa nyɛfai shi akɛ nyɛbaaya asafoŋ kpeei akɛ weku lɛ. Eka shi faŋŋ akɛ, nyɛbaanyɛ nyɛtsɔ nakai feemɔ nɔ nyɛkɛ mumɔŋ nikeenii ko ní amɛhiɛ kpaŋ nɔ kɔkɔɔkɔ lɛ aha amɛ.