Te Esa akɛ Wɔye Wekumɛi Odase Wɔha Tɛŋŋ?

1. Mɛni hewɔ sɛɛyoomɔ he hiaa kɛ́ wɔmiiye wekumɛi odase lɛ?

¹ Kwɛ miishɛɛ ni wɔbaaná kɛji akɛ wɔkɛ wɔsuɔlɔi bote jeŋ hee lɛ mli, ni wɔkɛ amɛ fee ekome kɛja Yehowa! Kɛ́ wɔye wɔwekumɛi odase lɛ, ekolɛ gbɛkpamɔ ni yɔɔ miishɛɛ nɛɛ baaba mli. Shi kɛlɛ, ehe miihia ni wɔkɛ sɛɛyoomɔ atsu nii koni wɔnyɛ wɔye amɛ odase yɛ gbɛ ni yɔɔ miishɛɛ nɔ. Kpokpaa nɔkwɛlɔ ko wie akɛ: “Mɛi ni yeɔ amɛ wekumɛi odase yɛ be kɛ beaŋ, ni amɛkɛ no haa amɛ wekumɛi lɛ taoɔ babaoo ale lɛ yeɔ omanye fe fɛɛ.” Mɛɛ gbɛ nɔ wɔɔtsɔ wɔfee enɛ?

2. Wɔwekumɛi lɛ ahe miishɛɛ ni wɔɔná lɛ baanyɛ aye abua wɔ ni wɔtee amɛ miishɛɛ shi yɛ mɛɛ gbɛ nɔ?

² Teemɔ Amɛmiishɛɛ Shi: Tsɔ hiɛ osusu bɔ ni obaafee otee owekumɛi lɛ amiishɛɛ shi lɛ he jogbaŋŋ. (Abɛi 15:28) Mɛni ji nibii ni amɛsusuɔ he? Mɛɛ naagbai amɛkɛkpeɔ? Ekolɛ obaanyɛ okɛ amɛ asusu saneyitso ko he loo ni otsĩ ŋmalɛ ko ni kɔɔ sane ko ni amɛnyaa he waa lɛ he lɛ tã. Kɛji akɛ okɛ owekumɛi lɛ ateŋ jɛkɛ lɛ, ekolɛ obaanyɛ ofee enɛ kɛtsɔ woloŋmaa loo tɛlifoŋ tswaa nɔ. Kaanyɛ amɛnɔ, shi moŋ du anɔkwale wui lɛ, ni oshi oha Yehowa koni eha nakai wui lɛ akwɛ̃.—1 Kor. 3:6.

3. Wɔhe miishɛɛ ni wɔwekumɛi yɔɔ lɛ baanyɛ aha wɔná hegbɛ kɛye amɛ odase yɛ mɛɛ gbɛ nɔ?

³ Yesu fã nuu ko ni efamɔ daimonioi pii yɛ emli lɛ akɛ: “Yaa owe kɛ bo diɛŋtsɛ owekumɛi lɛ aŋɔɔ, ni oyagba amɛ niwuji ni Nuŋtsɔ [Yehowa] lɛ efee ehao kɛ mɔbɔ ni enao lɛ.” (Mar. 5:19) Susumɔ hewalɛ ni ekolɛ enɛ ná yɛ ewekumɛi lɛ anɔ lɛ he okwɛ! Eyɛ mli akɛ ekolɛ onaŋ niiashikpamɔ ko ni yɔɔ naakpɛɛ moŋ, shi ekolɛ owekumɛi lɛ yɛ nibii ni bo loo obii lɛ feɔ lɛ ahe miishɛɛ. Wiemɔ ko ni oha yɛ Teokrase Sɔɔmɔ Skul lɛ mli, kpee ko ni otee, Betel ni oyasara, loo bo diɛŋtsɛ oshihilɛ mli nifeemɔ ko ni sa kadimɔ ni ooowie he lɛ baanyɛ agbele gbɛ kɛha bo koni ogba amɛ Yehowa kɛ egbɛjianɔtoo lɛ he sane.

4. Mɛɛ nifeemɔi esa akɛ wɔkwa kɛ́ wɔmiiye wekumɛi odase?

⁴ Okɛ Sɛɛyoomɔ Atsu Nii: Kɛ́ ooye wekumɛi odase lɛ, kaakɛɛ amɛ nibii babaoo yɛ be kometoo lɛ nɔŋŋ mli. Be ni nyɛminuu ko wieɔ be ni eje Biblia lɛ kasemɔ shishi lɛ he lɛ, ekɛɛ akɛ: “No mli lɛ mikɛ ŋmɛlɛtswai babaoo tsuɔ nii kɛgbálaa nibii fɛɛ ni mikase kɛjɛ Biblia lɛ mli lɛ amli mitsɔɔ minyɛ awo, ni bei pii lɛ enɛ kɛ ŋwanejee baa, titri lɛ yɛ mitsɛ gbɛfaŋ.” Kɛ́ owekunyo ko jie miishɛɛ kpo yɛ Biblia mli shɛɛ sane lɛ he po lɛ, ha lɛ hetoo yɛ gbɛ ni baaha esumɔ akɛ ele babaoo yɛ be kroko mli lɛ nɔ. (Abɛi 25:7) Okɛ bulɛ, mlijɔlɛ, kɛ tsuishitoo atsu nii be fɛɛ be, tamɔ bɔ ni obaafee be ni okɛ gbɔi wieɔ yɛ sɔɔmɔ nitsumɔ lɛ mli lɛ.—Kol. 4:6.

5. Mɛni esa akɛ wɔfee kɛ́ wɔwekumɛi ekpɛlɛɛɛ odase ni wɔyeɔ amɛ lɛ nɔ jogbaŋŋ lɛ?

⁵ Yɛ be ko mli lɛ, Yesu wekumɛi lɛ susu akɛ eyiŋ kãaa lɛ. (Mar. 3:21) Shi kɛlɛ, amɛteŋ mɛikomɛi batsɔmɔ heyelilɔi yɛ sɛɛ mli. (Bɔf. 1:14) Kɛ́ oje shishi obɔ mɔdɛŋ akɛ okɛ owekumɛi agba anɔkwale lɛ he sane ni amɛkpɛlɛɛɛ nɔ jogbaŋŋ lɛ, onijiaŋ akɛje wui. Amɛshihilɛi kɛ amɛnifeemɔi baanyɛ atsake. Yaa nɔ otao hegbɛ kroko ni okɛ amɛ agba sane ko ni baanyɛ eha amɛsumɔ akɛ amɛaale babaoo. Ekolɛ okɛ no baaye abua amɛ koni amɛje shishi amɛnyiɛ naanɔ wala gbɛ lɛ nɔ, ni ebaaha oná miishɛɛ.—Mat. 7:13, 14.

Nɔ ni Esa akɛ Owie yɛ Woji Tɛtrɛbii lɛ Ahe

Buu-Mɔɔ Dec. 1

“Su ko ni haa esoroɔ adesai yɛ kooloi ahe ji nyɛmɔ ni amɛyɔɔ ni amɛkɛyɔseɔ ekpakpa kɛ efɔŋ. Shi mɔbɔ sane ji akɛ, mɛi babaoo feɔ nifɔjianii. Mɛni osusuɔ akɛ no haa ebaa lɛ nakai? [Ŋmɛɛ gbɛ ni eha hetoo. No sɛɛ lɛ kanemɔ Yeremia 17:9 loo Kpojiemɔ 12:9.] Wolo tɛtrɛɛ nɛɛ tsɔɔ nɔ ni baaye abua wɔ koni wɔle, ní wɔfee ekpakpa.”

Awake! Dec. 8

“Hiɛ ni atee yɛ tsɔji ahe nilee mli lɛ tsakeko bɔ ni naanyobɔɔ ji adesai ahiamɔ nii titri lɛ. Shi ani oyɔse akɛ tsakemɔi ni eba adesai ashihilɛ mli lɛ haa ewaa akɛ aaaná naanyobɔɔ ni yɔɔ gbagbalii gbii-etɛ-nɛɛ? [Ŋmɛɛ gbɛ ni eha hetoo. No sɛɛ lɛ kanemɔ Abɛi 18:24.] Wolo tɛtrɛɛ nɛɛ tsɔɔ bɔ ni wɔbaafee wɔná naanyo kpakpa, ni wɔha eshi daa lɛ mli.”

Buu-Mɔɔ Dec. 15

“Mɛi kaiɔ Yesu fɔmɔ lɛ yɛ gbɛ̀i srɔtoi anɔ yɛ afi lɛ mli be nɛɛ mli yɛ je lɛŋ fɛɛ. Ani ole akɛ Biblia mli gbalɛ tsɔɔ akɛ Yesu fɔmɔ lɛ kɔɔ naanɔ toiŋjɔlɛ he? [Ŋmɛɛ gbɛ ni eha hetoo. No sɛɛ lɛ kanemɔ Yesaia 9:5, 6.] Wolo tɛtrɛɛ nɛɛ tsɔɔ bɔ ni nakai toiŋjɔlɛ lɛ baaba mli eha lɛ mli.”

Awake! Dec. 22

“Ani oyɔse akɛ etamɔ nɔ ni maŋbii gbalaa jwɛŋmɔ babaoo kɛyaa gbɔmɛi ahe fɛo nɔ? [Ŋmɛɛ gbɛ ni eha hetoo.] Wolo tɛtrɛɛ nɛɛ wieɔ osharai komɛi ni yɔɔ hefɛo ni aaagbala jwɛŋmɔ kɛya nɔ babaoo lɛ he. Eyaa nɔ emaa sɛɛnamɔ ni yɔɔ hefɛo ni he hiaa fe fɛɛ lɛ hu nɔ mi.” Kanemɔ 1 Petro 3:3, 4.