Okɛ Woji Tɛtrɛbii lɛ Atsu Nii yɛ Oshiɛmɔ Nitsumɔ lɛ Mli

1, 2. Buu-Mɔɔ kɛ Awake! lɛ ená mɛi ashihilɛ nɔ hewalɛ yɛ mɛɛ gbɛ nɔ?

¹ “Emli ŋɔɔ waa, eyɛ ebe naa, ni ewoɔ mɔ hewalɛ.” “Enɛɛmɛi ji woji tɛtrɛbii ni woɔ mɔ hewalɛ fe fɛɛ ni mikane pɛŋ.” Nɛkɛ wiemɔi nɛɛ tsɔɔ bɔ ni nikanelɔi ni yɔɔ je lɛŋ he fɛɛ he lɛ nuɔ he amɛhaa yɛ Buu-Mɔɔ kɛ Awake! lɛ he lɛ mli jogbaŋŋ. Yɛ anɔkwale mli lɛ wɔwoji tɛtrɛbii lɛ ahe eba sɛɛnamɔ waa diɛŋtsɛ ákɛ dɛŋdadei ni atsɔɔ nɔ akɛ sanekpakpa lɛ yaa “gbɔmɛi fɛɛ” aŋɔɔ.—1 Tim. 2:4.

² Jarayeli nitsulɔ ko nine shɛ Awake! wolo tɛtrɛɛ lɛ eko nɔ, ni enya emli sane ni ekane lɛ he waa. Sɛɛ mli lɛ, ekane Buu-Mɔɔ ni fata he kɛha nakai nyɔŋ lɛ, ni sane ni yɔɔ mli lɛ ha epɛi Triniti tsɔɔmɔ ni ehe eye yɛ eshihilɛ mli fɛɛ lɛ mli jogbaŋŋ kɛmɔ shi. Enɛ tée emiishɛɛ shi. Nyɔji ekpaa sɛɛ lɛ, abaptisi lɛ. Nuu kroko hu nine shɛɔ woji tɛtrɛbii lɛ anɔ daa shi ekaneee. Yɛ gbɛ kroko nɔ lɛ, eŋa sumɔɔɔ ni ekɛ Odasefoi gbaa sane shi ekaneɔ woji tɛtrɛbii ni akɛhaa ewu lɛ. Biblia mli shiwoo ni kɔɔ shikpɔŋ nɔ paradeiso ni jalɔi baahi mli lɛ he lɛ ha emii shɛ ehe waa. Yɛ sɛɛ mli lɛ, ekɛ ebinuu, kɛ lɛ diɛŋtsɛ enyɛmi yoo batsɔmɔ Yehowa sɔɔlɔi.

3. Mɛɛ sɛɛnamɔ yɔɔ he akɛ wɔkɛ woji tɛtrɛbii enyɔ lɛ fɛɛ aaaha?

³ Okɛ Enyɔ lɛ Fɛɛ Aha: Taakɛ nɔkwɛmɔnii ni etsɔ hiɛ lɛ tsɔɔ lɛ, wɔnyɛŋ wɔle mɔ diɛŋtsɛ ni baakane wɔwoji tɛtrɛbii lɛ loo wɔwoji tɛtrɛbii lɛ amli nɔ ni baanyɛ atee mɛi lɛ amiishɛɛ shi. (Jaj. 11:6) Enɛ hewɔ lɛ, sɛɛnamɔ yɛ he akɛ wɔkɛ Buu-Mɔɔ kɛ Awake! lɛ fɛɛ aha yɛ be kome too lɛ nɔŋŋ mli, eyɛ mli moŋ akɛ bei pii lɛ wolo tɛtrɛɛ lɛ ekome pɛ he wɔbaawie yɛ wɔshiɛmɔ wiemɔ lɛ mli. Yɛ shihilɛi komɛi amli lɛ, eeefee nɔ ni sa akɛ wɔkɛ wɔwoji tɛtrɛbii lɛ srɔtoi babaoo aaatsɔɔ yɛ saramɔ be kome too lɛ nɔŋŋ mli.

4. Wɔbaanyɛ wɔto gbɛjianɔ kɛha woji tɛtrɛbii ajaa nitsumɔ lɛ yɛ mɛɛ gbɛ nɔ?

⁴ Sɛɛnamɔ yɛ he akɛ aaato gbɛjianɔ koni akɛ he awo woji tɛtrɛbii ajaa nitsumɔ lɛ mli gbi kome daa otsi. Akadi Hɔɔ fɛɛ ni yɔɔ 2005 Calendar of Jehovah’s Witnesses lɛ mli lɛ akɛ “Magazine Day” (Woji Tɛtrɛbii Agbi). Yɛ anɔkwale mli lɛ, akɛni esoro he fɛɛ he shihilɛ, ni esoro shihilɛ mli ni mɔ fɛɛ mɔ yɔɔ hewɔ lɛ, ekolɛ mɛi komɛi kɛ gbi kroko baatsu nii kɛha wɔwoji tɛtrɛbii lɛ jaa. Ani okɛ enɛ efata odaa otsi gbɛjianɔtoo lɛ he?

5. Mɛɛ hegbɛi esa akɛ wɔha wɔhiɛ ahi nɔ koni wɔkɛ woji tɛtrɛbii lɛ aha, ni mɛni baanyɛ aye abua wɔ koni wɔfee nakai?

⁵ Okɛ Oti ko Ama Ohiɛ: Oti ni wɔkɛaama wɔhiɛ daa nyɔŋ nɔ akɛ wɔkɛ woji tɛtrɛbii lɛ falɛ ko aaaha lɛ baanyɛ aye abua wɔ koni wɔkɛ woji tɛtrɛbii babaoo aha. Ani oyɛ mɛi ni oyahaa amɛ woji tɛtrɛbii lɛ daa? Ani okɛ woji tɛtrɛbii haa mɛi ni okɛ amɛ kpeɔ yɛ shiɛmɔ nitsumɔ

Ye Obua Koni Aya nɔ Aye Amɛ Odase

¹ Yɛ be mli ni wɔshiɛɔ sanekpakpa lɛ, wɔkɛ mɛi ni bɛ wɔshikpɔŋkuku lɛ mli loo mɛi ni wieɔ wiemɔ kroko, ni mumuii fata he lɛ kpeɔ yɛ bei babaoo mli. Ekolɛ mɛi krokomɛi ni wɔkɛ amɛ gba Biblia mli saji ni yɔɔ miishɛɛ lɛ hu baashi wɔshikpɔŋkuku lɛ mli kɛyahi he kroko. Te wɔɔfee tɛŋŋ wɔto gbɛjianɔ koni wɔha aya nɔ aye mɛi ni tamɔ nɛkɛ lɛ odase? Kɛtsɔ Please Follow Up (S-43) wolo lɛ kɛ nitsumɔ nɔ.

² Bei pii lɛ, mɛi boɔ sanekpakpa lɛ toi jogbaŋŋ diɛŋtsɛ kɛ́ akɛmiiha yɛ amɛmaŋ wiemɔ mli. (Bɔf. 22:1, 2) Enɛ hewɔ lɛ, yɛ shihilɛi babaoo mli lɛ, kɛ́ wɔkɛ mɔ ko ni wieɔ wiemɔ kroko kpe lɛ, esa akɛ wɔŋma wolo lɛ nɔ nii kɛ́ mɔ lɛ ejieee miishɛɛ kpo yɛ Maŋtsɛyeli shɛɛ sane lɛ he po. Shi kɛlɛ, kɛ́ amɛji maŋsɛɛbii ni fa saŋŋ ni ayeɔ amɛ odase daa yɛ amɛmaŋ wiemɔ mli lɛ, ekolɛ ehe ebahiaŋ koni aŋma wolo lɛ nɔ nii ja ana mɔ ko ni jie miishɛɛ kpo.

³ Wolo lɛ Nɔ Niŋmalamɔ: Tsɔ ŋaa gbɛ nɔ koni obɔ mɔdɛŋ ni onine ashɛ mɔ lɛ gbɛi, edrɛs kɛ tɛlifoŋ nɔmba nɔ. Ŋmaa bɔ ni mɔ lɛ jie miishɛɛ kpo eha lɛ, be ni nine baanyɛ ashɛ enɔ, wolo ni akɛha lɛ loo wolo ni etsɔɔ akɛ eesumɔ koni aha enine ashɛ nɔ, kɛ maŋ wiemɔ ni mɔ lɛ nuɔ jogbaŋŋ. Beni oŋmala wolo lɛ nɔ nii ogbe naa lɛ, okɛha asafoŋ woloŋmalɔ lɛ amrɔ nɔŋŋ, ni ekɛbaamaje asafo loo kuu ni sa lɛ.

⁴ Wolo lɛ kɛ Majemɔ: Kɛ́ woloŋmalɔ lɛ leee asafo loo kuu ni esa akɛ amɛnine ashɛ wolo lɛ nɔ loo eleee amɛmajemɔ adrɛs lɛ, no lɛ ebaanyɛ etswa nitsumɔhe nine lɛ koni enine ashɛ enɛ he sane ni he baahia lɛ lɛ nɔ. Ehe ehiaaa dɔŋŋ ákɛ akɛ wolo lɛ aaaha maŋtiase nɔkwɛlɔ lɛ koni ekɛmaje.

⁵ Be fɛɛ be ni asafo ko loo kuu ko nine aaashɛ Please Follow Up wolo lɛ ni aŋmala nɔ nii agbe naa lɛ nɔ lɛ, esa akɛ ato gbɛjianɔ koni ayasara mɔ lɛ amrɔ nɔŋŋ. Yɛ be mli ni wɔkɛ ekãa tsuɔ wɔgbɛfaŋnɔ lɛ, wɔbaanyɛ wɔná nɔmimaa akɛ Yehowa baagbele “mɛi abɔ ni ajie ato naanɔ wala” lɛ atsuii amli kɛha sanekpakpa lɛ toiboo.—Bɔf. 13:48.