Kpokpaa nɔ Kpee He Gbɛjianɔtoo Hee

Je lɛ baasumɔ ni wɔhe wɔye akɛ ŋmɛnɛŋmɛnɛ nibii agbɛjianɔtoo nɛɛ baahi shi kɛya naanɔ. Shi kɛlɛ, Nyɔŋmɔ Wiemɔ lɛ kɛɔ wɔ nɔ kroko kwraa. (1 Yoh. 2:15-17) Nyɔŋmɔ Wiemɔ lɛ yeɔ ebuaa wɔ ni wɔnaa akɛ ‘jwetrii ni aaabɔ yɛ shikpɔŋ lɛ nɔ’ lɛ ji yaka deŋmegbomɔ. Bɔni afee ni awaje Nyɔŋmɔ webii lɛ, kpokpaa nɔ kpee he gbɛjianɔtoo kɛha afi 2007 sɔɔmɔ afi lɛ baagbala saneyitso ni ji “Nyɛbɔa Jwetrii . . . yɛ Ŋwɛi” lɛ mli.—Mat. 6:19, 20.

“Kɔɔyɔɔ mli hewalɛ lɛ nɔ lumɔ lɛ, ni ji mumɔ ni tsuɔ nii ŋmɛnɛŋmɛnɛ yɛ toigbele bii amli lɛ” ni atsĩ tã yɛ Efesobii 2:2 lɛ eko ji jwɛŋmɔ ni akɛmaa heloonaa nibii asɛɛtiumɔ nɔ. Tamɔ bɔ ni kɔɔyɔɔ yɔɔ he fɛɛ he ni ewaaa akɛ aaanyɛ amu eko lɛ, nakai nɔŋŋ hu “je nɛŋ mumɔ lɛ” ehe shi waa yɛ nibii agbɛjianɔtoo nɛɛ mli. (1 Kor. 2:12) Akɛni hewalɛ ni je nɛŋ mumɔ lɛ naa yɛ mɛi anɔ lɛ naa wa waa diɛŋtsɛ hewɔ lɛ, akɛɔ akɛ eji “lumɔ.” Kpokpaa nɔ Kpee He Gbɛjianɔtoo Hee lɛ baaye abua wɔ koni wɔkpoo heloonaa nibii asɛɛtiumɔ he jwɛŋmɔ ni je lɛ hiɛ lɛ, ni wɔkɛ wɔjwɛŋmɔ ama nɔ ni he hiaa fe fɛɛ lɛ nɔ jogbaŋŋ. (Mat. 6:33) Kɛfata he lɛ, kpee lɛ baaye abua wɔ koni wɔkɛ wɔhe afɔ̃ Yehowa nɔ beni wɔtsuɔ wɔsɔɔmɔ nitsumɔ lɛ, ekɔɔɔ he eko naagbai kɛ kaai ni ekolɛ wɔkɛaakpe lɛ.

Tswaa ofai shi akɛ obaahi kpee lɛ shishi gbii enyɔ lɛ fɛɛ, ni ákɛ ‘obaamɔ nii ni ooonu lɛ mli ni awa.’ (Heb. 2:1) Ŋmalamɔ saji otii kukuji ni obaanyɛ okɛtsu nii yɛ oshihilɛ mli kɛ agbɛnɛ hu yɛ osɔɔmɔ nitsumɔ lɛ mli. Kpee ni baatswa wɔkɛ Nyɔŋmɔ teŋ wekukpaa lɛ ema shi nɛɛ shishi ni ooohi kɛjɛ eshishijee aahu kɛyashi enaagbee lɛ baawo bo hewalɛ ni ebaawaje bo koni oya nɔ ‘obɔ jwetrii yɛ ŋwɛi’!