Ani Osaa Ohe Oto Adebɔɔ Naa Oshara?
1. Mɛni hewɔ nilee yɔɔ mli akɛ wɔɔsaa wɔhe wɔto osharai lɛ?
1 Daa afi lɛ, mɛi akpekpei abɔ ni yɔɔ je lɛŋ hei srɔtoi, ni wɔnyɛmimɛi hii kɛ yei babaoo fata he lɛ kɛ osharai tamɔ shikpɔŋhosomɔi, ŋshɔŋ shikpɔŋhosomɔi, lasuogbelei, kɛ nu afuai kpeɔ. Akɛni adebɔɔ naa osharai ni baa trukaa lɛ baanyɛ anina wɔteŋ mɔ fɛɛ mɔ he hewɔ lɛ, nilee yɛ mli akɛ wɔɔsaa wɔhe wɔto.—Abɛi 10:5.
2. Mɛni hewɔ esa akɛ wɔha onukpai lɛ ale wɔshĩai adrɛs kɛ wɔtɛlifoŋ nɔmbai ni wɔkɛtsuɔ nii be fɛɛ be lɛ?
2 Nɔ ni Abaanyɛ Atsɔ Hiɛ Afee: Bei komɛi lɛ nɔyeli hegbɛi lɛ nyɛɔ amɛkɛ kɔkɔbɔɔ haa yɛ osharai komɛi ni miiba lɛ ahe. Ehe miihia waa akɛ wɔɔbo kɔkɔbɔi nɛɛ atoi. (Abɛi 22:3) Kɛ́ akɛ osharai ahe kɔkɔbɔi ha lɛ, onukpai lɛ baabɔ mɔdɛŋ koni amɛnine ashɛ asafoŋbii lɛ fɛɛ anɔ ni amɛye amɛbua amɛ kɛto gbɛjianɔi ni he hiaa. Kɛ́ oshara ko ba lɛ, onukpai lɛ baabɔ mɔdɛŋ koni amɛnine ashɛ mɛi fɛɛ ni kɛ asafo lɛ bɔɔ lɛ anɔ, ni amɛkwɛ akɛ amɛyɛ shweshweeshwe lo, ni amɛkwɛ yelikɛbuamɔ ni ekolɛ ehe baahia amɛ. Kɛ́ onukpai lɛ leee nyɛshĩai adrɛs kɛ nyɛtɛlifoŋ nɔmbai ni nyɛkɛtsuɔ nii yɛ nakai beaŋ lɛ, ebaaha afite be babaoo kɛtao nyɛ. No hewɔ lɛ, ehe miihia ni shiɛlɔi fɛɛ aha asafoŋ woloŋmalɔ kɛ asafo woloŋ nikasemɔ kuu ni amɛyɔɔ mli lɛ nɔkwɛlɔ lɛ ale amɛshĩai adrɛs kɛ amɛtɛlifoŋ nɔmbai ni amɛkɛtsuɔ nii amrɔ nɛɛ, ni kɛ́ tsakemɔi ba mli lɛ esa akɛ amɛha mɛi nɛɛ ale oya nɔŋŋ.
3. Mɛɛ gbɛ nɔ wɔɔtsɔ wɔkɛ onukpai lɛ afee ekome kɛ́ wɔyɛ he ko ni osharai fɔɔ baa yɛ lɛ?
3 Kɛ́ he ni nyɛsafo lɛ yɔɔ lɛ ji he ko ni osharai fɔɔ baa yɛ lɛ, ekolɛ onukpai lɛ baabi shiɛlɔi lɛ ateŋ mɔ fɛɛ mɔ ni ekɛ ewekunyo loo enaanyo ko ni yɔɔ he kroko ni abaanyɛ atswa lɛ kɛ́ oshara ko ba lɛ gbɛi kɛ etɛlifoŋ nɔmba aha amɛ. Enɛ baaye abua onukpai lɛ ni amɛle he ni mɛi ni efã kɛshi he ni oshara lɛ ba yɛ lɛ yɔɔ. Ekolɛ onukpai lɛ baato gbɛjianɔ kɛha nɔ ni amɛsafo lɛ baafee kɛ́ oshara ba trukaa, ekomɛi ji nibii ni he baahia ni mɔ fɛɛ mɔ ahiɛ kɛ́ oshara ba, bɔ ni aaafee ajie mɛi kɛjɛ hei ni oshara eba yɛ lɛ, kɛ bɔ ni aaafee aye abua mɛi ni yelikɛbuamɔ krɛdɛɛ he hiaa amɛ lɛ. Ekome ni wɔkɛ amɛ aaafee kɛtsu gbɛjianɔi ni suɔmɔ yɔɔ mli nɛɛ he nii lɛ he miihia waa.—Heb. 13:17.
4. Mɛni esa akɛ wɔfee kɛ́ oshara ba yɛ he ni wɔyɔɔ lɛ?
4 Beni Oshara Eba: Mɛni esa akɛ ofee kɛ́ oshara ba yɛ he ni oyɔɔ lɛ? Kwɛmɔ ni otsu oweku lɛ heloonaa hiamɔ nii titrii lɛ ahe nii. Kɛ́ eyɛ onyɛmɔ mli lɛ, okɛ yelikɛbuamɔ ni he hiaa aha mɛi krokomɛi hu ni oshara lɛ enina amɛ lɛ. Bɔɔ mɔdɛŋ ni oha osafo woloŋ nikasemɔ nɔkwɛlɔ lɛ loo onukpa kroko anu ohe amrɔ nɔŋŋ. Esa akɛ ofee enɛ kɛji oyɛ shweshweeshwe ni yelikɛbuamɔ ko he ehiaaa bo po. Kɛ́ yelikɛbuamɔ ko he miihia bo yɛ nakai beaŋ po lɛ, ná nɔmimaa akɛ nyɛmimɛi lɛ baabɔ mɔdɛŋ fɛɛ ni amɛaanyɛ kɛye abua bo. (1 Kor. 13:4, 7) Kaimɔ akɛ Yehowa le shihilɛ mli ni oyaje lɛ; okɛ ohe afɔ̃ enɔ kɛha yelikɛbuamɔ. (Lala 37:39; 62:9) Ŋɔɔ hegbɛ fɛɛ hegbɛ ni oooná lɛ ní okɛ Nyɔŋmɔ Wiemɔ lɛ awo mɛi krokomɛi hewalɛ ni oshɛje amɛ mii. (2 Kor. 1:3, 4) Okɛ ohe awo gbɛjianɔi ni ato kɛha teokrase nifeemɔi lɛ amli oya nɔŋŋ.—Mat. 6:33.
5. Ákɛ Kristofoi lɛ, te wɔfeɔ wɔnii yɛ osharai ni baanyɛ aba lɛ he wɔhaa tɛŋŋ?
5 Eyɛ mli akɛ je lɛ feɔ yeyeeye yɛ osharai ni baanyɛ aba lɛ he moŋ, shi wɔ lɛ wɔbaanyɛ wɔkɛ miishɛɛ akwɛ wɔsɛɛ be gbɛ. Eshwɛ fioo ni osharai fɛɛ asɛɛ baafo. (Kpoj. 21:4) Shi dani nakai be lɛ aaaba lɛ, wɔbaanyɛ wɔto gbɛjianɔi ni hi kɛsaa wɔhe wɔto haomɔi kɛ naagbai ni baanyɛ aba lɛ, ni nakai beaŋ nɔŋŋ lɛ wɔya nɔ wɔkɛ ekãa ajaje sanekpakpa lɛ wɔtsɔɔ mɛi krokomɛi.