Dii Toiŋjɔlɛ ni Nyɔŋmɔ Kɛhaa lɛ Sɛɛ yɛ Weku Shihilɛ Mli
1. Te wɔɔfee tɛŋŋ wɔná toiŋjɔlɛ kɛ miishɛɛ yɛ wɔweku lɛ mli lɛ?
1 Yehowa Nyɔŋmɔ ni ji weku gbɛjianɔtolɔ lɛ ji mɔ ni ha weku fɛɛ weku ni yɔɔ shikpɔŋ nɔ lɛ ba shihilɛ mli. (Efe. 3:14, 15) Nyɔŋmɔ Wiemɔ ni ji Biblia lɛ kasemɔ kɛ emli shishitoo mlai lɛ kɛ nitsumɔ ji nɔ diɛŋtsɛ ni kɛ weku miishɛɛ baa. Ani oweku lɛ mli bii lɛ bɔɔ mɔdɛŋ koni amɛkɛ Biblia mli shishitoo mlai atsu nii yɛ amɛshihilɛ mli? Nyɛhaa wɔsusua shishitoo mlai ni he hiaa nɛɛ ni esa akɛ weku lɛ mli bii fɛɛ abɔ mɔdɛŋ amɛkɛtsu nii lɛ ateŋ ejwɛ ahe. Kɛ́ oweku lɛ kɛ shishitoo mlai nɛɛ tsu nii lɛ, nyɛbaaná miishɛɛ kɛ toiŋjɔlɛ.
2. (a) Mɛni hewɔ henɔyeli he hiaa yɛ weku mli lɛ? (b) Shishitoo mlai ni yɔɔ Kolosebii 3:12-14 lɛ baanyɛ aye abua wekui ni amɛtiu toiŋjɔlɛ sɛɛ yɛ mɛɛ gbɛ nɔ?
2 Henɔyeli: Su nɛɛ baaha aná toiŋjɔlɛ ni Nyɔŋmɔ kɛhaa lɛ yɛ weku shihilɛ mli. (Gal. 5:22, 23) Maŋtsɛ Salomo kɛɛ: “Mɔ ni nyɛɛɛ emumɔ nɔ aye lɛ, etamɔ maŋ ni akumɔ ni gbogbo bɛ he.” (Abɛi 25:28) Eyɛ mli akɛ wɔyeee emuu moŋ, shi ehe miihia ni weku mli bii kɛ henɔyeli atsu nii yɛ bɔ ni amɛkɛ amɛhe yeɔ amɛhaa lɛ mli. (Rom. 7:21, 22) Esaaa akɛ mlilawooi, bolɔmɔi kɛ shwɛmɔ fɔŋ hiɔ Kristofoi ashĩai amli. (Gal. 5:20, 21) Henɔyeli baaye abua gbalashihilɛ mli hefatalɔi koni ‘amɛjo ajwamaŋbɔɔ naa foi’ ní amɛye amɛhe anɔkwa. (1 Kor. 6:18) Su ni he hiaa nɛɛ baaye abua wɔ hu koni wɔkpoo basabasafeemɔ, wɔkwa dãatɔɔ loo wɔye nɔ, ni wɔkɛ mlijɔlɛ babaoo atsu shihilɛi ni mli wawai ahe nii.—Kol. 3:12-14.
3. Te yitsoyeli he shishitoo mla lɛ kɔɔ weku lɛ mli bii ahe ehaa tɛŋŋ?
3 Yitsoyeli: Paulo ŋma akɛ: “Shi miisumɔ akɛ nyɛle akɛ, nuu fɛɛ nuu yitso ji Kristo, ni yoo fɛɛ yoo hu yitso ji nuu, ni Kristo yitso ji Nyɔŋmɔ.” (1 Kor. 11:3) Yitsoyeli he shishitoo mla lɛ ni wɔɔkpɛlɛ nɔ ni wɔkɛtsu nii lɛ baaye abua wɔ ni wɔdi toiŋjɔlɛ ni Nyɔŋmɔ kɛhaa lɛ sɛɛ yɛ wɔwekui amli. Yehowa kɛwo wu lɛ dɛŋ akɛ enyiɛ weku lɛ hiɛ. Ŋa ni sheɔ Nyɔŋmɔ gbeyei lɛ fiɔ ewu lɛ yitsoyeli lɛ sɛɛ. Kɛ́ akɛ gbɛjianɔtoo nɛɛ tsu nii jogbaŋŋ lɛ, ebaafee mlɛo kɛha gbekɛbii akɛ amɛaabu amɛfɔlɔi ni amɛbo amɛ toi.—Efe. 5:22-25, 28-33; 6:1-4.
4. Mɛni hewɔ esaaa akɛ wumɛi ni ji Kristofoi lɛ kɛ yiwaa loo nɔnyɛɛ tsuɔ nii lɛ?
4 Ehe miihia ni wumɛi ni ji Kristofoi lɛ akai akɛ, Ŋmalɛ naa yitsoyeli jeee nɔ ni akɛwaa mɛi ayi loo akɛnyɛɔ amɛnɔ. Esa akɛ amɛkase Yesu, ni ji amɛ-Yitso lɛ. Eyɛ mli akɛ Yesu baafee “nibii fɛɛ yitso” moŋ, shi ‘ebaaa ni asɔmɔ lɛ, shi ebasɔmɔ moŋ.’ (Efe. 1:22; Mat. 20:28) Kristofoi hii kɛ amɛyitsoyeli tsuɔ nii yɛ gbɛ ni haa amɛtsuɔ amɛwekui lɛ ahiamɔ nii ahe nii dani amɛtsuɔ amɛnɔ̃ lɛ he nii lɛ nɔ. Kɛ́ akɛ he shã afɔle yɛ nɛkɛ gbɛ nɔ kɛkase Kristo lɛ, ehaa toiŋjɔlɛ kɛ ekomefeemɔ hiɔ weku lɛ mli.—1 Kor. 13:5.
5. Mɛɛ su baaye abua ŋa koni etsu egbɛfaŋnɔ yɛ weku lɛ mli, ni mɛɛ gbɛ nɔ eeetsɔ efee enɛ?
5 Esa akɛ ŋa ni ji Kristofonyo lɛ ajɛ miishɛɛ kɛ suɔmɔ mli ekɛ ewu ni ji eyitso lɛ afee ekome. Esa akɛ efee enɛ kɛji akɛ ele woloŋ fe ewu lɛ loo eyɛ shika fe ewu lɛ po. Ákɛ “yelikɛbualɔ” kɛ “hefatalɔ ni sa” nuu lɛ, ebaanyɛ ejie sui ni ekolɛ ewu lɛ bɛ eko lɛ akpo, ní ekɛ sɛɛfimɔ ni sa aha ewu lɛ. (1 Mose 2:20; Abɛi 31:10-31) Ewaaa kɛhaaa yoo heshibalɔ akɛ eeejie bulɛ kpo etsɔɔ ewu yitsoyeli hegbɛ lɛ. Ebii lɛ yɔseɔ enɛ ni no kanyaa amɛ ni amɛfeɔ toiboo.
6, 7. (a) Namɔ sɔ̃ kã enɔ akɛ etsɔɔ weku lɛ nii? (b) Mɛɛ gbɛ̀i anɔ wumɛi baanyɛ atsɔ amɛkɛ shishitoo mla ni yɔɔ Jajelɔ 11:6 lɛ atsu nii yɛ amɛwekui amli?
6 Ŋmalɛi lɛ kɛ wiemɔ ni mli kã shi faŋŋ tsɔɔ mɔ ni esa akɛ enyiɛ hiɛ yɛ gbekɛbii lɛ anitsɔɔmɔ mli. “Tsɛmɛi lɛ, . . . nyɛlɛa amɛ yɛ Nuŋtsɔ lɛ tsɔsemɔ kɛ ŋaawoo lɛ mli.” (Efe. 6:4) Esa akɛ tsɛmɛi ajɛ suɔmɔ mli akpɛlɛ sɔ̃ nɛɛ nɔ, ní amɛná miishɛɛ po akɛ amɛaatsɔɔ amɛbii lɛ anii ni amɛwo amɛ ŋaa.
7 Ákɛ nɔkwɛmɔnɔ lɛ, obaanyɛ okwɛ koni afee weku Biblia mli nikasemɔ ni woɔ mɔ hewalɛ daa. “Kaajie onine yɛ” Nyɔŋmɔ he anɔkwalei lɛ ni oootsɔɔ obii lɛ yɛ hegbɛ fɛɛ hegbɛ ni oooná lɛ “he.” (Jaj. 11:6) Enɛ baabi ni okɛ amɛteŋ mɔ fɛɛ mɔ afee Biblia mli nikasemɔ daa, koni no aha wekukpaa ni kã amɛkɛ Nyɔŋmɔ teŋ lɛ mli awa. Ye obua amɛ ni amɛsaa amɛhe kɛha hetoohamɔ yɛ kpeei ashishi kɛ Teokrase Sɔɔmɔ Skul lɛ mli nifeemɔi ni amɛnáa lɛ mli. Ha ohiɛ ahi mɛi ni amɛkɛbɔɔ lɛ ahe jogbaŋŋ.—1 Kor. 15:33.
8. (a) Kɛji akɛ nyɛmiyoo ko wu jeee Odasefonyo lɛ, mɛni abaanyɛ afee? (b) Eyɛ mli akɛ mɛi krokomɛi baanyɛ aye abua moŋ, shi mɛni esaaa akɛ afeɔ?
8 Mɛni abaanyɛ afee kɛji akɛ wu lɛ jeee Odasefonyo? Esa akɛ ŋa ni ji Odasefonyo lɛ atsu egbɛfaŋnɔ kɛtsɔɔ gbekɛbii lɛ anii ni efee weku nikasemɔ daa. (2 Tim. 1:5) Bei komɛi lɛ yɛ shihilɛi komɛi ahewɔ lɛ, ekolɛ ehe baahia ni ŋa lɛ aŋɔ gbɛnaa nii akɛ atsɔɔ gbekɛbii lɛ anii lɛ afɔ̃ enɔ kwraa. (Abɛi 1:8) Yɛ shihilɛi krokomɛi amli lɛ, hiamɔ pɔtɛɛ ni yɔɔ lɛ baabi ni onukpa ko loo shiɛlɔ ko ni he esa kɛ yelikɛbuamɔ ko aha. Shi esaaa ákɛ akɛ gbɛjianɔtoo nɛɛ tsuɔ nii kɛheɔ Ŋmalɛ naa sɔ̃ ni kã fɔlɔi anɔ akɛ amɛtsɔɔ amɛbii anii, amɛtsɔse amɛ, ni amɛkwɛ amɛ lɛ kɛjɛɔ amɛdɛŋ.—5 Mose 6:6, 7; 1 Tim. 3:2, 4.
9. Ani ŋamɛi baanyɛ aná gbɛfaŋnɔ yɛ gbekɛbii atsɔsemɔ mli? Tsɔɔmɔ mli.
9 Ŋamɛi baanyɛ aba amɛhe shi hu amɛha yitsoyeli he gbɛjianɔtoo lɛ kɛtsɔ amɛhe ni amɛkɛaawo amɛbii lɛ atsɔsemɔ mli lɛ nɔ. Nyɛhaa nyɛbii lɛ anaa akɛ nyɛkɛ nyɛwumɛi lɛ feɔ ekome yɛ Biblia mli shishitoo mlai ni nyɛkɛtsuɔ Nyɔŋmɔ taomɔ nii kɛ tsɔsemɔ he nii lɛ mli.—1 Kor. 1:10; Abɛi 1:8.
10. Mɛɛ gbɛ nɔ esa akɛ weku mli bii kɛ shishitoo mla ni yɔɔ Yakobo 1:19 lɛ atsu nii, ni mɛɛ be esa akɛ amɛfee enɛ?
10 Sanegbaa Kpakpa: Abaanyɛ awie shishitoo mla ni ji etɛ ni he hiaa lɛ he yɛ nɛkɛ wiemɔi nɛɛ amli akɛ: “Mɔ fɛɛ mɔ he afee oya kɛ ninumɔ, ehumi shi kɛ wiemɔ, ehumi shi kɛ mlifu.” (Yak. 1:19) Kɛ́ weku lɛ mlinyo ko miitsɔɔ ejwɛŋmɔ yɛ sane ko he lɛ, ehe miihia ni weku lɛ mli bii krokomɛi lɛ ajɛ bulɛ mli amɛbo lɛ toi. Kɛ́ naataamɔ te shi lɛ, esa akɛ nyɛjɛ nyɛtsuiŋ nyɛkɛ mlijɔlɛ, suɔmɔ kɛ saneshishinumɔ asusu naagba lɛ he.
11. (a) Mɛɛ saji komɛi ehe hiaa ni akɛ sanegbaa kpakpa asusu he? (b) Kɛ́ wɔmiisusu saji ni wɔkɛ wɔhe kpãaa gbee yɛ mli lɛ ahe lɛ, mɛni esaaa akɛ wɔfeɔ, ni mɛni hewɔ?
11 Ehe miihia ni wumɛi kɛ ŋamɛi ajɛ amɛtsuiiaŋ amɛsusu saji ni kɔɔ nihemɔ, nibii anyɔmɔwoo, shika faa, kɛ shika he saji krokomɛi lɛ ahe ni amɛkɛtsɔɔ akɛ amɛyɛ mɔ hesusumɔ kɛ bulɛ kɛha amɛhe. (Abɛi 15:22) Kɛ́ nyɛkpãaa gbee ni bo osane ja po lɛ, henɔwomɔ wiemɔi, wiemɔi ni naa wa loo nɔ ni etsɔɔɔ mɔ hesusumɔ ni okɛaatsu nii lɛ baaye awui babaoo moŋ fe nɔ ni eeesaa sane lɛ. Esa akɛ wɔwiemɔ aŋɔɔ ni “ŋoo ahi mli.” (Kol. 4:6) Wekui ni kɛ Ŋmalɛ naa shishitoo mlai nɛɛ tsuɔ nii lɛ baaná toiŋjɔlɛ ni Nyɔŋmɔ kɛhaa lɛ yɛ amɛshĩai amli.
12, 13. (a) Te esa akɛ suɔmɔ kɛha Yehowa aná wɔwekui anɔ hewalɛ eha tɛŋŋ? (b) Mɛɛ gbɛ nɔ esa akɛ wɔkɛ Ŋmalɛ naa shishitoo mlai ni kɔɔ suɔmɔ he lɛ atsu nii daa yɛ wɔwekui amli, ni mɛni hewɔ?
12 Suɔmɔ: Shishitoo mla ni ji ejwɛ ni he hiaa kɛha weku toiŋjɔlɛ kɛ miishɛɛnamɔ ji suɔmɔ. Nuu kɛ yoo teŋ suɔmɔ baanyɛ atsu gbɛfaŋnɔ ni he hiaa yɛ gbalashihilɛ mli, ni weku mli bii baanyɛ aná hedɔɔ ni mli wa aha amɛhe. Shi, nɔ ni he hiaa waa ji suɔmɔ ni akɛ Hela wiemɔ a·gaʹpe damɔ shi kɛha no lɛ. Enɛ ji suɔmɔ ni wɔnáa kɛhãa Yehowa, kɛhãa Yesu, kɛ agbɛnɛ kɛha wɔnaanyo gbɔmɔ. (Mat. 22:37-39) Nyɔŋmɔ jie suɔmɔ nɛɛ kpo etsɔɔ adesai kɛtsɔ ‘e-Bi koome lɛ’ ni ekɛ lɛ ha, koni ‘wɔhiɛ akakpata, shi moŋ wɔná naanɔ wala’ lɛ nɔ. (Yoh. 3:16) Kwɛ bɔ ni ehe hiaa akɛ wɔɔjie nakai suɔmɔ lɛ nɔŋŋ eko kpo wɔha wɔweku lɛ mli bii!
13 Nɛkɛ suɔmɔ ni nɔ bɛ nɛɛ ji “ekomefeemɔ kpãa ni yeɔ emuu” lɛ. (Kol. 3:14) Efimɔɔ gbalashihilɛ mli hefatalɔi efeɔ amɛ ekome, ni ekanyaa amɛ koni amɛfee nɔ ni hi fe fɛɛ amɛha amɛhe kɛ amɛbii. (Fil. 2:4) “Suɔmɔ . . . epeleee lɛ diɛŋtsɛ enɔ̃, . . . emiɔ ŋɔɔ yɛ nii fɛɛ mli, eheɔ nii fɛɛ eyeɔ, ehiɛ kãa nii fɛɛ nɔ, etoɔ etsui shi yɛ nii fɛɛ mli.” Suɔmɔ ni tamɔ nɛkɛ “sɛɛ efooo gbi ko gbi ko” kɛ́ eyɛ weku ko mli. (1 Kor. 13:4-8) Wekui ni suɔmɔ kɛha Yehowa haa amɛjieɔ suɔmɔ kpo amɛtsɔɔ amɛhe lɛ yɛ miishɛɛ diɛŋtsɛ!—1 Yoh. 5:3.
14. (a) Mɛni esa akɛ fɔlɔi afee koni Yehowa ajɔɔ amɛ? (b) Mɛni baajɛ toiŋjɔlɛ sɛɛ ni atiuɔ yɛ weku lɛ mli lɛ mli aba?
14 Kɛ́ weku mli bii fɛɛ kɛ Biblia mli shishitoo mlai ni atsɔɔ mli kɛtsɔ hiɛ lɛ tsu nii lɛ, amɛbaaná toiŋjɔlɛ ni Nyɔŋmɔ kɛhaa lɛ yɛ amɛshĩai amli. Fɔlɔi ni sheɔ Nyɔŋmɔ gbeyei ní kɛ Nyɔŋmɔjamɔ he otii mamɔɔ amɛbii lɛ ahiɛ, ní amɛkɛ amɛbii lɛ kaseɔ Biblia lɛ daa lɛ baanyɛ aná nɔmimaa akɛ Yehowa baajɔɔ amɛ! (Kpoj. 21:1-4) Belɛ eba akɛ anɔkwa Nyɔŋmɔ lɛ jamɔ aaafee nɔ ni he hiaa titri yɛ nyɛweku lɛ mli. Ni eba akɛ Yehowa, wɔŋwɛi Tsɛ ni yɔɔ suɔmɔ lɛ aaaha nyɛná miishɛɛ beni nyɛtiuɔ toiŋjɔlɛ ni Nyɔŋmɔ kɛhaa lɛ sɛɛ yɛ nyɛweku lɛ mli lɛ!