Adafitswai

◼ Woji ni akɛbaaha yɛ July kɛ August: Akɛ woji bibii ni hiɛ baafai 32 lɛ mli eko fɛɛ eko ni yɔɔ ní sa lɛ aha. September: Creation wolo (emli bibioo loo ewulu) lɛ. Abaanyɛ akɛ Mi-Wolo ni Gbaa Biblia Mli Saji wolo lɛ aye no najiaŋ kɛ́ eeehi. Kɛji shiatsɛmɛi lɛ eŋɔɔɔ woji nɛɛ lɛ, okɛ Nyɛyaa nɔ Nyɛshia Kpe! wolo bibioo lɛ aha. October: Nyɛkɛ Buu-Mɔɔ kɛ Awake! woji tɛtrɛbii srɔtoi lɛ ahaa. Kɛji shiatsɛ lɛ jie miishɛɛ kpo lɛ, no lɛ ofainɛ ni okɛ Taoɔ wolo bibioo lɛ atsɔɔ lɛ.

◼ Wiemɔ ni kpokpaa nɔkwɛlɔi baaha kɛjɛ September kɛyaa lɛ yitso ji “Mɛni Hewɔ Esa akɛ Oha Biblia lɛ Atsɔɔ Bo Gbɛ?”

◼ Esa ákɛ atsɔ hiɛ akɛ daa gbɛgbamɔ sɔɔmɔ lɛ he gbɛbimɔ woji lɛ amaje nitsumɔhe nine lɛ kɛ́ hooo lɛ gbii 30 dani be ni atsɔɔ yɛ nɔ akɛ abaaje shishi lɛ ashɛ. Esa akɛ asafoŋ woloŋmalɔ lɛ akwɛ ní eha aŋmala woji nɛɛ anɔ nii jogbaŋŋ. Kɛji shiɛlɔi komɛi nyɛɛɛ akai be tuuŋtu ni abaptisi amɛ lɛ, esa akɛ aha amɛtsɔɔ be ko ní eeenyɛ efee akɛ no nɔ abaptisi amɛ, koni no sɛɛ lɛ amɛkɛto. Esa akɛ woloŋmalɔ lɛ aŋma be nɛɛ ewo Congregation’s Publisher Record (S-21) wolo lɛ nɔ.

◼ Aakai asafoŋ sɛinɔtalɔi fɛɛ ekoŋŋ koni amɛfee tsakemɔi ni sa lɛ bɔni afee ni anyɛ asusu “Gbi Kome Kpee Krɛdɛɛ He Gbɛjianɔtoo Hee” ni je kpo yɛ March afi 2005 Wɔ-Maŋtsɛyeli Sɔɔmɔ lɛ baafa 3 lɛ mli lɛ he. Esa akɛ asusu sane ni ji “Gbi Kome Kpee Krɛdɛɛ Mlitĩi” lɛ he kɛ́ atee kpee lɛ aba nɔŋŋ. Nyɛfainɛ nyɛkɛ gbɛtsɔɔmɔ ni yɔɔ August afi 2004 Wɔ Maŋtsɛyeli Sɔɔmɔ lɛ baafa 4 lɛ mli lɛ atsua enɛ he nii.

◼ Esa akɛ asafoŋ woloŋmalɔi lɛ akwɛ kɛji gbɛgbalɔ fɛɛ gbɛgbalɔ ni yɔɔ asafo lɛ mli lɛ nine eshɛ Pioneer Appointment Letter (S-202) lɛ eko nɔ lo. Kɛ jeee nakai lɛ, nyɛfainɛ nyɛŋmaa nitsumɔhe nine lɛ.

◼ Aawo asafoŋ onukpai lɛ hewalɛ, titri lɛ sɔɔmɔ ajinafoi akuu lɛ, koni amɛkwɛ gbɛgbalɔi lɛ ashiɛmɔ nitsumɔ lɛ mli ni amɛye amɛbua amɛ koni amɛto amɛbe he gbɛjianɔ koni amɛnine ashɛ ŋmɛlɛtswaa ni ataoɔ yɛ amɛdɛŋ lɛ nɔ dani afi 2005 sɔɔmɔ afi lɛ aba naagbee yɛ August.

◼ Akɛni etsɛŋ ni afi 2005 sɔɔmɔ afi lɛ baaba naagbee hewɔ lɛ, wɔmiiwo shiɛlɔi fɛɛ hewalɛ koni amɛkɛ amɛshiɛmɔ he akɔntaabuu lɛ aha oya. Enɛ baaha asafoŋ woloŋmalɔi lɛ atsu he nii koni amɛkɛmaje nitsumɔhe nine lɛ oya. Wɔ fɛɛ wɔbaanyɛ wɔtsɔ enɛ feemɔ nɔ wɔye wɔbua koni nine ashɛ akɔntaabuu ni ja jogbaŋŋ nɔ kɛha sɔɔmɔ afi lɛ.

◼ Akɛni agbe nitsumɔhe nine lɛ mligbelemɔ naa ni ajɔɔ nɔ amrɔ nɛɛ hewɔ lɛ, aŋkroaŋkroi kɛ asafoi baanyɛ abashara shi kɛkwɛ tsũi lɛ. Wɔmiibi koni asafoi kɛ kui ni mli bii fa lɛ atsɔ hiɛ aha wɔle be ni amɛbaaba lɛ koni anyɛ ato amɛsaramɔ lɛ he gbɛjianɔ jogbaŋŋ. Esa akɛ mɛi fɛɛ ni miito gbɛjianɔ koni amɛbasara Betel lɛ akane saji ni kɔɔ hesaamɔ kɛ atadewoo he ni yɔɔ Ato Wɔhe Gbɛjianɔ Koni Wɔfee Yehowa Suɔmɔnaa Nii wolo lɛ baafa 138 lɛ. Kɛji akɛ wɔ-Biblia mli nikaselɔi lɛ hu baafata wɔhe kɛba lɛ, no lɛ esa akɛ wɔkwɛ koni amɛ hu amɛsaa amɛhe jogbaŋŋ.

Ye Obua Obii lɛ ní Amɛya Amɛhiɛ yɛ Shiɛmɔ Nitsumɔ lɛ Mli

¹ Gbɛnaa nii ni yɔɔ hiɛdɔɔ kã fɔlɔi ni ji Kristofoi lɛ anɔ akɛ amɛtsɔse amɛbii lɛ koni amɛkɛ amɛhe awo shiɛmɔ nitsumɔ lɛ mli kɛjɛ amɛgbekɛbiiashi. Fɔlɔi baanyɛ atsɔ gbɛ̀i srɔtoi anɔ amɛtsu enɛ he nii. Gbekɛbii komɛi nyɛɔ amɛkɛɔ Biblia mli ŋmalɛ ko ni sa ní amɛkwɛɛɛ wolo nɔ dani amɛbaleɔ nikanemɔ po. Enɛ baanyɛ ená mɛi ni boɔ amɛ toi lɛ anɔ hewalɛ waa. Be mli ni gbekɛbii lɛ daraa kɛbatsɔmɔɔ onukpai lɛ, amɛbaanyɛ amɛtsu babaoo yɛ shiɛmɔ nitsumɔ lɛ mli. Ákɛ fɔlɔi lɛ, te nyɛaafee tɛŋŋ nyɛye nyɛbua nyɛbii lɛ ni amɛshiɛ? Ekolɛ, ŋaawoi ni nyiɛ sɛɛ nɛɛ baaye abua nyɛ koni nyɛya nyɛhiɛ yɛ enɛ he nitsumɔ mli.

² Beni oŋa mɔ lɛ sɛɛ lɛ, obaanyɛ okɛɛ akɛ:

◼ “Mibinuu [tsɔɔmɔ egbɛi] yɛ ŋmalɛ ko ni he hiaa ni eesumɔ ni ekɛbo asusu he.” Obi lɛ baanyɛ akɛɛ akɛ: “Ŋmalɛ nɛɛ ni jeɔ kpo yɛ Lalai Awolo lɛ mli lɛ tsɔɔ mi Nyɔŋmɔ gbɛi. [Gbekɛ lɛ akane Lala 83:19 loo ekɛɛ emli wiemɔi lɛ.] Wolo tɛtrɛɛ nɛɛ wieɔ nibii ni Yehowa Nyɔŋmɔ baafee eha wɔ lɛ ahe. Obaasumɔ ni mashi maha bo?” Obaanyɛ ogbála tooyeli ni akɛfiɔ jeŋ muu fɛɛ nitsumɔ lɛ sɛɛ lɛ mli otsɔɔ lɛ, ní okɛ no amu sanegbaa lɛ naa.

³ Aloo obaanyɛ oka gbɛ nɛɛ hu okwɛ:

◼ “Hɛloo. Miitsɔɔ mibiyoo [tsɔɔmɔ egbɛi] bɔ ni eeefee ejie suɔmɔ kpo etsɔɔ mɛi ni yɔɔ akutso lɛ mli. Ebaasumɔ ni ekɛ bo asusu Biblia mli shɛɛ sane kuku ko he.” Ebaanyɛ ekɛɛ akɛ: “Nɔ̃ kome ni misumɔɔ ni mafee koni mikɛye mabua mɛi ji ní mikɛ amɛ agba wɔsɛɛ shihilɛ he hiɛnɔkamɔ ni Biblia lɛ kɛhaa lɛ he sane. [Gbekɛ lɛ akane Kpojiemɔ 21:4 loo ekɛɛ emli wiemɔi lɛ.] Woji tɛtrɛbii nɛɛ gbálaa nibii ni Nyɔŋmɔ Maŋtsɛyeli lɛ baatsu eha wɔ lɛ amli. Miheɔ miyeɔ akɛ kɛ́ okane lɛ, obaanyá he jogbaŋŋ.”

⁴ Shiɛmɔ wiemɔi ni yɔɔ mlɛo ni gbekɛbii kɛtsuɔ nii be fɛɛ be lɛ yeɔ buaa amɛ ni amɛnyɛɔ amɛshiɛɔ Maŋtsɛyeli shɛɛ sane lɛ kɛ nɔmimaa. Kɛ́ aha amɛfee amɛhesaamɔ lɛ he nɔkwɛmɔnɔ, ní titri lɛ akwɛ koni amɛwiemɔi amli atse ní egbɛɛ bɔ ni sa hu lɛ, no baaye abua amɛ koni amɛnyɛ amɛwie yɛ shihilɛ fɛɛ shihilɛ mli. Hiɛ ni atsɔɔ asaa he jogbaŋŋ kɛ yijiemɔ ni ajɛɔ tsuiŋ akɛhaa lɛ baaye abua gbekɛbii lɛ koni amɛkɛ mɛi agba amɛhemɔkɛyeli lɛ he sane.

⁵ Hewalɛwoo ni tamɔ nɛkɛ ni akɛha oblahii kɛ oblayei bibii babaoo lɛ eye ebua, ni amɛbatsɔmɔ shiɛlɔi ni abaptisiko amɛ. Kwɛ bɔ ni wɔnaa miishɛɛ kɛ́ wɔna akɛ wɔbii lɛ miiya amɛhiɛ yɛ Kristofoi ashiɛmɔ nitsumɔ lɛ mli!—Lala 148:12, 13.