Kaimɔi ni Yɔɔ Ebe Naa
◼ Shiɛlɔi enyiɛ esa akɛ amɛtsu nii yɛ shia kɛ shia shiɛmɔ nitsumɔ lɛ mli? Shiɛlɔi enyiɛ baanyɛ abu be ni amɛkɛfeɔ Biblia mli nikasemɔ ko lɛ he akɔntaa?
1 Yesu tsɔse ekaselɔi lɛ, ni ekɛ gbɛ̀i ni mɔɔ shi fe fɛɛ ni atsɔɔ nɔ ashiɛɔ sanekpakpa lɛ he famɔi ha amɛ, ni ekɛfee nɔkwɛmɔnɔ. Beni be shɛ ni esa akɛ ekaselɔi lɛ ayashiɛ lɛ, ‘etsɛ mɛi nyɔŋma kɛ enyɔ lɛ kɛba eŋɔɔ ni etsu amɛ enyɔnyɔ.’ (Mar. 6:7; Luka 10:1) Mɛni hewɔ Yesu fee enɛ?
2 Enɛ ha amɛnyɛ amɛkɛ amɛbe tsu nii jogbaŋŋ yɛ shiɛmɔ nitsumɔ lɛ mli. Eha kaselɔi lɛ nyɛ amɛná naanyobɔɔ ni ye kɛbua amɛ koni amɛkase nii kɛjɛ amɛhe, be mli ni amɛhaa Biblia sanebimɔi ahetoo ni amɛsusuɔ saji ahe kɛjɛɔ Ŋmalɛi lɛ amli lɛ hu. (Jaj. 4:9, 10) Yɛ nɔkwɛmɔnɔ nɛɛ kɛ gbeekpamɔ naa lɛ, wɔnáa naanyo hefatalɔ ní wɔkɛ lɛ tsuɔ nii yɛ shiɛmɔ nitsumɔ lɛ mli lɛ he sɛɛ.
3 Eyɛ mli akɛ shikpɔŋkuku ni wɔyɔɔ mli ŋmɛnɛ lɛ baanyɛ afee nɔ ni yɔɔ srɔto moŋ, shi abaanyɛ akɛ Yesu shishijee famɔi akɛ etsu ekaselɔi lɛ enyɔnyɔ lɛ atsu nii lolo. Shi kɛlɛ, nɔ ni fɔɔ feemɔ yɛ hei komɛi ji akɛ, shiɛlɔi etɛ loo nɔ ni fe nakai yaa shia ko mli yɛ shia kɛ shia shiɛmɔ nitsumɔ lɛ mli. Enɛ feemɔ baawo shiatsɛ lɛ he gbeyei, ni etsɔɔɔ akɛ wɔkɛ wɔbe miitsu nii jogbaŋŋ yɛ sɔɔmɔ nitsumɔ lɛ mli. Enɛ he ehiaaa, ni esa akɛ akpa feemɔ.
4 Ni kɛ wɔmiifee shia Biblia mli nikasemɔ hu? May afi 1987 Wɔ Maŋtsɛyeli Sɔɔmɔ Sanebimɔ He lɛ kɛɔ akɛ: “Kɛ́ aaawie he lɛ, ehe ehiaaa ni shiɛlɔi fe enyɔ kɛ amɛhe awo shia Biblia mli nikasemɔ kome feemɔ mli.” Kɛ́ shiɛlɔi fe enyɔ yafee Biblia mli nikasemɔ ko lɛ, mɛi enyiɛ baanyɛ abu be lɛ he akɔntaa? Our Ministry wolo lɛ baafa 103, kuku 2 lɛ kɛɔ akɛ: “Kɛ́ shiɛlɔ ko shiɛɔ yɛ hei loo shihilɛi komɛi ni nilee bɛ mli akɛ ekome pɛ eeetsu nii yɛ mli lɛ amli lɛ, ni no hewɔ lɛ ehe miihia ni shiɛlɔ kroko afata ehe lɛ, no lɛ mɛi enyɔ lɛ fɛɛ baanyɛ abu be lɛ he akɔntaa kɛji mɛi enyɔ lɛ fɛɛ kɛ amɛhe wo odaseyeli lɛ mli.” Sane nɛɛ feɔ lɛ faŋŋ akɛ, esa akɛ shiɛlɔi enyɔ pɛ akane ŋmɛlɛtswai lɛ kɛ́ amɛmiifee nikasemɔ ko fɛɛ nikasemɔ ko.
5 Ani shihilɛi komɛi yɛ ni shiɛlɔi fe enyɔ baanyɛ aya shinaa ko naa loo amɛfee Biblia mli nikasemɔ? Hɛɛ. Yɛ maji komɛi amli lɛ, awuiyeli ni fa babaoo yɛ jɛmɛ lɛ baanyɛ eha efee nɔ ni yɔɔ oshara akɛ shiɛlɔi enyɔ pɛ baaya shiɛmɔ. Yɛ hei ni atsĩ nitsumɔ lɛ naa yɛ lɛ, nyɛmimɛi eshiɛɛɛ yɛ faŋŋ mli. Shi kɛlɛ, shihilɛi nɛɛ eko bɛ Ghana amrɔ nɛɛ. No hewɔ lɛ, esa akɛ shiɛlɔi fɛɛ kɛ amɛbe atsu nii jogbaŋŋ kɛtsɔ mɛi fe enyɔ ni eyaŋ shinaa ko naa loo ni amɛaafee Biblia mli nikasemɔ lɛ nɔ.
6 Mɛni esa akɛ afee kɛ́ shiɛlɔi etɛ pɛ ba kɛha shiɛmɔyaa? Mɔ ni ji etɛ lɛ baanyɛ efee sɛɛsaramɔi loo eja woji tɛtrɛbii yɛ gbɛjegbɛ nɔ be mli ni mɛi enyɔ lɛ feɔ nikasemɔ lɛ. Kɛ́ shiɛlɔ ko nyɛɛɛ atsu nii ekometoo lɛ, no lɛ, kɛ́ shihilɛ lɛ ŋmɛɔ gbɛ lɛ, shiɛlɔ kome baanyɛ afee nikasemɔ lɛ ni shiɛlɔi enyɔ lɛ kɛ amɛhe awo sɔɔmɔ nitsumɔ lɛ fai krokomɛi amli. Hiɛ ni atsɔɔ atoɔ gbɛjianɔ lɛ haŋ shiɛlɔ ni ji etɛ ata nikasemɔ ko mli akɛni abaashi ekome lɛ hewɔ.
7 Esa akɛ mɛi ni kwɛɔ kpee kɛha shiɛmɔyaa nɔ lɛ ato gbɛjianɔ ni shiɛlɔi atsu nii enyɔnyɔ yɛ sɔɔmɔ nitsumɔ lɛ mli. Yɛ anɔkwale mli lɛ, aŋmɛɔ gbɛ koni gbekɛbii ni aatsɔse amɛ kɛha shiɛmɔ nitsumɔ lɛ afata amɛfɔlɔi loo shiɛlɔi krokomɛi ni he esa lɛ ahe. Yɛ bei krokomɛi amli lɛ, shiɛlɔi ni he esa waa lɛ baanyɛ amɛtsu nii amɛkometoo. No hewɔ lɛ, kɛhooo kwraa lɛ, ebaawa akɛ shiɛlɔi fe enyɔ baaya shinaa ko naa loo amɛfee Biblia mli nikasemɔ. Ni wɔɔnyiɛ nɔkwɛmɔnɔ ni Yesu fee efɔ shi nɛɛ sɛɛ lɛ baaha ‘wɔgbe wɔsɔɔmɔ lɛ naa kwraa.’—2 Tim. 4:5.