Wolo Ni Jɛ Nɔyeli Kuu Lɛ Dɛŋ
Suɔmɔ Nyɛmimɛi Yehowa Odasefoi:
Bɔfo Paulo kɛ hegbɛi fɛɛ ni ená lɛ tsu nii kɛjie suɔmɔ kɛ hiɛsɔɔ ni eyɔɔ lɛ kpo etsɔɔ enyɛmimɛi heyelilɔi lɛ. Eŋma Kristofoi ni yɔɔ Roma lɛ akɛ: “Miitsɔ Yesu Kristo nɔ miida mi-Nyɔŋmɔ lɛ shi yɛ nyɛ fɛɛ nyɛhewɔ, akɛ agbaa nyɛhemɔkɛyeli lɛ he sane yɛ je lɛŋ fɛɛ.” (Rom. 1:8) Hɛɛ, ale klɛŋklɛŋ afii 100 lɛ mli Kristofoi ni hi shi yɛ Roma Maŋtsɛyelihei lɛ mli fɛɛ lɛ akɛ amɛyɛ hemɔkɛyeli ni mli wa, ni amɛkɛ ekãa tsuɔ shiɛmɔ nitsumɔ lɛ hu. (1 Tes. 1:8) Belɛ ebɛ naakpɛɛ mɔ akɛ Paulo ná suɔmɔ ni mli wa eha enyɛmimɛi lɛ!
Taakɛ Paulo fee lɛ, be fɛɛ be ni wɔbaasusu nyɛhe lɛ, wɔdaa Yehowa shi. Wɔsumɔɔ nyɛ fɛɛ naakpa! Nyɛbaanyɛ nyɛná hekɛnɔfɔɔ akɛ, ákɛ aŋkroaŋkroi lɛ, Yehowa hu sumɔɔ nyɛ. Nyɛteŋ mɛi komɛi kɛ shitee kɛwoo ni naa wawai miikpe, shi kɛlɛ nyɛka he nyɛmiishiɛ lolo. Kwɛ bɔni ekãa ni nyɛyɔɔ kɛ gbeyei ni nyɛsheee lɛ baaha Yehowa tsui anyã aha!—Abɛi 27:11.
Beni nyɛkaneɔ ni nyɛjwɛŋɔ “Yehowa Odasefoi Anitsumɔi yɛ Wɔŋmɛnɛŋmɛnɛ Beaŋ” ni yɔɔ Yearbook ni mli saji ŋɔɔ ni woɔ mɔ hemɔkɛyeli mli hewalɛ lɛ mli lɛ anɔ lɛ, nyɛbaana odaseyeli babaoo ni tsɔɔ akɛ Nuŋtsɔ Yesu Kristo eje kpo ni “eeye kunim, koni esaa eye kunim,” ni ákɛ, tawuu nii ní asɔ̃ɔ ashiɔ Kristo sɛɛnyiɛlɔi lɛ eko eko yeŋ omanye.—Kpoj. 6:2; Yes. 54:17.
Paulo ŋma eyaha Kristofoi ni yɔɔ Filipi lɛ akɛ: ‘Midaa mi-Nyɔŋmɔ lɛ shi yɛ wá ni nyɛ wa yɛ Sanekpakpa lɛ gbɛfaŋ lɛ hewɔ.’ (Fil. 1:3-5) Wɔ, ni ji Nɔyeli Kuu lɛ mlibii lɛ nuɔ he nakai nɔŋŋ wɔhaa nyɛ. Yɛ afi 2007 sɔɔmɔ afi lɛ mli lɛ, shiɛlɔi ni naa shɛɔ 6,691,790 kɛ ŋmɛlɛtswai 1,431,761,554 tsu shiɛmɔ nitsumɔ lɛ yɛ shikpɔji 236 nɔ yɛ je lɛŋ fɛɛ. Mɛɛ mɔdɛŋbɔɔ ni sa kadimɔ waa po nyɛkɛyeɔ nyɛbuaa kɛha sanekpakpa lɛ hiɛyaa nɛkɛ! Susumɔ bɔ ni ekome ni wɔ fɛɛ wɔfeɔ kɛshiɛɔ sanekpakpa lɛ náa mɛi akpei ohai abɔ anɔ hewalɛ, ni ekɛ yijiemɔ hu haa Yehowa lɛ he okwɛ!
Paulo tsɔɔ akɛ eyɛ henumɔ kple kɛha enyɛmimɛi lɛ yɛ be kroko hu mli. Eŋma eyaha Tesalonikabii lɛ akɛ: ‘Wɔkaiɔ wɔ-Nuŋtsɔ Yesu Kristo he hiɛnɔkamɔ mli tsuishitoo ni nyɛyɔɔ yɛ wɔ-Nyɔŋmɔ kɛ wɔ-Tsɛ lɛ hiɛ’ lɛ. (1 Tes. 1:2, 3) Hɛɛ, naagbai babaoo yɛ shihilɛ mli. Naagbai baa, shi ehe miihia ni wɔto wɔtsui shi. Mɛɛ naagbai okɛkpeɔ? Ani hela ko ni yeɔ bo ni haaa onyɛ otsu babaoo yɛ Yehowa sɔɔmɔ mli taakɛ otsuɔ be ko ni eho lɛ eha onijiaŋ eje wui? Ani ohefatalɔ ni osumɔɔ lɛ waa ni okɛ lɛ ehi shi afii babaoo nɛ lɛ egbee henyɛlɔ ko ni etɔɔɔ, ni ji Gbohiiaje lɛ dɛŋ? (Abɛi 30:15, 16) Ani ootao gbalashihilɛ mli hefatalɔ ni sumɔɔ Yehowa taakɛ bo hu osumɔɔ Yehowa lɛ shi onako eko, ni nakai beaŋ nɔŋŋ lɛ okɛ anɔkwayeli miibo Ŋmalɛ mli ŋaawoo ni tsɔɔ akɛ abote gbalashihilɛ mli yɛ Nuŋtsɔ lɛ mli lɛ toi? (1 Kor. 7:39) Ani oobɔ mɔdɛŋ waa koni okwɛ obii lɛ yɛ bɔ ni shihilɛ lɛ mli wa waa ha lɛ fɛɛ sɛɛ? Bɔ fɛɛ bɔ ni oshihilɛ ji ha lɛ, kɛ́ okɛ Maŋtsɛyeli lɛ he nibii ye klɛŋklɛŋ gbɛhe yɛ oshihilɛ mli lɛ, obaanyɛ oná hekɛnɔfɔɔ akɛ Yehowa hiɛ ‘kpaŋ onitsumɔ kɛ suɔmɔ deŋme ni ogbo yɛ egbɛi lɛ hewɔ lɛ nɔ.’ Nyɛmimɛi hii kɛ yei, nyɛfainɛ, ‘nyɛkahaa ekpakpafeemɔ miitɔa nyɛ’!—Heb. 6:10; Gal. 6:9.
Mɛni baaye abua bo koni onyɛ oto otsui shi? Taakɛ eji yɛ Tesalonikabii lɛ agbɛfaŋ lɛ, “wɔ-Nuntsɔ Yesu Kristo he hiɛnɔkamɔ” lɛ ji nɔ ni baaha onyɛ oto otsui shi. Yiŋtoo kpakpa ko hewɔ lɛ, sɛɛ mli lɛ Paulo kɛ “yiwalaheremɔ nɔhiɛkamɔ” lɛ to dadefai ni baanyɛ abu Kristofonyo he kɛjɛ susumɔi ni ejaaa ni haa mɔ yiŋ feɔ lɛ enyɔnyɔɔnyɔ ni aaana lɛ he.—1 Tes. 5:8.
Yɛ anɔkwale mli lɛ, kɛ́ okɛ miishɛɛ to otsui shi lɛ, ohaa mpoa ni Satan tswa ni kɔɔ jeŋ muu fɛɛ Maŋtsɛ ni Yehowa ji lɛ he lɛ hetoo. Satan tsɔɔ akɛ, Nyɔŋmɔ tsuji fóɔ amɛ pɛ amɛnɔ mli, ni eyɛ mli akɛ amɛbaasumɔ ni amɛjá Nyɔŋmɔ kɛyashi be ko moŋ, shi kɛji akɛ amɛkɛ kaa ni mli wawai kpe, loo nibii agbɛjianɔtoo nɛɛ sɛɛ tsɛ fe bɔ ni amɛkpaa gbɛ lɛ, amɛkɛ ekãa jaŋ Nyɔŋmɔ dɔŋŋ. Oyɛ hegbɛ ni nɔ bɛ ní okɛaaha ana Abonsam akɛ amalelɔi fɛɛ atsɛ! Beni je naa ni je tserɛɔ nɛɛ, belɛ oobɛŋkɛ jɔɔmɔi ni ohiɛ ka nɔ akɛ onine baashɛ nɔ lɛ ahe.
Taakɛ bɔ ni Paulo kɛ hegbɛi ni ená lɛ tsu nii kɛjie enyɛmimɛi lɛ ayi yɛ amɛhemɔkɛyeli ni mli wa, mlihilɛ mli ni amɛjɛɔ amɛyeɔ amɛbuaa kɛtsuɔ shiɛmɔ nitsumɔ lɛ, kɛ amɛtsuishitoo lɛ hewɔ lɛ, wɔ hu wɔyɛ he miishɛɛ akɛ wɔɔŋɔ hegbɛ nɛɛ ni wɔkɛjie nyɛyi, agbɛnɛ hu ni wɔkɛma suɔmɔ ni wɔyɔɔ kɛha nyɛ lɛ nɔ mi. Nyɛyaa nɔ yɛ nitsumɔi kpakpai ni nyɛtsuɔ lɛ amli!
Eba akɛ Nyɔŋmɔ aajɔɔ nyɛ babaoo yɛ afi ni baaba lɛ mli. Wɔmiibi jɔɔmɔi wɔmiiha nyɛ.
Nyɛnyɛmimɛi,
Yehowa Odasefoi a-Nɔyeli Kuu