Sane Hee ni Wɔkɛbaaje Biblia Mli Nikasemɔ Shishi

1. Mɛɛ sane hee baaje kpo yɛ Blɔfo Buu-Mɔɔ ni ji maŋbii anɔ lɛ mli, ni mɛni ato he gbɛjianɔ ni akɛfee?

¹ Kɛjɛ wɔsɛɛ nyɔɔŋ lɛ nɔ kɛyaa lɛ, sane hee ko baaje kpo daa yɛ Blɔfo Buu-Mɔɔ ni ji maŋbii anɔ lɛ mli ni baaye ebua wɔ kɛje Biblia mli nikasemɔ shishi. Sane nɛɛ yitso ji “Learn From God’s Word” (Kasemɔ Nii Kɛjɛ Nyɔŋmɔ Wiemɔ lɛ Mli). Ŋwanejee ko bɛ he akɛ mɛi ni yɔɔ shikpɔŋkuku lɛ mli lɛ ateŋ mɛi komɛi baanya saji nɛɛ ateŋ eko fɛɛ eko ni baaba lɛ kanemɔ he moŋ, shi aje gbɛ ato saji nɛɛ ahe gbɛjianɔ koni akɛ shiatsɛmɛi lɛ akase.

2. Mɛni ji sane nɛɛ mli nibii komɛi?

² Emli Nibii Komɛi: Sane hee nɛɛ saneyitso lɛ kɛ esaneyitsei bibii lɛ ji sanebimɔi ni esa akɛ abi shiatsɛ lɛ beni akɛ lɛ susuɔ sane lɛ he lɛ. Atsɛ ŋmalɛi otii ayisɛɛ, shi aŋmalako amɛmli wiemɔi lɛ, bɔni afee ni shiatsɛ lɛ akane ŋmalɛi nɛɛ kɛjɛ Nyɔŋmɔ Wiemɔ lɛ mli tɛ̃ɛ. Kukuji lɛ asɛɛ kɛlɛɛɛ, no hewɔ lɛ, abaanyɛ asusu amɛhe yɛ shinaa lɛ naa nɔŋŋ. Sane fɛɛ sane ni baaje kpo lɛ baagbala jwɛŋmɔ kɛya Biblia lɛ Tsɔɔ wolo lɛ nɔ koni eye ebua bo ni otsake nikasemɔ lɛ kɛya no mli yɛ be ni sa mli.

3. Kɛ wɔmiishiɛ yɛ shĩa kɛ shĩa lɛ, te wɔɔfee tɛŋŋ wɔkɛ sane hee nɛɛ aje Biblia mli nikasemɔ shishi yɛ shinaa naa?

³ Bɔ ni Ooofee Okɛtsu Nii: Kɛ́ okɛ woji tɛtrɛbii lɛ miiha lɛ, obaanyɛ odamɔ saneyitso lɛ nɔ obi sane ko ni teɔ mɔ miishɛɛ shi. Ákɛ nɔkwɛmɔnɔ lɛ, January 1 nɔ lɛ wieɔ sɛɛnamɔ ni yɔɔ Biblia lɛ he lɛ he. Obaanyɛ obi akɛ: “Ani onaa Biblia lɛ akɛ eji Nyɔŋmɔ Wiemɔ aloo wolo kpakpa ko kɛkɛ? [Ŋmɛɛ lɛ gbɛ ni eha hetoo.] Ha mikɛ nɔ ko ni obaanya he atsɔɔ bo yɛ sane nɛɛ he.” Okɛ klɛŋklɛŋ sanebimɔ lɛ atsɔɔ lɛ, kanemɔ klɛŋklɛŋ kuku lɛ, ni okane ŋmalɛ ni atsɛ yisɛɛ lɛ otsɔɔ lɛ. Bi sane lɛ ekoŋŋ, ni oha shiatsɛ lɛ aha hetoo. Okɛ sanebimɔi ni ato naa lɛ atsu nii ni okɛ lɛ asusu kukuji lɛ ahe bɔ ni sa. Dani obaashi lɛ, gbalamɔ ejwɛŋmɔ kɛya sanebimɔ ni nyiɛ sɛɛ lɛ nɔ, ni okɛ lɛ ato gbɛjianɔ koni oku osɛɛ oya ni nyɛyasusu sane lɛ he. Kuu osɛɛ oya daa otsi ni okɛ lɛ ayatsa sane lɛ nɔ kɛyashi wolo tɛtrɛɛ ni nyiɛ sɛɛ lɛ baaba ni obaaha lɛ eko. Gbɛ kroko hu ji ni obi shiatsɛ lɛ tɛ̃ɛ kɛji ebaasumɔ ni ekase Biblia lɛ. No sɛɛ lɛ, okɛ sane lɛ ni yɔɔ wolo tɛtrɛɛ lɛ mli lɛ atsɔɔ lɛ bɔ ni wɔkɛ mɛi kaseɔ Biblia lɛ wɔhaa.

4. Mɛɛ gbɛ nɔ wɔbaanyɛ wɔkɛ sane hee nɛɛ atsu nii kɛ́ wɔmiifee sɛɛkuu-kɛsaramɔ?

⁴ Obaanyɛ okɛ mɛi ni ohaa amɛ woji tɛtrɛbii lɛ eko daa kɛ mɛi krokomɛi ni oyasaraa amɛ lɛ hu asusu sane hee nɛɛ he. Obaanyɛ okɛɛ akɛ: “Sane hee ko eje kpo yɛ Buu-Mɔɔ lɛ mli. Ha matsɔɔ bo bɔ ni akɛtsuɔ nii ahaa.” Wɔshwelɛ ji akɛ sane hee nɛɛ baaye ebua mɛi babaoo ni “amɛshɛ anɔkwale lɛ lee” he.—1 Tim. 2:4.