Nuŋtsɔ lɛ Gbɛkɛnaashi Niyenii​—Gbi Jurɔ ko ni Woɔ Nyɔŋmɔ Hiɛ Nyam

AFÃ Kristofoi akɛ amɛye Kristo gbele lɛ Kaimɔ lɛ he gbi jurɔ. Atsɛɔ gbijurɔyeli nɛɛ hu akɛ ‘Nuŋtsɔ lɛ Gbɛkɛnaashi Niyenii lɛ.’ (1 Korintobii 11:20) Mɛni ji nɔ ni sa kadimɔ waa yɛ nifeemɔ nɛɛ he? Mɛɛ be esa akɛ afee, ni yɛ mɛɛ gbɛ nɔ?

Yesu Kristo to gbijurɔyeli nɛɛ shishi yɛ gbi gbɛkɛ ni ayeɔ Yudafoi a-Hehoo lɛ yɛ afi 33 Ŋ.B. Ayeɔ Hehoo lɛ shikome daa afi yɛ Yudafoi lɛ anyɔŋ ni ji Nisan gbi 14 lɛ nɔ. Eka shi faŋŋ akɛ bɔni afee ni Yudafoi lɛ anyɛ amɛbu gbi lɛ he akɔntaa lɛ, amɛmɛɔ be ni nyɔɔŋ be kɛ hulu la be fɛɛ hiɛ be sɛɛkɛlɛ kome too lɛ nɔŋŋ yɛ agbiɛnaa be mli. Gbi nɛɛ ji be ni anáa hulu la ŋmɛlɛtswai 12 kɛ jenamɔ ŋmɛlɛtswai hu 12. Klɛŋklɛŋ nyɔɔŋ hee ni anaa akɛ ejeɔ yɛ gbi nɛɛ sɛɛ nɔŋŋ lɛ ji nɔ ni jeɔ Nisan shishi. Hehoo lɛ baa yɛ no sɛɛ gbii 14, beni hulu enyɔ shi.

Beni Yesu kɛ ebɔfoi lɛ ye Hehoo lɛ sɛɛ lɛ, eshwie Yuda Iskariot, ni no sɛɛ ni eto Nuŋtsɔ lɛ Gbɛkɛnaashi Niyenii lɛ yeli shishi. Akɛni niyenii nɛɛ baye Yudafoi lɛ a-Hehoo lɛ najiaŋ hewɔ lɛ, esa akɛ aye lɛ shikome daa afi.

Mateo Sanekpakpa lɛ bɔ amaniɛ akɛ: “Yesu kɔ aboloo, ni ejɔɔ nɔ ni ekumɔ mli, ni eŋɔha ekaselɔi lɛ, ni ekɛɛ: Nyɛhea, nyɛyea! Enɛ ji migbɔmɔtso lɛ. Ni ewó kpulu lɛ, ni eda shi, ni eŋɔha amɛ ni ekɛɛ: Nyɛ fɛɛ nyɛnua eko! ejaakɛ enɛ ji milá ni ji kpaŋmɔ hee lɛ nɔ̃ lɛ, ní afɔse ashwie shi yɛ mɛi pii ahewɔ ha eshaifaa lɛ.”​—Mateo 26:26-28.

Mɛi komɛi heɔ amɛyeɔ akɛ Yesu ha aboloo lɛ tsake ni etsɔ egbɔmɔtso diɛŋtsɛ ni eha wein lɛ hu tsɔ elá. Shi kɛlɛ, Yesu gbɔmɔtso lɛ yɛ bɔ ni eyɔɔ lɛ nɔŋŋ beni ekɛ aboloo nɛɛ ha lɛ. Ani Yesu bɔfoi lɛ miiye eheloo ni amɛmiinu elá lɛ diɛŋtsɛ? Dabi, ejaakɛ kulɛ no baafee gbɔmɔ lòo yeli, ni enɛ ji Nyɔŋmɔ mla lɛ mlikuu. (1 Mose 9:3, 4; 3 Mose 17:10) Taakɛ Luka 22:20 lɛ tsɔɔ mli lɛ, Yesu kɛɛ akɛ: “Nɛkɛ kpulu nɛɛ ji kpaŋmɔ hee lɛ yɛ mila ni aŋɔshwie shi aha nyɛ lɛ mli.” Ani nakai kpulu lɛ diɛŋtsɛ batsɔ “kpaŋmɔ hee lɛ”? Akɛni kpaŋmɔ ji gbeekpãmɔ, shi jeee nɔ ko ni anyɛɔ ataa he hewɔ lɛ, enyɛŋ eba lɛ nakai.

No hewɔ lɛ, aboloo lɛ kɛ wein lɛ fɛɛ ji okadi nibii. Aboloo lɛ feɔ Kristo gbɔmɔtso ni eye emuu lɛ he okadi. Yesu kɛ aboloo ni shwɛ yɛ Hehoo lɛ yeli shishi lɛ tsu nii. Ashã aboloo lɛ ni masha loo nɔ ni haa nii fũɔ lɛ bɛ mli. (2 Mose 12:8) Bei pii lɛ, Biblia lɛ kɛ masha tsuɔ nii akɛ esha loo fitemɔ he okadi. No hewɔ lɛ aboloo lɛ damɔ shi kɛha gbɔmɔtso ni yeɔ emuu ni Yesu kɛshã afɔle lɛ. Esha ko bɛ he.​—Mateo 16:11, 12; 1 Korintobii 5:6, 7; 1 Petro 2:22; 1 Yohane 2:1, 2.

Wein tsuru lɛ damɔ shi kɛha Yesu lá lɛ. Nakai lá lɛ haa kpaŋmɔ hee lɛ tsuɔ nii. Yesu kɛɛ akɛ, afɔse elá lɛ ashwie shi “kɛha eshaifaa.” No hewɔ lɛ adesai ahe baanyɛ atse yɛ Nyɔŋmɔ hiɛ, ní amɛkɛ lɛ afee kpaŋmɔ hee. (Hebribii 9:14; 10:16, 17) Kpaŋmɔ nɛɛ, loo gbeekpãmɔ nɛɛ gbeleɔ gbɛ kɛhaa Kristofoi anɔkwafoi 144,000 koni amɛya ŋwɛi. Amɛbaasɔmɔ yɛ jɛmɛ akɛ maŋtsɛmɛi kɛ osɔfoi, ni enɛ baafee jɔɔmɔ kɛha adesai aweku lɛ fɛɛ.​—1 Mose 22:18; Yeremia 31:31-33; 1 Petro 2:9; Kpojiemɔ 5:9, 10; 14:1-3.

Namɛi esa akɛ amɛye Kaimɔ lɛ okadi nibii lɛ eko? Shishinumɔ yɛ he akɛ mɛi ni yɔɔ kpaŋmɔ hee lɛ mli lɛ​—ni ji mɛi ni yɔɔ ŋwɛi hiɛnɔkamɔ lɛ​—ji mɛi ni esa akɛ amɛye aboloo lɛ ni amɛnu wein lɛ eko. Nyɔŋmɔ mumɔ krɔŋkrɔŋ lɛ tsɔɔ gbɔmɛi nɛɛ ayiŋ akɛ ahala amɛ koni amɛye maŋtsɛ yɛ ŋwɛi. (Romabii 8:16) Yesu kɛ amɛ efee Maŋtsɛyeli he kpaŋmɔ hu.​—Luka 22:29.

Ni mɛi ni yɔɔ hiɛnɔkamɔ akɛ amɛbaahi shi kɛya naanɔ yɛ Paradeiso yɛ shikpɔŋ nɔ lɛ hu? Amɛboɔ Yesu famɔ akɛ amɛba Nuŋtsɔ lɛ gbɛkɛnaashi Niyenii lɛ yeli lɛ shishi lɛ toi, shi amɛbaa jɛmɛ akɛ mɛi ni kɛ bulɛ kwɛɔ nɔ ni yaa nɔ lɛ, shi jeee mɛi ni baaye. Yehowa Odasefoi yeɔ Nuŋtsɔ lɛ Gbɛkɛnaashi Niyenii lɛ shikome daa afi beni hulu enyɔ shi sɛɛ, yɛ Nisan gbi 14 lɛ nɔ. Eyɛ mli akɛ mɛi akpei fioo komɛi pɛ kɛɔ akɛ amɛyɛ ŋwɛi hiɛnɔkamɔ moŋ, shi gbijurɔyeli nɛɛ ji nɔ ko ni he hiaa waa kɛha Kristofoi fɛɛ. Eji nifeemɔ be ko ni mɛi fɛɛ baanyɛ amɛkɛsusu suɔmɔ ni fe fɛɛ ni Yehowa Nyɔŋmɔ kɛ Yesu Kristo yɔɔ lɛ he.​—Yohane 3:16.