Ná Hesai Pii yɛ Shiɛmɔ Nitsumɔ lɛ Mli—Wɔhiɛkpamɔ Wiemɔi lɛ ní Wɔɔhã Emɔ Shi

Nɔ Hewɔ ni Ehe Hiaa: Kɛ́ wɔhiɛkpamɔ wiemɔi lɛ eteee shiatsɛmɛi lɛ amiishɛɛ shi lɛ, amɛbaafo wɔwiemɔ lɛ nɔ, ni wɔnyɛŋ wɔye amɛ odase. No hewɔ lɛ, shiɛlɔi babaoo naa amɛhiɛkpamɔ wiemɔi lɛ akɛ nɔ ni he hiaa fe fɛɛ yɛ amɛshiɛmɔ wiemɔ lɛ mli. Eyɛ mli ákɛ akɛ shiɛmɔ wiemɔi ewo Wɔ Maŋtsɛyeli Sɔɔmɔ lɛ kɛ Reasoning wolo lɛ mli moŋ, shi jeee fɛɛ ni yeɔ emuu, bɔ ni baahã wɔnyɛ wɔtsɔmɔ lɛ ni ekɔ shiatsɛmɛi lɛ ahe. Kɛ́ shiɛmɔ wiemɔ ko eye emuu po lɛ, shiɛlɔi baanyɛ atsake hiɛ loo amɛto amɛ diɛŋtsɛ amɛnɔ he gbɛjianɔ. No hewɔ lɛ, kɛ́ wɔto wɔhiɛkpamɔ wiemɔi lɛ ahe gbɛjianɔ jogbaŋŋ, ni wɔwieee nɔ fɛɛ nɔ kɛkɛ ni baaba wɔjwɛŋmɔŋ be ni wɔyanina shiatsɛ ko lɛ, ebaahã wɔshiɛmɔ lɛ amɔ shi.—Abɛi 15:28.

Bɔ ni Obaafee lɛ Ohã:

Halamɔ saneyitso ni osumɔɔ. Esa akɛ edamɔ wolo ni okɛhãa lɛ nɔ, ni esa akɛ efee nɔ ni mɛi ni yɔɔ oshikpɔŋkuku lɛ mli lɛ baanya he.
Saamɔ nɔ ni obaawie klɛŋklɛŋ kɛ nɔ ni obaawie kɛnyiɛ sɛɛ lɛ jogbaŋŋ, koni kɛ́ oŋa shiatsɛ lɛ nɔŋŋ lɛ, oje shishi. Obaanyɛ oje shishi akɛ: “Nɔ hewɔ ni miba biɛ ji akɛ . . . ,” “Mɛi babaoo miiye amɛtsui yɛ . . . ,” “Masumɔ male osusumɔ yɛ . . . ,” loo okɛɛ nɔ kroko. Bei pii lɛ, kɛ́ wɔwiemɔi lɛ yɛ kuku ni amɛshishinumɔ waaa lɛ, eyeɔ omanye. Shiɛlɔi komɛi kaseɔ amɛhiɛkpamɔ wiemɔi lɛ amɛwoɔ amɛyitsoŋ.
Saamɔ sanebimɔ ko ni baahã shiatsɛ lɛ asusu nii ahe ni okɛgbala lɛ owo sanegbaa lɛ mli. (Mat. 17:25) Hã ni ehi ojwɛŋmɔŋ akɛ ekolɛ eesusu nibii komɛi ahe dani oba eŋɔɔ lɛ, no hewɔ lɛ, esaaa akɛ ohãa sanebimɔ lɛ feɔ nɔ ni wa loo nɔ ni woɔ mɔ he gbeyei.

Kaa Enɛ Okwɛ yɛ Nyɔɔŋ nɛɛ Mli:

Kɛ́ nyɛmiifee weku jamɔ lɛ, nyɛkɛ be lɛ eko asaa hiɛkpamɔ wiemɔi kɛ bɔ ni nyɛaafee nyɛkɛtsu nii.
Kɛ́ okɛ nyɛmimɛi tee shiɛmɔ lɛ, gbaa amɛ hiɛkpamɔ wiemɔ ni okɛsaa ohe lɛ. (Abɛi 27:17) Kɛ́ ona akɛ ohiɛkpamɔ wiemɔ lɛ mɔɔɔ shi lɛ, tsakemɔ.