Yaa Ohiɛ Akɛ Shiɛlɔ
1. Mɛni mɛi komɛi fee yɛ klɛŋklɛŋ afii 100 lɛ mli ni tsɔɔ akɛ esa akɛ wɔya wɔhiɛ akɛ shiɛlɔi?
1 Esa akɛ Kristofoi aya amɛhiɛ akɛ shiɛlɔi. No hewɔ ni Yesu tsɔse esɛɛnyiɛlɔi lɛ koni amɛhe asa yɛ shiɛmɔ nitsumɔ lɛ mli lɛ. (Luka 9:1-5; 10:1-11) No hewɔ hu ni Akwila kɛ Priskila ŋɔ Apolo kɛba amɛŋɔɔ ni “amɛgbala Nyɔŋmɔ gbɛ lɛ mli jogbaŋŋ amɛtsɔɔ lɛ” lɛ. (Bɔf. 18:24-26) Nakai yiŋtoo lɛ nɔŋŋ hewɔ ni Paulo wo Timoteo ni yɔɔ niiashikpamɔ yɛ shiɛmɔ nitsumɔ lɛ mli lɛ hewalɛ ni eya nɔ ekɛ ejwɛŋmɔ ama enitsɔɔmɔ nɔ bɔ ni afee ni “mɛi fɛɛ ana” ehiɛyaa lɛ faŋŋ lɛ. (1 Tim. 4:13-15) Ekɔɔɔ he eko afii abɔ ni wɔkɛsɔmɔ Nuŋtsɔ lɛ akɛ sane kpakpa lɛ he shiɛlɔi lɛ, esa akɛ wɔya nɔ wɔhã hesai ni wɔkɛtsuɔ shiɛmɔ nitsumɔ lɛ aya hiɛ.
2. Te wɔɔfee tɛŋŋ wɔkase mɛi krokomɛi lɛ?
2 Kasemɔ Mɛi Krokomɛi: Gbɛ kome ni wɔbaanyɛ wɔtsɔ nɔ wɔya wɔhiɛ ji, ni wɔkase mɛi krokomɛi. (Abɛi 27:17) No hewɔ lɛ, kɛ́ shiɛlɔ ni fata ohe lɛ kɛ shiɛmɔ wiemɔ ko miitsu nii lɛ, bo toi jogbaŋŋ. Bi shiɛlɔi ni he esa lɛ ni amɛtsɔɔ bo gbɛ pɔtɛɛ ko ni obaanyɛ otsɔ nɔ oya ohiɛ, ni obo nɔ ni amɛbaakɛɛ bo lɛ toi jogbaŋŋ. (Abɛi 1:5) Ani sɛɛkuu kɛ saramɔ feemɔ, Biblia mli nikasemɔ, loo shiɛmɔ nitsumɔ lɛ fã ko he nitsumɔ wa kɛhã bo? Bi oshiɛmɔyaa kuu nɔkwɛlɔ lɛ loo shiɛlɔ ko ni he esa koni eye ebua bo. Kaimɔ hu akɛ, Yehowa mumɔ krɔŋkrɔŋ lɛ baanyɛ ahã wɔhe asa, no hewɔ lɛ sɔlemɔ obi yɛ be kɛ beaŋ.—Luka 11:13.
3. Kɛ́ mɔ ko tsɔɔ wɔ nɔ ko ni esa akɛ wɔfee koni wɔya wɔhiɛ, ni ekolɛ jeee wɔ wɔbi po lɛ, mɛni esa akɛ wɔfee?
3 Kɛ́ mɔ ko tsɔɔ bo nɔ ko ni esa akɛ ofee koni oya ohiɛ, ní jeee bo obi lɛ po lɛ, omli akafu. (Jaj. 7:9) Taakɛ Apolo fee lɛ, jɛɛ heshibaa kɛ miishɛɛ mli okpɛlɛ yelikɛbuamɔ lɛ nɔ. Kɛ́ ofee nakai lɛ, etsɔɔ akɛ ole nii.—Abɛi 12:15.
4. Mɛɛ yiŋtoo ni sa kadimɔ waa Yesu tsɔɔ akɛ no ji nɔ hewɔ ni esa akɛ wɔya wɔhiɛ akɛ shiɛlɔi lɛ?
4 Hiɛyaa Woɔ Nyɔŋmɔ Hiɛ Nyam: Yesu kɛ nɔkwɛmɔnɔ ko tsu nii kɛwo esɛɛnyiɛlɔi lɛ hewalɛ ni amɛya amɛhiɛ akɛ shiɛlɔi. Ekɛ ehe to weintso he, ni ekɛ esɛɛnyiɛlɔi ni afɔ amɛ mu lɛ to tso niji ahe. Ekɛɛ e-Tsɛ lɛ folɔɔ nine fɛɛ nine ni woɔ yibii lɛ he “koni ewo yibii fe tsutsu lɛ.” (Yoh. 15:2) Taakɛ bɔ ni weintromtsɛ ko baasumɔ ni eweintso niji lɛ awo yibii babaoo lɛ, Yehowa hu miisumɔ ni wɔya hiɛ yɛ “wɔnaabui lɛ ayibii” ni wɔwoɔ lɛ mli. (Heb. 13:15) Kɛ́ wɔtee wɔhiɛ akɛ shiɛlɔi lɛ, mɛɛ sɛɛnamɔ ni yɔɔ miishɛɛ wɔnáa? Yesu hã hetoo akɛ: “Enɛ ji nɔ ni woɔ mi-Tsɛ hiɛ nyam, akɛ nyɛya nɔ nyɛwo yibii babaoo.”—Yoh. 15:8.